Temwannyaz par Telefonn i en Mwayen pour ‘anons sa bon Nouvel’
1. Ki lavantaz temwannyaz par telefonn i donnen?
1 Fodre ki nou fer byen atansyon e servi byen nou lespri si nou anvi pres sa mesaz Rwayonm avek plis dimoun posib. (Akt 10:42) Nou bezwen analiz nou teritwar pour nou kapab pres avek efikasite dan en fason ki pou tous leker bann dimoun ki difisil pour zwenn e pour fer nou letan konte. Alors, akoz nou pa sey rann temwannyaz par telefonn?
2. Dan ki sirkonstans temwannyaz par telefonn i kapab pli apropriye?
2 Temwannyaz par telefonn i kapab en bon mwayen pour tous leker bann dimoun ki reste dan bann apartman ki ekipe avek sekirite, serten landrwa kot i pa posib pour pres port an port, oubyen dan bann landrwa ki difisil pour ganny akse. I permet nou kontakte bann dimoun ki reste dan bann landrwa lwen ki pli difisil pour vizite. I osi fer travay bann group ek bann kongregasyon ki koz en lot langaz pli fasil.
3. Ki nou kapab fer pour nou kalifye dan sa kalite fason prese?
3 Petet nou santi ki nou napa ase lardyes oubyen nou pa alez. Zapot Pol ti ‘annan kouraz pour anons sa bon nouvel.’ (1 Tesa. 2:2) Akoz ou pa demann Zeova pour fer pour ou sa ki i ti fer pour zapot Pol? Demann li pour ed ou dan sa domenn. Fer osi bann laranzman. Par egzanp, eski ou’n deza demann en dimoun kalifye pour ed ou donn temwannyaz dan sa fason? Obzerv sa dimoun e aprann konman pour fer. Apre ‘pran kouraz’ e sey fer li.—Vwar Ziz 7:17.
4. Donn legzanp bann proklanmater ki ti ganny bon rezilta ler zot in donn temwannyaz par telefonn.
4 Bann proklanmater ki ti pres dan en landrwa rezidansyel e ki pa ti trouv bokou dimoun in dir ki zot ti pou ganny pli bon rezilta si zot ti pran nimero tou sa bann dimoun dan liv e telefonn zot sa zour menm. En madanm ti demann en proklanmater ki ti’n telefonn li pour pas kot li e montre li konman pour fer en letid Labib ki i ti’n ofer li. En ser ki pa ti tro konnen ki pour fer, ti envit bann dimoun ki i ti koz avek pour asiste renyon lannmen. En madanm ti vini e i ti aksepte en letid Labib. En lot ser ki tre timid ti dir ki bann dimoun i pli zantiy lo telefonn ki ler ou devan zot laport.
5. Ki nou determinen pour fer?
5 Personnelman, eski nou fer nou mou dan lanmen Zeova, sa Gran Potye? Menm si avan zot ti en pe ezite, bann ki’n ganny formen dan lanmen Zeova in ganny bokou benediksyon. Devlop sa dezir pour adapte, pour ki nou kapab anons sa bon nouvel avek otan dimoun posib dan nou teritwar.—Akt 20:21, 24.