Zot Fidelite i en Legzanp
1 Pionye spesyal ti en nouvo form servis aplentan ki ti konmanse an 1937. Bann frer ek ser kalib ki ti annan leksperyans dan minister Kretyen, ti volonterman aksepte pour al servi nenport ki bor lorganizasyon ti anvoy zot. Ozordi i fer preski plizyer dizenn lannen depi ki sa form servis ti konmanse, e bann pionye spesyal i ankor fidel. Sa i en bon legzanp ki vo lapenn imite.—Ebr. 6:12.
2 Zot ti donn Legzanp: Depi okonmansman, bann pionye spesyal ti diriz travay predikasyon par anmenn granmofonn avek zot pour fer bann dimoun kot lakour ekout zot mesaz. Zot ti osi servi bann lanrezistreman lo zot retourn vizit pour diskit Labib. Sa ti ganny fer dan bann gran lavil kot bann kongregasyon ti’n deza ganny formen. Plitar, bann pionye spesyal ti ganny anvoye dan bann landrwa ki ti annan plis bezwen pour proklanmater. Zot ti kontinyen vizit bann dimoun ki ti enterese e kondwir bann letid Labib. Gras a zot gro zefor, plizyer santenn kongregasyon ti ganny formen. Zot devouman dan sa travay in kontribye pour lorganizasyon agrandir en kantite, parey nou vwar ozordi. (Iza. 60:22) Bann pionye spesyal i ankor pe zwe en rol enportan pour propaz sa bon nouvel “avek tou dimoun dan lemonn antye.”—Kol. 1:23.
3 I vo Lapenn imit zot: Serten pionye spesyal in dan servis aplentan pour plizyer dizenn lannen. Pandan sa bann lannen, sa bann frer ek ser fidel in pas atraver diferan sitiasyon ki’n rafin zot lafwa. (1 Pyer 1:6, 7) Zot in pare pour kit deryer tou zot keksoz pour al servi dan bann landrwa kot i annan gran bezwen. Ozordi serten parmi zot i vye, zot lasante pa bon, oubyen zot pe fer fas avek lezot problenm. (2 Kor. 4:16, 17) Me kantmenm sa, zot “kontinyen prospere kan zot seve in vin blan.” (Ps. 92:14) Zot met zot konfyans dan Zeova, e an retour zot ganny son benediksyon.—Ps. 34:8; Prov. 10:22.
4 Sirman bann pionye spesyal i merit ganny felisite. Si dan ou kongregasyon i annan bann pionye spesyal, profit sa loportinite pour pas letan avek zot e aprann avek zot. Lefe ki zot bann proklanmater fidel, montre lapresyasyon pour sa ki zot pe fer. Les zot fidelite vin en lankourazman pour ou. Si nou imit zot lafwa nou osi nou pou ganny faver ek benediksyon Zeova, akoz “i kontan bann ki fidel.”—Prov. 12:22.