Kwen kestyon

◼ Ki mannyer nou kapab ed bann pionye dan en fason pratik?

Pandan lannen servis 2009, preski 800,000 frer ek ser dan lemonn antye in fer pionye ordiner ek pionye spesyal. Sa bann serviter a plen tan i sakrifye zot letan, lenerzi, ek resours pour zot kapab partaz sa bon nouvel lo Rwayonm. (Prov. 3:9) Zeova i byen apresye zot zefor! Ki mannyer nou kapab annan menm pwennvi ki Zeova e ed zot annan lazwa e devlop landirans dan sa kalite servis?

Sirman si nou byen swazir nou parol sa pou ankouraz zot pour kontinyen servi konman pionye. (Prov. 25:11) Eski nou kapab aranz nou progranm lasemenn pour nou kapab travay avek zot dan predikasyon? Kan nou pe travay ansanm avek bann pionye, nou kapab servi nou prop transpor dan plas servi sa ki pour zot. Si nou servi zot transpor petet nou kapab ofer pour kouver fre bennzin. (1 Kor. 13:5; Fili. 2:4) Avek lanmour, nou osi kapab donn sipor bann pionye par demontre lospitalite e envit zot kot nou pour pran en repa detanzaot.—1 Pyer 4:8, 9.

Labib i donn lasirans ki Zeova pou pran swen avek bann ki met son Rwayonm premye. (Ps. 37:25; Mat. 6:33) En fason ki i fer sa, i atraver lasosyasyon nou bann frer ek ser Kretyen ki annan lanmour pour kanmarad. (1 Zan 3:16-18) Byensir, bann pionye pa ekspekte lezot pran swen avek zot finansyerman. Petet zot pa pou dir lezot direkteman ler zot dan bezwen. Me par kont, nou kapab ed sa bann pionye fidel “ki dan bezwen” dan en fason pratik par obzerv e vey bann loportinite.—2 Kor. 8:14, 15.

Kan Febe, en evanzelizater byen devoue dan kongregasyon Sankre dan premye syek, ti al Ronm, Pol ti ankouraz bann frer Ronm pour “resevwar li byen, konman fodre resevwar en sen. Ed li dan tou fason ki i a bezwen zot led.” (Rom. 16:1, 2) Nou annan sa loportinite pour donn sipor avek lanmour dan sa menm fason anver bann dan nou kongregasyon ki pe kontinyen anons sa bon nouvel konman bann pionye ordiner oubyen spesyal.—Akt 5:42.