Fason rezonnen

NOU rekonesan pour bann sanzman ki Parol Bondye in fer dan nou lavi, e nou anvi lezot benefisye osi. Deplis, nou realize ki lafason ki dimoun i reazir anver sa bon nouvel i annan en lefe lo zot lavenir. (Mat. 7:13, 14; Zan 12:48) Nou senserman anvi ki zot aksepte laverite. Toutfwa, pour kapab akonpli pli gran byenfe, nou bezwen azout disernman avek nou konviksyon ferm ek nou zel.

Ordinerman en dimoun pa pou byen aksepte en deklarasyon ki fran e direk ki demanti son krwayans menm si sa deklarasyon i kontyen plizyer verse pour siporte. Par egzanp, si ou zis kondann bann selebrasyon popiler akoz i sorti dan lorizin payen, sa i kapab pa sanz pwenn-vi sa dimoun lo bann selebrasyon. Ou pou pli reisi si ou rezonn avek dimoun. Kwa ki enplike dan rezonnen?

Labib i dir nou ki “lasazes ki sorti dan lesyel i . . . kontan lape, [rezonnab, NW].” (Zak 3:17) Sa mo Grek ki ganny tradwir ‘rezonnab’ i literalman vedir “sede.” Dan Nouvo Testaman an Kreol Seselwa i ganny tradwir “montre zot zanmi,” “montre zot bon,” oubyen “modere.” Remarke ki rezonnab i ganny asosye avek lape. Dan Tit 3:2, i ganny mansyonnen ansanm avek polites e i ganny opoze avek kerel. Filipyen 4:5 i enplor nou pour les dimoun konnen ki nou “rezonnab.” En dimoun ki rezonnab i pran an konsiderasyon lorizin, sirkonstans, ek santiman sa enn ki i pe koz avek. I pare pour les tonbe ler i apropriye pour fer sa. Sa fason abord dimoun pou fer zot kit zot lespri ek leker ouver, ki ler nou rezonn avek zot apartir Lekritir zot pou pli pare pour aksepte.

Kote pour konmanse. Istoryen Lik i rikorde ki ler zapot Pol ti an Tesalonik, i ti servi Lekritir, “i ti eksplik zot e montre ki dapre Lekritir Mesi ti bezwen soufer e resisite apre son lanmor.” (Akt 17:2, 3) I vo lapenn note ki Pol ti fer sa dan en sinagog Zwif. Sa bann ki i ti pe koz avek ti rekonnet Lekritir Ebre konman en lotorite. I ti apropriye pour konmans avek en keksoz ki zot ti aksepte.

Ler Pol ti pe koz avek bann Grek dan Lareopaz an Atenn, i pa ti konmans par fer referans lo Lekritir. Plito, i ti konmans avek bann keksoz ki zot ti konnen e aksepte, e i ti servi sa bann keksoz pour ki zot pran an konsiderasyon Kreater ek Son plan.—Akt 17:22-31.

Dan letan modern, i annan en kantite dimoun ki pa rekonnet Labib konman en lotorite dan zot lavi. Me preski tou dimoun i ganny afekte par bann sitiasyon difisil dan sa sistenm. Zot anvi en keksoz pli meyer. Si premyerman ou koz lo keksoz ki pe trouble zot e apre montre zot ki Labib i dir lo la, en tel lapros rezonnab i kapab ankouraz zot ekout sa ki Labib i dir konsernan plan Bondye pour limanite.

I kapab ki leritaz ki en etidyan Labib in resevwar avek son paran ti enkli serten krwayans ek koutim relizye. Aprezan, sa etidyan i aprann ki sa bann krwayans ek koutim pa fer plezir Bondye, e i rezet zot an faver sa ki Labib i ansennyen. Ki mannyer sa etidyan i kapab eksplik sa desizyon avek son paran? Zot kapab santi ki par rezet leritaz relizye ki zot in donn li, i pe rezet zot. Sa etidyan Labib i kapab deside, ki avan i esey eksplik zot rezon pour son desizyon dapre Labib, i pou bezwen reasir son paran ki i annan lanmour ek respe pour zot.

Kan pour sede. Menm Zeova, kantmenm i annan tou lotorite pour komande, i pare pour vwar sitiasyon avek konsiderasyon. Ler Zeova ti pe sov Lot ek son fanmiy an Sodonm, lanz Zeova ti ensiste: “Sov dan rezyon montanny, pour ki ou pa ganny detri!” Me, Lot ti sipliye: “Pa sa, silvouple, Zeova!” I ti sipliye pour permet li al Zoar. Zeova ti montre konsiderasyon pour Lot par permet li fer sa ki i ti demande; alor ki ler lezot lavil ti ganny detri, Zoar ti ganny eparnyen. Sepandan, plitar Lot ti swiv gidans ki Zeova ti’n donnen okonmansman e i ti al dan bann rezyon montanny. (Zen. 19:17-30) Zeova ti konnen ki son fason ti bon, me avek pasyans i ti montre konsiderasyon ziska ki Lot ti apresye pour li menm fason Zeova.

Pour kapab azir avek sikse avek lezot, nou bezwen montre nou rezonnab. Nou kapab konvenki ki sa lot dimoun i mal, e nou kapab annan bann pwen for antet ki pou prouv sa. Me parler i pli meyer pour pa met presyon lo sa dimoun pour li admet ki i mal. Montre nou rezonnab i pa vedir fer konpromi lo bann standar Zeova. I kapab senpleman pli meyer pour remersi sa lot dimoun pour eksprim son lekor oubyen ki nou pa reponn serten deklarasyon ki fo, pour ki nou kapab gard sa diskisyon lo en keksoz ki pou akonpli plis dibyen pour li. Menm si i pa dakor avek sa ki ou krwar, pa reakte an tro. Ou kapab demann li akoz i santi koumsa. Ekout atantivman son larepons. Sa pou ed ou konpran pli byen son fason panse. I kapab osi prepar semen pour plis konversasyon konstriktif plitar.—Prov. 16:23; 19:11.

Zeova in donn imen sa abilite pour swazir. I permet zot pour servi sa abilite, kantmenm zot kapab pa servi li dan en fason ki saz. Konman portparol Zeova, Zozye ti rakont fason azir Bondye avek Izrael. Me apre i ti dir: “Aprezan si i pa byen dan zot lizye pour servi Zeova, swazir pour zot menm ozordi lekel ki zot pou servi, si bann bondye ki zot zanset lot kote Larivyer ti servi oubyen si bann bondye bann Amorit dan sa pei kot zot pe reste. Me mwan ek mon fanmiy, nou pou servi Zeova.” (Zoz. 24:15) Nou travay ozordi se pour “anonse” e nou koz avek konviksyon, me nou pa esey fors lezot pour krwar. (Mat. 24:14) Zot bezwen swazir, e nou pa esey refiz zot sa drwa.

Demann Kestyon. Zezi ti donn en legzanp remarkab konsernan rezonn avek dimoun. I ti pran an konsiderasyon zot lorizin e i ti servi bann ilistrasyon ki zot ti pou fasilman aksepte. I ti osi servi bann kestyon avek lefikasite. Sa ti donn lezot loportinite pour eksprim zot lekor e ti devwal sa ki ti dan zot leker. I ti osi ankouraz zot pour rezonn lo size ki ti pe ganny konsidere.

En zonm ki ti konn byen Lalwa ti demann Zezi: “Met, ki fodre mon fer pour leritaz lavi eternel?” Zezi ti kapab fasilman donn li larepons. Me i ti envit sa zonm pour eksprim son lekor. “Ki i’n ekri dan lalwa? Konman ou lir?” Sa zonm ti reponn korekteman. Eski diskisyon ti termin lanmenm akoz i ti donn larepons korek? Pa ditou. Zezi ti les sa zonm kontinyen koze, e en kestyon ki sa zonm ti demande ti endike ki i ti pe esey prouve ki li i byen. I ti demande: “Me lekel mon prosen?” Olye donn en leklersisman, ki sa zonm ti kapab konteste akoz latitid ki bann Zwif ti annan anver bann non-Zwif ek Samariten sa letan, Zezi ti envit li pour rezonn lo en ilistrasyon. I ti konsernan en vwazen Samariten ki ti ed en vwayazer ki ti’n ganny vole e bate tandis ki en pret ek en Levit pa ti ed sa vwayazer. Avek en senp kestyon, Zezi ti fer sir ki sa zonm in konpran sa pwen enportan dan sa ilistrasyon. Fason rezonnen Zezi ti donn sa lekspresyon “prosen” en sinifikasyon ki sa zonm pa ti’n zanmen panse avan. (Lik 10:25-37) Eski pa i en bon legzanp pour imite! Olye fer tou koze ou menm, annefe, pa reflesir pour sa dimoun, aprann konman pour servi bann kestyon avek konsiderasyon ek ilistrasyon pour ankouraz sa ki ekout ou pour reflesir.

Donn bann Rezon. Ler zapot Pol ti koz dan sinagog an Tesalonik, i ti fer plis ki zis lir dan en sours lotorite ki son lodyans ti aksepte. Lik i raporte ki Pol ti eksplike, prouve, e i ti fer laplikasyon sa ki i ti lir. E rezilta se ki, “serten parmi zot ti krwar parol Pol e zot ti zwenn ansanm avek Pol ek Silas.”—Akt 17:1-4.

Avek nenport dimoun ki kapab dan ou lodyans, en tel lapros rezonnab i kapab itil. Sa i vre ler ou rann temwannyaz avek bann fanmiy, koz avek bann koleg travay, oubyen kanmarad lekol, koz avek bann etranze dan predikasyon, kondwir en letid Labib, oubyen donn en diskour dan kongregasyon. Ler ou lir en verse, son sinifikasyon i kapab kler pour ou me petet i kapab pa kler pour en lot dimoun. Ou leksplikasyon oubyen ou laplikasyon i kapab donn lenpresyon ki ou pe enpoz ou pwenn-vi. Eski swazir e eksplik serten lekspresyon enportan dan sa verse pou ede? Eski ou kapab prezant bann levidans ki siporte, posibleman avek bann verse ki vin avan e apre oubyen apartir en lot verse ki koz lo sa topik? Eski en ilistrasyon i kapab demontre ki sa ki ou dir i rezonnab? Eski bann kestyon i kapab ed ou lodyans pour rezonn lo sa topik? En tel lapros i donn en lenpresyon favorab e i kit avek lezot bokou keksoz pour zot reflesir lo la.