Mentenir en Bon Kondwit ki Glorifye Bondye
1 Nenport ki landrwa ki nou ete, nou kondwit, resanz e fason ki nou aranz nou seve i rann temwannyaz lo nou e osi lo sa Bondye ki nou pe adore. Sa i vin vreman remarkab dan bann gran rasanble, kot bokou dimoun i obzerv nou. Ler nou egzanpler, non Zeova i ganny glorifye. (1 Pyer 2:12) Sepandan, bann move konportman oubyen bann aksyon bet par ennde, i kapab anmenn repros lo non Bondye ek son pep. (Ekle. 9:18b) Kan nou gard an tet ki par nou kondwit lezot an deor i ziz nou lorganizasyon ek sa Bondye ki nou pe adore, sa i devret ed nou pour reste konsyan pour ‘fer tou keksoz pour laglwar Bondye.’—1 Kor. 10:31.
2 Labiyman Konvenab pandan Lasanble: Nenport ki landrwa ki pe ganny itilize, i ganny regarde koman en gran Lasal Rwayonm pandan bann lasanble. Resanz ek fason pennyen i devret adapte zis parey ler nou asiste bann renyon dan nou Lasal Rwayonm. Pandan e apre bann sesyon lasanble, bann frer ek ser i devret evite met bann resanz ki pa modes oubyen ekstravagan, ki reflekte lespri lemonn e fer difisil pour nou ganny rekonnet koman pozitivman diferan. Bann ser i devret fer atansyon ki stil e longer zot zip ek rob i konvenableman modes. (1 Tim. 2:9, 10) Ki nou pe asiste lasanble, pe reste dan en lotel, pe manze dan en restoran, oubyen pe fer konmisyon dan laboutik, atou moman nou devret demontre ki nou bann minis Bondye, an evitan donn rezon pour fer tonbe lezot.—2 Kor. 6:3.
3 Batenm pou ganny fer son Sanmdi bomaten pandan lasanble. La Tour de Garde, 1 Avril, 1995, paz 30, i dekrir latitid ki nou devret demontre pandan sa lokazyon. I eksplike ki nou “merit konsider batenm avek en latitid serye ki apropriye. I pa en letan pour demontre en lemosyon egzazere, pour anmize oubyen riye. Me i pa ni en moman mosad oubyen latristes.” I pa ti a vreman apropriye pour bann zonm oubyen fanm ki pe batize, pour met bann kostim-de-ben ki revel oubyen pa kouver byen zot lekor. Alor tou dimoun i devret reflekte tou lede sa laspe serye e zwaye batenm en Kretyen.
4 Pyer i rapel nou ‘ki kalite dimoun nou devret ete dan bann aksyon sen ek dan bann aksyon marke par latasman avek Bondye.’ (2 Pyer 3:11) Nou swete ki nou parol ek aksyon sa lannen dan Lasanble Distrik, “Pratikan Parol Bondye,” i ed tou bann obzervater avek leker senser pour konn e ador nou gran Bondye, ki merit tou loner ek laglwar.—1 Kor. 14:24, 25.