Zezi i nou Granpret ki konpran nou

1-2. (a) Akoz Zeova ti anvoy son Garson lo later? (b) Ki nou pou vwar dan sa lartik? (Ebre 5:7-9)

APEPRE 2,000 an pase, Zeova ti anvoy son Garson pli presye lo later. Akoz? Enn bann rezon i pour liber bann imen avek pese ek lanmor e retir tou bann problenm ki Satan in fer. (Zan 3:16; 1 Zan 3:8) Zeova ti osi konnen ki sa ki Zezi ti pou pas ladan konman en imen, ti pou prepar li pour vin en Granpret ki konpran nou. Zezi ti konmans servi konman Granpret apre son batenm lannen 29.a

² Dan sa lartik, nou pou vwar lafason ki sa ki Zezi ti pas ladan lo later, ti prepar li pour vin en Granpret ki konpran nou. Ler nou konpran pli byen lafason ki leksperyans Zezi ti fer li “vin parfe” pour son rol, sa pou fer li pli fasil pour nou vin pros avek Zeova menm ler nou dekouraze akoz nou bann febles oubyen akoz nou’n fer pese.—Lir Ebre 5:7-9.

GARSON BONDYE TI VIN LO LATER

3-4. Ki bann sanzman Zezi ti eksperyanse ler i ti vin lo later?

³ En kantite parmi nou in deza eksperyans en sanzman dan nou sirkonstans. Petet nou ti bezwen kit nou lakour ki nou ti byen kontan e osi kit nou fanmir ek zanmi. I kapab difisil pour fer bann sanzman koumsa. Me i napa personn ki’n deza eksperyans sa ki Zezi in pas ladan. Ler i ti dan lesyel, i ti sa lanz pli enportan. Zeova ti kontan li e i ti toultan dan lazwa anmezir i ti servi dan “kote drwat” Bondye. (Ps. 16:11; Prov. 8:30) Kantmenm sa, Filipyen 2:7 i dir ki “i ti pare pour kit tou sa ki i ti annan,” enkli son pozisyon enportan dan lesyel, pour viv parmi bann imen enparfe lo later.

⁴ Mazin osi ler Zezi ti ne ek bann premye lannen son lavi lo later. Paran Zezi ti pov. Nou konn sa parski apre ki Zezi ti’n ne, son paran ti kapab ofer zis de pti zwazo konman sakrifis kot tanp. (Lev. 12:8; Lik 2:24) Ler move Lerwa Erod ti tande ki Zezi ti’n ne, i ti esey touy li. Pour sov lavi Zezi, son fanmir ti bezwen viv konman bann refizye Lezip pour en pe letan. (Mat. 2:13, 15) Sa ti en gran sanzman konpare avek sa lavi ki Zezi ti annan avan i ti vin lo later.

5. Ki Zezi ti vwar ler i ti lo later e ki mannyer sa ki i ti pas ladan ti prepar li pour son rol konman Granpret? (Vwar portre.)

⁵ Ler Zezi ti lo later, i ti vwar dimoun kot pe soufer otour li. Zezi ti eksperyans sa soufrans ki en imen i santi ler en dimoun ki i kontan i mor. San dout, plizyer parmi bann dimoun ki Zezi ti konnen ti mor ler i ti lo later. Aparaman sa i enkli Zozef, son papa adoptif. Pandan son minister, Zezi ti zwenn dimoun ki ti annan lalep, bann ki ti aveg, ki ti paralize e bann paran ki zot zanfan ti’n mor. I ti pran pitye pour zot. (Mat. 9:2, 6; 15:30; 20:34; Mark 1:40, 41; Lik 7:13) I vre ki ler Zezi ti dan lesyel i ti vwar bann imen pe soufer. Me ler i ti lo later e i ti en imen, i ti konpran pli byen ki mannyer dimoun i santi ler zot soufer. (Iza. 53:4) Sa ki Zezi ti pas ladan ler i ti lo later, ti ed li konpran santiman, fristrasyon ek soufrans imen. Li osi, i ti annan bann santiman ki imen ti annan. I ti fatige fizikman, son lespri ti fatige e i ti sagren.

ZEZI TI MONTRE KI I TI KONPRAN SANTIMAN LEZOT

6. Ki nou aprann avek profesi Izai konsernan lafason ki Zezi ti demontre konpasyon? (Izai 42:3)

⁶ Pandan son minister, Zezi ti montre ki i ti konpran santiman bann ki pa ti pe ganny trete byen. Par fer sa, i ti akonpli profesi. Dan Lekritir Ebre, bann dimoun ki for, i parfwa ganny konpare avek en zarden ki ganny byen aroze oubyen avek bann gran pye dibwa ki for. (Ps. 92:12; Iza. 61:3; Zer. 31:12) Me bann ki pov e ki pa ganny trete byen, i ganny konpare avek en zon ki’n kase ek en lanmes ki pros pour tennyen, de keksoz ki pa itil pour personn. (Lir Izai 42:3; Mat. 12:20) Zeova ti enspir Izai pour servi sa bann legzanp, pour predir lafason ki Zezi ti pou demontre lanmour ek konpasyon anver bann dimoun ordiner ki lezot ti konsider konman napa valer.

7-8. Ki mannyer Zezi ti akonpli profesi Izai?

⁷ Ekriven Levanzil Matye ti montre ki Zezi ti akonpli profesi Izai ki dir: “I pa pou kraz en zon ki’n kase e i pa pou tenny en lanmes ki pros pour tennyen.” Zezi ti fer en kantite mirak pour bann ki pa ti ganny trete byen, ki petet ti santi parey en zon ki’n kase e pour bann ki ti napa lespwar ki ti santi parey en lanmes ki pros pour tennyen. Parmi zot, i ti annan en zonm ki ti ganny lalep. I bezwen ki sa zonm ti santi ki i ti napa lespwar pour ganny geri e pour pas letan avek son fanmir ek zanmi. (Lik 5:12, 13) Zezi ti osi zwenn en zonm ki ti sourd e ki pa ti kapab koz byen. Imazin lafason ki sa zonm ti santi ler i ti vwar lezot pe koz avek kanmarad me li i pa ti kapab konpran ki zot pe dir. (Mark 7:32, 33) Me pa zis sa.

⁸ Dan letan Zezi, en kantite Zwif ti krwar ki bann ki ti malad oubyen ki ti annan en dezabilite, ti pe ganny pini pour zot prop pese oubyen pour pese zot paran. (Zan 9:2) Sa kalite krwayans ti fer sa bann dimoun krwar ki zot napa valer. Me Zezi ti akonpli profesi Izai e i ti geri bann ki ti pe soufer e ed zot pour rekonmans annan lespwar dan Bondye. Ki sa i ansenny nou konsernan lafason ki Zezi i santi anver nou ozordi?

9. Ki mannyer Ebre 4:15, 16 i montre ki nou Granpret ki dan lesyel i vreman konpran bann imen enparfe?

⁹ Lir Ebre 4:15, 16. Nou kapab asire ki Zezi pou toultan demontre konpasyon e konpran nou. I konpran nou bann soufrans ek nou santiman. Dan sa verse, sa mo Grek ki’n ganny tradwir “konpran” i donn sa nide ki ler nou soufer e sagren, Zezi i santi parey nou. (Vwar osi Ebre 10:34, kot Pol i servi sa menm verb Grek.) Bann resi konsernan bann mirak ki Zezi ti fer, i montre ki soufrans lezot ti annan en gran lefe lo li. I pa ti geri bann dimoun akoz i ti santi li oblize. O kontrer i ti vreman enterese avek zot e anvi ed zot. Par egzanp, ler Zezi ti geri sa msye ki ganny lalep, i ti’n kapab debout lwen pour geri li me Zezi ti tous li. Petet sa ti premye fwa ki dimoun ti’n tous li apre plizyer lannen. Mazin osi ler Zezi ti geri sa msye ki ti sourd. Zezi ti pran konsiderasyon pour sa msye e anmenn li dan en landrwa trankil kot i ti napa tapaz pour geri li. Osi, reflesir lo sa ki ti arive ler en madanm ki ti’n repantir ti lav lipye Zezi avek son larm e eswiy son lipye avek son seve. En Farizyen pa ti demontre labonte anver sa madanm me Zezi ti protez sa madanm e i ti reprimann sa Farizyen. (Mat. 8:3; Mark 7:33; Lik 7:44) Zezi pa ti evit bann ki ti malad oubyen bann ki ti’n fer bann pese grav. O kontrer, i ti akeyir zot byen, demontre konpasyon anver zot e montre zot ki i kontan zot. Nou kapab asire ki i konpran nou zis parey i ti konpran sa bann dimoun.

ANNOU SWIV LEGZANP NOU GRANPRET

10. Ki nou kapab servi ozordi pour ed bann ki sourd ek bann ki aveg? (Vwar portre.)

¹⁰ Konman bann disip Zezi nou fer zefor pour swiv son legzanp e demontre lanmour anver kanmarad, konpran santiman kanmarad e demontre konpasyon anver lezot. (1 Pyer 2:21; 3:8) Nou pa kapab geri bann ki sourd oubyen aveg. Me nou kapab ed zot pour aprann konn Zeova e vin pros avek li. Par egzanp, nou bann piblikasyon baze lo Labib i aprezan disponib dan plis ki 100 langaz siny. Pour bann ki aveg oubyen ki pa kapab vwar byen, i annan bann piblikasyon an bray ki disponib dan plis ki 60 langaz. Osi, aprezan dan plis ki 100 langaz, nou annan bann video ki annan en narater ki dekrir ki pe arive dan sa video. Sa bann provizyon i ed bann ki sourd ek bann ki aveg pour vin pros avek Zeova ek son Garson.

11. Ki mannyer lorganizasyon Zeova i demontre lentere dan tou sort kalite dimoun zis parey Zezi? (Akt 2:5-7, 33) (Vwar portre.)

¹¹ Lorganizasyon Zeova i fer zefor pour ed tou sort kalite dimoun vin pros avek Zeova. Rapel ki apre ki Zezi ti’n resisite, i ti donn son bann disip lespri sen pour ki son bann disip i kapab anons sa bon nouvel dan “langaz sa bann dimoun” ki ti’n vin lafet Lapannkot. (Lir Akt 2:5-7, 33.) Anba gidans Zezi, lorganizasyon i pibliy bann piblikasyon baze lo Labib dan plis ki 1,000 langaz e serten parmi i bann langaz ki pa bokou dimoun ki koze. Par egzanp, zis en ptigin dimoun ki reste dan nor ek sid Lanmerik ki koz serten langaz Amerindian. Me kantmenm sa, lorganizasyon in pibliy bann piblikasyon dan plis ki 160 parmi sa bann langaz pour fer sir ki maksimonm dimoun posib i tann sa bon nouvel. Nou bann piblikasyon i osi disponib dan plis ki 20 langaz Laroumani. Plizyer milye dimoun ki koz sa bann langaz in aksepte laverite.

12. Ki lezot led lorganizasyon Zeova i donnen?

¹² Apard ki ed bann dimoun pour konn sa bon nouvel, lorganizasyon Zeova i osi ed bann ki soufer akoz bann dezas natirel. Plizyer frer ek ser i volonter pour ed bann ki dan bezwen. Lorganizasyon i osi fer provizyon pour nou ganny bann landrwa ladorasyon kot nou kapab zwenn ansanm pour aprann plis konsernan sa lanmour ki Bondye i annan pour nou.

NOU GRANPRET I KAPAB ED OU

13. Ki serten fason Zezi i ed nou?

¹³ Konman nou bon berze, Zezi i fer sir ki nou ganny tou sa ki nou bezwen pour reste pros avek Zeova. (Zan 10:14; Efe. 4:7) Parfwa nou sirkonstans i kapab fer nou santi parey en lanmes ki pros pour tennyen oubyen parey en zon ki’n kase. Petet nou vreman dekouraze parski nou annan en maladi grav, nou’n fer en fot oubyen nou’n ganny en problenm avek en dimoun dan kongregasyon. Petet nou vwar li difisil pour sirmont sa douler e pour konsantre lo nou lespwar pour lavenir. Me gard antet ki Zezi i vwar sa ki ou pe pas ladan e i konpran lafason ki ou pe santi. Sa konpasyon ki Zezi i annan pour ou i motiv li pour ed ou. Par egzanp, i kapab servi lespri sen pour donn ou lafors ler ou fay. (Zan 16:7; Tit 3:6) Zezi i kapab osi servi “bann zonm konman kado” ek bann lezot Kretyen pour ankouraz, siport e ed ou.—Efe. 4:8.

14. Ki nou kapab fer ler nou dekouraze?

¹⁴ Si ou dekouraze, medit lo rol Zezi konman nou Granpret. Rapel ki Zeova ti anvoy son Garson lo later, pa zis pour donn son lavi konman en ranson me osi pour ed li konpran pli byen bann problenm ki imen enparfe i fer fas avek. Ler nou dekouraze akoz nou annan en febles oubyen nou’n fer en pese, Zezi i pare e i anvi donn nou sa led ki nou bezwen “dan sa moman apropriye.”—Ebr. 4:15, 16.

15. Donn en leksperyans ki montre lafason ki en dimoun ki’n kit Zeova i kapab ganny led pour retourn dan kongregasyon.

¹⁵ Zezi i osi gid son pep ler zot pe rod e ed bann ki’n kit Zeova. (Mat. 18:12, 13) Annou vwar leksperyans Stefano.b Apre ki i ti’n ganny tire dan kongregasyon, i ti deside pour asiste en renyon apre 12 an. Stefano i dir: “I pa ti fasil pour mwan me mon ti anvi form parti fanmir Zeova ankor. Bann ansyen ki ti zwenn avek mwan ti byen akeyir mwan. Parfwa mon ti santi ki mon pa vo nanryen e mon ti anvi aret fer zefor pour retourn kot Zeova. Me bann ansyen ti fer mwan rapel ki Zeova ek Zezi i anvi ki mon persevere. Ler mon ti reganny aksepte dan kongregasyon, kongregasyon antye ti akeyir e demontre lanmour anver mwan ek mon fanmir. Avek letan, mon madanm ti aksepte en letid Labib e ozordi nou pe servi Zeova konman en fanmir.” I bezwen ki nou Granpret i vreman kontan ler i vwar bann ki’n repantir ganny sa led ki zot bezwen pour retourn dan kongregasyon.

16. Akoz ou rekonesan ki ou annan en Granpret ki konpran ou?

¹⁶ Ler Zezi ti lo later, i ti ed en kantite dimoun dan sa moman apropriye. Ozordi nou kapab asire ki Zezi pou ed nou sak fwa ki nou bezwen led. Dan nouvo lemonn, i pou ed bann imen obeisan pour viv en lavi kot zot pa pou anba lenfliyans pese ek lenperfeksyon. Nou remersye Zeova nou Bondye ki’n sitan kontan nou ki i’n apwent son Garson konman nou Granpret ki konpran nou!