Zeova i “geri bann ki annan en leker brize”

1. Ki mannyer Zeova i santi anver son bann serviter?

KI Zeova i vwar ler i get son bann serviter lo later? I vwar ler nou zwaye e ler nou sagren. (Ps. 37:18) Zeova i kontan ler i vwar ki nou pe fer nou mye pour servi li menm ler nou vreman sagren. Me an plis ki sa, i vreman anvi ed nou e rekonfort nou.

2. Ki Zeova i fer pour bann ki annan en leker brize e ki mannyer nou kapab ganny bann byenfe avek sa led ki Zeova i donnen?

² Psonm 147:3 i dir ki Zeova i ‘pans blesir’ bann ki annan en leker brize. Sa verse i montre ki mannyer Zeova i pran swen avek bann ki sagren. Ki nou bezwen fer pour ganny bann byenfe avek sa led ki Zeova i donnen? Annou pran en legzanp ki pou ed nou konpran sa. En dokter i kapab ed en dimoun ki’n ganny blese pour li geri. Pour sa dimoun ki’n ganny blese ganny bann byenfe i bezwen swiv byen lenstriksyon sa dokter. Dan sa lartik, nou pou vwar sa ki Zeova i dir avek bann ki pe soufer emosyonnelman e nou pou vwar ki mannyer nou kapab aplik son bann konsey.

ZEOVA I ASIR NOU KI NOU VREMAN PRESYE POUR LI

3. Akoz serten i santi ki zot pa vo nanryen?

³ Ozordi nou pe viv dan en lemonn kot en kantite dimoun pa kontan lezot. Sa i fer ki zot pa tret lezot byen e zot fer lezot santi ki zot pa vo nanryen. En ser ki apel Helena i dir: “Mon paran pa ti bann dimoun ki ti demontre lanmour. Mon papa ti vyolan e toulezour i ti dir nou ki nou pa vo nanryen.” Parey Helen, petet en dimoun pa tret ou byen. I souvan kritik ou oubyen fer ou santi ki ou pa vo nanryen. Si sa i leka, petet ou kapab vwar li difisil pour krwar ki en dimoun i kapab vreman kontan ou.

4. Dapre Psonm 34:18, ki Zeova i asir nou?

⁴ Menm si lezot pa’n tret ou byen, ou kapab asire ki Zeova i kontan ou e ki ou presye pour li. I “pros avek bann ki annan en leker brize.” (Lir Psonm 34:18.) Si ou santi ki ou pa vo nanryen, rapel ki Zeova i vwar bann bon kalite ki ou annan e i’n atir ou ver li. (Zan 6:44) I toultan pare pour ed ou parski ou presye pour li.

5. Ki nou kapab aprann avek lafason ki Zezi ti tret bann ki petet ti santi ki zot pa vo nanryen?

⁵ Nou kapab aprann konsernan bann santiman Zeova par egzamin legzanp Zezi. Ler Zezi ti lo later, i ti demontre labonte anver bann dimoun ki ti santi ki zot pa vo nanryen akoz lafason ki lezot ti tret zot. (Mat. 9:9-12) Ler en madanm ki ti annan en maladi grav ti tous lenz Zezi akoz i ti mazinen ki i ti pou ganny geri, Zezi ti rekonfort li e felisit li pour son lafwa. (Mark 5:25-34) Zezi i demontre bann kalite ki son Papa i annan dan en fason parfe. (Zan 14:9) Alor ou kapab asire ki ou presye pour Zeova e ki i vwar bann bon kalite ki ou annan. Sa i enkli ou lafwa ek sa lanmour ki ou annan pour li.

6. Ki ou kapab fer si ou santi ki ou pa vo nanryen?

⁶ Ki ou kapab fer si ou santi ki ou pa vo nanryen? Lir e medit lo bann verse Labib ki asir ou ki ou presye pour Zeova.b (Ps. 94:19) Pa konpar ou avek lezot e pa konsantre lo sa ki ou pa kapab fer. Zeova pa ekspekte ki ou fer plis ki sa ki ou kapab fer. (Ps. 103:13, 14) Si dan lepase ou’n ganny trete dan en move fason, pa blanm ou lekor pour sa ki sa dimoun in fer. Gard antet ki Zeova pou ziz bann ki pa’n tret lezot byen. Me i pou ed bann ki’n ganny trete dan en move fason. (1 Pyer 3:12) En ser ki apel Sandra, ki pa ti ganny trete byen ler i ti ankor en zanfan, i dir: “Mon regilyerman demann Zeova pour ed mwan vwar bann bon kalite ki i vwar dan mwan.”

7. Ki mannyer bann sityasyon difisil ki nou’n pas ladan i kapab itil dan nou servis pour Zeova?

⁷ Ou kapab asire ki Zeova i kapab servi ou pour ed lezot. I’n donn ou sa loner pour travay ansanm avek li dan sa travay predikasyon. (1 Kor. 3:9) I kapab ki bann sityasyon difisil ki ou’n pas ladan in fer li pli fasil pour ou konpran ki mannyer bann ki pe soufer i santi. Ou kapab fer en kantite keksoz pour ed zot. Helen, ki’n ganny mansyonnen pli boner, ti ganny led e aprezan i pli byen kapab ed lezot. Helen i dir: “Oparavan, mon ti santi ki mon pa vo nanryen me Zeova in fer mwan santi ki lezot i kontan mwan e i servi mwan pour ed lezot.” Aprezan, Helen i zwaye e i pe servi konman en pionye ordiner.

ZEOVA I ANVI KI NOU AKSEPTE KI IN PARDONN NOU

8. Ki Zeova i asir nou dan Izai 1:18?

⁸ Serten serviter Zeova i ankor santi zot koupab pour bann keksoz ki zot in fer dan lepase, ki swa avan zot batize oubyen apre. Me nou pa devret oubliye ki Zeova i vreman kontan nou e in donn sa ranson pour nou pese kapab ganny pardonnen. Nou kapab asire ki i anvi ki nou aksepte son kado. Zeova i asir nou ki apre ki nou’n “aranz keksoz”c avek li, i pou pardonn nou konpletman. (Lir Izai 1:18.) Nou vreman rekonesan ki nou Papa ki kontan nou i oubliy bann pese ki nou’n fer dan lepase. Kantmenm sa, i pa zanmen oubliy bann bon keksoz ki nou’n fer.—Ps. 103:9, 12; Ebr. 6:10.

9. Akoz nou devret fer nou mye pour konsantre lo sa ki nou pe fer la konmela e sa ki nou pou fer dan lavenir olye konsantre lo lepase?

⁹ Si ou santi ou koupab pour bann keksoz ki ou’n fer dan lepase, fer ou mye pour konsantre lo sa ki ou pe fer la konmela e lo sa ki ou pou kapab fer dan lavenir. Annou vwar legzanp zapot Pol. Pol ti regrete ki i ti’n persekit bann Kretyen dan lepase me i ti konnen ki Zeova ti’n pardonn li. (1 Tim. 1:12-15) Me eski apre sa, i ti kontinyen mazin bann pese ki i ti’n fer dan lepase? Zis parey i pa ti kontinyen mazin bann keksoz ki i ti’n akonpli ler i ti en Farizyen, nou kapab asire ki i ti refize kontinyen mazin bann pese ki i ti’n fer dan lepase. (Fili. 3:4-8, 13-15) O kontrer Pol ti kontinyen fer son mye dan predikasyon e i ti konsantre lo lavenir. Parey Pol, ou pa kapab sanz sa ki’n arive dan lepase. Me ou kapab onor Zeova la konmela e mazin sa lavenir merveye ki Zeova in promet pour donn ou.

10. Ki nou kapab fer si sa ki nou’n fer dan lepase in bles lezot?

¹⁰ Petet ou’n fer serten keksoz dan lepase ki’n bles lezot e i kapab ki sa pe fatig ou. Kwa ki kapab ede? Fer sa ki ou kapab pour aranz keksoz avek sa dimoun, sa i enkli dir li e montre li ki ou regrete pour sa ki ou’n fer. (2 Kor. 7:11) Demann Zeova pour ed bann ki’n ganny blese par sa ki ou’n fer. Zeova i kapab ed ou ek sa bann dimoun pour andire e pour annan lape lespri.

11. Ki nou kapab aprann avek legzanp profet Zonas? (Vwar kouvertir.)

¹¹ Aprann avek bann fot ki ou’n fer dan lepase e les Zeova servi ou dan nenport fason ki i anvi. Annou vwar legzanp profet Zonas. Bondye ti donn Zonas lord pour al Niniv e olye fer sa, Zonas ti al dan en lot direksyon. Zeova ti disiplin Zonas e Zonas ti aprann avek son fot. (Zon. 1:1-4, 15-17; 2:7-10) Zeova pa ti aret servi Zonas konman en profet. Bondye ti donn Zonas en lot loportinite pour al Niniv e safwasi Zonas ti obei deswit. Menm si i ti regret sa fot ki i ti’n fer, i pa ti les sa santiman anpes li fer sa ki Zeova ti’n demann li pour fer.—Zon. 3:1-3.

ZEOVA I SERVI SON LESPRI SEN POUR REKONFORT NOU

12. Ki mannyer Zeova i donn nou lape lespri ler en move keksoz i arive avek nou? (Filipyen 4:6, 7)

¹² Zeova i servi son lespri sen pour rekonfort nou ler bann move keksoz i arive avek nou. Annou vwar leksperyans Ron ek Carol. Malerezman, zot garson ti swiside. Zot dir: “Nou’n pas dan bann sityasyon difisil avan sa, me sa enn ti pli difisil. Pandan plizyer lannwit nou pa ti kapab dormi. Alor nou ti priy Zeova e nou ti vreman santi sa lape ki Filipyen 4:6, 7 i koz lo la.” (Lir.) Si ou vreman sagren akoz en move keksoz ki’n arive avek ou, dir Zeova egzakteman lafason ki ou santi. Ou kapab koz avek Zeova lakantite fwa ki ou oule e nenport ki kantite letan ki ou anvi. (Ps. 86:3; 88:1) Kontinyen demann Zeova pour donn ou son lespri sen. I pou toultan ed ou.—Lik 11:9-13.

13. Ki mannyer lespri sen i kapab ed nou pour kontinyen reste fidel avek Zeova? (Efezyen 3:16)

¹³ Eski en move keksoz in arive avek ou e aprezan ou santi ki ou napa lafors? Lespri sen Zeova i kapab donn ou sa lafors ki ou bezwen pour kontinyen reste fidel avek Zeova. (Lir Efezyen 3:16.) Annou vwar leksperyans en ser ki apel Flora. Flora ek son msye ti pe servi konman bann misyonner ler son msye ti tronp li e zot ti divorse. Flora i dir: “Mon ti vreman sagren parski i ti’n tronp mwan e sanmenm tou ki ti dan mon lespri. Mon ti demann Zeova pour donn mwan son lespri sen pour mwan kapab andire. Zeova ti rekonfort mwan e avek son led, mon ti vin pli for e mon ti kapab andire menm si o konmansman i ti paret enposib.” Flora i santi ki Bondye ti ed li pour annan plis konfyans dan Li e Flora i asire ki Bondye pou ed li dan tou son bann difikilte. Flora i osi dir ki Psonm 119:32 i dekri byen lafason ki Zeova in ed li. Sa verse i dir: “Mon pou obei ou bann komannman avek tou mon leker parski ou fer plas pour zot dan mon leker.”

14. Ki nou kapab fer pour permet lespri sen Bondye ed nou?

¹⁴ Ki ou devret fer apre ki ou’n demann Zeova pour donn ou son lespri sen? Fer bann keksoz ki pou permet lespri sen pour ed ou. Sa i enkli asiste renyon e anons sa bon nouvel avek lezot. Lir Parol Bondye toulezour parski sa pou ed ou pour medit lo son fason panse. (Fili. 4:8, 9) Anmezir ou lir Parol Bondye, reflesir lo bann dimoun dan Labib ki ti fer fas avek bann difikilte e medit lo lafason ki Zeova ti ed zot pour andire. Sandra, ki’n ganny mansyonnen pli boner, ti pas dan en kantite problenm ki ti fer li soufer. I dir: “Sa resi dan Labib konsernan Zozef i vreman ankouraz mwan. Zozef pa ti les bann problenm ek lenzistis ki i ti fer fas avek gat son lanmitye avek Zeova.”—Zen. 39:21-23.

ZEOVA I SERVI BANN FRER EK SER POUR REKONFORT NOU

15. Lekel ki kapab rekonfort nou e ki mannyer zot kapab ed nou? (Vwar portre.)

¹⁵ Ler nou pe soufer, nou bann frer ek ser i kapab vin en “gran sours rekonfor.” (Kol. 4:11) Atraver nou bann frer ek ser, Zeova i montre nou ki i kontan nou. Nou bann frer ek ser i kapab rekonfort nou ler zot pas letan avek nou e zot ekoute ler nou pe eksprim nou santiman avek zot. Zot kapab ankouraz nou avek en verse Labib oubyen fer lapriyer ansanm avek nou.d (Rom. 15:4) Parfwa en frer oubyen en ser i kapab fer nou rapel fason panse Zeova e sa i kapab ed nou pour kontinyen andir nou bann difikilte. Bann frer ek ser i kapab osi ed nou dan lezot fason. Par egzanp, zot kapab prepar en pla pour nou ler nou vreman sagren.

16. Petet kwa ki nou bezwen fer pour lezot kapab ed nou?

¹⁶ Parfwa nou bezwen demann led avek lezot. Nou bann frer ek ser i kontan nou e zot anvi ed nou. (Prov. 17:17) Me i kapab ki zot pa konnen ki mannyer nou santi e ki nou bezwen. (Prov. 14:10) Si ou vreman sagren, ou kapab koz avek en zanmi ki matir e dir li ki mannyer ou pe santi. Fer li konnen kwa ki pou ed ou. Ou kapab swazir pour koz avek enn oubyen de ansyen ki ou alez avek. I annan serten ser ki’n vwar ki ler zot koz avek en ser matir, sa in rekonfort zot.

17. Ki serten sityasyon ki kapab anpes nou ganny lankourazman e ki mannyer nou kapab fer fas avek sa bann sityasyon?

¹⁷ Pa pas tro bokou letan ou tousel. Parfwa ou kapab sitan sagren ki ou pa anvi pas letan avek lezot. I kapab ki parfwa ou bann frer ek ser pa vreman konpran ki mannyer ou pe santi oubyen i kapab ki zot dir en keksoz ki bles ou santiman. (Zak 3:2) Me pa les bann sityasyon koumsa anpes ou ganny sa lankourazman ki ou bezwen avek ou bann frer ek ser. En ansyen ki apel Gavin, ki pe fer fas avek depresyon, i dir: “Souvandfwa, mon pa anvi koz avek mon bann zanmi e mon pa anvi pas letan avek zot.” Kantmenm sa, Gavin i fer zefor pour pas letan avek son bann frer ek ser e ler i fer sa, souvandfwa i santi li pli byen. En ser ki apel Amy i dir: “Mon vwar li difisil pour annan konfyans dan lezot akoz bann move leksperyans ki mon’n pas ladan. Me mon pe aprann pour kontan mon bann frer ek ser e annan konfyans dan zot parey Zeova. Mon konnen ki sa i fer Zeova kontan e i fer mwan osi kontan.”

BANN PROMES ZEOVA KONSERNAN LAVENIR I REKONFORT NOU

18. Ki promes Zeova in fer konsernan lavenir e ki nou kapab fer depi la konmela?

¹⁸ Byento Zeova pou tir tou keksoz ki fer nou vreman sagren e tou douler ki nou annan. (Rev. 21:3, 4) Sa letan, bann keksoz ki nou’n eksperyanse ki’n bles nou santiman “pa pou dan [nou] leker.” (Iza. 65:17) Parey nou’n vwar, menm ozordi Zeova i ‘pans nou blesir’ ler nou pe soufer. Zeova in donn nou en kantite keksoz pour rekonfort e ed nou. Alor fer sir ki nou aksepte son led. Ou kapab toultan asire ki Zeova “i enterese avek [ou].”—1 Pyer 5:7.