“ Ou vreman presye”!

1-2. Kwa ki kapab ed nou konpran ki nou presye pour Zeova?

BANN serviter Zeova i presye pour li. Me i annan ki santi ki Zeova pa vreman kontan zot. Petet serten dimoun in tret zot dan en fason e sa i fer zot santi ki zot napa valer. Eski ou’n deza santi koumsa? Si wi, kwa ki kapab ed ou pour asire ki ou presye pour Zeova?

² En keksoz ki kapab ed ou, i pour lir bann resi Labib ki montre lafason ki Zeova i vwar bann dimoun e lafason ki i anvi zot ganny trete. Son Garson, Zezi, ti tret dimoun avek dinyite ek respe. Par fer sa, i ti montre ki li ek son Papa, zot vreman apresye bann dimoun ki santi ki zot napa bokou valer. (Zan 5:19; Ebr. 1:3) Dan sa lartik, nou pou vwar: (1) ki mannyer Zezi ti ed bann dimoun konpran ki zot presye pour Zeova e (2) ki mannyer nou kapab asire ki nou vreman presye pour Bondye.—Aga. 2:7.

KI MANNYER ZEZI TI ED DIMOUN KONPRAN KI ZOT ANNAN VALER?

3. Ki mannyer Zezi ti tret bann dimoun Galile ki ti vin kot li pour ganny led?

³ Pandan sa trwazyenm kanpanny predikasyon ki Zezi ti fer Galile, en kantite dimoun ti vin kot li pour ekout li e i ti geri zot. I ti dir ki “zot ti pe ganny maltrete e rezete parey bann mouton ki napa berze.” (Mat. 9:36; vwar bann not letid dan nwtsty-E.) Zot bann sef relizye pa ti vwar sa bann dimoun ase enportan pour enterese avek zot. Zot ti menm dir ki zot ti “bann dimoun modi.” (Zan 7:47-49; not letid dan nwtsty-E.) Me Zezi ti demontre labonte ek respe anver zot par pran letan pour ansenny zot e geri zot. (Mat. 9:35) Osi, pour ed plis dimoun, i ti form son bann zapot pour anons sa bon nouvel e i ti donn zot lotorite pour geri bann malad.—Mat. 10:5-8.

4. Ki nou aprann avek lafason ki Zezi ti tret bann dimoun ki lezot ti konsider konman pa enportan?

⁴ Zezi ti tret bann dimoun ki lezot ti konsider konman pa enportan avek labonte ek respe. Par fer sa, i ti montre ki li ek son Papa i konsider sa bann dimoun konman presye. Si ou pe servi Zeova e ou krwar ki ou napa valer pour li, reflesir lo lafason ki Zezi ti tret bann dimoun ki ti anvi aprann avek li. Ler ou fer sa, ou pou vwar ki kantite ou presye pour Zeova.

5. Ki nou konnen konsernan en madanm ki Zezi ti zwenn Galile?

⁵ Zezi pa ti zis ansenny bann lafoul me i ti osi ansenny e ed bann dimoun endividyelman. Par egzanp, ler Zezi ti pe fer predikasyon Galile, i ti zwenn en madanm ki ti’n soufer pandan 12 an akoz i ti pe perdi disan. (Mark 5:25) Sa maladi ti fer sa madanm enpir e sa ti fer ki tou dimoun ki tous li, ti vin enpir. Sa ti osi fer ki i pa ti kapab pas letan avek lezot e laplipar ditan i ti li tousel. An plis ki sa, i pa ti kapab zwenn avek lezot pour ador Zeova kot sinagog oubyen pandan bann lafet. (Lev. 15:19, 25) San dout, sa madanm ti soufer fizikman me i ti osi santi ki i pa vo nanryen.—Mark 5:26.

6. Ki mannyer sa madanm ki ti pe perdi disan ti ganny geri?

⁶ Sa madanm ki ti pe soufer ti anvi Zezi i geri li. Me i pa ti apros Zezi direkteman. Akoz? Petet i ti anbarase oubyen onte akoz son maladi. Oubyen i kapab ki i ti per ki Zezi ti pou pous li parski i ti enpir e i pa ti devret parmi lafoul. Alor i ti zis tous lenz Zezi parski i ti asire ki sa ti pou ase pour geri li. (Mark 5:27, 28) I ti annan rezon pour annan sa kalite lafwa parski i ti ganny geri. Me apre Zezi ti demande lekel ki’n tous li e sa madanm ti dir li sa ki i ti’n fer. Ki mannyer Zezi ti reakte?

7. Ki mannyer Zezi ti tret sa madanm ki ti pe soufer? (Mark 5:34)

⁷ Zezi ti tret sa madanm avek labonte ek respe. I ti remarke ki sa madanm “ti per e i ti pe tranble.” (Mark 5:33) I ti konsyan lafason ki sa madanm ti pe santi alor i ti koz avek li dan en fason ki reasir li. I ti menm apel li “mon fiy,” en term ki montre lanmour, labonte ek tandres. (Lir Mark 5:34.) Not letid pour sa term i dir ki “sa i sa sel moman dan Labib kot Zezi i apel en madanm ‘mon fiy,’ petet akoz son sityasyon delika e lafason ki i ti pe ‘tranble.’” I bezwen ki sa madanm ti santi li soulaze. Si Zezi pa ti’n koz avek li dan sa fason, i kapab ki sa madanm ti pou’n santi li koupab menm si i ti’n ganny geri. O kontrer Zezi ti anvi i konnen ki son Papa ki dan lesyel i kontan li e ki I vwar li konman son fiy ki presye.

8. Ki difikilte en ser ki reste Brezil ti fer fas avek?

⁸ Dan nou letan osi, i annan serten serviter Bondye ki annan bann problenm lasante ki fer zot soufer emosyonnelman. Maria,a i en pionye ki reste Brezil. Ler i ti ne, i ti napa lipye ek son lanmen gos. I dir: “Kot lekol, mon ti toultan ganny bouli akoz mon dezabilite. Zot ti donn mwan bann pti non ki ti bles mon santiman. Parfwa menm mon fanmir ti tret mwan dan en fason ki ti fer mwan santi ki mon napa valer.”

9. Kwa ki ti ed Maria pour konpran ki i presye pour Zeova?

⁹ Ki led Maria ti gannyen? Ler i ti vin en Temwen Zeova, bann frer ek ser dan kongregasyon ti rekonfort li e ed li pour vwar son lekor parey Zeova i vwar li. I dir: “I napa ase paz dan mon kaye pour mansyonn tou dimoun ki’n ed mwan. Mon remersye Zeova avek tou mon leker parski i’n donn mwan en fanmir spirityel ki merveye.” Bann frer ek ser in ed Maria pour konpran ki i presye pour Bondye.

10. Ki problenm Mari Magdalenn ti fer fas avek? (Vwar portre.)

¹⁰ Annou vwar lafason ki Zezi ti ed en lot dimoun. Sa i Mari Magdalenn, ki ti annan set demon lo li. (Lik 8:2) I tre probab ki i ti azir drol parski i ti anba lenfliyans bann demon e sa ti fer ki lezot ti reste lwen avek li. Pandan sa bann letan, i ti soufer en kantite e i bezwen ki i ti santi ki lezot in rezet li. I ti per e i ti santi ki i pa ti kapab fer nanryen pour sanz son sityasyon. I tre probab ki Zezi ti sas sa bann demon e Mari Magdalenn ti vin enn son disip. Ki lezot fason Zezi ti ed Mari Magdalenn pour konpran ki kantite i presye pour Bondye?

11. Ki mannyer Zezi ti montre Mari Magdalenn ki i presye pour Bondye? (Vwar portre.)

¹¹ Zezi ti demann Mari Magdalenn pour akonpanny li avek son bann disip ler zot ti al prese partou.b Sa ti fer ki i ti ganny sa loportinite pour tann Zezi ler i ti ansenny lezot. Zezi ti osi aparet avek Mari Magdalenn sa menm zour ki i ti resisite. I ti enn parmi bann premye disip ki Zezi ti koz avek sa zour. Zezi ti menm anvoy li pour al dir son bann zapot ki i ti’n resisite. Tousala i montre ki Mari Magdalenn ti vreman presye pour Zeova.—Zan 20:11-18.

12. Kwa ki ti fer Lidia santi ki personn pa ti pou zanmen kontan li?

¹² Zis parey Mari Magdalenn, en kantite dimoun ozordi i santi ki personn pa kontan zot. En ser ki apel Lidia, ki reste Lespanny i dir ki avan i ti ne, son manman ti mazin fer en lavortman. Menm ler i ti pti, i rapel ki mannyer son manman ti inyor li e dir li bann keksoz kriyel. I dir: “Mon ti toultan anvi ki lezot i aksepte mwan e kontan mwan. Mon manman ti konvenk mwan ki mon ti en move dimoun e sa ti fer ki mon ti per ki nenport kwa ki mon ti pou fer, personn pa ti pou kontan mwan.”

13. Kwa ki ti ed Lidia konpran ki i presye pour Zeova?

¹³ Ler Lidia ti konmans etidye Labib, keksoz ti sanze. Lapriyer, lektir Labib e parol ek aksyon ankourazan bann frer ek ser, ti ed li konpran ki i presye pour Zeova. I dir: “Mon msye i souvan dir mwan ki kantite i kontan mwan. I toultan fer mwan rapel ki mon annan bann bon kalite. Mon bann zanmi osi i fer sanmenm.” Eski ou konn en dimoun dan ou kongregasyon ki petet i bezwen led pour konpran ki kantite i presye pour Zeova?

KWA KI POU ED NOU VWAR NOU LEKOR PAREY ZEOVA I VWAR NOU?

14. Ki mannyer 1 Samyel 16:7 i ed nou pour konn lafason ki Zeova i vwar dimoun? (Vwar bwat “Akoz pep Zeova i presye pour li?”)

¹⁴ Rapel ki Zeova pa vwar ou parey bann dimoun i vwar ou. (Lir 1 Samyel 16:7.) Zeova pa get ou laparans, lakantite larzan oubyen ledikasyon ki ou annan pour deside si ou annan valer oubyen non. (Iza. 55:8, 9) Alor esey vwar ou lekor parey Zeova i vwar ou me pa dapre lafason ki dimoun i vwar ou. Ou kapab lir bann resi dan Labib ki montre ki Zeova ti apresye bann ki parfwa ti santi ki zot napa valer parey Eliya, Naomi ek Ana. Ou osi kapab ekri bann keksoz ki’n arive dan ou lavi ki montre ki Zeova i vreman kontan ou e i apresye ou. Osi, ou kapab vwar bann lenformasyon dan nou bann piblikasyon konsernan bann dimoun ki ti santi ki zot napa valer.c

15. Akoz Zeova ti vwar Danyel konman en dimoun ki “vreman presye”? (Danyel 9:23)

¹⁵ Gard antet ki ou fidelite i fer ou annan valer pour Zeova. I kapab ki ler profet Danyel ti dan son bann 90 an, i ti santi li “vreman fatige” e dekouraze. (Dan. 9:20, 21) Ki mannyer Zeova ti ankouraz li? Bondye ti anvoy lanz Gabriyel pour fer Danyel rapel ki i “vreman presye” e ki I’n tann son lapriyer. (Lir Danyel 9:23.) Kwa ki ti fer Danyel sitan presye pour Bondye? Parmi bann kalite ki Danyel ti annan, i ki i ti kontan fer sa ki byen e i ti fidel. (Ezek. 14:14) Zeova in fer ekri sa resi konsernan Danyel dan son Parol pour rekonfort nou. (Rom. 15:4) Zeova i osi ekout ou lapriyer e ou presye pour li parski ou kontan fer sa ki byen e ou fidel avek li.—Mik. 6:8 ek bann not.; Ebr. 6:10.

16. Kwa ki kapab ed ou pour vwar Zeova konman en Papa ki kontan ou?

¹⁶ Vwar Zeova konman en Papa ki kontan ou. Zeova pa pe rod ou bann defo me i anvi ed ou. (Ps. 130:3; Mat. 7:11; Lik 12:6, 7) Ler bann frer ek ser ki ti santi ki zot napa valer ti medit lo sa, sa ti ed zot. Annou vwar leksperyans en ser ki apel Michelle ki reste Lespanny, ki ti santi ki personn pa kontan li e ki i pa vo nanryen parski pour plizyer lannen son msye ti dir li bann keksoz kriyel. I dir: “Sak fwa mon santi ki mon pa vo nanryen, mon imazin Zeova pe anmenn mwan dan son lebra, pe demontre lanmour anver mwan e protez mwan.” (Ps. 28:9) En ser ki apel Lauren, ki reste Sidafrik i dir son lekor: “Si Zeova in atir mwan ver li avek lakord lanmour, i’n ed mwan pour reste pros avek li tou sa bann lannen e i menm servi mwan pour ed lezot, alor mon asire ki i vwar mwan konman en dimoun ki annan valer e ki itil.”—Ose. 11:4.

17. Kwa ki kapab fer ou asire ki ou annan laprouvasyon Zeova? (Psonm 5:12) (Vwar portre.)

¹⁷ Ou kapab asire ki ou annan laprouvasyon Zeova. (Lir Psonm 5:12.) David ti konpar laprouvasyon Zeova avek “en gran boukliye” ki protez bann dimoun ki fer sa ki byen. Ler ou konnen ki ou annan laprouvasyon Zeova ek son sipor, sa i kapab protez ou si ou konmans mazin bann move keksoz lo ou lekor. Ki mannyer ou kapab konnen si ou annan laprouvasyon Zeova? Parey nou’n vwar, Zeova i dir ki mannyer i santi anver ou dan son Parol. I osi servi bann ansyen, bann zanmi pros ek lezot pour fer ou rapel ki ou presye pour li. Ki mannyer ou devret santi ler lezot i dir bann bon keksoz lo ou?

18. Akoz ou devret aksepte ler lezot i felisit ou?

¹⁸ Ler bann ki konn ou e ki kontan ou i dir bann bon keksoz lo ou, pa bezwen krwar ki zot pa konnen ki zot pe dir. Gard antet ki i kapab ki Zeova pe servi zot pour ed ou konpran ki ou annan son laprouvasyon. Michelle, ki’n ganny mansyonnen pli boner, i dir: “Ptitapti mon pe aprann pour aksepte ler lezot i dir mwan bann parol ankourazan. Menm si i difisil, mon konnen ki sanmenm sa ki Zeova i anvi mon fer.” Bann ansyen in osi ed Michelle pour vwar ki i annan laprouvasyon Zeova. Aprezan i en pionye e i ede dan Betel konman en volonter ki servi depi kot li.

19. Akoz ou kapab asire ki ou presye pour Zeova?

¹⁹ Zezi ti dir nou ki nou vreman enportan pour nou Papa ki dan lesyel. (Lik 12:24) Alor nou kapab asire ki pour Zeova nou vreman presye. Annou pa zanmen oubliy sa. Annou fer nou mye pour ed lezot vwar ki kantite zot presye pour Zeova.