Fer Zeova vin ou Ros

1. Dan Psonm 18:46 David i konpar Zeova avek kwa?

NOU viv dan en lemonn kot en sel kou nou kapab fer fas avek en problenm ki fer nou lavi difisil oubyen ki kapab sanz nou lavi konpletman. Nou vreman rekonesan ki nou kapab depan lo nou Bondye Zeova pour ed nou. Dan sa lartik avan, nou ti aprann ki Zeova i sa Bondye vivan e ki i toultan pare pour ed nou. Ler nou ganny son led, sa i reasir nou ki “Zeova i vivan!” (Lir Psonm 18:46.) Me zis apre ki David ti’n dir ki Zeova i vivan, David ti konpar Bondye avek en keksoz ki pa vivan. David ti apel Bondye “mon Ros.” Ki sa i vedir?

2. Ki nou pou aprann avek lefet ki David ti apel Zeova “mon Ros”?

² Dan sa lartik, nou pou aprann akoz Zeova i ganny konsidere konman en ros e ki sa i ansenny nou lo li. Nou pou osi aprann ki mannyer nou kapab depan lo Zeova konman nou Ros. Apre nou pou vwar ki mannyer nou kapab devlop serten kalite ki Zeova i annan ki fer li parey en ros.

KI MANNYER ZEOVA I PAREY EN ROS?

3. Ki mannyer Labib i souvan servi sa mo “ros”? (Vwar portre.)

³ Labib i servi sa mo “ros” pour ed nou konpran serten kalite ki Zeova i annan. Plizyer fwa dan Labib, ler bann serviter Zeova i loue li pour son bann kalite, zot dekri li konman en Bondye ki parey en ros. Sa premye fwa ki Zeova i ganny dekrir konman “sa Ros” i dan Deterononm 32:4. Dan en lapriyer ki Ana ti fer, i ti dir: “Nou Bondye, zis ou ki for parey en ros.” (1 Sam. 2:2) Abakouk ti apel Zeova “mon Ros.” (Aba. 1:12) Sa ekriven Psonm 73 ti apel Bondye “ros mon leker.” (Ps. 73:26, not.) Menm Zeova ti dir ki i parey en ros. (Iza. 44:8) Aprezan annou diskit lo trwa kalite ki Zeova i annan ki fer li parey en ros e annou vwar ki mannyer nou kapab fer Zeova vin “nou Ros.”—Det. 32:31.

4. Ki mannyer Zeova i en refiz? (Psonm 94:22)

⁴ Zeova i en refiz. Zis parey en dimoun i kapab kasyet anba en gro ros ler i annan en tanpet, Zeova i kapab protez nou ler nou rankontre bann difikilte. (Lir Psonm 94:22.) I ed nou protez nou lanmitye avek li e i asir nou ki napa nanryen ki nou fer fas avek la konmela ki pou fer nou soufer pour touzour. Me i promet nou plis ki sa. Dan lavenir, Zeova pou tir okenn keksoz ki fer nou enkyet oubyen soufer.—Ezek. 34:25, 26.

5. Ki mannyer Zeova i kapab vin nou Refiz?

⁵ En fason ki nou fer Zeova vin nou Refiz, i ler nou koz avek li dan lapriyer. Ler nou priy Zeova, Zeova i donn nou “lape Bondye” ki protez nou leker ek lespri. (Fili. 4:6, 7) Annou vwar leksperyans en frer ki apel Artem ki ti ganny met dan prizon akoz son lafwa. Ler i ti dan prizon, en gard ti kestyonn li plizyer fwa, met presyon li e imilye li. Artem i dir: “Sak fwa ki sa gard ti demande pour vwar mwan, mon ti per. . . . Mon ti toultan priy Zeova. Mon ti demann li pour ed mwan pour reste kalm e pour annan lasazes. Bann taktik ki sa gard ti servi pa ti marse lo mwan. . . . Avek led Zeova, i ti konmsi mon ti pe debout deryer en miray ros.”

6. Akoz nou kapab toultan depan lo Zeova? (Izai 26:3, 4)

⁶ Zeova i fidel e i pa pou zanmen kit nou. Zis parey en ros i reste dan son plas e i pa bouze, Zeova i toultan la pour nou. Nou kapab annan konfyans dan li parski i “sa Ros pour touzour.” (Lir Izai 26:3, 4.) I pou toultan egziste, alor i pou toultan gard son bann promes, ekout nou bann lapriyer e ed nou ler nou bezwen. Nou osi kapab depan lo Zeova parski i fidel avek bann ki servi li. (2 Sam. 22:26) I pa pou zanmen oubliy sa ki nou fer e i pou toultan rekonpans nou.—Ebr. 6:10; 11:6.

7. Ki pou arive ler nou depan lo Zeova? (Vwar portre.)

⁷ Nou fer Zeova vin nou ros ler nou depan lo li konpletman. Nou asire ki si nou obei li, menm pandan bann letan difisil, nou pou ganny bann byenfe. (Iza. 48:17, 18) Sak fwa ki nou vwar lafason ki Zeova i ed nou, sa i fer nou annan plis konfyans dan li. Nou pou pli asire ki zis Zeova ki pou kapab ed nou fer fas avek nenport problenm ki nou rankontre. Souvan dan bann sityasyon kot i napa personn ki kapab ed nou, nou realize ki nou kapab toultan depan lo Zeova. Vladimir i dir: “Ler mon ti dan sant detansyon, sa ti sa moman ki mon ti santi mwan pli pros avek Zeova. Vi ki mon ti mwan tousel e mon ti napa kontrol lo mon sityasyon, mon ti aprann pour annan plis konfyans dan Zeova.”

8. (a) Akoz nou kapab dir ki Zeova pa sanze? (b) Ki byenfe nou gannyen ler nou fer Zeova vin nou Ros? (Psonm 62:6, 7)

⁸ Zeova pa sanze. Zeova i parey en gro ros ki pa sanze. Son personnalite ek son plan pa zanmen sanze. (Mal. 3:6) Ler Adan ek Ev ti rebel kont Zeova, Zeova pa ti sanz son plan ki i ti annan pour bann imen. Parey zapot Pol ti dir, Zeova “pa kapab kontredir son lekor.” (2 Tim. 2:13) Sa i vedir ki Zeova pa pou zanmen sanz sa ki i ete, son plan ouswa son bann standar nenport keksoz ki arive oubyen nenport kwa ki lezot i fer. Vi ki Zeova pa zanmen sanze, nou konnen ki i pou ed nou dan letan difisil e i pou gard son bann promes konsernan lavenir.—Lir Psonm 62:6, 7.

9. Ki ou aprann avek leksperyans Tatyana?

⁹ Nou fer Zeova vin nou Ros ler nou medit lo son bann kalite e lo son plan pour later e pour bann imen. Sa pou ed nou reste kalm e reste fidel avek Zeova pandan bann letan difisil. (Ps. 16:8) Sanmenm ki ti arive avek en ser ki apel Tatyana, ki ti ganny mete konman en prizonnyen dan son prop lakour akoz son lafwa. Tatyana i dir: “Mon ti mwan tousel. O konmansman i ti vreman difisil e souvandfwa mon ti dekouraze.” Me apre Tatyana ti konmans medit lo Zeova ek Son plan pour bann imen e i ti realize akoz i sitan enportan pour li andire dan sa sityasyon. Sa ti ed li pour reste kalm e donn li sa lafors pour reste fidel avek Zeova. Tatyana i dir: “Ler mon ti konpran akoz sa bann keksoz pe arive, sa ti fer mwan rapel ki i pour Zeova ki mon dan sa sityasyon. Sa in ed mwan pour aret konsantre lo mon lekor.”

10. Ki mannyer nou kapab fer Zeova vin nou Ros la konmela?

¹⁰ Byento nou pou fer fas avek bann moman vreman difisil e nou pou bezwen depan lo Zeova plis ki zanmen oparavan. Alor i enportan ki depi la konmela nou devlop plis konfyans dan Zeova e nou vreman asire ki i pou ed nou reste fidel avek li dan nenport sityasyon. Ki mannyer nou kapab fer sa? Lir bann resi dan Labib ek leksperyans bann serviter Zeova dan nou letan. Vwar ki mannyer Zeova in ed son bann serviter. Medit lo sa bann resi. Ler ou fer sa, sa i kapab ed ou pour fer Zeova vin ou Ros.

SWIV LEGZANP ZEOVA

11. Akoz nou anvi demontre bann menm kalite ki Zeova i annan? (Vwar bwat “En lobzektif pour bann zenn frer.”)

¹¹ Dan sa lartik, nou’n vwar serten kalite ki Zeova i annan ki fer li parey en ros. Aprezan annou vwar ki mannyer nou kapab demontre sa bann kalite. Si nou fer nou mye pour devlop bann kalite ki Zeova i annan, nou pou pli byen kapab ankouraz nou bann frer ek ser. Par egzanp, Zezi ti donn Simon sa non Sefas (ki’n ganny tradwir “Pyer”), ki vedir “En bout ros.” (Zan 1:42) Sa ti vedir ki Pyer ti pou rekonfort lezot dan kongregasyon e i ti pou ed zot pour annan en lafwa for. Labib i dir ki bann ansyen i parey “lonbraz en gro ros.” Sa i vedir ki zot protez bann ki dan kongregasyon. (Iza. 32:2) Me nou tou nou kapab ankouraz kanmarad si nou devlop bann kalite ki Zeova i annan.—Efe. 5:1.

12. Ki mannyer nou kapab vin en refiz pour lezot?

¹² Vin en refiz pour bann frer ek ser. Ler nou bann frer ek ser i perdi zot lakaz oubyen zot bezwen kit zot lakaz akoz dezas natirel ouswa lager, nou kapab fer zot vin reste avek nou. Anmezir keksoz i vin pli difisil dan sa “bann dernyen zour,” nou pou annan plis loportinite pour ed nou bann frer ek ser. (2 Tim. 3:1) Nou osi kapab rekonfort nou bann frer ek ser e demontre lanmour anver zot. En fason nou kapab fer sa, i par fer zot santi zot alez ler zot vin renyon e rekonfort zot. Sa pou fer ki kongregasyon pou vin en landrwa kot i annan lanmour e kot nou ankouraz kanmarad. Nou viv dan en lemonn kot dimoun i tret kanmarad dan en move fason. Sa i kapab fer ki nou bann frer ek ser i santi zot vreman strese e santi ki lezot pa kontan zot. Ler nou bann frer ek ser i asiste renyon, nou anvi fer tou sa ki nou kapab pour ankouraz zot e fer zot santi ki nou kontan zot.

13. Ki mannyer bann ansyen i kapab vin en refiz pour lezot? (Vwar portre.)

¹³ Bann ansyen i kapab vin en refiz pour bann frer ek ser ki pe pas dan bann moman difisil. Ler i annan en dezas natirel oubyen ler en frer oubyen en ser i tonm malad en sel kou, deswit bann ansyen i fer laranzman pour ed sa frer oubyen sa ser. Bann ansyen i osi servi Labib pour ankouraz e donn konsey zot bann frer ek ser. Bann frer ek ser pou santi zot konfortab pour demann en ansyen pour ed zot si zot konnen ki sa ansyen i en dimoun zantiy, ki pare pour ekoute e ki esey konpran santiman lezot. Si en ansyen i demontre sa bann kalite, sa pou fer lezot santi ki i kontan zot e i pou pli fasil pour zot aplik nenport konsey ki baze dan Labib ki sa ansyen i donn zot.—1 Tesa. 2:7, 8, 11.

14. Ki mannyer nou kapab montre ki nou en dimoun ki diny konfyans?

¹⁴ Vin en dimoun ki diny konfyans. Nou anvi ki lezot i konnen ki zot kapab depan lo nou, sirtou dan bann letan difisil. (Prov. 17:17) Ki nou kapab fer pour ki lezot i vwar nou konman en dimoun ki diny konfyans? Nou fer zefor pour swiv legzanp Zeova toulezour. Par egzanp nou gard nou promes e nou fer zefor pour toultan aler. (Mat. 5:37) Nou osi ede ler lezot i bezwen led. An plis ki sa, nou fer sir ki nou fer nou size ki nou gannyen dan kongregasyon dapre lenstriksyon.

15. Ki byenfe kongregasyon i gannyen ler bann ansyen i diny konfyans?

¹⁵ Bann ansyen ki diny konfyans i anmenn en gran byenfe pour kongregasyon. Ki mannyer sa? Ler bann frer ek ser i konnen ki zot kapab kontakte bann ansyen ler zot bezwen led, sa i ed zot pour pa tro enkyet. Bann frer ek ser i santi ki bann ansyen i kontan zot ler bann ansyen i pare pour ed zot. Ler bann ansyen i servi Labib ek nou bann piblikasyon pour donn konsey olye donn konsey dapre zot prop lopinyon, bann frer ek ser pou annan plis konfyans dan zot. Bann frer ek ser i annan konfyans dan bann ansyen ki pa dir lezot bann keksoz konfidansyel e ki gard zot promes.

16. Ki byenfe nou gannyen e ki byenfe lezot i gannyen ler nou fer sa ki Zeova i dir i drwat?

¹⁶ Toultan fer sa ki Zeova i dir i drwat. Si nou obei Zeova dan tou sa ki nou fer e nou fer desizyon baze lo bann prensip Labib, nou pou vin en bon legzanp pour lezot. Anmezir nou etidye Labib e nou lafwa i vin pli for, nou pou reste fidel avek Zeova ek son bann standar. Nou pou rekonnet bann fo lansennyman ek bann nide ki pa dapre fason panse Zeova e sa pou fer ki nou pa pou ganny enfliyanse par sa bann keksoz. (Efe. 4:14; Zak 1:6-8) Nou lafwa dan Zeova ek son bann promes i ed nou pour reste kalm ler nou ganny move nouvel. (Ps. 112:7, 8) Nou osi kapab ed bann ki pe fer fas avek bann difikilte.—1 Tesa. 3:2, 3.

17. Kwa ki fer bann ansyen kapab ed lezot pour reste kalm e pour annan en lafwa for dan Zeova?

¹⁷ Bann ansyen i bezwen annan kontrol dan tou keksoz, annan bon zizman, zot lavi i devret annord e zot devret rezonnab. Sa bann frer i ed lezot pour reste kalm e pour annan konfyans dan Zeova. Zot ankouraz bann frer ek ser par “reste atase avek sa vre parol.” (Tit 1:9; 1 Tim. 3:1-3) Atraver zot legzanp e lankourazman ki zot donnen, bann ansyen i ed bann frer ek ser pour asiste renyon regilyerman, pour partisip dan predikasyon regilyerman e pour fer zot letid personnel regilyerman. Ler bann frer ek ser i fer fas avek bann problenm ki fer zot enkyet, bann ansyen i fer zot rapel ki zot bezwen depan lo Zeova e konsantre lo son bann promes.

18. Akoz nou anvi loue Zeova e vin pli pros avek li? (Vwar bwat “En fason ki nou kapab vin pros avek Zeova.”)

¹⁸ Apre ki nou’n etidye bann zoli kalite ki Zeova i annan, parey Lerwa David nou kapab dir: “Ki Zeova, mon Ros i ganny loue.” (Ps. 144:1) Nou pou toultan kapab depan lo Zeova. Menm ler nou’n vin vye, nou asire ki Zeova pou kontinyen ed nou pour reste pros avek li e nou pou kapab dir: “I mon Ros.”—Ps. 92:14, 15.