LARTIK LETID 21
KANTIK 21 Kontinyen rod Rwayonm premye
Esper avek enpasyans sa lavil ki permanan
“Nou pe esper avek enpasyans sa lavil ki pe vini.”—EBR. 13:14.
TOPIK
Nou pou vwar ki mannyer sa ki ganny dir dan Ebre sapit 13 i kapab ed nou la konmela e dan lavenir.
1. Ki Zezi ti dir ti pou arive avek Zerizalenm dan premye syek?
DETRWA zour avan Zezi Kri ti mor, i ti donn son bann disip en profesi. Sa profesi ti annan en premye lakonplisman ler Zerizalenm ek son tanp ti ganny detrir. I ti averti son bann disip ki en zour, lavil Zerizalenm ti pou ganny “antoure avek bann kan larme.” (Lik 21:20) Zezi ti dir son bann disip ki dek ki zot vwar sa larme, zot ti devret kit Zide deswit. Parol Zezi ti vin vre e larme Romen ti antour Zerizalenm.—Lik 21:21, 22.
2. Ki konsey zapot Pol ti donn bann Kretyen ki ti pe viv Zide ek Zerizalenm?
2 Zis detrwa lannen avan ki larme Romen ti anserkle Zerizalenm, zapot Pol ti ekri en let pour bann Kretyen Zide ek Zerizalenm. Dan sa let, i ti annan en mesaz enportan e ozordi nou konn sa let konman liv Ebre. Dan sa let, Pol ti donn sa bann Kretyen bann konsey enportan ki ti pou ed zot prepare pour sa ki ti pe al arive. Me ki ti pe al arive egzakteman? Zerizalenm ti pe al ganny detrir. Si bann Kretyen ti anvi sirviv sa destriksyon, zot ti pou bezwen pare pour kit deryer zot lakour ek biznes. Pol ti dir sa konsernan Zerizalenm: “Nou napa en lavil ki permanan.” I ti osi dir: “Me nou pe esper avek enpasyans sa lavil ki pe vini.”—Ebr. 13:14.
3. Kisisa sa “lavil ki annan en fondasyon solid” e akoz nou kontinyen esper li?
3 Ler bann Kretyen ti deside pour kit Zerizalenm ek Zide, i tre probab ki dimoun ti riy zot e dir ki zot bet. Me sa desizyon ti sov zot lavi. Ozordi, dimoun i kapab dir ki nou bet parski nou pa depan lo bann imen pour rezourd bann problenm dan lemonn e nou pa tay deryer larzan pour annan en lavi konfortab. Me akoz nou swazir pour viv nou lavi koumsa? Parski nou konnen ki sa lemonn ek bann keksoz dan sa lemonn i tanporer. Nou pe esper Rwayonm Bondye setadir sa “lavil ki annan en fondasyon solid” e “ki pe vini.”a (Ebr. 11:10; Mat. 6:33) Anba sak soutit dan sa lartik, nou pou vwar: (1) ki mannyer konsey ki zapot Pol ti donn bann Kretyen dan premye syek ti ed zot pour kontinyen esper “sa lavil ki pe vini,” (2) ki mannyer Pol ti prepar zot pour sa ki ti pe al arive e (3) ki nou aprann avek sa konsey ki Pol ti donnen.
ANNAN KONFYANS DAN SA ENN KI PA POU ZANMEN ABANDONN OU
4. Akoz Zerizalenm ti enportan pour bann Kretyen?
4 Lavil Zerizalenm ti enportan pour bann Kretyen. Sa premye kongregasyon Kretyen ti ganny etablir dan sa lavil lannen 33 e bann frer lo konsey direkter ti reste dan sa lavil. Osi, serten Kretyen ti annan lakaz ek en kantite keksoz materyel dan sa lavil. Kantmenm sa, Zezi ti averti son bann disip ki zot ti pou bezwen kit Zerizalenm e menm kit Zide.—Mat. 24:16.
5. Ki mannyer Pol ti prepar bann Kretyen Zerizalenm pour sa ki ti pe al arive?
5 Pol ti anvi prepar bann Kretyen Zerizalenm pour sa ki ti pe al arive. Alor i ti ed zot konpran pwennvi Zeova lo sa lavil. Pol ti fer zot rapel ki dapre pwennvi Zeova, tanp, bann pret ek bann sakrifis ki ti ganny ofer Zerizalenm ti nepli sakre. (Ebr. 8:13) Laplipar zabitan sa lavil ti’n rezet Mesi. Dimoun ti nepli bezwen al Zerizalenm pour al ador Zeova e sa lavil ek son tanp ti pou ganny detrir.—Lik 13:34, 35.
6. Akoz sa konsey ki Pol ti donn bann Kretyen dan Ebre 13:5, 6 ti vin dan sa bon moman?
6 Ler Pol ti ekri sa let pour bann Kretyen Ebre, Zerizalenm ti en lavil ki ti pe prospere. En ekriven Romen ki ti pe viv pandan sa letan, ti dir ki Zerizalenm ti sa lavil pli renonmen dan sa parti lemonn. Tou le lannen, bann Zwif sorti dan plizyer landrwa ti vin dan sa lavil pour bann lafet. Sa ti kontribye pour fer sa lavil prospere. I tre probab ki sa ti fer serten Kretyen fer en kantite larzan. Petet i pour sa rezon ki Pol ti dir zot: “Montre dan zot fason viv ki zot pa kontan larzan e kontant zot avek sa ki zot annan.” Apre i ti sit en verse dan Lekritir kot Zeova ti asir sakenn parmi son bann serviter: “Mon pa pou zanmen kit ou e mon pa pou zanmen abandonn ou.” (Lir Ebre 13:5, 6; Det. 31:6; Ps. 118:6) Bann Kretyen ki ti reste Zerizalenm ek Zide ti pou bezwen rapel sa promes pli tar. Akoz? Parski pa bokou letan apre ki zot ti’n ganny sa let, zot ti pou oblize kit zot lakour, zot biznes ek laplipar zot bann keksoz materyel. Zot ti pou bezwen konmans en nouvo lavi dan en lot landrwa e sa pa ti pou fasil.
7. Akoz depi la konmela nou devret devlop plis konfyans dan Zeova?
7 Ki nou aprann? Ki pou arive byento? “Gran ladetres” pou konmanse e sa move lemonn pou ganny detrir. (Mat. 24:21) Parey bann Kretyen dan premye syek, nou bezwen reste eveye e prepar nou pour sa ki pe al arive. (Lik 21:34-36) Pandan gran ladetres, i kapab ki nou pou bezwen kit deryer serten oubyen tou nou bann keksoz materyel. Sa letan, nou pou bezwen vreman annan konfyans ki Zeova pa pou zanmen abandonn nou. Nou kapab montre ki nou annan konfyans dan Zeova depi la konmela. Demann ou lekor: ‘Eski mon bann desizyon ek lobzektif i montre ki mon pa pe met mon konfyans dan larises? Oubyen eski i montre ki mon annan konfyans ki Zeova pou pran swen avek mwan?’ (1 Tim. 6:17) Menm si nou kapab aprann avek sa ki ti arive dan premye syek, sa “gran ladetres” ki pou konmanse byento pou bokou pli difisil ki sa ki okenn Kretyen in deza eksperyanse. Alor, ki mannyer nou pou konnen ki pour fer ler gran ladetres i konmanse?
OBEI BANN KI PE DIRIZE DAN KONGREGASYON
8. Ki lenstriksyon Zezi ti donn son bann disip?
8 Detrwa lannen apre ki bann Kretyen Ebre ti’n ganny sa let ki Pol ti’n ekri, sa bann Kretyen ti vwar larme Romen anserkle lavil Zerizalenm. Ler sa ti arive, bann Kretyen ti konnen ki i ti’n ariv ler pour zot kit Zerizalenm parski sa ti vedir ki byento sa lavil ti pou ganny detrir. (Mat. 24:3; Lik 21:20, 24) Me kote zot ti pou ale? Zezi ti’n zis dir zot: “Bann ki Zide konmans sov dan montanny.” (Lik 21:21) I ti annan en kantite montanny dan sa rezyon. Alor ki mannyer zot ti pou konnen ki montanny zot ti pou ale?
9. Petet akoz bann Kretyen ti’n kapab demande ki montanny zot pou sov ladan? (Vwar map.)
9 Annou vwar serten montanny dan sa rezyon kot bann Kretyen ti kapab ale. Par egzanp, i ti annan bann montanny Samari, bann montanny Galile, Montanny Ermonn ek bann montanny Liban e osi bann montanny ki lot kote Larivyer Zourden. (Vwar map.) Serten lavil dan sa bann montanny ti paret sen e sof. Par egzanp, lavil Gamla ti sitye lo en montanny ki ti o e i ti vreman difisil pour ariv kot sa lavil. Serten Zwif ti krwar ki sa lavil ti pou en landrwa sen e sof. Me pli tar, i ti annan en lager ant bann Zwif ek bann Romen dan sa lavil. Sa lavil ti ganny detrir e en kantite dimoun ti mor.b
I ti annan en kantite montanny kot bann Kretyen ti’n kapab sove me pa tou ki ti sen e sof (Vwar paragraf 9)
10-11. (a) Petet ki mannyer Zeova ti gid bann Kretyen? (Ebre 13:7, 17) (b) Ki byenfe bann Kretyen ti gannyen ler zot ti obeir bann ki ti pe dirize dan kongregasyon? (Vwar portre.)
10 I paret ki Zeova ti servi bann frer ki ti pe dirize dan kongregasyon pour dir bann Kretyen kote zot pou ale. En istoryen ki ti apel Eusebius ti ekri konsernan sa letan kot bann Zwif ti bezwen kit Zerizalenm. I ti dir ki Bondye ti revel avek serten frer Zerizalenm ki bann Kretyen ti devret kit Zerizalenm e al Pela, ki ti en lavil Pere. Pela ti en bon landrwa pour bann Kretyen ale. Vi ki i pa ti lwen avek Zerizalenm, i ti fasil pour zot ariv laba. Osi, laplipar dimoun ki ti reste Pela pa ti Zwif, alor zot pa ti pe esey lager avek bann Romen pour ganny laliberte.—Vwar map.
11 Bann Kretyen ki ti “obeir sa bann ki pe diriz” kongregasyon ti sov dan montanny e al Pela. Sa ti fer ki zot pa ti ganny touye. (Lir Ebre 13:7, 17.) Vi ki zot ti kontinyen esper Rwayonm Bondye setadir sa “lavil ki annan en fondasyon solid,” Zeova pa ti abandonn zot.—Ebr. 11:10.
Pela ti en landrwa sen e sof pour bann Kretyen ale e i pa ti lwen avek Zerizalenm (Vwar paragraf 10-11)
12-13. Ki mannyer Zeova in gid son pep pandan bann moman vreman difisil?
12 Ki nou aprann? Zeova i servi bann ki pe dirize dan kongregasyon pour donn son pep bann lenstriksyon spesifik. Dan Labib, i annan en kantite legzanp ki montre lafason ki Zeova ti servi bann berze pour gid son pep dan bann letan vreman difisil. (Det. 31:23; Ps. 77:20) Ozordi, nou osi nou’n vwar en kantite levidans ki montre ki Zeova pe kontinyen servi bann ki pe dirize dan kongregasyon pour gid son pep.
13 Par egzanp, o konmansman pandemi COVID-19, ‘bann ki pe dirize’ dan lorganizasyon ti donn lenstriksyon. Bann ansyen ti ganny lenstriksyon lo ki mannyer pour ed bann frer ek ser pour kontinyen reste pros avek Zeova. Zis detrwa mwan apre ki sa pandemi ti’n konmanse, nou ti annan en lasanble ki ti ganny fer dan plis ki 500 langaz. Nou bann frer ek ser ti kapab swiv sa progranm lo Enternet, televizyon oubyen ekoute lo radyo. Nou pa ti’n zanmen fer en lasanble koumsa oparavan. Pandan sa pandemi, nou ti kontinyen ganny manze spirityel e sa ti fer ki nou ti kontinyen reste ini. Nou kapab asire ki nenport problenm ki nou fer fas avek dan lavenir, Zeova pou kontinyen ed bann ki pe dirize dan kongregasyon pour fer bann desizyon saz. Parey nou’n vwar, pour nou kapab pare pour gran ladetres e pour nou kapab fer bann desizyon saz pandan sa moman difisil, nou bezwen annan konfyans dan Zeova e obeir bann ki pe dirize dan kongregasyon. Me ki lezot kalite ki nou bezwen annan?
KONTAN KANMARAD PAREY BANN FRER EK SER E DEMONTRE LOSPITALITE
14. Dapre Ebre 13:1-3, ki kalite bann Kretyen ti bezwen demontre pandan bann lannen avan Zerizalenm i ganny detrir?
14 Ler gran ladetres i konmanse, nou pou bezwen demontre lanmour pour kanmarad plis ki oparavan. Pandan sa letan, nou pou bezwen swiv legzanp bann Kretyen ki ti reste Zerizalenm ek Zide. Zot ti’n toultan demontre lanmour pour kanmarad. (Ebr. 10:32-34) Me pandan bann lannen avan Zerizalenm ti ganny detrir, bann Kretyen ti bezwen montre ki zot ti “kontan kanmarad parey bann frer ek ser” e “demontre lospitalite” plis ki zot ti pe deza fer.c (Lir Ebre 13:1-3.) Anmezir lafen i vin pli pros, nou osi nou bezwen fer menm parey avek nou bann frer ek ser.
15. Apre ki bann Kretyen Ebre ti’n kit Zerizalenm, akoz zot ti bezwen montre ki zot kontan kanmarad parey bann frer ek ser e demontre lospitalite?
15 Ler larme Romen ti anserkle Zerizalenm e apre zot ti ale, bann Kretyen ti kapab sove. Me zot ti zis kapab anmas detrwa keksoz pour al avek. (Mat. 24:17, 18) Zot ti bezwen ed kanmarad ler zot ti pe vwayaze dan bann montanny e osi ed kanmarad pour trouv en landrwa reste ek en travay ler zot ti ariv Pela. En kantite frer ek ser ti bezwen manze, lenz ek en landrwa reste. Ler sa bann Kretyen ti pran swen avek kanmarad, zot ti montre ki zot ti vreman kontan kanmarad parey bann frer ek ser e ki zot ti pe demontre lospitalite.—Tit 3:14.
16. Ki mannyer nou kapab demontre lanmour anver bann frer ek ser ki bezwen nou led? (Vwar portre.)
16 Ki nou aprann? Lanmour i motiv nou pour ed nou bann frer ek ser ler zot bezwen led. Par egzanp, en kantite parmi pep Bondye i kontan pour ed bann frer ek ser ki’n vin refizye akoz lager oubyen dezas natirel. Zot donn sa bann refizye bann keksoz ki zot bezwen pour viv, ed zot e ankouraz zot pour kontinyen servi Zeova. En ser ki ti reste Likrenn ki ti bezwen kit son lakour akoz lager i dir: “Nou’n vwar lafason ki Zeova ti servi nou bann frer ek ser pour ed nou e pran swen avek nou. Bann frer ek ser Likrenn, Laongri e isi Lalmanny ti akey nou byen e ed nou en kantite.” Ler nou demontre lospitalite anver nou bann frer ek ser e nou donn zot sa ki zot bezwen, nou travay ansanm avek Zeova.—Prov. 19:17; 2 Kor. 1:3, 4.
Ozordi, bann Kretyen ki bann refizye i bezwen nou led (Vwar paragraf 16)
17. Akoz i enportan ki depi la konmela nou aprann pour kontan kanmarad parey bann frer ek ser e pour demontre lospitalite?
17 Pandan gran ladetres, nou pou bezwen ed kanmarad plis ki nou pe deza fer la konmela. (Aba. 3:16-18) Depi la konmela, Zeova pe ed nou devlop bann kalite ki nou pou bezwen sa letan. I pe ansenny nou pour kontan kanmarad parey bann frer ek ser e pour demontre lospitalite.
KI POU ARIVE DAN LAVENIR?
18. Ki mannyer nou kapab swiv legzanp bann Kretyen Ebre dan premye syek?
18 Parey listwar i montre, bann Kretyen ki ti sov dan montanny ti sirviv ler Zerizalenm ti ganny detrir. Zot ti bezwen kit tou keksoz deryer. Me Zeova pa ti zanmen abandonn zot. Ki nou aprann avek zot legzanp? Nou pa vreman konnen ki pou arive dan lavenir. Me Zezi ti dir ki nou bezwen pare pour obeir. (Lik 12:40) Nou osi kapab aplik sa ki nou aprann dan sa let ki Pol ti ekri pour bann Kretyen Ebre dan premye syek. Osi, Zeova in promet sakenn parmi nou ki i pa pou zanmen kit nou oubyen abandonn nou. (Ebr. 13:5, 6) Alor annou kontinyen esper sa lavil ki permanan setadir Rwayonm Bondye. Si nou fer sa, nou pou ganny en kantite benediksyon ki pou dire pour touzour.—Mat. 25:34.
KANTIK 157 Finalman vre lape!
a Dan letan Labib, souvandfwa bann lavil ti ganny dirize par en lerwa e bann lavil koumsa ti kapab ganny konsidere konman en rwayonm.—Zen. 14:2.
b Sa ti ariv lannen 67, pa bokou letan apre ki bann Kretyen ti’n kit Zide ek Zerizalenm.
c Sa mo ki’n ganny tradwir “kontan kanmarad parey bann frer ek ser” i kapab refer avek sa lanmour ki en dimoun i annan pour son prop fanmir. Me Pol ti servi sa mo pour dekrir sa kalite lanmour ki i annan dan kongregasyon.