Iduaribira Jeowaba jaradiamarẽã

1. ¿Ẽbẽrarãbara kʼãrẽta nesidapanʉ sobia panaita? (Mateo 5:3).

JEOWABARA kʼawuabʉ ẽbẽrarã jõmaʉ̃ba nesidapanʉta yiko koita, wua jʉ̃ĩta akʉza sama kʼãĩta. Naʉ̃nebemata aba dayirãba erpanʉ ẽ bʉrʉ zʉbʉriaseapanʉ. Adewara parãsi dayirãta Daizezedebemata kʼawuakĩrãnamarẽã (akʉra Mateo 5:3). Dayirã sobia baita kʼawuadaibara iyi kʼarebata nesidapanʉta, iyira ũdukʼawuaita akʉza iyi ʉ̃rʉ ĩjaita.

2. ¿Kʼãrẽ yizaba dayirãra jaradiabʉ dayirãba Jeowa kʼarebata nesidabʉra?

² Krĩchara ẽbẽra aba ewarade newidibʉ ʉ̃rʉ, iyira wua zore jʉ̃bʉ akʉza yiko koi neẽã bʉ, adewara bisia jũwũrʉa edre jewedabʉ. Adewara kewaradera kʉrãzaba obʉ akʉza jarrababa berabaribʉ. Maʉ̃ba iyira chĩãbʉ maʉ̃ kʼarea ẽbẽrarãbara igara akʉpanʉ, iyi sãwũã bʉ kʼarea. Iya kʼawuabʉ bia bʼaira nesidabʉta kʼarebata. Maʉ̃ kĩrãkʼa ẽbẽrarã Jeowa ʉ̃rʉ audre kʼawuakĩrãbʉbara kʼawuapanʉ ãyi bia bʼaira nesidapanʉta Daizezeba kʼarebamarẽã, maʉ̃ kʼarea zarea odayi Jeowaba jarabʉta oita sobia baita.

3. ¿Kʼãrẽta kʼawuadai naʉ̃ artikulodera?

³ Naʉ̃ artikulode bedʼeadayi wẽrã Feniciadebema ʉ̃rʉ, iya Jesúsʼa soiduba kʼarebata widibasi. Kʼawuadayi wẽrã Feniciadebemaba nebia sode erbʉdebemarata ũbea, maʉ̃ nebia ũbea sodebemata ũdubibara dayirãbida kʼawuapanʉbʉrʉ Daizeze kʼareba nesidata. Akʉza kʼawuadayi yumakẽrã ũbeadebemata, ãyira Jeowa neũdukʼawuara basi, maʉ̃ra Pedro, Pablo akʉza David basi.

WẼRÃ ABAɄBA ŨDUBISI Ʉ̃TABɄ ẼÃTA, MAPAE ẼÃTA AKɄZA ĨJÃBɄTA

4. ¿Kʼãrẽta omarẽã kãgabasi wẽrã Feniciadebemabara Jesúsba?

⁴ Ewari aba wẽrã Feniciadebemara jʉ̃ẽsi Jesús bʉidʉ, yi kau jaiba wawa bʉta Jesúsba kʼarebamarẽã (Mat. 15:​21-28). Iyira Jesús nãã sãkokode besi baera ũdubisi ẽbẽra bia basita. Akʉdaya maʉ̃ranebemata.

5. Wẽrã Feniciadebemabara ¿kʼãrẽ nebiata ũdubisi akʉza kʼãrẽta osi Jesúsbara? (Akʉra potota)

⁵ Jesústa bedʼeaside wẽrã Feniciadebemaʉ̃me Jesúsbara zokʼasi yiza aba, jarasi wẽrã Feniciadebemara usa zake kĩrãkʼa bʉta. Naʉ̃ wẽrãitara Jesúsba iya jaradara iyitara mitia ẽ basi, ¿kʼãrẽa? Iyi kulturadera usa zakerãra wũãwũãrabawara jemenebasi baera akʉza ãyirabara usara kãgapanasi baera. Dayaʼa mawũã jarasidabʉrʉ ¿kʼãrẽta okausi? ¿Kĩrʉ wãkausika? Wẽrã Feniciadebemaba maʉ̃ra oẽ basi awuarabʉrʉ nebiata osi, bari jaraita iyitrʉ ʉ̃ta bʉta krĩchaba ẽ basi. Adewara iyara mapae ẽ basi, widida ʉ̃rʉ widibasi baera Jesúsʼa kʼarebamarẽã akʉza Jesús ʉ̃rʉ wãrĩnu ĩjãbasi. Jesúsba jarasimina iyira zesita Israeldebemaratrʉ kʼarebaita, mawũãsidu naʉ̃ yuwẽrã kaura bebisi, iya ũdusi baera naʉ̃ yuwẽrãbara wãrĩnu ĩjãbʉta.

6. ¿Kʼãrẽta kʼawuaseapanʉ wẽrã Feniciadebema berabaridadeba?

⁶ Dayirãbara Jeowa kʼawa baita wẽrã Feniciadebema berabaridadeba kʼawuaseapanʉ ũtabʉta ũdubi ẽ baibarata, adewara pae ẽ baibarata akʉza wãrĩnu ĩjãbʉta ũdubibarata. Dayirãta ʉ̃tabʉta ũdubi ẽ bʉrʉ widida ʉ̃rʉ pae ẽã widiyi Daizezeʼa kʼarebamarẽã. Adewara jipa yibia dayirãba ĩjãbʉta ũdubita Jesús ʉ̃rʉ akʉza ĩjãita Jesúsba zokʼapeadara ʉ̃rʉ dayirã akʉita (Mat. 24:​45-47). Jeowata akʉza Jesúsʼʉ̃me sobiapanʉ kʼarebakĩrãpanʉ baera ẽbẽrarã iyi kʼawa bakĩrãpanʉta (akʉra Santiago 1:​5-7). Kʼawuadadrʉ sãwũã Daizeze Bedʼea ʉ̃rʉ kʼawuatakeraita, Jeowaba kãgabʉde baita akʉza iduaribita Jeowaba kʼarebamarẽã. Adewara kʼawuadayi sãwũã Pedro, Pablo akʉza Davidʼde kĩrãkʼa oseapanʉta.

PEDRODE KĨRÃKʼA ODADRɄ: DAIZEZE BEDʼEA Ʉ̃RɄ KʼAWUATAKERADRɄ

7. (1) ¿Jesúsbara kʼãrẽta omarẽã jarasi Pedroʼara? (2) ¿Adewara Pedrobara kʼãrẽta oibarabasi? (Hebreos 5:14–6:1).

⁷ Krĩchadadrʉ apostol Pedro yiza ʉ̃rʉ. Iyira judio basi akʉza mesera ĩjãsi Jesúsʼra dayirã ẽdrʉbibarita. Iyara kʼawuabasi Jeowaba Jesúsʼra zokʼasita ẽbẽrarã jaradiamarẽã bedʼea bia ewari jõmaʉ̃ne bai ʉ̃rʉ (Juan 6:​66-68). Jesús ʉ̃ta wãi naweda Pedroʼa jarasi akʉmarẽã iyi kʼaidubemarata. Akʉza Jeowabara kʼarebasi bʉmarẽã libro ũme Daizeze Bedʼeadebemata (Juan 21:17). Pedroba ũrĩsi Jesúsba jaradata, maʉ̃ kʼarea kʼarebasi akʉza jaradiasi Jesús kʼaidubemarata. Jesúsba jarada oita Pedrobara audre kʼawuaibarabasi Daizeze ʉ̃rʉ, bari jaraita Pedrobara Daizeze Bedʼeadebema Pabloba bʉdata kʼawuasi. Pedroba jarasi ʉ̃kʉrʉ bedʼea Pabloba bʉdara iyitara zare basita ũrĩta, mamina Pedrobara iya kʼawuabʉta idubʉ ẽ basi, ĩjãbasi baera Jeowaba kʼarebaita bia ũrĩbita akʉza kʼarebaita iya kʼawua wãta oũdubita (akʉra Hebreos 5:14–6:1; 2 Ped. 3:​15, 16).

8. ¿Sãwũã Pedrobara ũdubisi Jeowade ĩjãbʉta?

⁸ Pedrobara ũdubisi Jeowade ĩjãbʉta iya jarabʉta ũrĩsi baera, ¿sãwũã? Ewari aba Jope drʉade bʉde, Jeowa angelba jarasi Pedroʼa beamarẽã akʉza komarẽã nedʉwʉrʉra Moisés leyba jarabʉta ko ẽ baibarata. Judioraitara maʉ̃ oira jipade zarea basi, maʉ̃ kʼarea Pedrobara naʉ̃ta panʉsi: «Nokʼó, mʉãrã kʼo ẽã, ne mitiata daia kʼobidʼa ẽãrã mʉãrã kʼokʼa». Maʉ̃ tẽã angelba naʉ̃ta jarasi: «Daizezeba nene ẽã obʉrʉta bʉa ne mitia arãrũã» (Hech.10:​9-15). Maʉ̃ iya ũduda tẽã zesida yumakẽrãta ũbea iyi bʉidʉ, maʉ̃ra Cornelioba zokʼadapeada basi jaramarẽã Pedrora iyi deidʉ jʉ̃ẽmarẽã iyiʉ̃me bedʼeaita. Maʉ̃ ewaride judiora nokʼorabara jaradiapanasi biga ẽ basita judio ẽãra deidʉ wãira. Maʉ̃ kʼarea Pedroitara zare basibaibara Cornelio deidʉ wãita, iyira judio ẽ basi baera (Hech. 10:​28, 29). Pedro berabaridadeba Jeowabara ũdubisi maʉ̃neba ʉ̃ta ẽbẽrarã jõma kãgabasita Daizeze Bedʼea ʉ̃rʉ jaradiamarẽã. Pedrobara wãña ĩjãsi Jeowaba jaradara (Prov. 4:18). Pedroba jaradiasi Cornelioʼa akʉza jõma mebẽrã iyi deda panʉra, adewara Pedrora sobia basi ũdubʉrʉde wãrĩnu ĩjãpanasita akʉza sãwũã Jeowa jaure zareata ãyide basita akʉza buru kʼoepanʉta (Hech. 10:​44-48).

9. Dayirãba bedʼea zarea ʉ̃rʉ kʼawuakĩrãbʉbʉrʉ, ¿kʼãrẽ nebiata ũme odayi?

⁹ Pedrode kĩrãkʼa dayirãbida ewariza kʼawuadaibara Daizeze Bedʼea ʉ̃rʉ, ʉ̃kʉrʉ bedʼeara ʉ̃rĩta zare ẽ mamina ʉ̃kʉrʉ bedʼea zarea bʉra ewari jʉrʉibara maʉ̃ ʉ̃rʉ ẽza kʼawuaita. Dayirãba maʉ̃ta odara nebiata ũme odayi, abara Daizezeta audre kãga wãnañi akʉza wawiata ũdubidayi. Ũmera jaradiakĩrã jaradiadayi Daizeze ʉ̃rʉ ẽbẽrarã jõma (Rom. 11:33; Apoc. 4:11). Dayirãba Pedro yizadeba kʼawuaseapanʉ, Jeowa organizasionba Daizeze Bedʼeade kʼawuabʉdeba awuara obʉrʉde dayirãbida mesera oibara ãya jarabʉ kĩrãkʼa, mawũã odara Jeowaba jaradiatakerayi akʉza dayirarã kʼẽrẽpa panañi iyi ode.

PABLODE KĨRÃKʼA ODADRɄ: JEOWABA KÃGABɄDE BADADRɄ

10. ¿Kʼãrẽta oibara Jeowaba jarabʉde baita? (Colosenses 3:​8-10).

¹⁰ Jeowaba dayirã jaradiabʉ sãwũã baibarata akʉza kʼãrẽ nebiata oibarata mawũã iyi sobiabita. Maʉ̃ kʼarea apostol Pabloba ũrãgʼata diasi, naweda aña obadata idubʉita, maʉ̃itara nãã krĩchabadata idubʉibara akʉza krĩcha yiwidita erbaibara (akʉra Colosenses 3:​8-10). Jeowaba jarabʉde baita ewariza zarea otakeraibara. Krĩchadrʉ Pablo yiza ʉ̃rʉ, iyi warrara baside zarea obasi Jeowaba kãgabʉde baita, mawũãmina iya biʼia ũdukʼawua ẽ basi baera Daizezeba sãwũã bamarẽa kãgabʉta, aña obasi. Bari jaraita biʼia ũdukʼawua ẽ basi Jesúsba jaradiabʉra, adewara iyira ʉ̃ta bʉta krĩchabasi. Maʉ̃ba iyira ba ẽ basi Daizezeba kãgabʉde (Gál. 1:14; Filip. 3:​4, 5; 1 Tim. 1:13).

11. ¿Kʼãrẽta idubʉibarabasi Pablobara?

¹¹ Pablo Jesús kʼaidubema bainãã iyira jipa kĩrʉmia basi. Daizeze Bedʼeaba jarabʉ iyira mejãcha kĩrʉbasita, maʉ̃ kʼarea pewã jʉ̃drʉsi Jesús kʼaidubemarata akʉza jipa beakĩrãbasi (Hech. 9:1). Jesús kʼaidu jʉ̃drʉda tẽã Pablobara mejãcha zarea osi kĩrʉmia bada idubʉita (Efe. 4:​22, 31). Mawũãsidu ewari aba Bernabéʉ̃me bedʼeata abarika ze ẽ kʼarea ãyira mejãcha kĩrʉsida, maʉ̃ba krĩchabiseabasi baibara iyara aripe obʉ ẽãta, mamina iya zarea obasi pae ẽ baita, awuarabʉrʉ iyara ewariza zarea obasi iya nãã obadara idubʉita, mawũã Jeowaba iyira biʼia akʉmarẽã (Hech.15:​37-39; 1 Cor. 9:27).

12. ¿Pabloba sãwũã idubʉsi iya nãã obadara?

¹² Pablobara ĩjã ẽ basi iyi zareadebʉrʉ, awuarabʉrʉ Pedrode kĩrãkʼa ĩjãsi Daizezeba zarea diabʉta nekʼãrẽ aña obadara idubʉita (Filip. 4:13; 1 Ped. 4:11). Mawũãsidu edaʉde iya aña obasi, maʉ̃ba sopʉabibasi. Maʉ̃ berabarinʉmʉne Pabloba krĩchabasi Jeowaba sãwũã kʼareba zebʉrʉta iyira, maʉ̃ba zarea diabasi Jeowaba kãgabʉde otakeraita (Rom. 7:​21-25).

13. ¿Sãwũã Pablode kĩrãkʼa oseapanʉ?

¹³ Dayirãta dããrababʉrʉ Jeowa ode, mane ẽ bʉrʉ ʉ̃rabʉrʉ eda wãsibʉrʉ, zarea odaibara Pablode kĩrãkʼa odaita, ¿sãwũã? Dayirãba mejãcha zarea oibara ewariza wika wikaʉde idubʉ wãita daya aña obadata. Mawũã Jeowaba nebia dayirã jaradiabʉde baita. Edaʉde dayirãba ne aña ototora, dayi sãwũã bʉ kʼarea, dayi sãwũã bedʼeabʉdeba akʉza daya kʼãrẽ obʉdeba, krĩcha ẽ baibara jipa nemitia omia badogota, awuarabʉrʉ zarea odaibara krĩcha takeraita Jeowaba kãgabʉde baita, mawũã nebia owãita (Rom. 12:​1, 2; Efes. 4:24). Dayirãta ẽbẽra bia bakĩrãbʉbʉrʉ akʉza nebiata okĩrãbʉbʉrʉ iduaribidaibara Jeowaba dayirã jaradiamarẽã akʉza kʼawuadaibara iyi ʉ̃rʉ, mawũã iya kãgabʉde baita.

DAVIDʼDE KĨRÃKʼA ODADRɄ: IDUARIBIRA JEOWABA KʼAREBAMARẼÃ

14, 15. Jeowabara idi ewadera ¿sãwũã kʼarebabʉ iyi odebemara? (Salmo 27:​5, akʉra poto yi nããranebemata).

¹⁴ Dayirãta wãrĩnu sobia baita nesidapanʉ Jeowaba kʼarebamarẽã. ¿Sãwũã Jeowaba kʼarebabʉ? ¿Daya kʼãrẽta odaibara Jeowaba kʼarebamarẽã?

¹⁵ Davidba kʼawuabasi bedʼea zroma berabarinʉmʉnera Jeowaba iyira kʼarebaita, iyide kʼarebata jʉrʉbʉbʉrʉ (akʉra Salmo 27:5). Mõbera Jeowabara idi ewadera, ¿sãwũã kʼarebabʉ iyi odebemara? Jeowabara kʼarebabʉ iyi ʉ̃rʉ ĩjãtakeramarẽã. Ẽbẽrarãba kãgada ẽ bayi dayirãba iyaʼa yiwidʼidamarẽã mamina Jeowaba kʼarebayi audre iyi kʼawa baita (Sal. 34:7; Is. 54:17). Satanásba, iyi kʼaidubemaraba akʉza dayi pewãpanʉrãba mejãcha zarea barabʉmina Jeowara audre zarea barabʉ ãyiraira. Akʉza dayirã beasidabʉrʉsida Jeowaba jẽda pirãdrʉbiyi (1 Cor. 15:​55-57; Apoc. 21:​3, 4). Adewara mejãchade krĩcha obʉrʉde Jeowaba kʼarebayi aduʼa baita, mawũã iyi ode takeraita (Prov. 12:25; Mat. 6:​27-29). Adewara Jeowaba dayirãta kãgabʉ baera, diabʉ mebẽrã kongregasionebemata dayirãta kʼarebamarẽã akʉza diabʉ zõrãrã kongregasionebemata dayirãta akʉmarẽã (Is. 32:​1, 2). Adewara dayirã ãba yi jʉrebarieda wãbʉrʉde audre kʼawuaseapanʉ Jeowaba dayirã sãwũã kʼarebaseabʉta (Heb. 10:​24, 25).

16. ¿Jeowaba sãwũã kʼarebasi Davidʼra?

¹⁶ Davidba ũrĩside Jeowaba jarabʉta, Jeowaba mejãcha kʼarebasi nebia oita mawũã zʉbʉria ẽ marẽã wuabema ẽbẽrarãba Jeowa bedʼea ũrĩ ẽ bʉ kĩrãkʼa (akʉra Proverbios 5:​1, 2). Mamina Davidba nekayirua oside Jeowabara iduaribisi iyira zʉbʉriamarẽã iya nemitia oda kʼarea (2 Sam. 12:​9, 10). Awuruba zʉbʉriabiside Davidʼra Jeowaʼa yiwidʼisi, maʉ̃ne Jeowaba so zarea babisi akʉza kĩrãbebisi mejãcha kãgabʉta, adewara kʼarebatakeraibasita (Sal. 23:​1-6).

17. ¿Sãwũã Davidʼde kĩrãkʼa oseapanʉ?

¹⁷ ¿Sãwũã Davidʼde kĩrãkʼa oseapanʉ? Dayirãba nekʼãrẽ okĩrãbʉrʉde Jeowa kʼarebata jʉrʉdaibara, mawuasidu edaʉde dayikʉza zʉbʉriaseabʉ dayirãba aña obʉ kʼarea akʉza Jeowa karebata jʉrʉ ẽ basi baera (Gál. 6:​7, 8). Daizeze ode bʉmina awuruba dayirãta zʉbʉriabidara yiwidʼidaibara Jeowaʼa, mawũãra iyara so zarea babiyi akʉza ũdubiyi dayirã kãgabʉta (Filip. 4:​6, 7).

IDUARIBIRA JEOWABA JARADIAMARẼÃ

18. (1) ¿Idi ewade ẽbẽra bioʉba kʼãrẽta krĩchapanʉ? (2) ¿Kʼãrẽta oibara Jeowa ʉ̃rʉ ĩjãtakeraita? (Akʉra potorata).

¹⁸ Testo poaga 2026debemaba naʉ̃ta jarabʉ: «Ẽbẽra abaʉba kʼawuabʉbʉrʉ Daizeze kʼareba nesidabʉta, maʉ̃ ẽbẽrarã sobiabʉ». Jesúsba jaradata dayirãba ũrĩbara akʉza iduaribidaibara Jeowaba dayirã jaradiamarẽã. Ẽbẽra bioʉba Daizezeʼa yi jaradiabida ẽ, mawũã ẽ bʉrʉ Daizeze ʉ̃rʉ ĩjãi kĩrãkʼa panʉmina ãya kãgabʉtrʉ opanʉ, mawũã ẽ bʉrʉ ĩjãpanʉ ẽbẽrarãnebʉrʉ, maʉ̃ kʼarea ãyira sobia panʉ ẽ. ¿Mawẽrã kʼãrẽta oibara Jeowa ʉ̃rʉ ĩjãtakeraita? Daizeze Bedʼea ʉ̃rʉ kʼawuatakeraibara adewara Jeowaba kãgabʉde baibara akʉza iduaribibara Jeowaba kʼarebamarẽã.