Apocalipsis
10 Tsaʼ j qʼuele yambʌ ángel pʼʌtʌl bʌ woliʼ jubel tilel ti panchan mosol bʌ ti tocal, i an jumpʼejl arcoíris yaʼ tiʼ jol. Jiñi i ñiʼ i wut cheʼ yilal bajcheʼ jiñi qʼuin, i jiñi i yaʼ* lajal bajcheʼ tsʌts bʌ oy cheʼ bʌ yilal bajcheʼ cʼajc. 2 Yaʼ tiʼ cʼʌb chucul i chaʼan jumpʼejl alʌ bʌlbil bʌ jun jambilix bʌ. Jiñi ñoj bʌ i yoc tsiʼ yʌcʼʌ yaʼ ti mar, pero jiñi i tsʼej tsiʼ yʌcʼʌ ti lum. 3 Cheʼ jiñi tsiʼ chaʼle cʼam bʌ oñel cheʼ bajcheʼ miʼ chaʼlen uqʼuel juncojt león. I cheʼ bʌ tsiʼ chaʼle oñel, tsaʼ caji ti tʼan jiñi 7 chajc.
4 Muqʼuix caj c tsʼijbun tsaʼ cʌlʌ chuqui tsiʼ yʌlʌ jiñi 7 chajc cheʼ bʌ tsiʼ chaʼle tʼan, pero tsaʼ cubi jumpʼejl tʼan tilem bʌ ti panchan i tsiʼ yʌlʌ: «Mucu tsaʼ bʌ i yʌlʌ jiñi 7 chajc i mach a tsʼijbun». 5 Jiñi ángel tsaʼ bʌ j qʼuele yaʼ bʌ waʼal ti mar yicʼot ti lum tsiʼ letsa ti panchan jiñi ñoj bʌ i cʼʌb 6 i tsiʼ waʼchoco i tʼan tiʼ cʼabaʼ jiñi cuxul bʌ tiʼ pejtelel ora, jiñi tsaʼ bʌ i mele panchan yicʼot chuqui tac an yaʼi, jiñi tsaʼ bʌ i mele lum yicʼot chuqui tac an, jiñi tsaʼ bʌ i mele mar yicʼot chuqui tac an yaʼi. Tsiʼ yʌlʌ: «Maʼañix mi caj i jalʼan. 7 Cheʼ tiʼ qʼuiñilel cheʼ bʌ muqʼuix caj i wus i trompeta jiñi i sietejlel bʌ ángel, mi caj i tsʼʌctiyel jiñi chʼujul bʌ i tʼan Dios mucul bʌ, ili jiñʌch tsaʼ bʌ i sube bajcheʼ wen tʼan jiñi i yaj eʼtelob, jiñi xʼaltʼañob».
8 I tsaʼ cubi jiñi tʼan tilem bʌ ti panchan woliʼ chaʼ pejcañon. Tiʼ subeyon: «Cucu i chʼʌmʌ jiñi bʌlbil bʌ jun jambilix bʌ chucul bʌ i chaʼan jiñi ángel waʼal bʌ ti mar yicʼot ti lum». 9 Tsaʼ majliyon yaʼ baqui an jiñi ángel i tsaʼ c sube chaʼan miʼ yʌqʼueñon jiñi alʌ bʌlbil bʌ jun. Tsiʼ jacʼbeyon: «Chʼʌmʌ jiñi bʌlbil bʌ jun i cʼuxu. Mi caj i chʼajʼesan a ñʌcʼ, pero yaʼ ti a wej tsaj mi caj a wubin bajcheʼ chab». 10 Jin chaʼan tsaʼ c chʼʌmʌ jiñi alʌ bʌlbil bʌ jun chucul bʌ i chaʼan jiñi ángel i tsaʼ j cʼuxu. Yaʼ ti quej tsaj bajcheʼ chab, pero cheʼ bʌ tsaʼ ujti j cʼux tsaʼ chʼajʼa jiñi c ñʌcʼ. 11 I tiʼ subeyoñob: «Yom maʼ chaʼ sub jiñi profecía tac tiʼ tojlel alʌ tejclum tac, ñuqui tejclum tac, tʼan tac yicʼot cabʌl reyob».