Noviembre

Mi an chut bʌ a walobilob coltañob chaʼan miʼ chajpañob i comentario. An tempa bʌ tac baqui miʼ tajtʌl ti tʼan wocol tac chaʼan jiñi ñujpuñel o chaʼan jiñi tsʼiʼlel. Pero tajol añʌch jumpʼejl o chaʼpʼejl párrafo baqui jiñi alʌlob miʼ mejlel i yʌcʼob i comentario. Cheʼ jaʼel, miʼ mejlel a coltañob chaʼan miʼ ñaʼtañob chucoch an i tajol maʼañic mi caj i yʌqʼuentelob jiñi comentario. Mi mucʼʌch a mel iliyi, maʼañic mi caj i yubiñob i chʼijyemlel cheʼ yambʌ muʼ bʌ i yʌqʼuentelob jiñi comentario (1 Tim. 6:18). Ti lac pejtelel miʼ mejlel lac chajpan comentario tac muʼ bʌ yʌqʼuen i ñuclel Jehová yicʼot muʼ bʌ i tijicñesʌben i pusicʼal la quermañujob (Pr. 25:11). Mucʼʌch i mejlel lac tsʼitaʼ taj ti tʼan chuqui ñusʌbil lac chaʼan, pero mach cʌlʌxic (Pr. 27:2; 2 Cor. 10:18). Yom bʌ mi lac mel jiñʌch cheʼ mi la cʌqʼuen i ñuclel Jehová, jiñi i Tʼan yicʼot jiñi i tejclum. w23.04 24, 25 párr. 17, 18

Chaʼan cañal lac wut yicʼot mi lac chʌn cʼʌn lac ñaʼtʌbal yomʌch an laj cʼuxbiya (Mat. 22:​37-39). Jiñi laj cʼuxbiya ti Dios miʼ ñijcañonla chaʼan mi lac bej chaʼlen subtʼan anquese wocolʌch (2 Tim. 1:​7, 8). Cheʼ jaʼel, jiñi laj cʼuxbiya tiʼ tojlel lac piʼʌlob miʼ ñijcañonla chaʼan mi lac bej subeñob jiñi wen tʼan i mi lac sʌclan bajcheʼ mi lac mel, ti teléfono o ti carta. Maʼañic mi lac ñaʼtan chaʼan maʼañix baʼ ora mi caj i qʼuextañob i melbal. Mi lac pijtan chaʼan ti jumpʼejl bʌ qʼuin miʼ tech i melob chuqui wen (Ez. 18:​27, 28). Mi laj cʼuxbiñob jaʼel jiñi la quermañujob, jin chaʼan mi laj coltañob yicʼot mi lac ñuqʼuesʌbeñob i pusicʼal (1 Tes. 5:11). Lajal bajcheʼ ti jumpʼejl guerra, jiñi soldadojob miʼ lajal coltañob i bʌ. Joñonla jaʼel, maʼañic baʼ ora la com lac low la quermañujob mi muqʼuic caj lac chaʼ sutqʼuin mi an chuqui mi lac melbentel (1 Tes. 5:​13, 15). Yambʌ bajcheʼ mi lac pʌs chaʼan mi laj cʼuxbin la quermañujob jiñʌch cheʼ mi laj qʼuelob ti ñuc jiñi waʼchocobiloʼ bʌ ti congregación (1 Tes. 5:12). w23.06 10 párr. 6; 11 párr. 10, 11

Junchajp bajcheʼ mi lac pʼʌtʼesan lac ñopoñel jiñʌch cheʼ mi lac wen ñaʼtan i tojol laj coltʌntel come jiñi miʼ yʌqʼueñonla lac ñop chaʼan mucʼʌch caj i tsʼʌctiyel albil bʌ i chaʼan Dios. Wen ñuc i cʼʌjñibal cheʼ mi lac ñaʼtan pejtelel chuqui tsaʼ mejli chaʼan miʼ yʌjqʼuel laj coltʌntel i chucoch tsaʼ mejli. Cheʼ bajcheʼ jiñi mi caj lac ñumen ñop chaʼan Jehová mi caj i chʼʌm tilel jiñi tsijib pañimil i chaʼan mi caj lac mejlel ti chumtʌl tiʼ pejtelel ora. ¿Chucoch mi la cʌl jiñi? Laʼcu lac ñaʼtan pejtelel tsaʼ bʌ ujti chaʼan miʼ tojtʌl lac mul. Jehová tsiʼ choco tilel ila ti Lum jiñi wen cʼuxbibil bʌ i Yalobil, jiñi ñumen wem bʌ i yamigo, chaʼan miʼ yilan pañimil bajcheʼ juntiquil toj bʌ wiñic. Cheʼ bʌ Jesús wʌʼan ti pañimil tsiʼ wen ila wocol yicʼot pʼumpʼumtic tiʼ tsʌnsayob. Jehová wen lets tsiʼ tojo. Jehová maʼañic tsiʼ yʌcʼʌ i Yalobil chaʼan miʼ yilan wocol cheʼ chaʼañic jach miʼ jumucʼ aqʼueñonla lac tijicñʌyel (Juan 3:16; 1 Ped. 1:​18, 19). Añʌch chuqui mi caj i mel chaʼan mi lac mejlel ti chumtʌl tiʼ pejtelel ora ti jiñi tsijiʼ bʌ pañimil come Jehová wen lets tsiʼ tojo. w23.04 27 párr. 8, 9

¿Yomʌch ba i chaʼ cuxtesan chʌmeñoʼ bʌ Jehová? Yomʌch. Cheʼ bʌ tsaʼ tsʼijbunti jiñi Biblia tsiʼ yʌcʼʌ chaʼan miʼ tajtʌl ti tʼan iliyi (Is. 26:19; Apoc. 20:​11-13). I Jehová mucʼʌch i tsʼʌctesan chuqui miʼ yʌl (Jos. 23:14). Tiʼ sujm, yomʌch i chaʼ cuxtesan jiñi chʌmeñoʼ bʌ. Laʼcu lac ñaʼtan tsaʼ bʌ i yʌlʌ Job. Mucʼʌch i ñop chaʼan, mi tsaʼ chʌmi, Jehová mi caj i chaʼ cuxtesan (Job 14:​14, 15). I jiñʌch bej yom bʌ Jehová tiʼ tojlel jiñi i wiñicob tsaʼix bʌ chʌmiyob. Yom i chaʼ cuxtesañob i cʼocʼ yicʼot tijicña miʼ chumtʌlob. ¿I chuqui miʼ ñaʼtan Jehová tiʼ tojlel jiñi tsaʼix bʌ chʌmiyob i maʼañic tsaʼ mejli i cʌñob jiñi i sujmlel? Yomʌch i chaʼ cuxtesañob jaʼel (Hech. 24:15). Yom chaʼan miʼ sujtelob tiʼ yamigo i miʼ chumtʌlob tiʼ pejtelel ora (Juan 3:16). w23.04 9 párr. 5, 6

¿Bajcheʼ miʼ mejlel a pʼʌtʼesan jiñi a pijtaya? Mi maʼ pijtan chumtʌl wʌʼ ti Pañimil, pejcan muʼ bʌ i yʌl jiñi Biblia chaʼan jiñi Paraíso i ñaʼtan chaʼan yaʼix añeti (Is. 25:8; 32:​16-18). Cheʼ maʼ ñaʼtan a bʌ yaʼ ti Paraíso, jiñi wocol tac mach jalic mi caj a wubin yicʼot mach ñuquic (2 Cor. 4:17). Jiñi pijtaya muʼ bʌ i yʌqʼueñonla Jehová mi caj i pʼʌtʼesañonla. An i yʌqʼueyonla pejtelel i cʼʌjñibal lac chaʼan chaʼan mi lac taj lac pʼʌtʌlel. Jin chaʼan, cheʼ bʌ wocol mi la cubin chaʼan mi lac tsʼʌctesan jumpʼejl eʼtel, chaʼan mi laj cuch jumpʼejl wocol o chaʼan tijicña mi lac chʌn melben i yeʼtel Jehová, laʼ lac chaʼlen oración ti jumpʼejl lac pusicʼal, laʼ lac pejcan jiñi Biblia chaʼan mi laj qʼuel chuqui miʼ subeñonla, laʼ lac jacʼben i coltaya jiñi hermanojob yicʼot laʼ lac chʌn ñaʼtan jiñi lac pijtaya. Cheʼ bajcheʼ jiñi, Jehová mi caj i yʌqʼueñonla jiñi lac pʼʌtʌlel «i cʼʌjñibal bʌ laʼ chaʼan chaʼan miʼ laj mejlel laʼ cuch yicʼot laʼ pijt i yicʼot laʼ tijicñʌyel» (Col. 1:11). w23.10 17 párr. 19, 20

Ti jiñi la coración tac cabʌl chucoch miʼ mejlel la cʌqʼuen wocolix i yʌlʌ Jehová. Laʼ la cʌqʼuen wocolix i yʌlʌ chaʼan pejtelel chuqui jiñi wem bʌ an lac chaʼan come yaʼʌch tilem pejtelel jiñi wem bʌ majtañʌl tac (Sant. 1:17). Jumpʼejl ejemplo, miʼ mejlel la cʌqʼuen wocolix i yʌlʌ chaʼan jiñi utsʼatax bʌ lac planeta, chaʼan jiñi melbil tac bʌ i chaʼan, chaʼan laj cuxtʌlel, lac familia, la camigojob yicʼot chaʼan jiñi lac pijtaya. I cheʼ jaʼel, la com la cʌqʼuen wocolix i yʌlʌ Jehová come miʼ yʌcʼonla ti sujtel tiʼ yamigo. ¿Chuqui tac miʼ ñijcan lac pusicʼal ti jujuntiquilonla chaʼan mi la cʌqʼuen wocolix i yʌlʌ Jehová? Tajol wocol mi la cubin chaʼan mi lac taj laj qʼuel come chumulonla ti jumpʼejl pañimil maʼañic bʌ chuqui miʼ qʼuel ti ñuc. Jiñi lac piʼʌlob jin jach miʼ ñumen pensariñob chuqui yomob i mach jiñic cheʼ miʼ yʌcʼob wocolix yʌlʌ chaʼan jiñi añoʼ bʌ i chaʼan. Mi tsaʼ lac toyo ili melbalʌl, jiñi la coración tac miʼ mejlel i sujtel bajcheʼ jumpʼejl lista baqui mucʼ jach laj cʼajtin chuqui tac jach la com. Chaʼan maʼañic miʼ yujtel jiñi, yom mi lac chaʼlen wersa chaʼan mi laj qʼuel ti ñuc yicʼot mi lac chaʼlen wersa chaʼan mi la cʌqʼuen wocolix i yʌlʌ Jehová chaʼan pejtelel muʼ bʌ i yʌqʼueñonla (Luc. 6:45). w23.05 4 párr. 8, 9

Jehová, jiñi lac Tat, miʼ cʼuxbiñonla i mach yomic chaʼan mi lac ñusan wocol (Is. 63:9). Pero jiñi mach yomic i yʌl chaʼan mi caj i junyajl jisan pejtelel jiñi wocol tac, muʼ bʌ i lajintel yaʼ ti Biblia bajcheʼ jaʼ o cʼajc (Is. 43:2). Jehová mucʼʌch caj i coltañonla chaʼan mi lac ñusan jiñi wocol tac yicʼot chaʼan chʌn xucʼul mi la cajñel tiʼ tojlel. Cheʼ jaʼel, mi caj i yʌqʼueñonla chʼujul bʌ i yespíritu (Luc. 11:13; Filip. 4:13). Jin chaʼan, miʼ mejlel lac ñop chaʼan Jehová tiʼ pejtelel ora mi caj i yʌqʼueñonla chuqui i cʼʌjñibal bʌ chaʼan mi laj cuch yicʼot chaʼan chʌn xucʼul mi la cajñel. Jehová miʼ pijtan chaʼan mi lac ñop tiʼ tojlel (Heb. 11:6). An i tajol mi lac ñaʼtan chaʼan Jehová maʼañic mi caj i mejlel i coltañonla cheʼ wen wocol woli lac ñusan. Pero jiñi Biblia miʼ subeñonla chaʼan tiʼ coltaya Jehová mi caj i mejlel lac ñusan baqui jach bʌ wocol (Sal. 18:29). Jin chaʼan, mach lac ñaʼtan chaʼan Jehová maʼañic mi caj i coltañonla. Laʼ lac melben oración ti jumpʼejl lac pusicʼal i laʼ lac ñop chaʼan mucʼʌch caj i jacʼ (Sant. 1:​6, 7). w23.11 22 párr. 8, 9

Ili tʼan tac miʼ pʌsbeñonla chaʼan jiñi cʼuxbiya muʼ bʌ i yubiñob jiñi ñujpuñemoʼ bʌ miʼ mejlel ti jalʼan tiʼ pejtelel ora. Cheʼ bajcheʼ jiñi cʼajc yom miʼ bej otsʌbentel i siʼil chaʼan maʼañic miʼ yajpel, jiñi ñujpuñemoʼ bʌ yom miʼ chaʼleñob wersa chaʼan maʼañic miʼ jilelob i cʼuxbiya. Pero an i tajol tiʼ caj jiñi wocol tac chaʼan taqʼuin, cʼamʌjel yicʼot cheʼ bʌ miʼ cosañob i yalobilob miʼ mejlel i yʌcʼ chaʼan jiñi cʼuxbiya miʼ jilel majlel. Jin chaʼan jiñi ñujpuñemoʼ bʌ yom miʼ chaʼleñob wersa chaʼan wem bʌ i yamigojob Jehová. w23.05 20, 21 párr. 1-3

Anquese lac papá lac mamá chʼejlob i miʼ subeñoñobla chaʼan cheʼ yomonla jaʼel, mach yomic i yʌl chaʼan mi caj lac waʼ taj lac chʼejlel. Ñaʼtancu ili, cheʼ an chuqui la com lac mel pero mach la cujilic melol, yom mi lac ñaxan qʼuel bajcheʼ miʼ mel jiñi yujilix bʌ, i cheʼ jiñi mi caj lac ñop lac mel jaʼel. Chaʼan mi lac taj lac chʼejlel yom mi laj cʌn tiʼ tojlel jiñi muʼ bʌ i pʌsob i chʼejlel. Cheʼ bajcheʼ Daniel, yom mi lac wen pejcan jiñi Biblia, mi lac mel oración i mi lac ñop chaʼan mucʼʌch caj i coltañonla. Mi mucʼʌch lac mel pejtelel iliyi, mi caj lac pʌs lac chʼejlel cheʼ bʌ miʼ tilel jumpʼejl wocol. Añʌch i wenlel cheʼ mi lac pʌs lac chʼejlel, mi laj qʼuejlel ti ñuc i tajol jiñi lac piʼʌlob mi caj i mulañob i ñumen cʌñob Jehová. w23.08 2 párr. 2; 4 párr. 8, 9

Ti griego, jiñi tʼan muʼ bʌ i chaʼlentel ti traducir «wen qʼuelela» miʼ cʼʌjñel cheʼ bʌ juntiquil lac piʼʌl yom miʼ wen qʼuel o miʼ tsajin chaʼan jiñi muʼ bʌ caj i mʌn, bajcheʼ oro o plata mero jiñʌchi, i mach woli jach i lotintel. Cheʼʌch yom mi lac mel jaʼel. Yom mi lac wen qʼuel miʼ sujmʌch jiñi woli bʌ lac subentel o jiñi woli bʌ lac pejcan. Pero ñumento yom mi lac mel ili ora, come woliʼ lʌcʼtiyel tilel jiñi ñuc bʌ wocol. Yom mi laj cʼʌn lac ñaʼtʌbal i maʼañic mi lac waʼ ñop pejtelel chuqui mi lac subentel. Yom mi lac wen qʼuel mi jiñi woli bʌ i yʌjlel cheʼʌch an bajcheʼ miʼ yʌl jiñi Biblia yicʼot i yorganización Jehová, cheʼ bajcheʼ jiñi maʼañic mi caj lac lotintel ti xibajob (Pr. 14:15; 1 Tim. 4:1). La cujil chaʼan jiñi i tejclum Jehová maʼañic mi caj i jilel ti jiñi ñuc bʌ wocol, pero mach la cujilic chuqui mi caj i yujtel ti lac tojlel ijcʼʌ chaʼbi majlel (Sant. 4:14). Pero Jehová mi caj i yʌqʼueñonla laj cuxtʌlel miʼ xucʼulonla tiʼ tojlel. Jin chaʼan, laʼ la cʌcʼ lac ñaʼtʌbal ti jiñi lac pijtaya i laʼ lac chajpan lac bʌ chaʼan jiñi i qʼuiñilel Jehová. w23.06 13 párr. 15, 16

Mach la cujilic bajcheʼ mi caj i tsʼʌctiyel pejtelel jiñi profecía (Dn. 12:​8, 9). Pero ili mach yomic i yʌl chaʼan maʼañic mi caj i tsʼʌctiyel jiñi profecía tac. La cujil chaʼan Jehová xucʼu xucʼul mi caj i tsictesʌbeñonla jiñi yom bʌ la cujil cheʼ tiʼ yorajlel, cheʼ bajcheʼ tsiʼ mele wajali. Mach jalix yom chaʼan mi caj i yʌjlel: «Wʌle chumulonla ti ñʌchʼtʌlel yicʼot maʼañix chuqui bʌbʌqʼuen bʌ» (1 Tes. 5:3). Cheʼ jiñi, jiñi yumʌlob mi caj i jisañob jiñi mach bʌ i sujmic ñopbalʌl tac (Apoc. 17:​16, 17). Ti wiʼil, mi caj i contrajiñob i tejclum Dios (Ez. 38:​18, 19). I mi caj i tejchel jiñi guerra chaʼan Armagedón (Apoc. 16:​14, 16). La cujil chaʼan tsʼitaʼ jax yom chaʼan miʼ yujtel pejtelel iliyi, jin chaʼan laʼ lac bej pʌs chaʼan mi laj qʼuel ti ñuc bajcheʼ woliʼ cʌntañonla Jehová cheʼ mi lac wen qʼuel jiñi profecía tac yicʼot mi laj coltan yambʌlob chaʼan cheʼʌch miʼ melob jaʼel. w23.08 13 párr. 19, 20

Cheʼ bʌ jiñi apóstol Pablo tsiʼ taja ti tʼan jiñi lac ñopoñel, lac pijtaya yicʼot jiñi cʼuxbiya, tsiʼ yʌlʌ chaʼan «jiñi ñumen ñuc bʌ tiʼ pejtelel jiñʌch jiñi cʼuxbiya» (1 Cor. 13:13). ¿Chucoch tsiʼ yʌlʌ Pablo iliyi? Come Jehová mi caj i tsʼʌctesan pejtelel chuqui woli bʌ lac pijtan, jin chaʼan mach wersajix jiñi lac ñopoñel yicʼot lac pijtaya. Pero jiñi laj cʼuxbiya maʼañic mi caj i jilel come yomʌch mi caj lac bej cʼuxbin Jehová yicʼot jiñi lac piʼʌlob. I jiñi laj cʼuxbiya mi caj i bej pʼʌtʼan majlel. Cheʼ jaʼel, jiñʌch muʼ bʌ i pʌs chaʼan i sujm bʌ xñoptʼañonla. Jesús tsiʼ yʌlʌ: «Cheʼ bajcheʼ iliyi tiʼ pejtelelob mi caj i ñaʼtañob chaʼan xcʌntʼañetla c chaʼan: Mi mucʼʌch laʼ cʼuxbin laʼ bʌ» (Juan 13:35). Yambʌ, come jiñʌch muʼ bʌ i temonla. Jin chaʼan, jiñi apóstol Pablo tsiʼ yʌlʌ: «Come jiñi cʼuxbiya mucʼʌch i tem lac piʼʌlob tiʼ sujm» (Col. 3:14). Cheʼ jaʼel, cheʼ mucʼʌch lac pʌsben laj cʼuxbiya jiñi hermanojob, woli lac pʌs jaʼel chaʼan mi laj cʼuxbin Jehová. Jiñi apóstol Juan tsiʼ yʌlʌ: «Jiñi muʼ bʌ i cʼuxbin Dios laʼ i cʼuxbin i yermañu jaʼel» (1 Juan 4:21). w23.11 8 párr. 1, 3

Jiñi Biblia miʼ yʌl chaʼan woliyonla ti ajñel, i mi mucʼʌch la cujtesan mi caj lac taj jiñi lac majtan: Jiñi cuxtʌlel mach bʌ añic miʼ jilel (2 Tim. 4:​7, 8). Yomʌch mi lac chaʼlen wersa chaʼan mi lac bej chaʼlen ajñel come tsʼitaʼ jachix yom chaʼan mi la cujtesan. ¿Chuqui mi caj i coltañonla chaʼan miʼ mʌjlel lac chaʼan? Jiñi apóstol Pablo, tsiʼ yʌlʌ: «Laʼ laj cʌy pejtelel jiñi laj cuch […], i mach lujbʼaconla ti jiñi ajñel baqui tsaʼ ochiyonla. ¿Chuqui yom i yʌl cheʼ yom mi «laj cʌy pejtelel jiñi laj cuch»? Mach yomic i yʌl chaʼan maʼañix chuqui mi lac junyaj chʼʌm majlel. Yom bʌ i yʌl Pablo jiñʌch chaʼan yom mi laj cʌy jiñi mach bʌ añic i cʼʌjñibal, mucʼ jach bʌ i mʌctañonla yicʼot miʼ lujbʼesañonla. Pero an tacʌch yom bʌ mi laj cuch majlel, come mi tsaʼ laj cʌyʌ mi lac mejlel ti chojquel loqʼuel ti jiñi ajñel (2 Tim. 2:5). w23.08 26 párr. 1, 2

Mi mach tsʌtsoñicla mach wocolic mi caj la cubin chaʼan mi laj qʼuel ti ñuc muʼ bʌ i ñaʼtan yambʌlob. Jumpʼejl ejemplo, an hermanajob muʼ bʌ i mulan i boñob i bʌ, pero an yambʌlob maʼañic bʌ. Cheʼ jaʼel, an hermanojob mach bʌ lecojic miʼ qʼuelob cheʼ mi lac tsʼitaʼ jap lembal, pero an maʼañic bʌ miʼ wis japob. I ti lac pejtelel la com laj cʌntan lac bʌ chaʼan cʼocʼ mi la cajñel, pero mach junlajalic bajcheʼ mi lac mel. Mi tsaʼ caji lac wersa xicʼ yambʌlob chaʼan cheʼ miʼ melob bajcheʼ mi lac ñaʼtan miʼ mejlel lac tech wocol yicʼot lac tʼox jiñi congregación (1 Cor. 8:9; 10:​23, 24). Jumpʼejl ejemplo, Jehová maʼañic tsiʼ jamʌ alʌ bajcheʼ yilal yom mi lac xoj lac pislel yicʼot mi lac chʼʌl lac bʌ. Pero tsaʼʌch i yʌqʼueyonla principio tac muʼ bʌ i coltañonla lac ñaʼtan bajcheʼ yom mi lac mel. La com chaʼan tiʼ pejtelel ora mi la cʌqʼuen i ñuclel Jehová. Yom pʼisbilon jachla yicʼot mi laj cʼʌn ti wen lac ñaʼtʌbal chaʼan wen jach bajcheʼ mi lac xoj lac pislel yicʼot mi lac chʼʌl lac bʌ (1 Tim. 2:​9, 10). Mach la comic chaʼan jin miʼ ñumen qʼuejlel bajcheʼ yilal lac pislel. Ili jiñʌch muʼ bʌ i coltañob jaʼel jiñi ancianojob chaʼan maʼañic miʼ yʌlob muʼ bʌ i bajñel ñaʼtañob. w23.07 23 párr. 13, 14

Jehová miʼ pʌsbeñonla chuqui yom mi lac mel chaʼan tijicña mi la cajñel. Jiñi muʼ bʌ i jacʼbeñob i tʼan jiñi «tonto bʌ xʼixic» jin jach añob tiʼ pusicʼal i jumucʼ ñusañob i bʌ ti tsʼiʼlel. Tiʼ sujm, woliʼ majlelob «tiʼ tamlel mucoñibʌl» (Pr. 9:​13, 17, 18). Pero muʼ bʌ i jacʼbeñob i tʼan jiñi xʼixic am bʌ i ñaʼtʌbal, tijicña miʼ ñusañob (Pr. 9:1). Woli laj cʌn laj cʼuxbin muʼ bʌ i cʼuxbin Jehová, i mi lac tsʼaʼlen muʼ bʌ i tsʼaʼlen (Sal. 97:10). Lajalonla bajcheʼ jiñi xpʌyoñelob muʼ bʌ i yʌjlelob ti Proverbios 9:4 muʼ bʌ i chaʼleñob cʼam bʌ tʼan yaʼ ti tejclum, miʼ yʌlob: «Laʼ tilic jini maxto bʌ anic i pusicʼal [o i ñaʼtʌbal]». Mi mucʼʌch lac jacʼ ili lac pʌyol mi caj lac taj cabʌl lac wenlel ili ora, i mach cojach jiñi, ti jiñi talto bʌ qʼuin mi caj lac mejlel ti chumtʌl tiʼ pejtelel ora mi mucʼʌch lac chʌn taj majlel lac ñaʼtʌbal (Pr. 9:​3, 4, 6). w23.06 24 párr. 17, 18

¿Bajcheʼ yubil maʼ wubin cheʼ bʌ juntiquil a piʼʌl ti eʼtel o ti escuela an chuqui miʼ cʼajtibeñet chaʼan bʌ a ñopbal? Tajol miʼ toj sajtel a pusicʼal. I mach jatet jach, tajol cheʼʌch luʼ ujtemonla bajcheʼ jiñi. Pero cheʼ an majqui miʼ melbeñonla jumpʼejl cʼajtiya miʼ pʌsbeñonla jaʼel chaʼan jiñi lac piʼʌlob añʌch chuqui yomob i ñaʼtan, i joñonla miʼ mejlel lac subeñob jiñi wen tʼan. Pero an lac piʼʌlob toj michʼ bʌ miʼ techob tʼan, tajol come an chuqui an i yubiyob ti lac tojlel i mach wen yujilobic chuqui ñopol bʌ lac chaʼan (Hech. 28:22). Mach yomic miʼ toj sajtel lac pusicʼal, jiñi Biblia miʼ yʌl chaʼan «ti jiñi cojix tac bʌ qʼuin» jiñi lac piʼʌlob «maʼañic mi caj i mulañob i sʌclan ñʌchʼtʌlel» yicʼot «wen jontolob» (2 Tim. 3:​1, 3). ¿Chuqui mi caj i coltañonla chaʼan wen jach bajcheʼ mi lac jacʼ cheʼ an majqui miʼ melbeñonla cʼajtiya tac chaʼan bʌ lac ñopbal? Jiñʌch cheʼ mi lac pʌs la cutslel. Juntiquil am bʌ i yutslel mach orajic miʼ michʼan yicʼot mi caj i ticʼ i bʌ chaʼan wen jach bajcheʼ miʼ jacʼ cheʼ bʌ an majqui yom i tech wocol o mach yujilic bajcheʼ yom miʼ jacʼ. w23.09 14 párr. 1, 2

Jiñi i yorganización Jehová miʼ yʌqʼueñonla ticʼojel muʼ bʌ i coltañonla chaʼan maʼañic mi lac yajlel ti cʌlʌx sʌclʌntel chubʌʼañʌl yicʼot chaʼan maʼañic mi lac mel mach tac bʌ weñic. I weñʌch cheʼ bʌ mi lac jacʼ come maʼañic mi lac taj wocol (Is. 48:​17, 18; 1 Tim. 6:​9, 10). Jehová mi caj i bej cʼʌn jiñi wiñicob waʼchocobiloʼ bʌ i chaʼan chaʼan miʼ tojʼesan majlel i tejclum cheʼ bʌ wolix jiñi ñuc bʌ wocol yicʼot ti jiñi Mil jab i Yumʌntel Cristo. ¿Muʼ ba caj lac chʌn jacʼ ti jumpʼejl lac pusicʼal chuqui mi lac subentel? Mi ti ili ora mucʼʌch lac jacʼ tʼan mach wocolic mi caj la cubin ti talto bʌ qʼuin. Mi la com lac chʌn jacʼ bajcheʼ miʼ tojʼesañonla majlel Jehová yomʌch mi lac jacʼ chuqui miʼ subeñoñobla jiñi waʼchocobiloʼ bʌ i chaʼan (Is. 32:​1, 2; Heb. 13:17). An cabʌl chuqui miʼ pʌsbeñonla chaʼan jiñʌch Jehová woli bʌ i tojʼesañonla majlel, chaʼan woliʼ coltañonla chaʼan maʼañic mi lac taj wocol i chaʼan mi caj i coltañonla chaʼan mi laj cʼotel yaʼ ti tsijiʼ bʌ pañimil baqui mi caj lac chumtʌl tiʼ pejtelel ora. w24.02 25 párr. 17, 18

Jiñi apóstol Pablo tijicña tsiʼ ñusa cheʼ bʌ tsiʼ melbe i yeʼtel Jehová, pero tsaʼʌch i taja wocol tac. Tsiʼ chaʼle ñajt bʌ xʌmbal i yaʼ ti bij tsiʼ taja xujchʼob, tsiʼ taja wocol ti jaʼ, cheʼto jaʼel jiñi i contrajob tsiʼ ticʼlayob (2 Cor. 11:​23-27). I an hermanojob mach bʌ añic tsiʼ wen qʼueleyob ti ñuc pejtelel tsaʼ bʌ i mele Pablo chaʼan miʼ lon coltañob (2 Cor. 10:10; Filip. 4:15). Jiñi apóstol Pablo wen i cʌñʌ Jehová come miʼ pejcan jiñi Tsʼijbujel yicʼot cabʌl chuqui tsiʼ ñusa. Ili tsiʼ yʌqʼue i ñop chaʼan Jehová mucʼʌch i wen cʼuxbin, i jin chaʼan maʼañic tsiʼ cʌyʌ i melben i yeʼtel (Rom. 8:​38, 39; Efes. 2:​4, 5). Cheʼ jaʼel, Pablo tsaʼʌch i wen cʼuxbi Jehová. Tsiʼ pʌsʌ cheʼ bʌ tsiʼ chʌn cʼuxbi jiñi hermanojob yicʼot tsiʼ coltayob (Heb. 6:10). w23.07 9 párr. 5, 6

Cabʌl lac piʼʌlob miʼ ñaʼtañob chaʼan weñʌch cheʼ mi lac jacʼbeñob i tʼan jiñi añoʼ bʌ i yeʼtel. Pero cheʼ ñumeñix ti pʼis chuqui miʼ cʼajtiñob o chuqui miʼ yʌlob maʼañix miʼ jacʼob. Jiñi Biblia miʼ yʌl chaʼan jiñi yumʌlob miʼ yʌcʼob ti wocol jiñi lac piʼʌlob, añob tiʼ pʼʌtʌlel Satanás i lʌcʼʌlix mi caj i jisʌntelob (Sal. 110:​5, 6; Ec. 8:9; Luc. 4:​5, 6). Pero miʼ yʌl jaʼel chaʼan jiñi maʼañic bʌ miʼ jacʼben i tʼan jiñi añoʼ bʌ i yeʼtel «woliʼ yʌcʼ i bʌ tiʼ contra chuqui waʼchocobil i chaʼan Dios». Jehová woli i yʌcʼ chaʼan miʼ melob i yeʼtel, jin chaʼan yom mi la cʌqʼueñob chuqui yom bʌ miʼ yʌqʼuentelob, yaʼ ochem chaʼan mi lac chaʼlen tojoñel, mi laj qʼuelob ti ñuc yicʼot mi lac jacʼbeñob i tʼan (Rom. 13:​1-7). Tajol mi lac ñaʼtan chaʼan mach weñic chuqui woliʼ yʌlob o chaʼan ñumeñix ti pʼis o cʌlʌx letsix chuqui woliʼ cʼajtiñob, pero Jehová yom chaʼan mi lac jacʼbeñob i tʼan, cojach mi añix tiʼ contra chuqui miʼ yʌl Dios maʼañic mi caj lac jacʼ (Hech. 5:29). w23.10 8 párr. 9, 10

Cheʼ bʌ Sansón tsiʼ yila pañimil jiñi israelitajob wen wocol jax woli i ñusañob come añob tiʼ cʼʌb jiñi filisteojob i miʼ wen ticʼlʌntelob (Jue. 13:1). Jin chaʼan Jehová tsiʼ yajca Sansón chaʼan miʼ «coltan jini israelob tiʼ tojlel filisteojob» (Jue. 13:5). Sansón tsaʼʌch i sʌcla i coltʌntel ti Jehová. Ti jumpʼejl bʌ qʼuin, junmojt soldadojob filisteojoʼ bʌ tsaʼ majliyob ti Lehí, tajol am bʌ ti Judá, chaʼan miʼ chucob Sansón. Jiñi wiñicob ti Judá tsiʼ bʌcʼñayob i tsiʼ yʌcʼʌyob Sansón tiʼ cʼʌb i contrajob. Tsiʼ cʌchʌyob ti chaʼtʼujm chij wen tsijibto bʌ i tsiʼ pʌyʌyob majlel baʼan jiñi filisteojob (Jue. 15:​9-13). Pero «tsaʼ cʼoti i yEspíritu lac Yum tiʼ tojlel Sansón», i tsaʼ tsʼojqui jiñi lazo tac. Cheʼ jiñi tsiʼ taja i xʌcʼtiʼ juncojt burro i jin tsiʼ cʼʌñʌ chaʼan miʼ tsʌnsan mil filisteojob (Jue. 15:​14-16). w23.09 2, 3 párr. 3, 4

Jehová an chuqui ñaʼtʌbil i chaʼan «muʼ bʌ i jalijel tiʼ pejtelel ora» i mi lac wen qʼuel ti ñuc cheʼ an i tsictesʌbeyonla majlel yaʼ ti Biblia. Tiʼ sujm, Jehová an i laj cʼʌñʌ chuqui an chaʼan miʼ tsʼʌctiyel jiñi ñaʼtʌbil bʌ i chaʼan (Prov. 16:​4, TNM). Cheʼ jaʼel, la cujil chaʼan pejtelel muʼ bʌ i mel chaʼañʌch tiʼ pejtelel ora. Cheʼ jiñi, ¿chuqui jiñi yom bʌ i mel Jehová, i chuqui an i mele chaʼan miʼ tsʼʌctesan? Wen tsiquil chuqui jiñi ñaʼtʌbil bʌ i chaʼan Jehová cheʼ bʌ tiʼ subeyob Adán yicʼot Eva: «Butʼula jini pañimil. Cʼʌñʌla. Laʼ i yumañetla [ . . . ] pejtel cuxul tac bʌ muʼ bʌ ti xʌmbal ti pañimil» (Gn. 1:28). Cheʼ bʌ Adán yicʼot Eva tsiʼ ñusʌbeyob i tʼan Jehová, tsaʼ ochi jiñi mulil, pero jiñi maʼañic tsiʼ mʌcta chaʼan miʼ tsʼʌctesan jiñi ñaʼtʌbil bʌ i chaʼan, tsaʼ jach i qʼuexta bajcheʼ mi caj i mel. ¿Chuqui tsiʼ mele? Ti orajach tsiʼ yʌlʌ chaʼan mi caj i waʼchocon jumpʼejl Yumʌntel ti panchan chaʼan miʼ tsʼʌctiyel chuqui yom Jehová (Mat. 25:34). w23.10 19, 20 párr. 6, 7

Jehová mucʼʌch i mejlel i coltañonla chaʼan mi lac chʌn chaʼlen wersa. Tajol wocol mi la cubin, ñumento mi añix cabʌl ora caj lac chaʼlen wersa. O mi lac ñaʼtan chaʼan ñumen tsʌtsto jiñi lac wocol cheʼ bajcheʼ i chaʼan jiñi apóstol Pedro. Pero Jehová jiñʌch muʼ bʌ i yʌqʼueñonla lac pʼʌtʌlel chaʼan mi lac chʌn chaʼlen wersa (Sal. 94:​18, 19). Jiñʌch tsaʼ bʌ ujti tiʼ tojlel juntiquil hermano homosexual bʌ wajali. Anquese cabʌl jab tsaʼ ajñi bajcheʼ jiñi, tsaʼʌch mejli i cʌy. Pero an i tajol muʼto i tilel leco bʌ i pensar, ¿chuqui tsiʼ mele chaʼan maʼañic miʼ lujbʼan? Miʼ yʌl: «Jehová tsiʼ pʼʌtʼesayon yicʼot an i yʌqʼueyon chʼujul bʌ i yespíritu chaʼan mic bej mel chuqui wen. Anquese cabʌl c sajtemal, Jehová miʼ yʌcʼ chaʼan mic bej melben i yeʼtel i miʼ chʌn pʼʌtʼesañon». w23.09 23 párr. 12

Mi chʼitoñetto i a wom a taj majlel a ñaʼtʌbal, cʼajtesan chaʼan mach ti jumpʼejl jach qʼuin mi caj a waʼ taj. Yom maʼ sʌclan weñoʼ bʌ i melbal, maʼ cʼʌn ti wen a pensar, maʼ tsʼʌctesan chuqui maʼ subentel, maʼ cʌn chuqui tac yom melol i maʼ chajpan a bʌ chaʼan jiñi talto bʌ qʼuin. Tajol cʌlʌxix maʼ wubin jiñi yom bʌ maʼ mel, pero mucʼʌch a mejlel. Cʼajtesan chaʼan Jehová yom i coltañet (Is. 41:​10, 13). Cheʼ jaʼel, jiñi hermanojob ti a congregación mi caj i coltañetob. Cheʼ bʌ maʼ sujtel ti juntiquil wiñic am bʌ i ñaʼtʌbal mi caj a wubin a tijicñʌyel. Mic wen cʼuxbiñet lojon i com lojon chaʼan Jehová miʼ yʌqʼueñet i bendición cheʼ maʼ bej chaʼlen wersa chaʼan maʼ taj a ñaʼtʌbal. w23.12 29 párr. 19, 20

Ñaʼtancu chaʼan yaʼan a wicʼot yambʌ hermanojob i tijicña woli laʼ ñusan, i mi laʼ locʼsan laʼ bʌ ti foto. Pero ¿chuqui maʼ mel cheʼ bʌ maʼ qʼuel chaʼan mach cʌlʌx weñic tsaʼ loqʼui jumpʼejl foto? Maʼ yʌp, cojach miʼ cʌlel a wicʼot jiñi ñumen wem bʌ. Jiñi wen tac bʌ chuqui ñusʌbil lac chaʼan la quicʼot jiñi la quermañujob lajalʌch bajcheʼ jumpʼejl wem bʌ foto lotol bʌ lac chaʼan. Pero mi an juntiquil hermano tsaʼ bʌ i yʌlʌ o i mele mach bʌ weñic. ¿Chuqui mi caj a mel? ¿Muʼ ba caj a chʌn cʼajtesan? Maʼañic (Efes. 4:32). Iliyi lajalʌch bajcheʼ maʼ yʌp jumpʼejl foto mach bʌ weñic. Ñumen wen cheʼ jin jach mi laj cʼajtesan chuqui tac wem bʌ ñusʌbil lac chaʼan. w23.11 12 párr. 16, 17

Jiñi tʼan tac ti griego tsaʼ bʌ cʼʌjñi ti jiñi texto chaʼan ili qʼuin miʼ yʌcʼ ti ñaʼtʌntel chaʼan jiñi hermanajob yom wen jach bajcheʼ miʼ xojob i pislel yicʼot miʼ chʼʌmob ti ñuc chuqui miʼ ñaʼtan yambʌlob. Mi lac wen qʼuelob ti ñuc jiñi hermanajob muʼ bʌ i pʌsob i ñaʼtʌbal cheʼ bajcheʼ yilal miʼ xojob i pislel. I cʌñol chuqui jiñi wem bʌ yicʼot jiñi mach bʌ weñic. Cheʼ bʌ juntiquil miʼ cʼotel i cʌn chuqui jiñi wem bʌ yicʼot jiñi mach bʌ weñic, miʼ chʼʌmben i sujm chuqui yom bʌ miʼ mel. Laʼ laj qʼuel jumpʼejl ejemplo, jiñʌch tiʼ tojlel Abigaíl. Cheʼ bʌ jiñi i ñoxiʼal mach weñic chuqui tsiʼ mele, Abigaíl tsiʼ qʼuele chaʼan pejtelel jiñi añoʼ bʌ tiʼ yotot miʼ mejlel i tajob wocol. Tsiʼ cʌñʌ chaʼan mach weñic chuqui tsaʼ ujti i tsiʼ chʼʌmbe i sujm chuqui yom miʼ mel, cheʼ bajcheʼ jiñi tsiʼ colta jiñi añoʼ bʌ tiʼ yotot (1 S. 25:​14-23, 32-35). Cheʼ mi laj cʌn chuqui jiñi wem bʌ yicʼot jiñi mach bʌ weñic miʼ coltañonla lac ñaʼtan jaʼel baqui ora yom mi lac chaʼlen tʼan yicʼot chuqui yom mi la cʌl. Cheʼ jaʼel, miʼ coltañonla chaʼan maʼañic mi lac mel cʼajtiya tac mach bʌ yomix mi lac mel cheʼ bʌ woli lac chaʼlen tʼan la quicʼot jiñi hermanojob (1 Tes. 4:11). w23.12 20 párr. 8, 9

Jiñi apóstol Pablo tiʼ tsʼijbube majlel ili tʼan tac jiñi congregación am bʌ ti Roma. Ili hermanojob tsaʼix i cʌñʌyob tiʼ tojlel Jehová yicʼot Jesús, i tsiʼ pʌsʌyob chaʼan añobʌch i ñopoñel yicʼot tsaʼ sujtiyob ti xñoptʼan. Jin chaʼan Dios tsiʼ qʼueleyob ti toj i tsiʼ yajcayob ti chʼujul bʌ espíritu (Rom. 5:1). Ti jimbʌ ora añob i chaʼan jumpʼejl utsʼatax bʌ pijtaya. Ti wiʼil, Pablo tiʼ sube jiñi xñoptʼañob ti Éfeso chaʼan jiñi pijtaya tsaʼ bʌ i yʌqʼueyob Jehová jumpʼejlʌch pijtaya «maʼañic bʌ miʼ mejlel ti lajintel tsaʼ bʌ i wʌn sube jiñi chʼujuloʼ bʌ» (Efes. 1:18). Cheʼ jaʼel, tiʼ sube jiñi xñoptʼañob añoʼ bʌ ti Colosas: «Woli laʼ pijtan jiñi laʼ majtan chajpʌbil bʌ chaʼañetla yaʼ ti panchan» (Col. 1:​4, 5). Jin chaʼan, jiñi xñoptʼañob yajcʌbiloʼ bʌ añob i pijtaya chaʼan miʼ majlelob ti panchan baqui mi caj i chaʼleñob yumʌntel yicʼot Cristo (1 Tes. 4:​13-17; Apoc. 20:6). w23.12 9 párr. 4, 5

Jiñi tʼan «cʌntan» miʼ cʼʌjñel chaʼan miʼ yʌjlel jiñi soldadojob muʼ bʌ i cʌntañob jumpʼejl tejclum. Jiñi yaʼ bʌ chumulob wen miʼ wʌyelob come yujilob chaʼan cʌntʌbil jiñi tejclum. Cheʼʌch jaʼel jiñi i ñʌchʼtʌlel Dios, miʼ cʌntan lac pusicʼal yicʼot lac ñaʼtʌbal, i cʌntʌbil mi la cubin lac bʌ (Sal. 4:8). Anquese jiñi wocol maʼañic miʼ seb tojʼan, miʼ mejlel lac taj lac ñʌchʼtʌlel, cheʼ bajcheʼ tsaʼ ujti tiʼ tojlel Ana (1 S. 1:​16-18). Cheʼ bajcheʼ jiñi, mach wocolic mi caj la cubin chaʼan wen jach chuqui mi lac ñaʼtan yicʼot chuqui mi lac yajcan lac mel. ¿Chuqui yom bʌ mi lac mel? Lajal bajcheʼ jiñi chumuloʼ bʌ ti jumpʼejl tejclum miʼ cʼajtibeñob juntiquil soldado chaʼan miʼ cʌntañob, joñonla jaʼel miʼ mejlel laj cʼajtiben Jehová chaʼan miʼ cʌntañonla. Laʼ lac chʌn melben oración jinto mi la cubiben i ñʌchʼtʌlel Dios (Luc. 11:9; 1 Tes. 5:17). Mi jatet woli a ñusan wocol jaʼel, chʌn mele oración i mi caj a qʼuel bajcheʼ Jehová miʼ yʌqʼueñet a ñʌchʼtʌlel, miʼ cʌntan a pusicʼal yicʼot a ñaʼtʌbal (Rom. 12:12). w24.01 21 párr. 5, 6

Jesús tsaʼ wen ticʼlʌnti, tsiʼ pʼajayob yicʼot tsaʼ jopʼbenti i mul. Tsiʼ cuchu pejtelel iliyi come yom i sʌqʼuesʌben i cʼabaʼ i Tat. Maʼañic chuqui tsiʼ bʌcʼña come yujil chaʼan maʼañic tsiʼ mele mach bʌ weñic (Heb. 12:2). Cheʼ jaʼel, yujil chaʼan jiñʌch Satanás woli bʌ i contrajin come yom chaʼan Jesús mach xucʼulic miʼ yajñel tiʼ tojlel Jehová (Luc. 22:​2-4; 23:​33, 34). Pero maʼañic tsaʼ mejli, Jesús tsiʼ jamʌ pʌsʌ chaʼan Satanás juntiquilʌch xlot i chaʼan i wiñicob Jehová xucʼul miʼ mejlelob ti ajñel anquese miʼ ñusañob tsʌts tac bʌ wocol. ¿A wom ba a tijicñesan Jesucristo, jiñi a Rey? Mach a cʌy a wʌqʼuen i ñuclel Jehová i coltan yambʌlob chaʼan miʼ qʼuelob bajcheʼ yilal bʌ Dios, cheʼ bajcheʼ jiñi woli a lajin Jesús (1 Ped. 2:21). I cheʼ bajcheʼ Jesús, mi caj a tijicñesan Jehová i mi caj a pʌs chaʼan Satanás juntiquil jachix xlot mach bʌ la comic laj qʼuel. w24.02 11, 12 párr. 11-13

Ti jiñi joʼpʼejl jab ñumen bʌ tilel, ñumen ti 1 millón hermanojob an i chʼʌmʌyob jaʼ. Cheʼ mi la cʌcʼ lac bʌ ti Jehová yom i yʌl chaʼan mi lac sujtel ti xcʌntʼan i chaʼan Jesús yicʼot chaʼan tiʼ pejtelel ora ñaxan mi caj lac mel chuqui yom Dios. ¿Chuqui yom i yʌl jiñi? Jesús tsiʼ yʌlʌ: «Mi an majqui yom i tsajcañon, laʼ i cʌy i bajñel sʌclan i wenlel» (Mat. 16:24). Jiñi tʼan am bʌ ti griego muʼ bʌ i chaʼlentel ti traducir bajcheʼ «laʼ i cʌy i bajñel sʌclan i wenlel», miʼ mejlel ti chaʼlentel ti traducir jaʼel bajcheʼ «laʼ i suben i bʌ chaʼan maʼañic». Jin chaʼan, cheʼ mi la cʌcʼ lac bʌ ti Jehová, mi laj cʌy pejtelel maʼañic bʌ miʼ mulan (2 Cor. 5:​14, 15). Yaʼ ochem jaʼel jiñi «i melbal tac lac bʌcʼtal», bajcheʼ jiñi tsʼiʼlel (Gál. 5:​19-21; 1 Cor. 6:18). ¿Wocol ba ti melol? Maʼañic mi mucʼʌch a cʼuxbin Jehová yicʼot maʼ ñop chaʼan jiñi muʼ bʌ i subeñonla chaʼañʌch a wenlel (Sal. 119:97; Is. 48:​17, 18). w24.03 2 párr. 1; 3 párr. 4

Jehová miʼ yʌqʼuen chʼujul bʌ i yespíritu jiñi utsʼat bʌ miʼ qʼuelob (Mat. 12:18). Miʼ mejlel laj cʼajtiben lac bʌ: «¿Tsiquil ba tij cuxtʌlel jiñi melbalʌl tac muʼ bʌ i yʌcʼ jiñi espíritu?». Jumpʼejl ejemplo, ¿ñumen a wujil ba pijt bajcheʼ ti ñaxan? Mi tsaʼ qʼuele chaʼan mucʼʌch a wen pʌs jiñi melbalʌl tac tilem bʌ ti jiñi espíritu, ñumento miʼ mejlel a ñop chaʼan Jehová tijicña yicʼotet. Jehová miʼ cʼʌn jiñi i tojol laj coltʌntel chaʼan miʼ ñusʌben i mul jiñi utsʼat bʌ miʼ qʼuelob (1 Tim. 2:​5, 6). Pero ¿ixcu mi maʼañic mi lac wen ñop chaʼan Jehová utsʼat miʼ qʼuelonla anquese la cujil chaʼan tsaʼix i yʌcʼʌ i tojol laj coltʌntel i tsaʼix lac chʼʌmʌ jaʼ? Laʼ laj cʼajtesan chaʼan maʼañic miʼ mejlel lac ñop pejtelel chuqui miʼ subeñonla lac pusicʼal, pero mucʼʌch i mejlel lac ñop muʼ bʌ i subeñonla Jehová. Jehová miʼ qʼuelonla ti toj mi mucʼʌch lac wen ñop i tojol laj coltʌntel i miʼ yʌcʼ i tʼan chaʼan mi caj i yʌqʼueñonla i bendición (Sal. 5:12; Rom. 3:26). w24.03 30 párr. 15; 31 párr. 17