Cʼʌñʌ jiñi libro Ubin a tijicñʌyel chaʼan maʼ pʼʌtʼesʌben i ñopoñel yañoʼ bʌ ti Jehová yicʼot ti Jesús

Jiñi estudiantejob yom miʼ pʼʌtʼesañob i ñopoñel chaʼan miʼ tijicñesañob Dios (Heb 11:6). Jiñi libro Ubin a tijicñʌyel miʼ coltañonla chaʼan mi laj cʼotel tiʼ pusicʼalob. Miʼ chʼʌm tilel texto tac, wen tsiquil bajcheʼ miʼ tsictesan jiñi tema tac, an i chaʼan wem bʌ cʼajtiya tac, utsʼatax bʌ foto tac yicʼot video tac. Cheʼ mi laj coltan jiñi estudiantejob chaʼan miʼ tajob jiñi wem bʌ melbalʌl tac yicʼot chaʼan miʼ sujtelob tiʼ yamigo Dios, mi caj lac pʼʌtʼesʌbeñob i ñopoñel chaʼan miʼ mejlel i cuchob wocol tac (1Co 3:12-15).

An wocol bʌ miʼ yubiñob chaʼan miʼ ñopob chaʼan mucʼʌch i mejlelob ti sujtel tiʼ yamigo Dios come maʼañic miʼ qʼuelob. Jin chaʼan, yom mi laj coltañob i cʌñob Jehová yicʼot chaʼan miʼ ñopob tiʼ tojlel.

CHEʼ BɅ TSAʼIX LAʼ QʼUELE JIÑI VIDEO CʼɅÑɅ JIÑI LIBRO «UBIN A TIJICÑɅYEL» CHAʼAN MAʼ PʼɅTʼESɅBEN I ÑOPOÑEL YAÑOʼ BɅ TI JEHOVÁ, JACʼɅ ILI CʼAJTIYA TAC:

• ¿Bajcheʼ la cujil chaʼan jiñi hermana tsaʼʌch i wen chajpa i bʌ chaʼan jiñi estudio?

• ¿Baqui bʌ yan tac bʌ cʼajtiya tsiʼ mele jiñi hermana chaʼan jiñi estudiante miʼ yʌl chaʼan jiñi tsaʼ bʌ i pejca ti Isaías 41:10, 13?

• ¿Bajcheʼ tsiʼ colta jiñi estudiante jiñi video yicʼot jiñi texto tac?

Cabʌlob maʼañic miʼ ñaʼtañob chuquiyes jiñi i tojol laj coltʌntel o maʼañic miʼ qʼuelob bajcheʼ jumpʼejl majtan tsaʼ bʌ i yʌqʼueyob Dios (Gál 2:20). Jin chaʼan, yom mi laj coltañob chaʼan miʼ ñopob tiʼ tojlel Jesús cheʼ tsiʼ yʌcʼʌ i cuxtʌlel ti lac tojlel.

CHEʼ BɅ TSAʼIX LAʼ QʼUELE JIÑI VIDEO CʼɅÑɅ JIÑI LIBRO «UBIN A TIJICÑɅYEL» CHAʼAN MAʼ PʼɅTʼESɅBEN I ÑOPOÑEL YAÑOʼ BɅ TI JESÚS, JACʼɅ ILI CʼAJTIYA TAC:

• ¿Bajcheʼ la cujil chaʼan jiñi hermano tsaʼʌch i wen chajpa i bʌ chaʼan jiñi estudio?

• ¿Bajcheʼ tsiʼ cʼʌñʌ jiñi sección «Cʌñʌ yan tac bʌ» chaʼan miʼ coltan jiñi estudiante?

• ¿Chucoch wen ñuc i cʼʌjñibal chaʼan jiñi estudiante jiñi oración?