Ubin a tijicñʌyel: Tsijib eʼtijib tac chaʼan mi lac pʌs jiñi i sujmlel

¡Wen tijicñayonla cheʼ an lac chaʼan jumpʼejl tsijib libro yicʼot tsijib folleto chaʼan mi la cʌcʼ estudio! Mi laj cʼajtiben Jehová i bendición cheʼ bʌ mi lac chaʼlen wersa lac sutqʼuin ti xcʌntʼan yambʌlob (Mt. 28:18-20; 1 Co. 3:6-9). ¿Bajcheʼqui miʼ mejlel laj cʼʌn ili tsijib eʼtijib tac?

Come ti ili estudio laja lajal yom miʼ chaʼleñob tʼan jiñi xcʌntesa yicʼot jiñi estudiante, yom mi laj qʼuextan bajcheʼ mi la cʌcʼ estudio. Jin chaʼan, cheʼ maʼ chajpan a bʌ yicʼot cheʼ maʼ wʌcʼ estudioa, mele iliyi:

• Qʼuele jiñi cʌntesʌntel yicʼot qʼuele jiñi cʼajtiya tac.

• Pejcan jiñi texto muʼ bʌ i yʌjlel chaʼan yom miʼ pejcʌntel yicʼot coltan jiñi estudiante chaʼan miʼ chʼʌmben i sujm chuqui miʼ cʌntesan.

• Qʼuele jiñi video tac yicʼot mele jiñi cʼajtiya tac muʼ bʌ i tilel yaʼ ti jun.

• Chaʼlen wersa a qʼuel ti tsʼʌcʌl jumpʼejl cʌntesʌntel cheʼ maʼ wʌcʼ estudio.

Cheʼ maʼ chaʼlen subtʼan, pʌsben jiñi folleto chaʼan maʼ qʼuel mi jiñi lac piʼʌl yomʌch i cʌn chaʼan jiñi Biblia (qʼuele jiñi recuadro «¿Bajcheʼ miʼ mejlel lac sub jiñi folleto Ubin a tijicñʌyel ti jiñi ñaxam bʌ julaʼ?»). Mi tsaʼ ujti laʼ qʼuel jiñi folleto i jiñi lac piʼʌl yomʌch bej estudio, aqʼuen jiñi libro i techeʼ laʼ qʼuel jiñi cʌntesʌntel 4. Mi wolix a cʼʌn jiñi libro Miʼ cʌntesañonla yicʼot I cʼuxbiya Dios chaʼan maʼ wʌcʼ estudio, ñumeñix ti jiñi libro Ubin a tijicñʌyel. Jatet a wujil chuqui ti cʌntesʌntel mi caj a tech.

CHEʼ BɅ TSAʼIX LAʼ QʼUELE JIÑI VIDEO UBIN A TIJICÑɅYEL CHEʼ MI CAJ A CHʼɅM ESTUDIO, JACʼɅ ILI CʼAJTIYA TAC:

• ¿Chuqui mi caj i cʌñob jiñi estudiantejob ti jiñi libro?

• ¿Chucoch yom mi lac pʌsbeñob ili video jiñi tsijib estudiantejob?

• ¿Chuquiyes miʼ mejlel a suben jiñi estudiante chaʼan yom miʼ mel majlel? (Qʼuele jiñi recuadro «Ñuc tac bʌ i cʼʌjñibal yicʼot yom bʌ miʼ mejlel ti jujumpʼejl parte»).