¿Bajcheʼ miʼ mejlel i coltañet jiñi oración?

Pamela wen cʼam, i tsaʼ majli ti doctor. Pero ti jiñi jach bʌ ora tsiʼ melbe oración Dios i tsiʼ cʼajtibe chaʼan miʼ coltan i taj i pʼʌtʌlel chaʼan miʼ lʌtʼ jiñi tsʌts bʌ cʼamʌjel. ¿Tsaʼʌch ba i colta jiñi oración?

Pamela miʼ yʌl: «Cheʼ bʌ woli c chʼʌm jiñi tsʼac chaʼan jiñi cáncer, tsaʼʌch c wen bʌcʼña. Pero cheʼ bʌ mic melben oración Jehová, mi cubin c tijicñʌyel i wen jach chuqui mic pensarin. Tsaʼʌch c wen ubi i cʼuxel, pero tsaʼʌch i wen coltayon jiñi oración. Cheʼ bʌ jiñi lac piʼʌlob miʼ cʼajtibeñoñob bajcheʼ quilal, mic subeñob: ‹Mach cʼocʼoñic, pero tijicña añon›».

Ili mach yomic i yʌl chaʼan jin jach cheʼ bʌ mi lac ñusan wocol mi lac melben oración Dios. Ti lac pejtelel mi lac ñusan wocol i mach yʌlʌyic baqui tac bʌ, la comʌch chaʼan an majqui miʼ coltañonla. ¿Muʼ ba mejlel i coltañonla jiñi oración?

Jiñi Biblia miʼ yʌl: «Aqʼuen a cuch lac Yum [Jehová]. Jini mi caj i cuchbeñet majlel. Maʼanic miʼ junyajlel cʌy jini toj bʌ tiʼ bajñelil» (Salmo 55:22). ¡Wen utsʼatax ili tʼan! Cheʼ jiñi, ¿bajcheʼ miʼ coltañonla jiñi oración? Cheʼ bʌ mi lac melben oración Dios cheʼ bajcheʼ miʼ mulan, miʼ yʌqʼueñonla jiñi lac pʼʌtʌlel chaʼan miʼ mʌjlel lac chaʼan jiñi wocol (qʼuele jiñi sección: «Jiñi wenlel muʼ bʌ lac taj cheʼ bʌ mi lac mel oración»).

Jiñi wenlel muʼ bʌ lac taj cheʼ bʌ mi lac mel oración

I ñʌchʼtʌlel lac pusicʼal

«Subenla Dios chuqui tac yom ti oración [...]. Cheʼ jini, i ñʌchʼtʌlel laʼ pusicʼal chʼoyol bʌ ti Dios mi caj i cʌntan laʼ pusicʼal yicʼot laʼ ñaʼtʌbal ti Cristo Jesús. Maʼanic i pʼisol i ñʌchʼtʌlel lac pusicʼal muʼ bʌ i yʌqʼueñonla» (Filipenses 4:6, 7). Miʼ mucʼʌch lac suben Dios jiñi muʼ bʌ laj cʼojoʼtan, mi caj i coltañonla lac taj i ñʌchʼtʌlel lac pusicʼal yicʼot wen chuqui mi lac mel cheʼ bʌ mi lac ñusan wocol.

Lac ñaʼtʌbal

«Mi anto yom laʼ ñaʼtʌbal cʼajtibenla Dios muʼ bʌ i pʼewbeñob pejtelel winicob. Cheʼ mi laʼ cʼajtiben mi caj i yʌqʼueñetla tiʼ yonlel i ñaʼtʌbal come mach yujilic aʼleya» (Santiago 1:5). An i tajol mach la cujilic chuqui mi lac mel cheʼ bʌ mi lac ñusan wocol. Pero miʼ mucʼʌch laj cʼajtiben Dios lac ñaʼtʌbal, mi caj i coltañonla laj cʼajtesan ticʼojel tac am bʌ yaʼ tiʼ Biblia.

I ñuqʼuesʌntel lac pusicʼal

«Miʼ mejlel j cuch tiʼ pejtelel chuqui jach wocolix i yʌlʌ jiñi muʼ bʌ i yʌqʼueñon c pʼʌtʌlel» (Filipenses 4:13, TNM). Come Jehová jiñʌch jiñi Dios mach bʌ Añic i pʼisol i pʼʌtʌlel, miʼ mejlel i ñuqʼuesʌbeñonla lac pusicʼal chaʼan miʼ mejlel lac lʌtʼ jiñi wocol tac (Isaías 40:29). Jiñi Biblia miʼ yʌl chaʼan Jehová jiñʌch jiñi Dios «muʼ bʌ i ñuqʼuesan lac pusicʼal tiʼ pejtelel wocol» (2 Corintios 1:3, 4).

JIÑI ORACIÓN MIʼ MEJLEL I COLTAÑET

Jehová maʼañic miʼ wersa subeñet chaʼan maʼ mel oración, pero yicʼot i cʼuxbiya miʼ subeñet chaʼan miʼ mejlel a mel (Jeremías 29:11, 12). Pero ¿ixcu mi ti wajali tsaʼ mele oración i tsaʼ qʼuele chaʼan Dios maʼañic tsiʼ jacʼbeyet? Mach lujbʼaquet yicʼot mach a cʌy a mel oración. Jiñi wem bʌ tatʌlob, miʼ sʌclʌbeñob i yorajlel jalaqui yom miʼ coltañob i yalobilob yicʼot bajcheʼ mi caj i melob. Tajol tsaʼix i ñaʼtayob bajcheʼ ñumen wen mi caj i coltañob jiñi i yalobilob. Pero mucʼʌch caj i coltañob.

Jehová Dios jiñʌch lac Tat wem am bʌ i cʼuxbiya, i yom i coltañet jaʼel. Miʼ mucʼʌch a wen tsajin muʼ bʌ i yʌl jiñi Biblia, cheʼ bajcheʼ jiñi tsaʼix bʌ laj qʼuele, yicʼot maʼ chaʼlen wersa a tsʼʌctesan, Dios utsʼat bajcheʼ mi caj i jacʼbeñet jiñi a woración (Salmo 34:15; Mateo 7:7-11).