Wem bʌ ticʼojel tac chaʼan wen mi la cajñel

1. ¿Chucoch i cʼʌjñibal lac chaʼan i ñaʼtʌbal Dios? (Proverbios 4:7).

¿AM BA tsaʼ yajca a mel (chaʼlen) junchajp ñuc bʌ i cʼʌjñibal? Mi añʌch, miʼ mejlel la cʌl chaʼan tsaʼʌch a cʼajtibe Jehová chaʼan miʼ yʌqʼueñet a ñaʼtʌbal, come i cʼʌjñibal a chaʼan tsaʼ wubi (Sant. 1:5). Jiñi rey Salomón tiʼ tsʼijbu: «Jini ñaxan bʌ yom jiñʌch wen bʌ a ñaʼtʌbal» (pejcan Proverbios 4:7). I sujmʌch, mach jiñic woli (choncol) i taj ti tʼan baqui jach bʌ ñaʼtʌbalʌl, jiñʌch tilem bʌ ti Jehová (Pr. 2:6). Pero ¿muʼ ba i mejlel i coltañonla jiñi ñaʼtʌbalʌl tilem bʌ ti Dios chaʼan mi lac ñusan jiñi wocol tac ti ili ora? Mucʼʌch. Ili estudio mi caj i pʌsbeñonla.

2. ¿Chuqui jiñi junchajp muʼ bʌ i mejlel lac mel chaʼan mi lac taj i sujm bʌ lac ñaʼtʌbal?

² Junchajp bajcheʼ miʼ mejlel lac ñumen taj lac ñaʼtʌbal jiñʌch cheʼ mi lac chaʼlen ti estudiar yicʼot mi lac jacʼ i cʌntesa tac jiñi chaʼtiquil wiñicob wen cʌmbiloʼ bʌ chaʼan jiñi i ñaʼtʌbalob. Ñaxan mi caj lac taj ti tʼan Salomón. Jiñi Biblia miʼ yʌl chaʼan «Dios tsiʼ yʌqʼue i ñaʼtʌbal yicʼot i pʼipʼlel i pusicʼal Salomón» (1 R. 4:29). Cheʼ jiñi, mi caj laj qʼuel i yejemplo Jesús, jiñi wiñic ñumen am bʌ i ñaʼtʌbal ajñem bʌ ila ti Lum (Mat. 12:42). Jumpʼejl profecía tsiʼ yʌlʌ tiʼ tojlel: «Mi caj i yajñel Chʼujul bʌ i Chʼujlel [yespíritu, TNM] Dios tiʼ tojlel jini Winic. Mi caj i yʌqʼuentel wen bʌ i ñaʼtʌbal yicʼot cabʌl i pusicʼal» (Is. 11:2).

3. ¿Chuqui mi caj laj qʼuel ti ili estudio?

³ Dios tsiʼ yʌqʼue i ñaʼtʌbal Salomón yicʼot Jesús, jin chaʼan tsiʼ yʌcʼʌyob wem bʌ ticʼojel tac chaʼan jiñi ñuc tac bʌ i cʼʌjñibal lac chaʼan. Ti ili estudio, mi caj laj qʼuel uxchajp: Cheʼ wen jach mi laj qʼuel jiñi taqʼuin, jiñi eʼtel yicʼot bajcheʼ yilal mi laj qʼuel lac bʌ.

WEN JACH BAJCHEʼ YILAL YOM MI LAJ QʼUEL JIÑI TAQʼUIN

4. ¿Bajcheʼ yilal tsaʼ chumle Salomón yicʼot Jesús?

⁴ Salomón cabʌl chuqui an i chaʼan (1 R. 10:7, 14, 15). Pero Jesús mach cabʌlic chuqui an i chaʼan i mi añicto i yotot (Mat. 8:20). Pero Salomón yicʼot Jesús wen jach bajcheʼ tsiʼ qʼueleyob jiñi chubʌʼañʌl tac come jiñi i ñaʼtʌbalob tilem ti Jehová.

5. ¿Bajcheʼ yilal tsiʼ qʼuele taqʼuin jiñi Salomón?

⁵ Salomón tsiʼ yʌlʌ chaʼan «an i cʼʌjñibal taqʼuin» (Ec. 7:11, 12). Jiñi taqʼuin miʼ coltañonla chaʼan mi lac taj jiñi i cʼʌjñibal bʌ lac chaʼan yicʼot chaʼan muʼto lac mʌn jiñi la com bʌ. Pero, anquese Salomón cabʌl chuqui an i chaʼan, tsiʼ chʼʌmbe i sujm chaʼan an yan tac bʌ ñumen ñuc bʌ i cʼʌjñibal. Jumpʼejl ejemplo, tiʼ tsʼijbu: «Ñumen tijicña jini utsʼat bʌ i cʼabaʼ bajcheʼ jini am bʌ cabʌl i chubʌʼan» (Pr. 22:1). Tsiʼ qʼuele jaʼel chaʼan jiñi muʼ bʌ i wen cʼuxbiñob taqʼuin an jach i tajol poj tijicñayob yicʼot jiñi añoʼ bʌ i chaʼan (Ec. 5:10, 12). I tsiʼ yʌlʌ jaʼel chaʼan añʌch i wocolel cheʼ yaʼ jach cʌyʌlonla ti taqʼuin, come mach tsiquilic miʼ waʼ jilel (Pr. 23:4, 5).

6. ¿Bajcheʼ yilal tsiʼ qʼuele Jesús jiñi chubʌʼañʌl tac? (Mateo 6:31-33).

⁶ Jesús wen jach bajcheʼ tsiʼ qʼuele jiñi chubʌʼañʌl tac. Tsiʼ wen ñusa i bʌ ti uchʼel yicʼot i jap chuqui miʼ jap (Luc. 19:2, 6, 7). Ti jumpʼejl bʌ qʼuin, tiʼ sujtesa ti wem bʌ vino jiñi jaʼ, i jiñʌch jiñi ñaxam bʌ milagro tsaʼ bʌ i mele (Juan 2:10, 11). Cheʼ jaʼel, cheʼ bʌ tsaʼ chʌmi lʌpʌl i chaʼan pʌl bʌ i bujc wen lets bʌ i tojol (Juan 19:23, 24). Pero jiñi chubʌʼañʌl mach jiñic ñumen ñuc bʌ i cʼʌjñibal tiʼ tojlel. Tiʼ sube jiñi xcʌntʼañob i chaʼan: «Maʼañic majch miʼ mejlel i melben i yeʼtel chaʼtiquil i yum [...]. Maʼañic miʼ mejlel laʼ chʼujutesan Dios yicʼot laʼ sʌclan Chubʌʼañʌl tac» (Mat. 6:24). Jesús tsiʼ yʌlʌ chaʼan Jehová mi caj i yʌqʼueñonla chuqui i cʼʌjñibal lac chaʼan mi mucʼʌch lac ñaxan sʌclan jiñi i Yumʌntel Dios (pejcan Mateo 6:31-33).

7. ¿Chuqui ti bendición tac tajbil i chaʼan juntiquil hermano cheʼ wen jach bajcheʼ yilal miʼ qʼuel jiñi taqʼuin?

⁷ Cabʌl hermanojob yicʼot hermanajob an i wen coltayob cheʼ miʼ jacʼob jiñi ticʼojel tac muʼ bʌ i yʌcʼ Jehová chaʼan jiñi taqʼuin. Laʼ laj qʼuel i yejemplo juntiquil hermano i bajñelto bʌ i cʼabaʼ Daniel. Miʼ yʌl: «Cheʼ bʌ xcolelonto, tsaʼ cʌlʌ chaʼan jiñi ñumen ñuc bʌ i cʼʌjñibal miʼ cajel tic tojlel jiñʌch cheʼ mic melben i yeʼtel Jehová». Daniel mejlem i cʼʌn jiñi i tiempo yicʼot chuqui tac yujil chaʼan miʼ chaʼlen coltaya ti Betel yicʼot cheʼ bʌ miʼ yujtel wocol tac come an i chaʼle wersa chaʼan mach cabʌlic chuqui an i chaʼan miʼ chumtʌl. Miʼ bej al: «Maʼañic baʼ ora mic chaʼ ñaʼtan c bʌ chaʼan jiñi tsaʼ bʌ c yajca c mel. I sujmʌch, cheʼ comiqui tsaʼʌch mejli c taj cabʌl taqʼuin, pero maʼañic baʼ ora tsaʼ c taja jiñi wem bʌ camigojob am bʌ c chaʼan ili ora. Cheʼ jaʼel, cheʼ mi cʌcʼ ti ñaxan jiñi i Yumʌntel Dios an i yʌqʼueyon c tijicñʌyel maʼañic bʌ miʼ mejlel i yʌcʼ jiñi taqʼuin. Jiñi taqʼuin maʼañic miʼ mejlel i laj jiñi bendición tac am bʌ i yʌqʼueyon Jehová». Tsiquil chaʼan, cheʼ mi la cʌcʼ lac ñaʼtʌbal tiʼ melol i yeʼtel Dios i mach yaʼic ti taqʼuin, ñumento chuqui mi lac taj.

WEN JACH BAJCHEʼ YILAL YOM MI LAJ QʼUEL JIÑI EʼTEL

8. ¿Bajcheʼ la cujil chaʼan Salomón wen jach bajcheʼ yilal tsiʼ qʼuele jiñi eʼtel? (Eclesiastés 5:18, 19).

⁸ Salomón tsiʼ yʌlʌ chaʼan jiñi tijicñʌyel muʼ bʌ la cubin chaʼan jiñi tsʌts bʌ eʼtel muʼ bʌ lac mel «jiñʌch lac majtan ti Dios» (pejcan Eclesiastés 5:18, 19). Cheʼ jaʼel tiʼ tsʼijbu: «Pejtel eʼtel muʼ bʌ lac mel miʼ yʌcʼ i chobejtʌbal» (Pr. 14:23). I mach toʼol tʼan jach tsiʼ chaʼle. Miʼ mejlel la cʌl chaʼan tsaʼʌch i chaʼle eʼtel come tsiʼ mele otot tac, tsʼusubil, pʌcʼʌbʌl, i yajñib jaʼ yicʼot tsiʼ mele tejclum tac (1 R. 9:19; Ec. 2:4-6). Tiʼ sujm, tsaʼʌch i chaʼle tsʌts bʌ eʼtel. I Salomón tsaʼʌch i tsʼitaʼ ubi i tijicñʌyel, pero yujil chaʼan mach jasʌlic jiñi chaʼan mi lac taj jiñi i sujm bʌ tijicñʌyel. Cheʼ jaʼel, cabʌl chuqui tsiʼ mele tiʼ tojlel Jehová. Jumpʼejl ejemplo, tsiʼ wen qʼuele chaʼan miʼ mejlel jumpʼejl utsʼatax bʌ templo baqui miʼ chʼujutesʌntel Jehová, jumpʼejl eʼtel tsaʼ bʌ jalʼa 7 jab (1 R. 6:38; 9:1). Anquese cabʌl chuqui tsiʼ mele tiʼ cuxtʌlel, tsiʼ qʼuele chaʼan jiñi ñumen ñuc bʌ i cʼʌjñibal jiñʌch cheʼ mi lac melben i yeʼtel Dios. Tiʼ tsʼijbu: «Cojach jini mic sub. Bʌcʼñan Dios, jacʼben i mandar, come jiñʌch muʼ bʌ i wersa cʼajtibeñet» (Ec. 12:13).

9. ¿Chuqui tsiʼ mele Jesús chaʼan maʼañic miʼ chilben i tiempo jiñi eʼtel?

⁹ Jesús wen yujilʌch eʼtel. Cheʼ bʌ chʼitonto tsiʼ chaʼle eʼtel bajcheʼ carpintero (Mar. 6:3). Miʼ mejlel la cʌl chaʼan jiñi i tat i ñaʼ tsaʼʌch i wen qʼueleyob ti ñuc cheʼ tsiʼ coltayob chaʼan miʼ mʌcʼlañob i familia. I, come juntiquil toj bʌ wiñic, tsiʼ mele wen tac bʌ eʼtel, jin chaʼan miʼ mejlel la cʌl chaʼan tsaʼ cʼoti cabʌl i yeʼtel. Miʼ mejlel lac ñaʼtan chaʼan Jesús tsaʼʌch i ñusa i bʌ tiʼ yeʼtel. Pero maʼañic tsiʼ yʌcʼʌ chaʼan iliyi miʼ chilben i tiempo chaʼan miʼ mel jiñi i chaʼan tac bʌ Dios (Juan 7:15). I cheʼ bʌ wolix (yʌquelix) i melben i yeʼtel Jehová tiʼ pejtelel ora tsiʼ yʌcʼʌ ili ticʼojel: «Mach laʼ chaʼlen eʼtel chaʼan jiñi bʌlñʌcʼʌl muʼ bʌ i yʌsiyel, chaʼlenla eʼtel chaʼan jiñi bʌlñʌcʼʌl muʼ bʌ i jalijel yicʼot muʼ bʌ i pʌyetla majlel ti jiñi cuxtʌlel mach bʌ añic miʼ jilel» (Juan 6:27). I ti jiñi Cʌntesa yaʼ ti wits tsiʼ yʌlʌ: «Tempan laʼ chubʌʼan yaʼ ti panchan» (Mat. 6:20).

10. ¿Chuqui ti wocol miʼ mejlel lac taj mi wem bʌ xʼeʼtelonla?

¹⁰ Jiñi ñaʼtʌbal tilem bʌ ti Jehová miʼ coltañonla chaʼan wen jach mi laj qʼuel jiñi eʼtel. Jiñi xñoptʼañonbʌla mi lac subentel chaʼan mi lac chaʼlen tsʌts bʌ eʼtel yicʼot chaʼan mi lac mel «wem bʌ eʼtel» (Efes. 4:28). Jiñi lac yumob ti eʼtel miʼ qʼuelob chaʼan maʼañic mi lac mel mach bʌ weñic yicʼot chaʼan la cujilʌch eʼtel, i tajol miʼ subeñoñobla chaʼan miʼ mulañob bajcheʼ mi lac chaʼlen eʼtel. Tajol mi lac ñumen chaʼlen eʼtel chaʼan jiñi lac yum ti eʼtel ñumen wen chuqui miʼ yʌl tiʼ tojlel jiñi i testigojob Jehová. Pero, mi tsaʼ caji lac mel jiñi, tajol maʼañix mi caj i mejlel laj cʌntan lac familia yicʼot lac mel jiñi i chaʼan tac bʌ Dios. Mi tsaʼ lac mele bajcheʼ jiñi, añʌch chuqui yom mi lac mel chaʼan mi lac tojʼesan.

11. ¿Chuqui tsiʼ cʌñʌ William cheʼ bʌ tsiʼ qʼuele i yejemplo juntiquil anciano?

¹¹ Juntiquil xñoptʼan xcolelto bʌ i cʼabaʼ William tsiʼ cʌñʌ chaʼan ñucʌch i cʼʌjñibal cheʼ wen jach mi laj qʼuel jiñi la queʼtel. Tsiʼ chaʼle eʼtel yicʼot juntiquil hermano anciano bʌ ti jumpʼejl congregación. William tsiʼ yʌlʌ tiʼ tojlel: «Juntiquilʌch wem bʌ ejemplo chaʼan bajcheʼ yilal yom mi laj qʼuel chuqui tac an. Miʼ wen chaʼlen eʼtel i mucʼʌch i mulañob bajcheʼ tac miʼ chaʼlen eʼtel. Pero cheʼ bʌ miʼ yujtel i yeʼtel, miʼ laj cʌy i miʼ tech i qʼuel chaʼan tac bʌ i familia yicʼot chaʼan bʌ i ñopbal. I jiñʌch juntiquil wiñic ñumen tijicña cʌmbil bʌ c chaʼan».b

WEN JACH BAJCHEʼ YILAL YOM MI LAJ QʼUEL LAC BɅ

12. ¿Bajcheʼ tsiʼ pʌsʌ Salomón chaʼan wen bajcheʼ yilal miʼ qʼuel i bʌ, i bajcheʼ tsaʼ asiyi?

¹² Cheʼ bʌ Salomón tsaʼ ajñi bajcheʼ i wiñic Jehová, wen jach bajcheʼ tsiʼ qʼuele i bʌ. Ti jumpʼejl bʌ qʼuin, cheʼ bʌ xcolelto i maxto wen jalic ochem bajcheʼ rey, tsiʼ cʌñʌ chaʼan an chuqui tac maʼañic bʌ miʼ mejlel i mel i tiʼ sube Jehová chaʼan miʼ cʌntesan (1 R. 3:7-9). Cheʼ jaʼel, tsiʼ cʌñʌ chaʼan añʌch i wocolel cheʼ mi lac chañʼesan lac bʌ. Tiʼ tsʼijbu: «Chañʌch i pusicʼal jini muʼ bʌ caj ti toʼol jilel. Ñucʌch miʼ lon qʼuel i bʌ jini muʼ bʌ caj ti yajlel» (Pr. 16:18). Pero ti wiʼil tsaʼ ñajʌyi i chaʼan jiñi i tʼan tac. Cheʼ bʌ añix chaʼpʼej uxpʼejl jab i cajel ti yumʌntel, tsiʼ chañʼesa i bʌ i tsaʼ caji i ñusʌben i mandar tac Dios. Jumpʼejl ejemplo, ti jiñi Mandar miʼ subentel jiñi reyob hebreojob: «Mach yomic miʼ pʌy cabʌl i yijñam ame sojquic i pusicʼal» (Dt. 17:17). Salomón maʼañic tsiʼ jacʼʌ ili mandar i tsiʼ pʌyʌ 700 i yijñam yicʼot 300 i concubina, ¡i yonlel ili xʼixicob miʼ chʼujutesañob yan tac bʌ dios! (1 R. 11:1-3). Tajol tsiʼ ñaʼta chaʼan maʼañic i wocolel. Mach la cujilic chuqui tsiʼ ñaʼta, pero la cujil chaʼan ti wiʼil tsaʼʌch i qʼuelbe i wocolel cheʼ tsiʼ ñajtʼesa i bʌ ti Jehová (1 R. 11:9-13).

13. ¿Chuqui mi laj cʌn cheʼ mi lac wen ñaʼtan jiñi i pecʼlel Jesús?

¹³ Jesús tiʼ pejtelel ora tsiʼ pʌsʌ i pecʼlel yicʼot wen jach bajcheʼ yilal tsiʼ qʼuele i bʌ. Cheʼ bʌ muʼto caj i tilel ila ti Lum, cabʌl chuqui ñuc tac bʌ tsiʼ mele tiʼ yeʼtel Jehová. Colosenses 1:16 miʼ yʌl chaʼan «tiʼ tojlel tsaʼ mejli pejtelel jiñi yan tac bʌ am bʌ ti panchan yicʼot ti pañimil». Tajol cheʼ bʌ tsiʼ chʼʌmʌ jaʼ tsiʼ cʼajtesa pejtelel chuqui tac tsiʼ mele yaʼ ti panchan cheʼ bʌ yaʼan yicʼot i Tat (Mat. 3:16; Juan 17:5). Pero maʼañic tsiʼ chañʼesa i bʌ cheʼ tsiʼ cʼajtesa pejtelel iliyi. Maʼañic baʼ ora tsiʼ pʌsʌ chaʼan ñumen ñuc miʼ qʼuel i bʌ bajcheʼ jiñi yambʌlob. Tiʼ sube jiñi xcʌntʼañob i chaʼan chaʼan maʼañic tsaʼ tili ti Lum «chaʼan miʼ melbentel i yeʼtel, chaʼañʌch miʼ melben i yeʼtel yambʌlob yicʼot chaʼan miʼ yʌcʼ i cuxtʌlel bajcheʼ i tojol i coltʌntel cabʌlob» (Mat. 20:28). Tsiʼ yʌlʌ chaʼan maʼañic chuqui miʼ mejlel i bajñel mel (Juan 5:19). ¡Jesús tsiʼ wen pʌsʌ i pecʼlel! ¿Mach ba la comic lac lajin?

14. ¿Bajcheʼ miʼ coltañonla jiñi i tʼan tac Jesús chaʼan wen jach bajcheʼ yilal mi laj qʼuel lac bʌ?

¹⁴ Jesús tiʼ sube jiñi xcʌntʼañob i chaʼan chaʼan yom wen jach miʼ qʼuelob i bʌ. Ti jumpʼejl bʌ qʼuin tiʼ subeyob: «Laj tsicbilto jiñi i tsutsel laʼ jol» (Mat. 10:30). Miʼ wen ñuqʼuesan lac pusicʼal ili tʼan tac, ñumento mi ñʌmʌlonla lac ñaʼtan mach bʌ weñic ti lac tojlel. Miʼ cʼajtesʌbeñonla chaʼan jiñi lac Tat am bʌ ti panchan mucʼʌch i wen cʼuxbiñonla yicʼot chaʼan miʼ wen qʼuelonla ti ñuc. Mi Jehová weñʌch miʼ qʼuel chaʼan mi lac melben i yeʼtel yicʼot chaʼan mi lac chumtʌl ti jiñi tsijiʼ bʌ pañimil (mulawil), ¿majquiyonla chaʼan mi lac suben chaʼan mach cheʼiqui?

15. a) Cheʼ bajcheʼ tsiʼ yʌlʌ jiñi revista La Atalaya ti wajali, ¿bajcheʼ yilal yom mi laj qʼuel lac bʌ? b) Cheʼ bajcheʼ mi laj qʼuel ti jiñi foto tac yaʼ ti página 24, ¿chuqui ti bendición tac mi lac sʌt mi joñon jach la mi laj cʌlʌx qʼuel lac bʌ ti ñuc?

¹⁵ Añix cheʼ bʌ 15 jab, jiñi revista La Atalaya tiʼ subeyonla chaʼan yom wen jach bajcheʼ yilal mi laj qʼuel lac bʌ. Tsiʼ yʌlʌ: «I sujmʌch, mach la comic laj cʌlʌx qʼuel lac bʌ ti ñuc i tiʼ caj jiñi mi lac chañʼesan lac bʌ, pero mach la comic lac ñaʼtan jaʼel chaʼan maʼañic laj cʼʌjñibal. La com lac ñaʼtan bajcheʼ yilalonla tiʼ sujm, i chaʼan miʼ mejlel lac mel jiñi yom mi laj cʌn chuqui jiñi la cujil bʌ i melol yicʼot chuqui jiñi mach bʌ la cujilic. Juntiquil hermana tsiʼ yʌlʌ: ‹Mach joñoñic jiñi ñumen jontol bʌ i mach joñoñic jiñi ñumen wem bʌ lac piʼʌl. Añʌch wen tac bʌ c melbal (chaʼlibal) yicʼot an c sajtemal, cheʼ bajcheʼ pejtelel lac piʼʌlob›».c ¿Muʼ ba laj qʼuel chaʼan weñʌch cheʼ wen jach bajcheʼ yilal mi laj qʼuel lac bʌ?

16. ¿Chucoch miʼ yʌqʼueñonla wen tac bʌ ticʼojel Jehová?

¹⁶ Jehová miʼ yʌqʼueñonla wen tac bʌ ticʼojel yaʼ tiʼ Tʼan. Miʼ mel come miʼ cʼuxbiñonla i yom chaʼan tijicñayonla (Is. 48:17, 18). Jiñi ñumen wem bʌ muʼ bʌ i mejlel lac mel jiñʌch cheʼ mi la cʌcʼ Jehová ti ñaxan ti laj cuxtʌlel. Jiñʌch muʼ bʌ caj i yʌqʼueñonla i sujm bʌ lac tijicñʌyel. Maʼañic mi caj lac wen taj wocol tac muʼ bʌ i tajob jiñi lac piʼʌlob muʼ bʌ i ñumen qʼuelob ti ñuc jiñi taqʼuin, jiñi eʼtel (troñel) o mucʼ jach i bajñel ñaʼtañob i bʌ. Jin chaʼan, ¡laʼ lac pʌs lac ñaʼtʌbal i laʼ lac tijicñesʌben i pusicʼal Jehová! (Pr. 23:15).