Xcolelob, ¿chuqui mi caj laʼ mel ti laʼ cuxtʌlel?

1. ¿Chuqui ti ñuc bʌ eʼtel tsaʼ aqʼuentiyob Jehoás, Uzías yicʼot Josías?

ÑAʼTANCU chaʼan maʼ waʼchocontel ti rey tiʼ tejclum Dios, pero chutetto o xcolelet jaxto, ¿chuqui mi caj a mel? Jiñi Biblia miʼ taj ti tʼan uxtiquil reyob ti Judá maxto bʌ añobic i jabilel tsaʼ ochiyob tiʼ yeʼtel. Juntiquil jiñʌch Jehoás, 7 bʌ i jabilel tsaʼ ochi ti rey, Uzías, 16, i Josías, 8. ¡Jumpʼejlʌch wen ñuc bʌ eʼtel (troñel) añob i chaʼan! Anquese wocolʌch tsiʼ ñusayob, pero añobʌch i coltʌntel chaʼan miʼ melob chuqui wen.

2. ¿Chucoch weñʌch cheʼ mi laj cʌn tsaʼ bʌ ujti tiʼ tojlel Jehoás, Uzías yicʼot Josías?

² I sujmʌch chaʼan ili ora mach reyoñicla, pero cabʌl chuqui miʼ mejlel laj cʌn tiʼ tojlel ili uxtiquil reyob muʼ bʌ i yʌjlelob ti Biblia. Ili reyob tsiʼ meleyob chuqui wem bʌ pero cheʼ jaʼel tsiʼ meleyob mach bʌ weñic. Jin chaʼan, ti ili estudio mi caj laj cʌn chaʼan ñuc i cʼʌjñibal cheʼ wen mi lac yajcan la camigojob, chaʼan mi lac chʌn pʌs lac pecʼlel yicʼot mi lac sʌclan i coltaya Jehová.

YAJCAN TI WEN A WAMIGOJOB

3. ¿Bajcheʼ tsiʼ jacʼʌ Jehoás jiñi i cʌntesʌntel ti Jehoiadá?

³ Mele chuqui wen cheʼ bajcheʼ Jehoás. Jehoás alʌto cheʼ bʌ tsaʼ chʌmi jiñi i papá, jin chaʼan jiñi ñuc bʌ sacerdote Jehoiadá jiñʌch tsaʼ bʌ i cosa bajcheʼ i yalobil yicʼot tsiʼ cʌntesa. I Jehoás tsaʼʌch i jacʼʌ jiñi i cʌntesʌntel. Jin chaʼan wen chuqui tsiʼ yajca i mel, tsiʼ melbe i yeʼtel Jehová yicʼot tsiʼ colta jiñi tejclum chaʼan cheʼʌch miʼ mel jaʼel. I tsaʼto i yʌcʼʌ chaʼan miʼ chaʼ tojʼesʌntel jiñi templo Jehová (2 Cr. 24:​1, 2, 4, 13, 14).

4. ¿Bajcheʼ miʼ coltañonla cheʼ mi lac jacʼ jiñi i mandar Jehová? (Proverbios 2:​1, 10-12).

⁴ Mi jiñi a papá a mamá o yambʌ lac piʼʌl miʼ cʌntesañet chaʼan maʼ cʼuxbin Jehová yicʼot maʼ jacʼben i tʼan, woli (choncol) i cʌybeñetob jumpʼejl ñuc bʌ a majtan (pejcan Proverbios 2:​1, 10-12). Jiñi tatʌlob cabʌl bajcheʼ miʼ mejlel i cʌntesañob i yalobil. Ñaʼtancu tiʼ tojlel Katia, cheʼ bʌ jiñi i papá miʼ majlel i cʌy ti escuela miʼ yʌlob majlel yaʼ ti bij jiñi texto chaʼan bʌ jiñi qʼuin. Katia miʼ yʌl: «Ili tsiʼ coltayon chaʼan mic ñaʼtan bajcheʼ miʼ mejlel c ñusan jumpʼejl wocol muʼ bʌ c taj yaʼ ti escuela». Tajol jiñi a papá a mamá miʼ subeñetob chuqui tac mach bʌ yomic maʼ mel, i tajol maʼ ñaʼtan chaʼan wolix (yʌquelix) i cʌlʌx mʌctañetob. ¿Chuqui miʼ mejlel a mel chaʼan maʼ jacʼbeñob i tʼan? Ñaʼtan muʼ bʌ i yʌl Anastasia, cheʼ bʌ jiñi i papá i mamá miʼ subeñob chuqui tac mach bʌ yomic miʼ mel, miʼ tsictesʌbeñob jaʼel chucoch cheʼ woliʼ yʌlob bajcheʼ jiñi. Anastasia miʼ yʌl: «Ili tsiʼ coltayon c chʼʌmben i sujm chaʼan pejtelel woli bʌ i subeñoñob chaʼañʌch miʼ cʼuxbiñoñob yicʼot yomob i cʌntañon, mach chaʼañic yomob jach i mʌctañon».

5. ¿Bajcheʼ mi caj i yubin i bʌ jiñi a papá a mamá yicʼot Jehová cheʼ mucʼʌch a jacʼ jiñi ticʼojel tac? (Proverbios 22:6; 23:​15, 24, 25).

⁵ Mi mucʼʌch a jacʼ jiñi ticʼojel tac loqʼuem bʌ ti Biblia yicʼot muʼ bʌ i yʌqʼueñetob jiñi a papá a mamá wen tijicña mi caj i yubiñob i bʌ. Pero mi caj a ñumen aqʼuen i tijicñʌyel Jehová i mi caj a wajñel bajcheʼ i yamigo tiʼ pejtelel ora (pejcan Proverbios 22:6; 23:​15, 24, 25). Jin chaʼan, ¿ixcu cheʼ muqʼuic a lajin jiñi ejemplo chaʼan Jehoás?

6. ¿Majqui tsiʼ jacʼbe i tʼan Jehoás, i chuqui tsiʼ chaʼle? (2 Crónicas 24:​17, 18).

⁶ Ñaʼtan chuqui mach bʌ weñic tsiʼ mele Jehoás. Cheʼ bʌ Jehoiadá tsaʼ chʌmi, Jehoás tiʼ sajca mach bʌ weñic i yamigojob (pejcan 2 Crónicas 24:​17, 18). Jin tsiʼ jacʼbeyob i tʼan anquese maʼañic miʼ cʼuxbiñob Jehová. ¿Weñʌch ba tsaʼ bʌ i mele maʼ wʌl? Mach cheʼiqui, pero jin tsiʼ jacʼbeyob i tʼan (Pr. 1:10). I cheʼ bʌ jiñi i primo i cʼabaʼ Zacarías tsiʼ ñopo i ticʼ, tsiʼ yʌcʼʌ ti tsʌnsʌntel (2 Cr. 24:​20, 21; Mat. 23:35). Ti ñaxan lon weñʌch bajcheʼ tsaʼ caji i mel i yeʼtel, pero ti wiʼil mach weñic bajcheʼ tsiʼ mele. Tsaʼ sujti ti juntiquil apóstata yicʼot ti xtsʌnsa, i ti wiʼil tsaʼ tsʌnsʌnti tiʼ wiñicob (2 Cr. 24:​22-25). ¡Tsaʼic i bej jacʼbe i tʼan Jehová yicʼot jiñi muʼ bʌ i cʼuxbiñob mach cheʼic tsaʼ ujti wʌle bajcheʼ jiñi! ¿Chuqui miʼ mejlel a cʌn tiʼ tojlel?

7. ¿Bajcheʼ yilal yom jiñi a wamigojob? (Qʼuele jaʼel jiñi foto).

⁷ Muʼ bʌ laj cʌn tiʼ tojlel Jehoás jiñʌch chaʼan yom mi lac yajcan wem bʌ la camigojob muʼ bʌ i coltañoñobla chaʼan mi laj cʼuxbin Jehová yicʼot chaʼan mi lac tijicñesan. I miʼ mejlel lac sʌclan la camigojob mach bʌ junlajalobic i jabilel. Cʼajtesan, Jehoiadá ñumen an i jabilel bajcheʼ Jehoás. Jin chaʼan, ñaʼtan majqui jiñi a wamigojob i cʼajtiben a bʌ: «¿Muʼ ba i coltañon chaʼan mic ñumen ñop Jehová? ¿Muʼ ba i subeñoñob chaʼan mic jacʼben i Tʼan? ¿Muʼ ba i mulañob i yʌlob chaʼan tac bʌ Jehová yicʼot miʼ pejcañob jiñi Biblia? ¿Muʼ ba i qʼuelob ti ñuc i mandar tac Dios? Mi tsaʼ c mele mach bʌ weñic, ¿muʼ ba i ticʼoñob?» (Pr. 27:​5, 6, 17). Mi jiñi a wamigojob maʼañic miʼ cʼuxbiñob Jehová, tiʼ sujm yom maʼ cʌyob. Pero mi mucʼʌch i cʼuxbiñob Jehová, wen cʌntan chaʼan maʼañic maʼ sʌt jiñi a wamigojob ¡come jiñobʌch jiñi i sujm bʌ amigojob! (Pr. 13:20).

8. Mi jatet maʼ cʼʌn internet, ¿chuqui yom maʼ wen ñaʼtan?

⁸ Jiñi internet añʌch i cʼʌjñibal, miʼ mejlel laj cʼʌn chaʼan mi lac pejcan jiñi lac familia yicʼot jiñi la camigojob. Pero an muʼ bʌ i letsañob foto tac o video tac chaʼan jach yomob i pʌs chuqui tac añob i chaʼan o chuqui tac an i meleyob. Jin chaʼan, mi jatet maʼ cʼʌn internet cʼajtiben a bʌ: «¿Chucoch mic letsan foto tac o video tac? ¿Chaʼan jach ba com chaʼan miʼ qʼuelob jiñi yambʌlob i miʼ qʼueloñob ti ñuc? ¿Muʼ ba caj i coltan yambʌlob? Cheʼ bajcheʼ mic chaʼlen tʼan yicʼot chuqui tac mic mel, ¿chaʼan jach ba com cʌqʼuen i tijicñʌyel yambʌlob?». Ti jumpʼejl bʌ qʼuin jiñi hermano Nathan Knorr, tsaʼ bʌ ajñi ti jiñi Junmojt muʼ bʌ i pʌsob bij, tsiʼ yʌcʼʌ ili ticʼojel: «Mach laʼ mel chuqui tac mi laʼ mel chaʼan mi laʼ wʌqʼuen i tijicñʌyel yambʌlob. Melela chaʼan mi laʼ tijicñesan Jehová, i cheʼ jiñi mi caj laʼ tijicñesan jaʼel jiñi muʼ bʌ i cʼuxbiñob Jehová».

JIÑI PECʼLEL WEN ÑUC I CʼɅJÑIBAL

9. ¿Chuqui tsiʼ mele Uzías tiʼ coltaya Jehová? (2 Crónicas 26:​1-5).

⁹ Mele chuqui wen cheʼ bajcheʼ Uzías. Cheʼ bʌ jiñi rey Uzías xcolelto, tsiʼ pʌsʌ i pecʼlel yicʼot «tsiʼ tsajca Dios ti pejtelel i pusicʼal». Tsaʼ chumle 68 jab i Jehová cabʌl jab tsiʼ yʌqʼue i bendición (pejcan 2 Crónicas 26:​1-5). Uzías tsiʼ jisa cabʌl i contrajob yicʼot tsiʼ wen qʼuele chaʼan jiñi tejclum Jerusalén cʌntʌbil miʼ yajñel (2 Cr. 26:​6-15). Tajol tijicña tsiʼ yubi i bʌ cheʼ bʌ tsiʼ qʼuele chaʼan wolʌch i mejlel i mel i yeʼtel tiʼ coltaya Jehová (Ec. 3:​12, 13).

10. ¿Chuqui tsaʼ ujti tiʼ tojlel Uzías?

¹⁰ Ñaʼtan chuqui mach bʌ weñic tsiʼ mele Uzías. Uzías ñʌmʌl i yʌl chuqui miʼ mejlel come jiñʌch jiñi rey. Tajol jin chaʼan tsiʼ ñaʼta chaʼan miʼ mejlel i mel chuqui yom. Jin chaʼan, tsaʼ ochi yaʼ ti templo i tsiʼ pulu jiñi pom yaʼ ti pulʌntib anquese yujil chaʼan mach cheʼic yom miʼ mel (2 Cr. 26:​16-18). Jiñi ñuc bʌ sacerdote Azarías tsiʼ tiqʼui, pero Uzías tsaʼ wen michʼa. Come tsiʼ chaʼle mulil, Jehová tsiʼ yʌqʼue lepra (2 Cr. 26:​19-21). ¡Tsaʼic i chʌn pʌsʌ i pecʼlel mach cheʼic tsaʼ ujti bajcheʼ jiñi!

11. ¿Chuqui miʼ mel jiñi am bʌ i pecʼlel? (Qʼuele jaʼel jiñi foto tac).

¹¹ Cheʼ bʌ Uzías tsiʼ taja i ñuclel, tsaʼ ñajʌyi i chaʼan i yʌqʼuen wocolix i yʌlʌ Jehová chaʼan pejtelel tajbil bʌ i chaʼan. ¿Chuqui mi laj cʌn? Chaʼan yom mi laj cʼajtesan chaʼan pejtelel chuqui melbil lac chaʼan o tajbil lac chaʼan mach ti lac bajñel pʼʌtʌlelic. Yom mi la cʌqʼuen i ñuclel Jehová i maʼañic mi lac chañʼesan lac bʌ (1 Cor. 4:7).b Jin chaʼan yom mi lac pʌs lac pecʼlel, mi lac ñaʼtan chaʼan xmulilonla yicʼot chaʼan i cʼʌjñibalʌch chaʼan mi lac tojʼesʌntel. Juntiquil hermano ñumeñix bʌ ti 60 i jabilel tsiʼ yʌlʌ: «An j cʌñʌ chaʼan mach yomic mij cʌlʌx qʼuel c bʌ ti ñuc. Cheʼ bʌ an majqui miʼ ticʼon chaʼan chuqui mach bʌ weñic tsaʼ c mele mic chaʼlen wersa chaʼan mic tojʼesan yicʼot mic bej melben i yeʼtel Jehová». Mi mucʼʌch lac chʌn pʌs lac pecʼlel yicʼot mi lac bʌcʼñan Jehová, utsʼat mi caj la cajñel (Pr. 22:4).

CHɅN SɅCLAN JEHOVÁ

12. ¿Chuqui tsiʼ mele Josías chaʼan miʼ sʌclan Jehová cheʼ bʌ xcolelto? (2 Crónicas 34:​1-3).

¹² Mele chuqui wen cheʼ bajcheʼ Josías. Josías an jaxto 16 i jabilel cheʼ bʌ tsaʼ caji i sʌclan Jehová, come yom i ñumen cʌn yicʼot i melben i yeʼtel. Pero wocolʌch tsiʼ yubi come ti jimbʌ ora jiñi lac piʼʌlob miʼ chʼujutesañob jiñi dios tac mach bʌ i sujmic. Jin chaʼan tsaʼʌch i wen pʌsʌ i chʼejlel chaʼan miʼ mel chuqui wen. ¡I tsaʼʌch mejli i mel! Maxto añic 20 i jabilel cheʼ bʌ tsiʼ jisa i chʼujutesʌntel jiñi dios tac mach bʌ i sujmic yaʼ ti tejclum (pejcan 2 Crónicas 34:​1-3).

13. ¿Bajcheʼ mi caj i coltañet cheʼ maʼ wʌcʼ a bʌ ti Jehová?

¹³ ¿Bajcheʼ miʼ mejlel a lajin Josías anquese xcoleletto? Sʌclan Jehová i chaʼlen wersa chaʼan maʼ ñumen cʌn jiñi utsʼatax bʌ i melbal tac (chaʼlibal tac). Ili mi caj i ñijcan a pusicʼal chaʼan maʼ wʌcʼ a bʌ tiʼ tojlel. ¿I bajcheʼ mi caj i coltañet cheʼ maʼ wʌcʼ a cuxtʌlel ti Jehová? Qʼuele muʼ bʌ i yʌl Luke, tsaʼ bʌ i chʼʌmʌ jaʼ cheʼ 14 i jabilel: «Cʼʌlʌl ili ora ñaxan mi cʌcʼ tij cuxtʌlel jiñi i chaʼan bʌ Jehová i mic chaʼlen wersa chaʼan mi cʌqʼuen i tijicñʌyel» (Mar. 12:30). Mi cheʼʌch maʼ mel jaʼel mi caj a taj cabʌl bendición.

14. ¿Bajcheʼ miʼ lajiñob Josías jiñi xcolelob?

¹⁴ ¿Chuqui ti wocol miʼ mejlel i ñusañob jiñi xcolelob muʼ bʌ i melbeñob i yeʼtel Jehová? Jumpʼejl ejemplo, Johan tsiʼ chʼʌmʌ jaʼ cheʼ 12 i jabilel, miʼ yʌl chaʼan jiñi i piʼʌlob ti escuela miʼ wersa subeñob chaʼan miʼ ñucʼ jiñi tsijib cigarro am bʌ ili ora, jiñi cigarro electrónico. ¿Chuqui miʼ coltan chaʼan maʼañic miʼ jacʼ? Miʼ wen ñaʼtan chaʼan mi tsiʼ mele bajcheʼ jiñi miʼ mejlel ti cʼamʼan yicʼot miʼ mejlel i ñajtʼesan i bʌ ti Jehová. Juntiquil xchʼoc i cʼabaʼ Rachel, tsaʼ bʌ i chʼʌmʌ jaʼ cheʼ 14 i jabilel, miʼ yʌl chuqui miʼ coltan jaʼel cheʼ miʼ taj jumpʼejl wocol yaʼ ti escuela. «Cheʼ an chuqui miʼ yʌjlel yaʼ ti escuela mic ñop j cʼajtesan jiñi cʌmbil bʌ c chaʼan yaʼ ti Biblia. Jumpʼejl ejemplo cheʼ bʌ an chuqui miʼ yʌjlel chaʼan bʌ historia, mij cʼajtesan jumpʼejl relato o jumpʼejl profecía am bʌ ti Biblia muʼ bʌ i taj i bʌ yicʼot. I cheʼ an majqui woliyon ti tʼan quicʼot, mij cʼajtesan jumpʼejl texto muʼ bʌ i mejlel c suben». Anquese tajol mach lajalic jiñi wocol am bʌ a chaʼan bajcheʼ tsaʼ bʌ i ñusa jiñi rey Josías, mucʼʌch a mejlel a cʼʌn a ñaʼtʌbal yicʼot a pʌs a xucʼtʌlel. Mi maʼ mejlel a ñusan jiñi wocol muʼ bʌ a taj ili ora, mi caj i chajpañet chaʼan jiñi talto bʌ qʼuin.

15. ¿Chuqui tsiʼ colta Josías chaʼan miʼ melben i yeʼtel Jehová? (2 Crónicas 34:​14, 18-21).

¹⁵ Cheʼ bʌ jiñi rey Josías 26 i jabilel, tsiʼ yʌcʼʌ i tʼan chaʼan miʼ tojʼesʌntel jiñi templo. Ti jimbʌ ora tsaʼ tajle jiñi «jun baʼ tsʼijbubil i tʼan lac Yum tsaʼ bʌ aqʼuenti Moisés». Cheʼ bʌ tsaʼ pejcʌbenti jiñi rey, ti orajach tsiʼ jacʼʌ muʼ bʌ i yʌjlel yaʼ ti Mandar (pejcan 2 Crónicas 34:​14, 18-21). ¿Muʼ baʼ pejcan jiñi Biblia tiʼ pejtelel ora? Mi wolʌch a chaʼlen wersa a mel, ¿mucʼʌch baʼ mulan? ¿Chuqui miʼ mejlel a mel chaʼan maʼañic miʼ ñajʌyel a chaʼan jiñi versículo tac muʼ bʌ a mulan? Luke, tsaʼ bʌ la cʌlʌ yaʼ ti párrafo 13, miʼ tsʼijbun ti jumpʼejl cuaderno jiñi texto tac muʼ bʌ i mulan. ¿Muʼ ba i mejlel i coltañet chaʼan maʼ cʼajtesan jaʼel jiñi texto tac tsaʼ bʌ a mulaj o ñuc bʌ i cʼʌjñibal tsaʼ qʼuele mi tsaʼ mele bajcheʼ Luke? Cheʼ maʼ ñumen cʌn jiñi Biblia yicʼot maʼ ñumen qʼuel ti ñuc mi caj a mulan a ñumen melben i yeʼtel Jehová. I cheʼ bajcheʼ jiñi rey Josías, jiñi i Tʼan Dios mi caj i coltañet a mel chuqui wen.

16. ¿Chucoch tsiʼ mele mach bʌ weñic Josías, i chuqui mi laj cʌn?

¹⁶ Ñaʼtan chuqui mach bʌ weñic tsiʼ mele Josías. Cheʼ bʌ Josías 39 i jabilel, tsiʼ mele mach bʌ weñic i tiʼ sʌtʌ i cuxtʌlel. Tsiʼ bajñel qʼuele i bʌ ti ñuc i maʼañic tsiʼ cʼajtibe i coltaya Jehová (2 Cr. 35:​20-25). ¿Chuqui mi laj cʌn? Chaʼan yom mi lac chʌn sʌclan laj coltʌntel ti Jehová mach yʌlʌyic jaypʼejl lac jabilel. Jin chaʼan yom mi lac jacʼben i Tʼan, mi lac pejcan jiñi Biblia yicʼot mi lac ñʌchʼtan chuqui miʼ yʌl jiñi hermanojob añobix bʌ i ñaʼtʌbal. Cheʼ bajcheʼ jiñi, mi caj lac wen ñaʼtan chuqui muʼ bʌ lac mel i tijicña mi caj la cajñel (Sant. 1:25).

XCOLELOB, TIJICÑA MI LAʼ MEJLEL TI AJÑEL

17. ¿Chuqui miʼ mejlel laʼ cʌn tiʼ tojlel jiñi uxtiquil reyob?

¹⁷ Xcolelob, cabʌl chuqui miʼ mejlel laʼ mel chaʼan tijicña mi laʼ wajñel. Jiñi ejemplo chaʼan Jehoás, Uzías yicʼot Josías miʼ pʌs chaʼan jiñi alʌlob yicʼot xcolelob miʼ mejlel i melob chuqui wen yicʼot i tijicñesañob Jehová. I sujmʌch, ili uxtiquilob tsaʼʌch i meleyob chuqui mach bʌ weñic i tsiʼ tajayob wocol, pero ili mach yomic i yʌl chaʼan maʼañic chuqui miʼ mejlel laʼ cʌn tiʼ tojlelob. Chaʼlenla wersa chaʼan maʼañic mi laʼ mel jiñi mach bʌ weñic, cheʼ bajcheʼ jiñi utsʼat mi caj laʼ chumtʌl.

18. ¿Chuqui miʼ pʌsbeñonla chaʼan tijicña mi lac mejlel ti ajñel? (Qʼuele jaʼel jiñi dibujo).

¹⁸ Jiñi Biblia miʼ taj ti tʼan yambʌ xcolelob tsaʼ bʌ i lʌcʼtesayob i bʌ ti Jehová, i Jehová utsʼat tsiʼ qʼueleyob i wen tsaʼ chumleyob, bajcheʼ David. Cheʼ bʌ xcolelto, tsiʼ lʌcʼtesa i bʌ Jehová i ti wiʼil tsaʼ sujti ti rey. Anquese tsaʼʌch i taja i sajtemal, Dios tsiʼ qʼuele bajcheʼ juntiquil xucʼul bʌ i wiñic (1 R. 3:6; 9:​4, 5; 14:8). Jin chaʼan, mi mucʼʌch a ñumen cʌn tiʼ tojlel mi caj i coltañet chaʼan maʼ chʌn melben i yeʼtel Jehová. Yambʌ jiñʌch cheʼ maʼ ñumen cʌn tiʼ tojlel Marcos yicʼot Timoteo, chaʼtiquil xcolelob xucʼul bʌ tsiʼ melbeyob i yeʼtel Jehová jaʼel. Jin chaʼan tsiʼ yʌqʼueyob i tijicñʌyel Jehová i utsʼat tsaʼ ajñiyob.

19. ¿Bajcheʼ yilal maʼ mejlel ti chumtʌl?

¹⁹ ¿Bajcheʼ yilal maʼ mulan chumtʌl ti talto bʌ qʼuin? Utsʼat maʼ mejlel a ñusan yicʼot tijicña maʼ mejlel ti chumtʌl. Jin chaʼan ñopo Jehová i mach ti a bajñel ñaʼtʌbalic, Jehová mi caj i coltañet chaʼan wen muʼ bʌ a yajcan a mel (Pr. 20:24). I cʼajtesan chaʼan Jehová miʼ wen qʼuel ti ñuc muʼ bʌ a mel tiʼ tojlel, jin chaʼan melben i yeʼtel come miʼ wen cʼuxbiñonla. ¡Maʼañic chuqui yambʌ ñumen ñuc bʌ!