Mach a qʼuel a bʌ ti ñuc bajcheʼ miʼ mel cabʌl lac piʼʌlob
CABɅL lac piʼʌlob yomob chaʼan miʼ qʼuejlelob ti ñuc, anquese cheʼʌch miʼ qʼuejlelob bajcheʼ jiñi, ñumen yomobto chaʼan miʼ qʼuejlelob ti ñuc. Jiñi Biblia miʼ yʌl chaʼan cheʼ ti cojix bʌ qʼuin an cheʼ bʌ mi caj i ñaʼtañob bajcheʼ jiñi (2 Tim. 3:2).
Iliyi mach woli (choncol) jaxto i tejchel, cʼʌlʌlʌch ti wajali. Adán i Eva tsiʼ qʼueleyob i bʌ ti ñuc cheʼ bʌ tsiʼ ñaʼtayob chaʼan miʼ mejlel i yʌlob chuqui jiñi wem bʌ yicʼot mach bʌ weñic. I tiʼ caj tsaʼ bʌ i meleyob woli (yʌquel) lac ñusan wocol. Cheʼ jaʼel, jiñi rey Uzías tsiʼ mele mach bʌ weñic cheʼ bʌ tsiʼ pulu jiñi pom yaʼ ti templo anquese maʼañic tiʼ wenta i mel jiñi (2 Cr. 26:18, 19). Jiñi fariseojob yicʼot saduceojob tsiʼ ñaʼtayob chaʼan yom miʼ qʼuejlelob ti ñuc ti Dios come tilemob tiʼ pʼolbal Abrahán (Mat. 3:9).
Chumulonla baqui jiñi lac piʼʌlob miʼ wen qʼuelob i bʌ ti ñuc, i mach wocolic chaʼan mi lac tech lac ñaʼtan jaʼel bajcheʼ jiñi (Gál. 5:26). Tajol mi lac tech lac ñaʼtan chaʼan yom mi laj qʼuejlel ti ñuc jaʼel. ¿Chuqui miʼ mejlel i coltañonla chaʼan mach cheʼic mi lac ñaʼtan bajcheʼ jiñi? Jiñʌch cheʼ mi lac ñaʼtan bajcheʼ yilal miʼ qʼuel Jehová iliyi. Laʼ laj qʼuel chaʼpʼejl principio.
Jehová jiñʌch miʼ yʌl yom bʌ mi la cʌqʼuentel. Laʼ laj qʼuel ejemplo tac.
Ti jumpʼejl familia, Jehová miʼ pijtan chaʼan jiñi wiñic miʼ qʼuejlel ti ñuc tiʼ yijñam, i jiñi xʼixic miʼ cʼuxbintel tiʼ ñoxiʼal (Efes. 5:33). Jiñi ñujpuñemoʼ bʌ yom miʼ tsʼʌctesañob chuqui yom tiʼ tojlel i yijñam o i ñoxiʼal chaʼan bʌ jiñi piʼleya, i maʼañic majqui yambʌ yom miʼ piʼleñob (1 Cor. 7:3). Jiñi tatʌlob yomob chaʼan jiñi i yalobilob miʼ jacʼbeñob i tʼan, i jiñi i yalobilob yomob chaʼan miʼ cʼuxbintelob yicʼot miʼ cʌntʌntelob (2 Cor. 12:14; Efes. 6:2).
Yom mi laj qʼuelob ti ñuc jiñi ancianojob chaʼan jiñi tsʌts bʌ eʼtel (troñel) muʼ bʌ i melob yaʼ ti congregación (1 Tes. 5:12). Pero maʼañic miʼ mejlel i subeñoñobla chaʼan maʼañix chuqui miʼ junyaj mejlel lac mel (1 Ped. 5:2, 3).
Dios miʼ yʌcʼ chaʼan jiñi yumʌlob wʌʼ ti pañimil miʼ cʼajtiñob tojoñel yicʼot chaʼan miʼ qʼuejlelob ti ñuc (Rom. 13:1, 6, 7).
Jehová wen yujil cʼuxbiya i cabʌl chuqui an i yʌqʼueyonla. Come xmulilonla, i wentʌlel jach mi lac chʌmel (sajtel) (Rom. 6:23). Pero chaʼan jiñi xucʼul bʌ i cʼuxbiya Jehová, cabʌl chuqui utsʼatax bʌ miʼ yʌqʼueñonla (Sal. 103:10, 11). Jiñi bendición tac yicʼot jiñi privilegio tac muʼ bʌ i yʌqʼueñonla chaʼañʌch jiñi ñuc bʌ i yutslel (Rom. 12:6-8; Efes. 2:8).
CHUQUI MIʼ MEJLEL LAC MEL CHAʼAN MAʼAN MI LAJ QʼUEL LAC BɅ TI ÑUC O CHANCHAN JAX MI LAC MEL LAC BɅ
Yom mi laj cʌntan lac bʌ chaʼan mach cheʼ mi lac ñaʼtan bajcheʼ jiñi lac piʼʌlob ti pañimil. Mi maʼan mi laj cʌntan lac bʌ tajol miʼ mejlel lac ñaʼtan chaʼan ñumento chuqui yom mi la cʌqʼuentel bajcheʼ jiñi yambʌlob. Jesús tsiʼ yʌlʌ ti jumpʼejl relato chaʼan mach wocolic miʼ mejlel lac ñaʼtan bajcheʼ ili cheʼ bʌ tsiʼ taja ti tʼan juntiquil muʼ bʌ i pʌcʼ uva tsaʼ bʌ i sʌcla xʼeʼtelob chaʼan miʼ chaʼleñob eʼtel, ti wiʼil tiʼ sʌcla yambʌ xʼeʼtelob. Cheʼ acʼʌlelix tsiʼ tojoyob, i junlajal tsiʼ tojoyob cheʼ bajcheʼ jiñi jumpʼejl jach bʌ ora tsiʼ chaʼleyob eʼtel. Jiñi sebto bʌ tsaʼ cajiyob ti eʼtel tsiʼ lon ñaʼtayob chaʼan ñumen letsto mi caj i tojtʌlob (Mat. 20:1-16). Jesús tsiʼ cʼʌñʌ ili ejemplo chaʼan miʼ tsictesʌbeñob jiñi xcʌntʼañob i chaʼan chaʼan yom tijicñayob chaʼan jiñi muʼ bʌ i yʌqʼuentelob ti Dios.
Jiñi wiñicob jumpʼejl bʌ qʼuin tsiʼ chaʼleyob eʼtel tsiʼ ñaʼtayob chaʼan ñumen lets mi caj i tojtʌlob.
Yom tijicñayonla chaʼan chuqui an lac chaʼan, mach lac pijtan chaʼan an chuqui yom mi la cʌqʼuentel (1 Tes. 5:18). Laʼ lac lajin jiñi apóstol Pablo, maʼañic tsiʼ cʼajtibe jiñi hermanojob chaʼan miʼ yʌqʼueñob chuqui i cʼʌjñibal i chaʼan anquese mucʼʌch i mejlel i cʼajtin (1 Cor. 9:11-14). Yom tijicñayonla chaʼan jiñi chuqui am bʌ lac chaʼan.
Jiñi apóstol Pablo maʼañic tsiʼ cʼajti chaʼan miʼ yʌqʼuentel taqʼuin.
Laʼ lac pʌs lac pecʼlel. Jiñi muʼ bʌ i qʼuelob i bʌ ti ñuc mach jasʌlic miʼ yubiñob jiñi añoʼ bʌ i chaʼan, pero cheʼ mi lac ñaʼtan bajcheʼ jiñi lajalʌch bajcheʼ jiñi veneno. I cheʼ an lac pecʼlel jiñʌch muʼ bʌ i coltañonla.
Jiñi i pecʼlel tsaʼ bʌ i pʌsʌ Daniel jiñʌch tsaʼ bʌ i qʼuele ti ñuc Jehová.
Jiñi xʼaltʼan Daniel tsiʼ wen pʌsʌ i pecʼlel. Tilem ti jumpʼejl wem bʌ familia, utsʼatax, wen an i ñaʼtʌbal i cabʌl chuqui yujil melol. Jin chaʼan, tsaʼ mejli i ñaʼtan chaʼan i wentʌlelʌch miʼ yʌqʼuentel jiñi eʼtel tsaʼ bʌ aqʼuenti i chaʼan miʼ qʼuejlel ti ñuc (Dn. 1:3, 4, 19, 20). Pero mach cheʼic tsiʼ mele, tsaʼʌch i pʌsʌ i pecʼlel. Jin chaʼan Jehová wen tsiʼ qʼuele (Dn. 2:30; 10:11, 12).
Mach lac mel cheʼ bajcheʼ miʼ melob jiñi lac piʼʌlob muʼ bʌ i ñaʼtañob chaʼan yom miʼ qʼuejlelob ti ñuc. Laʼ la cubin lac tijicñʌyel chaʼan jiñi muʼ bʌ i yʌqʼueñonla Jehová chaʼan jiñi ñuc bʌ i yutslel.