Anquese cujil quisin tsaʼ sujtiyon ti misionera

Tsaʼ quila pañimil (chʼocʼayon) ti 1951 ti Viena (Austria). Anquese cujil quisin mach wocolic mi cubin chaʼan mic pejcan Dios ti oración. Jiñi c familia católicojob, pero cheʼ bʌ 9 c jabilel jiñi c papá tsaʼ caji ti estudio yicʼot jiñi i testigojob Jehová. Ti wiʼil jiñi c mamá tsaʼ caji ti estudio jaʼel.

Cheʼ jiñi tsaʼ cajiyon lon ti majlel ti tempa bʌ ti jiñi congregación Döbling, am bʌ ti Viena. Cabʌl chuqui mi lon j comol mel: Mi lon c pejcan jiñi Biblia, mi lon c chaʼlen estudio, mi lon cajñel ti tempa bʌ i mi lon c chaʼlen coltaya ti jiñi asamblea tac. Cʼʌlʌl cheʼ bʌ tsaʼ coliyon majlel, jiñi c papá tsiʼ coltayon chaʼan mic ñumen cʼuxbin Jehová. I muʼto i cʼajtin tiʼ yoración chaʼan jiñi quijtsʼin yicʼot joñon mi lon c sujtel bajcheʼ precursora. Pero joñon mach jiñic com bʌ c mel ti jiñi bʌ ora.

TSAʼ C TECHE C ÑUMEN MELBEN I YEʼTEL JEHOVÁ

Tsaʼ c chʼʌmʌ jaʼ ti 1965 cheʼ bʌ 14 jaxto c jabilel. Pero cheʼ bʌ mic loqʼuel ti subtʼan wen wocol mi cubin chaʼan mic pejcan lac piʼʌlob. Cheʼ jaʼel, maʼañic j cʼʌjñibal mi cubin c bʌ i com chaʼan jiñi c piʼʌlob ti clase wen miʼ qʼueloñob, jin chaʼan tsaʼ caji c ñochtañob. Anquese mucʼʌch c mulan ajñel yicʼotob mach tijicñayoñic come cujil chaʼan mach yomic mic ñusan qʼuin yicʼotob jiñi mach bʌ Testigojob. Pero wocol tsaʼ cubi chaʼan mij cʌy c ñochtañob. ¿Chuqui tsiʼ coltayon?

Ti jimbʌ ora tsaʼ j cʌñʌ juntiquil xchʼoc tsaʼ jaxto bʌ sujti ti publicadora, i cʼabaʼ Dorothée i an jaxto 16 i jabilel. Tsaʼ j qʼuele chaʼan Dorothée miʼ wen mulan loqʼuel ti subtʼan. Joñon tsʼitaʼ ñumen añix c jabilel, pero maʼañic mic wen loqʼuel ti subtʼan. Jin chaʼan tsaʼ c ñaʼta: «Jiñi c papá c mamá Testigojob, pero Dorothée mach cheʼiqui. Cheʼ jaʼel, miʼ cʌntan i mamá come cʼam pero miʼ chʌn loqʼuel ti subtʼan». Jiñi tsiʼ coltayon chaʼan mic ñumen mulan c melben i yeʼtel Jehová. Ti wiʼil tsaʼ lajal sujtiyon lojon bajcheʼ precursora auxiliar i cheʼ jiñi ti precursora regular. Dorothée miʼ wen mulan subtʼan i jiñʌch tsaʼ bʌ i coltayon c taj jiñi ñaxam bʌ c estudio. Ti wiʼil mach wen wocolix mi cubin chaʼan mic pejcan lac piʼʌlob muʼ bʌ c tajob tiʼ yotot, ti calle o baqui jach mic ñumel.

Cheʼ bʌ an jaxto jumpʼejl jab j cajel bajcheʼ precursora, tsaʼ cʼoti tij congregación juntiquil precursor especial i cʼabaʼ Heinz. Heinz tsiʼ cʌñʌ i sujmlel cheʼ bʌ tsajñi i julaʼtan i yeran Testigo bʌ yaʼ ti Canadá. Cheʼ bʌ cojaxto tsaʼ j qʼuele, tsaʼ c mulaj. Yom sujtel ti misionero, pero joñon maʼañic. Jin chaʼan maʼañic tsaʼ c pʌsʌ chaʼan mic mulan. Pero ti wiʼil tsaʼ caji c pejcan lon c bʌ, tsaʼ ñujpuñiyon lon i tsaʼ bej ajñiyon lon bajcheʼ precursor ti Austria.

TSAʼIX CAJI C MULAN OCHEL TI MISIONERA

Heinz tsaʼʌch i chʌn taja ti tʼan chaʼan yom sujtel ti misionero. Pero maʼañic tsiʼ xiqʼuiyon, tsaʼ jach i coltayon chaʼan mi cʌqʼuen c bʌ jiñi meta. An i tajol miʼ subeñon: «Maʼan la calobil, ¿ixcu cheʼ muqʼuic laj qʼuel bajcheʼ miʼ mejlel lac ñumen melben i yeʼtel Jehová?». I sujmʌch chaʼan añoñix bajcheʼ precursora anquese cujil quisin, pero maʼañic mi caj c mejlel mi cubin mi tsaʼ ochiyon ti misionera. Heinz maʼañic tsaʼ michʼa, tsaʼ jach i bixel subeyon chaʼan mic ñaʼtan jiñi meta chaʼan mic sujtel ti misionera. Cheʼ jaʼel, tsiʼ coltayon j qʼuel chaʼan mach jiñic yom mij cʌlʌx ñaʼtan chuqui mach bʌ mejlic c mel, jiñʌch chuqui miʼ mejlel c mel chaʼan mij coltan jiñi lac piʼʌlob. Pejtelel tsaʼ bʌ i subeyon tsaʼʌch i coltayon.

Tsaʼ caji j cʼunteʼ mulan ochel bajcheʼ misionera, jin chaʼan tsaʼ lon c choco majlel jiñi solicitud chaʼan Galaad. Pero jiñi am bʌ tiʼ wenta i qʼuel jiñi sucursal tiʼ subeyon chaʼan yomto mic ñumen cʌn inglés, i jiñʌch tsaʼ bʌ caji c mel. Cheʼ tsaʼ ñumi uxpʼejl jab tsaʼ chojquiyon lon majlel ti Salzburgo (Austria) ti jumpʼejl congregación baqui miʼ cʼʌjñel jiñi tʼan serbocroata. Seis jab tsaʼ ajñiyon lon yaʼi bajcheʼ precursor i jumpʼejl jab tsaʼ ajñiyon lon bajcheʼ viajante. Anquese wocolʌch tsaʼ lon cubi chaʼan mi lon j cʌn jiñi tʼan tsaʼʌch lon c taja cabʌl lac piʼʌlob yomoʼ bʌ i cʌn i sujmlel.

Ti 1979 jiñi hermanojob añoʼ bʌ tiʼ wenta jiñi sucursal ti Austria tiʼ subeyon lon chaʼan mi lon c majlel ti Bulgaria. Ti jimbʌ ora mʌctʌbil lac subtʼan yaʼi, jin chaʼan chaʼan mi lon cʌjqʼuel ti ochel yom mi lon c sub chaʼan vacación woli (yʌquel) lon j cʼotel. Mach subtʼañic tsaʼ majliyon lon, tsaʼ majli lon j cʌyben alʌ publicación tac jiñi cinco hermana chumuloʼ bʌ ti Sofía, i capital Bulgaria. Tsaʼ c wen chaʼle bʌqʼuen, pero Jehová tsiʼ coltayon chaʼan mic tsʼʌctesan jiñi tsaʼ bʌ subentiyon. Jiñi hermanajob tijicña woliʼ bej melbeñob i yeʼtel Jehová anquese miʼ mejlelob ti otsʌntel ti cárcel. Jiñi tsiʼ coltayon chaʼan mic mel muʼ bʌ i subeñon c mel jiñi organización.

Cheʼ jiñi tsaʼ lon c chaʼ choco majlel jiñi lon c solicitud chaʼan Galaad i tsaʼʌch jacʼbentiyon lon. Tsaʼ lon c ñaʼta chaʼan cʼʌlʌlto ti Estados Unidos mi caj lon c majlel. Pero mach cheʼic tsaʼ ujti come ti noviembre ti 1981 tsaʼ caji ti mejlel jiñi escuela yaʼ ti sucursal am bʌ ti Wiesbaden (Alemania). Jiñi clase tsaʼ mejli ti alemán, tsaʼ c wen mulaj come jiñʌch jiñi tʼan muʼ bʌ c chʼʌmben i sujm. Laʼto c subeñetla baqui tsaʼ chojquiyon lon majlel.

TSAʼ CHOJQUIYON LON MAJLEL TI JUMPʼEJL PAÍS BAQUI TSAʼ WEN UJTI GUERRA

Tsaʼ chojquiyon lon majlel ti Kenia. Cheʼ jiñi, jiñi sucursal am bʌ yaʼi tsiʼ cʼajtibeyon lojon mi com lon majlel ti Uganda. Yaʼ ti Uganda tsaʼ wen ujti wocol, añix cheʼ bʌ 10 jab jiñi general Idi Amin tsiʼ chilbe i yeʼtel jiñi yumʌl ti Uganda. I cheʼ bʌ jiñix woli ti yumʌntel jiñi general tsiʼ wen tsʌnsa cabʌl lac piʼʌlob i tsiʼ toʼol ticʼla yonlelob, pero ti 1979 tsaʼ chilbenti i yeʼtel jaʼel. Jin chaʼan cheʼ bʌ tsaʼ subentiyon lon majlel yaʼi maʼañic tsaʼ c wen mulaj. Pero Galaad tsiʼ coltayon lon chaʼan mi lon c ñop chaʼan Jehová maʼañic mi caj i bajñel cʌyon lon, jin chaʼan tsaʼʌch lon c jacʼʌ majlel.

Ti 1982 tsaʼ cʼotiyon lon ti Kampala, i capital Uganda. Ti jimbʌ ora wen wocol bajcheʼ an come maʼañic luz, jaʼ, señal yicʼot yan tac bʌ i cʼʌjñibal bʌ i chaʼan lac piʼʌlob. Cheʼ jaʼel, miʼ wen ujtel julbʌl yicʼot xujchʼ, ñumento cheʼ ti acʼʌlel. Jin chaʼan maʼañix majqui miʼ loqʼuel i jiñi lac piʼʌlob muʼto i chaʼleñob oración chaʼan miʼ cʼajtibeñob Dios chaʼan maʼañic chuqui miʼ tumbentelob. Anquese jiñi hermanojob wocolʌch woliʼ ñusañob, chʌn xucʼul tsaʼ ajñiyob ti Jehová.

Ti jiñi ñaxan bʌ joʼpʼejl uw tsaʼ chumleyon lon tiʼ yotot Sam yicʼot Christina Waiswa. An cinco i yalobilob i yaʼ chumulob yambʌ chʌntiquil i familia. Anquese junsujtel jach miʼ cʼuxob i waj ti jumpʼejl qʼuin, tiʼ pejtelel ora tsiʼ tʼoxbeyon lon chuqui añob i chaʼan. Cabʌlʌch chuqui tsaʼ lon j cʌñʌ tiʼ tojlelob muʼ bʌ caj i coltañon lon bajcheʼ misionero. Junchajp jiñʌch cheʼ maʼañic mi lon j cʌlʌx cʼʌn jaʼ cheʼ bʌ mi lon c chaʼlen tsʼʌmel i mi lon c tempan jiñi jaʼ muʼ bʌ lon j cʼʌn ti tsʼʌmel chaʼan mi lon c chaʼ cʼʌn ti baño. Ti 1983 tsaʼ majliyon lon ti chumtʌl ti yambʌ otot yaʼ ti Kampala, yaʼi mero ñʌchʼʌlixto.

Tsaʼʌch c wen ñusa lon c bʌ ti subtʼan. Cʼajal c chaʼan chaʼan ti jumpʼejl uw tsaʼ cʌcʼʌ lojon ñumen ti 4 mil revista. Jiñi lac piʼʌlob yaʼi miʼ wen mulañob i chaʼan tac bʌ Dios yicʼot i yʌlob i chaʼan tac bʌ Biblia. Ti jujuntiquil an lon c chaʼan cheʼ bʌ 10 o 15 estudio, i cabʌl chuqui tsaʼ lon j cʌñʌ tiʼ tojlel jiñi estudiantejob. Anquese ñajt yom miʼ chaʼleñob xʌmbal chaʼan miʼ cʼotelob ti tempa bʌ, maʼañic baʼ ora tsiʼ yʌlʌyob chaʼan mach yomobix majlel i joy tijicñayob yilal.

Ti 1985 yicʼot ti 1986 tsaʼ ujti yambʌ chaʼpʼejl guerra ti Uganda. Mach junsujtelic jach tsaʼ lon j qʼuele alobob cuchuloʼ bʌ i chaʼan i juloñib muʼ bʌ i cʌntañob jiñi carretera. Mic chʌcʌ cʼajtiben lon Jehová chaʼan miʼ coltañon lon c ñaʼtan bajcheʼ miʼ mejlel j cʌntan lon c bʌ yicʼot chaʼan maʼañic mi lon c chaʼlen bʌqʼuen cheʼ bʌ mic chaʼlen lojon subtʼan. I tsaʼʌch i jacʼʌ jiñi lon coración come cheʼ bʌ mi lon c taj jiñi lac piʼʌlob yomoʼ bʌ i cʌn muʼ bʌ i yʌl jiñi Biblia muqʼuix i majlel lon c bʌqʼuen.

Cheʼ jaʼel, mic mulan lon c suben wen tʼan jiñi tsaʼ jach bʌ cʼotiyob ti chumtʌl ti Uganda. Tsaʼ lon cʌqʼue estudio Murat yicʼot Dilbar Ibatullin, ili xñujpuñel chʼoyolob ti Tartaristán (Rusia central). Murat juntiquilʌch doctor, i tiʼ chaʼticlelob tsaʼ caji i melbeñob i yeʼtel Jehová cʼʌlʌl ili ora. Cheʼ jaʼel tsaʼ j cʌñʌ Tatjana Vileyska, juntiquil xʼixic chʼoyol bʌ ti Ucrania am bʌ i chaʼan depresión i añix i ñaʼta i tsʌnsan i bʌ. Tatjana tsiʼ chʼʌmʌ jaʼ i tsaʼ chaʼ sujti majlel tiʼ país, cheʼ jiñi tsaʼ caji ti coltaya ti traducción.a

TSAʼ AQʼUENTIYON LON YAMBɅ ASIGNACIÓN

Ti 1991 cheʼ bʌ yaʼañon lon ti vacación ti Austria, jiñi sucursal am bʌ yaʼi tiʼ subeyon lojon chaʼan mi caj lon j chojquel majlel ti Bulgaria. Cabʌl jab maʼañic tsaʼ mejli ti sujbel jiñi wen tʼan ti Bulgaria yicʼot ti yan tac bʌ país am bʌ yaʼ ti Europa. Pero tsaʼ qʼuextʌyi i tsaʼix ajqʼui permiso chaʼan jiñi Testigojob miʼ chaʼleñob subtʼan. Cheʼ bajcheʼ tsaʼix cʌlʌ, Heinz yicʼot joñon tsajñoñix lon ti Bulgaria. Jiñʌch cheʼ bʌ tsaʼ c chʼʌmʌ lon majlel publicación tac cheʼ bʌ mʌctʌbilto jiñi lac subtʼan, pero wʌle wolix j chojquel lon majlel ti subtʼan.

Tsaʼ subentiyon lon chaʼan maʼañix mi lon c chaʼ sujtel ti Uganda. Jin chaʼan maʼañix tsaʼ mejliyon lon ti majlel chaʼan mic majlel lon c chʼʌm chuqui an lon c chaʼan i maʼañix tsaʼ c sube lon c bʌ jiñi hermanojob. Toj tsaʼ majliyon lojon ti Betel am bʌ ti Alemania, yaʼi tsaʼ aqʼuentiyon lon jumpʼejl carro i tsaʼ lon c ñijca majlel cʼʌlʌl ti Bulgaria. Tsaʼ subentiyon lon majlel ti jiñi tejclum Sofía, yaʼi an jumpʼejl grupo baqui an 20 publicadorob.

Yaʼ ti Bulgaria tsaʼʌch lon c ñusa yambʌ wocol. Junchajp jiñʌch cheʼ mach cujilic lojon jiñi tʼan muʼ bʌ i cʌjñel yaʼi. I cojach an chaʼpʼejl publicación ti búlgaro, jin jach jiñi: La verdad que lleva a vida eterna yicʼot jiñi C libro muʼ bʌ yʌl cʌntesʌntel am bʌ ti Biblia. Cheʼ jaʼel, wocol chaʼan mi lon c taj lac piʼʌlob yomoʼ bʌ estudio. Anquese an ili wocol tac jiñi hermanojob chʌn tijicña miʼ chaʼleñob subtʼan. Pero cheʼ bʌ jiñi Iglesia ortodoxa tsiʼ qʼuele chaʼan woliyon lojon ti subtʼan maʼañic tsiʼ mulayob, jin chaʼan tsaʼ caji i contrajiñon lojon.

Ti 1994, jiñi añoʼ bʌ i yeʼtel ti Bulgaria tsiʼ yʌlʌyob chaʼan jiñi Testigojob maʼañix mi caj i qʼuejlelob bajcheʼ jumpʼejl ñopbalʌl. Jin chaʼan, jiñi lac piʼʌlob mach weñic tsaʼ caji i qʼueloñob lon come miʼ ñaʼtañob chaʼan mach weñic chuqui woli lon c pʌs. An hermanojob tsaʼ bʌ otsʌntiyob ti cárcel, cheʼ jaʼel yaʼ ti periódico yicʼot ti televisión tsaʼ caji i yʌlob lot tac ti lac tojlel. Tsiʼ yʌlʌyob chaʼan jiñi Testigojob miʼ yʌcʼob ti chʌmel i yalobil tiʼ caj maʼañic miʼ chʼʌmob chʼichʼ i chaʼan muʼ bi lac suben jiñi hermanojob chaʼan miʼ tsʌnsañob i bʌ. Wen wocolʌch subtʼan come an i tajol mi lon c taj lac piʼʌlob wen jontoloʼ bʌ (simaroñoʼ bʌ), an muʼ bʌ i yʌʼleñoñob lon i chuqui jach miʼ chʼʌmob chaʼan miʼ juloñob lon, i an muʼto bʌ i pʌyob jiñi policía. Maʼañic miʼ mejlel ti chojquel majlel publicación tac yaʼ ti país, i wocol chaʼan mi lon c taj baqui mi lon c tempan lon c bʌ. Junsujtel jiñi policía tsaʼ ochiyob baqui woliʼ mejlel asamblea i tsiʼ mʌctayob. Maʼañic baʼ lon j qʼuele cheʼ tac bʌ bajcheʼ ili come yaʼ ti Uganda jiñi lac piʼʌlob wen utsob i miʼ wen mulan i ñʌchʼtañob i chaʼan tac bʌ Biblia. ¿Chuqui tsiʼ coltayon lojon chaʼan maʼañic mi lon c sʌt lon c tijicñʌyel?

Tsaʼ bʌ i coltayon lon jiñʌch cheʼ tsaʼ ajñiyon lon quicʼot jiñi hermanojob. Ili hermanojob wen tijicñayob chaʼan tsiʼ tajayob i sujmlel yicʼot miʼ wen qʼuelob ti ñuc cheʼ yaʼan lon quicʼot. Chʌn temel tsaʼ ajñiyon lon i tsaʼ c laja cʌnta lon c bʌ. Heinz yicʼot joñon tsaʼ lon j cʌñʌ chaʼan chʌn tijicña mi lac mejlel ti ajñel mi jin mi lac ñaʼtan bajcheʼ miʼ mejlel laj coltan yambʌlob i mach jiñic jiñi lac wocol woli bʌ lac ñusan.

Tsaʼ ñumi chaʼpʼej uxpʼejl jab i tsaʼ tsʼitaʼ tojʼa jiñi wocol. Ti 1998, jiñi yumʌl ti Bulgaria tsiʼ yʌlʌ chaʼan jiñi i testigojob Jehová muqʼuix i chaʼ qʼuejlelob bajcheʼ ñopbalʌl. Cheʼ jiñi, tsaʼ caji i chaʼlentel ti traducir cabʌl publicación ti búlgaro. Ti 2004 tsaʼ mejli jiñi sucursal. Wʌle an 57 congregación ti Bulgaria, i an 2 mil 953 publicadorob. I ti 2024 tsajñob ti Conmemoración cheʼ bʌ 6 mil 475. Cheʼ jaʼel, yaʼ ti tejclum Sofía baqui ti ñaxan an jach cinco hermana, wʌle añix nueve congregación. An lon j qʼuele bajcheʼ woliʼ tsʼʌctiyel ili profecía: «Jini mach bʌ ñuquic mi caj i pʼojlel ti jumpʼejl mil» (Is. 60:22).

TSAʼ CAJI LON C ÑUSAN YAN TAC BɅ WOCOL

An c ñusa cabʌl wocol tiʼ caj jiñi cʼamʌjel. An i tajbeyoñob cabʌl tumor i jumpʼejl tsiʼ tajbeyoñob tic jol. Tsaʼ c chʼʌmʌ jumpʼejl tratamiento wen pʼʌtʌl bʌ i tsajñon ti India chaʼan miʼ locʼsʌbeñoñob jiñi tumor tic jol. Jiñi operación tsaʼ jalʼa 12 hora. Yaʼix tsaʼ cʌyleyon ti jiñi sucursal am bʌ yaʼ ti India jinto tsaʼ cʼocʼayon, cheʼ jiñi tsaʼ chaʼ sujtiyon lon majlel ti Bulgaria.

Cheʼ jaʼel, Heinz tsaʼ tajbenti jumpʼejl leco bʌ cʼamʌjel. Ili cʼamʌjel tsiʼ yʌcʼʌ chaʼan maʼañix miʼ wen mejlel ti xʌmbal, ti tʼan i maʼañic miʼ mejlel i ticʼ bajcheʼ miʼ ñijcan i yoc i cʼʌb. Cheʼ bʌ tsaʼ ñumen tsʌtsʼa i cʼamʌjel joñoñix mic ñumen coltan. An i tajol maʼañix mic mejlel mi cubin, i cheʼ bʌ mi cubin bajcheʼ jiñi, juntiquil hermano i cʼabaʼ Bobi miʼ pʌy majlel ti subtʼan. Bobi mach lecojic miʼ yubin tiʼ caj bajcheʼ yilal an Heinz. Bobi jiñʌch tsaʼ bʌ i wen coltayon chaʼan mij cʌntan Heinz. I sujmʌch chaʼan maʼañic lon calobil, pero Jehová tsiʼ yʌqʼueyon lon Bobi tsaʼ bʌ sujti bajcheʼ juntiquil lon calobil (Mar. 10:​29, 30).

Cheʼ jaʼel Heinz tsiʼ taja cáncer i tsaʼ chʌmi ti 2015. Mic wen cʼajtesan pejtelel tsaʼ bʌ lon c ñusa. Heinz jiñʌch tsaʼ bʌ i coltayon chaʼan maʼañic mij cʌlʌx chaʼlen pensar i wocol mi cubin cheʼ mach chʌn wʌʼix an quicʼot. Ti jujumpʼejl qʼuin mic chʌn cʼajtesan chuqui tac tiʼ subeyon yicʼot jiñi ticʼojel tsaʼ tac bʌ i yʌqʼueyon (Luc. 20:38). Anquese mach wʌʼix an quicʼot, tijicñayon come tsaʼ mejli lon j comol melben i yeʼtel Jehová cabʌl jab.

MI CɅQʼUEN WOCOLIX I YɅLɅ JEHOVÁ CHAʼAN TSIʼ COLTAYON

Jehová añʌch i coltayon cheʼ bʌ woli c ñusan wocol. Cheʼ jaʼel tsiʼ coltayon chaʼan mic sujtel ti misionera i chaʼan mic sʌclan bajcheʼ mic pʌsben j cʼuxbiya jiñi lac piʼʌlob anquese cujil quisin (2 Tim. 1:7). Wocolix i yʌlʌ Jehová, joñon yicʼot quijtsʼin woli lon c bej melben i yeʼtel. Jiñi quijtsʼin yicʼot i ñoxiʼal añob bajcheʼ viajante ti Europa i miʼ julaʼtañob congregación tac baqui yujilob jiñi tʼan serbio. Jiñi oración tac tsaʼ bʌ i mele c papá cheʼ bʌ woli lon j colel tsaʼʌch jacʼbenti.

Cheʼ bʌ mic pejcan jiñi Biblia miʼ coltañon chaʼan maʼañic mij cʌlʌx chaʼlen pensar. I cheʼ bʌ woli c ñusan wocol muʼto c ñumen mel oración cheʼ bajcheʼ tsiʼ mele Jesús (Luc. 22:44). Junchajp bajcheʼ an j qʼuele chaʼan Jehová miʼ jacʼbeñon coración jiñʌch tiʼ tojlel jiñi hermanojob añoʼ bʌ tij congregación ti Sofía. Miʼ pʌyoñob tiʼ yotot i miʼ subeñoñob chaʼan miʼ wen cʼuxbiñoñob. Jiñi miʼ yʌqʼueñon c tijicñʌyel.

Mic wen ñaʼtan baʼ ora yaʼix añon ti tsijiʼ bʌ pañimil. Mij qʼuel chaʼan yaʼan c papá c mamá i mach ñoxobix. Mij qʼuel jaʼel chaʼan jiñi quijtsʼin woliʼ chajpan bʌlñʌcʼʌl i Heinz yaʼan yicʼot i caballo. Cheʼ bʌ mic ñaʼtan iliyi miʼ coltañon chaʼan maʼañic mi cubin c chʼijyemlel i chaʼan mi cʌqʼuen wocolix i yʌlʌ Jehová chaʼan jiñi albil bʌ i chaʼan.

Cheʼ bʌ mic ñaʼtan pejtelel am bʌ c ñusa yicʼot jiñi wolito bʌ c pijtan, cheʼ mi cubin c bʌ bajcheʼ tsiʼ yubi i bʌ David, tsaʼ bʌ i yʌlʌ: «Cujil belel ora mi caj cubin i yutslel c Yum ila ti pañimil cheʼ cuxulon to. Pijtan lac Yum, yom chʼejlet. Laʼ xucʼlec a pusicʼal. Yom cu maʼ pijtan lac Yum» (Sal. 27:​13, 14).