¿Lajal ba bajcheʼ yeʼeb a subtʼan?

JIÑI lac subtʼan wen ñuc i cʼʌjñibal, pero an mach bʌ cheʼic miʼ ñaʼtañob. Anquese an yomoʼ bʌ i ñaʼtan chuqui miʼ yʌl jiñi Biblia, pero miʼ ñaʼtañob chaʼan mach cʼʌñʌlic miʼ chʼʌmob jumpʼejl estudio.

Laʼ laj qʼuel tsaʼ bʌ ujti tiʼ tojlel juntiquil wiñic i cʼabaʼ Gavin. Miʼ yajñel ti tempa bʌ, pero mach yomic jumpʼejl estudio. ¿Chucoch? Tsiʼ yʌlʌ chaʼan mach wen yujilic chaʼan Biblia i mach yomic chaʼan miʼ ñaʼtʌntel. Cheʼ jaʼel mach yomic ochel ti jumpʼejl ñopbalʌl yicʼot mach yomic lotintel. ¿Chuqui maʼ ñaʼtan tiʼ tojlel Gavin? ¿Am ba bajcheʼ miʼ mejlel ti coltʌntel? Muʼ bʌ i yʌl yaʼ ti Biblia miʼ mejlel i coltañob. Jin chaʼan, Jehová tsiʼ sube israelob chaʼan i tʼan lajal bajcheʼ «yeʼeb» yicʼot «wij wis jaʼal ti pimel tac» (Deuteronomio 31:19, 30; 32:2, TNM). Mi caj laj qʼuel chʌnchajp bajcheʼ yilal jiñi yeʼeb muʼ bʌ i mejlel lac lajin cheʼ bʌ mi lac suben wen tʼan tiʼ «pejtelel winicob xʼixicob» (1 Timoteo 2:3, 4).

¿CHUCOCH MIʼ LAJINTEL LAC SUBTʼAN BAJCHEʼ YEʼEB?

Jiñi yeʼeb mach pʼʌtʌlic. Jiñi yeʼeb miʼ loqʼuel cheʼ bʌ tsʼitaʼ ticʌw jiñi icʼ cheʼ ti acʼʌlel. ¿Chucoch miʼ yʌl jiñi Biblia chaʼan lajal bajcheʼ «yeʼeb» i tʼan Jehová? Come ti cʼun bʌ tʼan yicʼot uts bʌ tʼan miʼ pejcan i wiñicob. ¿Bajcheʼ miʼ mejlel lac lajin? Cheʼ mi lac chaʼlen subtʼan maʼañic mi la cʌcʼ ti ñaʼtʌntel chaʼan mi lac tsʼaʼlen i ñopbalob, yom wen jach chuqui mi lac subeñob chaʼan miʼ coltan i bajñel ñaʼtañob yom bʌ miʼ melob. Mi mucʼʌch lac pʌs chaʼan mi laj cʼuxbiñob, mi caj i jacʼob chuqui mi lac subeñob. Mi caj laj qʼuelben i wenlel lac subtʼan.

Tsʌwan tsʌwan jiñi yeʼeb. Jiñi lac subtʼan lajal bajcheʼ yeʼeb miʼ mucʼʌch i tijicñesʌben i pusicʼal quixtañujob. ¿Bajcheʼ miʼ mejlel lac mel? Laʼ lac ñaʼtan bajcheʼ miʼ mejlel laj coltañob i cʌn jiñi Biblia. Laʼ lac chaʼ al chaʼan Gavin. Ti ñaxan, juntiquil hermano i cʼabaʼ Chris tsiʼ sube chaʼan miʼ yʌqʼuen estudio, pero maʼañic tsiʼ xiqʼui. Jiñi hermano tsiʼ chaʼle wersa chaʼan jiñi Gavin tijicña miʼ yubin cheʼ bʌ miʼ chaʼleñob tʼan chaʼan Biblia. Tiʼ tsictesʌbe chaʼan jiñi Biblia an i chaʼan wen ñuc bʌ temaj yicʼot chaʼan jiñʌch mi caj i coltan i chʼʌmben isujm jiñi tempa bʌ. Cheʼ jaʼel, Chris tsiʼ sube Gavin chaʼan jiñi profecía tac am bʌ ti Biblia tsiʼ colta i cʌn jaʼel chaʼan isujmʌch muʼ bʌ i yʌl jiñi Biblia. Cabʌl chuqui tsiʼ yʌlʌyob chaʼan jiñi profecía tac. Tsiʼ taja i tijicñʌyel Gavin yicʼot tsiʼ jacʼʌ jumpʼejl estudio.

Jiñi yeʼeb miʼ yʌcʼ cuxtʌlel. Cheʼ i yorajlel qʼuin tuñil yaʼ ti Israel, cabʌl ticwal yicʼot tajol cabʌl uw maʼañic jaʼal. Mi maʼañic yeʼeb miʼ chʌmel jiñi pimel yicʼot miʼ tʌquin. Jiñi Biblia tsiʼ wʌn alʌ chaʼan ili ora mi caj i mulan i ñʌchʼtañob «i tʼan Dios» jiñi quixtañujob (Amós 8:11). Lajal bajcheʼ añob cabʌl i tiquin tiʼ, pero ti ñʌchʼtʌntel i chaʼan bʌ Dios. Jin chaʼan, jiñi Biblia miʼ yʌl chaʼan jiñi bombiloʼ bʌ ti espíritu lajalob bajcheʼ «yeʼeb [...] muʼ bʌ i choc tilel lac Yum» cheʼ miʼ subob jiñi wen tʼan (Miqueas 5:7). Miʼ chaʼleñob jaʼel jiñi yambʌ junmojt xñoptʼañob cʌmbiloʼ bʌ bajcheʼ ‹yambʌ tiñʌmeʼ› (Juan 10:16). Jiñi wen tʼan muʼ bʌ lac sub jiñʌch junchajp muʼ bʌ i yʌcʼ Jehová chaʼan miʼ tajob i cuxtʌlel jiñi yom bʌ i cʌñob. ¿Muʼ ba laj qʼuel ti ñuc ili wen tʼan?

Jiñi yeʼeb jumpʼejlʌch bendición tilem bʌ ti Jehová. (Deuteronomio 33:13). Jiñi lac subtʼan jumpʼejlʌch bendición o jumpʼejl majtañʌl tiʼ tojlel muʼ bʌ i jacʼob. Jiñi estudio tsaʼ bʌ i chʼʌmʌ Gavin jiñʌch jumpʼejl bendición come tsiʼ colta i tajben i jacʼbal tiʼ pejtelel i cʼajtiya. Mach jalic tsiʼ chaʼle chʼʌmjaʼ, ili ora Gavin yicʼot i yijñam, i cʼabaʼ Joyce, tijicñayob woliʼ subob jiñi wen tʼan chaʼan i Yumʌntel Dios.

LAʼ LAJ QʼUEL TI ÑUC LAC SUBTʼAN

Cheʼ mi lac laj bajcheʼ yeʼeb jiñi lac subtʼan, mi caj laj qʼuel chaʼan ñucʌch i cʼʌjñibal cheʼ mi lac chaʼlen wersa. ¿Chucoch? Come juntʼujy yeʼeb maʼañic chuqui miʼ wen mel, pero mi cabʌl miʼ tempʌyel, miʼ yʌchʼesan jiñi lum. Cheʼ lajal jiñi lac subtʼan, tajol mach cabʌlic chuqui melbil lac chaʼan mi laj qʼuel. Pero cheʼ mi lac tem lac bʌ ti subtʼan miʼ mejlel lac chʼʌm majlel «tiʼ pejtelel pañimil» (Mateo 24:14). Cheʼ bajcheʼ mi laj qʼuel, jiñʌch jumpʼejl bendición tilem bʌ ti Jehová jiñi lac subtʼan. Lajal bajcheʼ yeʼeb mach bʌ pʼʌtʌlic yicʼot tsʌwan tsʌwan bʌ i miʼ yʌcʼ cuxtʌlel.