¿Chuqui miʼ yʌl jiñi Biblia chaʼan jiñi amigojob?
I jacʼbal muʼ bʌ i yʌcʼ jiñi Biblia
Jiñi la camigojob miʼ yʌqʼueñoñobla lac tijicñʌyel i miʼ coltañoñobla chaʼan wen mi la cajñel. Jiñi wem bʌ la camigojob miʼ coltañoñobla lac taj wen tac bʌ lac melbal yicʼot lac ñumen pʌs jiñi añix bʌ lac chaʼan (Proverbios 27:17).
Pero jiñi Biblia miʼ subeñonla chaʼan ñucʌch i cʼʌjñibal cheʼ wen mi lac yajcan jiñi la camigojob i miʼ subeñonla chaʼan añʌch i wocolel cheʼ mach weñic mi lac yajcañob (Proverbios 13:20; 1 Corintios 15:33). Ili miʼ mejlel i yʌqʼueñonla lac mel mach tac bʌ weñic i mi lac sʌt jiñi wen tac bʌ lac melbal.
Ti ili tema mi caj laj qʼuel ili:
¿Bajcheʼ yilal juntiquil wem bʌ amigo?
Jiñi Biblia miʼ yʌl chaʼan jiñi wem bʌ amigojob mach jin jach muʼ bʌ i mulañob muʼ bʌ lac mulan. Jumpʼejl ejemplo, ti Salmo 119:63 miʼ yʌl: «I piʼʌlon pejtel muʼ bʌ ia bʌcʼñañet. I piʼʌlon jini muʼ bʌ i jacʼob a cʌntesa». Jiñi tsaʼ bʌ i tsʼijbu jiñi Salmo tsiʼ yʌlʌ chaʼan miʼ yajcan tiʼ yamigojob jiñi yomoʼ bʌ i mel chuqui miʼ mulan Dios yicʼot i jacʼbeñob i mandar tac.
Jiñi Biblia miʼ yʌl jaʼel baqui bʌ melbalʌl tac yom a i chaʼan juntiquil wem bʌ amigo. Jumpʼejl ejemplo:
«Jiñi i sujm bʌ amigo miʼ cʼuxbiñonla tiʼ pejtelel ora i juntiquilʌch la quermañu cheʼ tiʼ yorajlel wocol» (Proverbios 17:17, TNM).
«An muʼ bʌ i lon cʼuxbiñonla cheʼ an chuqui yomob i taj ti lac tojlel, pero an muʼ bʌ i cʼuxbiñonla ti isujm ñumen bajcheʼ lac piʼʌlob» (Proverbios 18:24).
Ili versículo tac miʼ pʌsbeñonla chaʼan juntiquil wem bʌ amigo yom xucʼul, uts, an i cʼuxbiya yicʼot miʼ tʼox chuqui an i chaʼan. Juntiquil i sujm bʌ amigo yaʼan yicʼotonla cheʼ woli lac ñusan wocol o maʼañic. Cheʼ jaʼel, maʼañic mi caj i bʌcʼñan i subeñonla mi an chuqui mach bʌ weñic woli lac mel o cheʼ bʌ woli lac ñaʼtan lac mel mach bʌ weñic (Proverbios 27:6, 9).
Jiñi Biblia miʼ taj ti tʼan jiñi wem bʌ i yamigojob i bʌ
Ti jiñi Biblia mi lac taj ejemplo tac chaʼan tsaʼ bʌ sujtiyob ti wem bʌ i yamigojob i bʌ anquese mach lajalobic bajcheʼ tsaʼ coliyob, i cultura, i jabilelob o yeʼtelob. Laʼ laj qʼuel uxpʼejl ejemplo:
Rut yicʼot Noemí. Jiñi Rut i yʌʼlib Noemí, i mach lajalobic i jabilel. Cheʼ jaʼel, Rut yambʌyʌch i cultura. Anquese wen qʼuexelobʌch tsaʼʌch sujtiyob ti wem bʌ amiga i tsiʼ wen cʼuxbiyob i bʌ (Rut 1:16).
David yicʼot Jonatán. Jiñi Jonatán añix i jabilel bajcheʼ David, 30 jab cʌyʌlob i chaʼañob i bʌ, pero jiñi Biblia miʼ yʌl chaʼan tsaʼ sujtiyob ti wem bʌ amigojob (1 Samuel 18:1).
Jesús yicʼot i yapóstolob. Jesús an i yeʼtel tiʼ tojlel i yapóstolob come miʼ subeñob tiʼ «Maestro» yicʼot tiʼ «Yum» (Juan 13:13). Pero tsiʼ qʼuele bajcheʼ i yamigojob. Cheʼ jaʼel, Jesús ñumen lʌcʼʌl tsaʼ ajñi yicʼotob jiñi muʼ bʌ i jacʼbeñob i cʌntesa. I tiʼ subeyob: «Mic subeñetla ti camigojob, come tsaʼix c subeyetla pejtelel tsaʼ bʌ cubi i yʌl jiñi c Tat» (Juan 15:14, 15).
¿Muʼ ba lac mejlel ti sujtel tiʼ yamigo Dios?
Mucʼʌch lac mejlel ti sujtel tiʼ yamigo Dios. Jiñi Biblia miʼ yʌl chaʼan wen i yamigojob jiñi tojoʼ bʌ (Proverbios 3:32). Ti yambʌ tʼan, Dios miʼ yajcan tiʼ yamigojob jiñi muʼ bʌ i chaʼleñob wersa i pʌsob wem bʌ i melbal yicʼot i jacʼbeñob i mandar. Jumpʼejl ejemplo, jiñi Biblia miʼ yʌl chaʼan Abrahán tsaʼ sujti tiʼ yamigo Dios come juntiquilʌch xucʼul bʌ wiñic (2 Crónicas 20:7; Isaías 41:8; Santiago 2:23).
a Muʼ bʌ i yʌl tilel ila ti salmo miʼ pʌs chaʼan jiñi i woliʼ taj ti tʼan Dios.