¿Muʼ ba caj i jilel ti jumpʼejl bʌ qʼuin jiñi terrorismo?
Cheʼ bʌ mi la cubin cheʼ an baqui tsaʼ ujti jiñi terrorismo, tajol mi laj cʼajtiben lac bʌ: «¿I wenta ba Dios chuqui miʼ yujtel? ¿Chucoch miʼ yujtel tac iliyi? ¿Muʼ ba caj i jilel ti jumpʼejl bʌ qʼuin jiñi terrorismo?a ¿Bajcheʼ mic mejlel ti ajñel anquese an c bʌqʼuen?». Yaʼ ti Biblia mi lac tajben i jacʼbal ili cʼajtiya tac.
¿Chuqui miʼ ñaʼtan Dios chaʼan jiñi terrorismo?
Dios miʼ tsʼaʼlen jiñi jontolil yicʼot jiñi terrorismo (Salmo 11:5; Proverbios 6:16, 17). I Jesús, tsiʼ tojʼesa jiñi xcʌntʼañob i chaʼan cheʼ bʌ an chuqui mach weñic tsiʼ meleyob (Mateo 26:50-52). An quixtañujob muʼ bʌ i contrajiñob yambʌ i miʼ yʌlob chaʼan miʼ melob tiʼ cʼabaʼ Dios. Pero Dios mach weñic miʼ qʼuel chuqui miʼ melob. Mi muqʼuicto i ñʌchʼtʌbeñob i yoración (Isaías 1:15).
Dios i wentajʌch pejtelel jiñi muʼ bʌ i ñusañob wocol, cheʼto jaʼel jiñi muʼ bʌ i tajob wocol tiʼ caj jiñi terrorismo (Salmo 31:7; 1 Pedro 5:7). Cheʼ jaʼel, jiñi Biblia miʼ yʌl chaʼan Dios mi caj i jisan jiñi jontolil (Isaías 60:18).
¿Bajcheʼ miʼ tejchel jiñi terrorismo?
Jiñi Biblia miʼ subeñonla chucoch miʼ tejchel jiñi terrorismo:«[An] muʼ bʌ i cʼʌñob i pʼʌtʌlel chaʼan miʼ jisañob i piʼʌlob» (Eclesiastés 8:9). Cʼʌlʌl ti wajali an lac piʼʌlob muʼ bʌ i cʼʌñob i pʼʌtʌlel chaʼan miʼ ticʼlañob yambʌlob. I tiʼ caj jiñi wocol an muʼ bʌ i techob jiñi terrorismo (Eclesiastés 7:7).
I jilibal terrorismo
Dios miʼ subeñonla chaʼan mi caj i jisan jiñi bʌqʼuen yicʼot jontolil, i mi caj i chʼʌm tilel ñʌchʼtʌlel tiʼ pejtelel pañimil (Isaías 32:18; Miqueas 4:3, 4). Mi caj i mel ili tac:
Mi caj i jisan jiñi terrorismo. Dios mi caj i jisan jiñi yumʌlob, i jiñix jiñi i yumʌntel waʼchocobil bʌ i chaʼan muʼ bʌ caj i chʼʌm tiʼ wenta pejtelel ili Pañimil. Jesucristo, jiñi Rey chaʼan jiñi yumʌntel, utsʼat chuqui mi caj i mel tiʼ tojlel lac piʼʌlob i mi caj i jisan jiñi ticʼlʌntel yicʼot jontolil (Salmo 72:2, 14). Cheʼ bʌ miʼ yujtel iliyi maʼañix majqui mi caj i teche’ jiñi terrorismo. Pejtelel jiñi quixtañujob «tijicña mi caj i yubiñob cheʼ ñʌchʼʌlob i pusicʼal» (Salmo 37:10, 11).
Mi caj i tojʼesan jiñi wocol tsaʼ bʌ i yʌcʼʌ jiñi terrorismo. Dios mi caj i tojʼesan jiñi wocol tac tsaʼ bʌ i tajayob lac piʼʌlob tiʼ caj jiñi terrorismo i maʼañix mi caj i cʼajtesañob (Isaías 65:17; Apocalipsis 21:3, 4). I mach cojach jiñi. Dios mi caj i chaʼ aqʼuen i cuxtʌlel jiñi tsaʼ bʌ chʌmiyob i mi caj i cuxtesañob ti jumpʼejl utsʼatax bʌ pañimil (Juan 5:28, 29).
Jiñi Biblia miʼ subeñonla chaʼan mach jalix yom chaʼan Dios an chuqui mi caj i mel. Pero tajol maʼ cʼajtiben a bʌ chucoch Dios maxto i jisa jiñi terrorismo. Mi a wom a cʌmben i jacʼbal, qʼuele jiñi video ¿Chucoch Dios woliʼ yʌcʼ ti ujtel jiñi wocol?
a Cheʼ bʌ miʼ tajtʌl ti tʼan jiñi terrorismo, miʼ cʼʌjñel jatsʼ, tsʌnsʌntel o chʼʌcoñel tiʼ tojlel lac piʼʌlob chaʼan miʼ yotsʌbentelob i bʌqʼuen yicʼot chaʼan jiñi políticojob, ñopbalʌl tac añʌch chuqui miʼ qʼuextañob. Pero mach tiʼ pejtelelic lac piʼʌlob miʼ ñaʼtañob mi tiʼ cajʌch terrorismo o maʼañic cheʼ miʼ yujtel jumpʼejl wocol.