¿Chuqui miʼ mejlel a mel chaʼan maʼ taj jiñi wenlel muʼ bʌ i yʌcʼ jiñi i cuxtʌlel Jesús?
Jujumpʼejl jab, jiñi i testigojob Jehová tiʼ petol pañimil yicʼot yambʌ lac piʼʌlob miʼ tempañob i bʌ chaʼan i Cʼajtesʌntel i chʌmel Jesús cheʼ bajcheʼ tsiʼ yʌlʌ chaʼan miʼ mejlel. (Luc. 22:19) Ili tempa bʌ miʼ coltañonla lac chʼʌmben i sujm chucoch Jesús tsiʼ yʌcʼʌ i cuxtʌlel ti lac tojlel yicʼot bajcheʼ miʼ coltañonla ili ora i ti talto bʌ qʼuin (Juan 3:16).
Mi tsajñetʌch o maʼañic ti jiñi i Cʼajtesʌntel i chʌmel Jesús ti ili jab, ¿chuqui miʼ mejlel a mel chaʼan maʼ taj jiñi wenlel muʼ bʌ i yʌcʼ jiñi i cuxtʌlel Jesús? Jesús tsiʼ yʌlʌ chaʼchajp ñuc bʌ i cʼʌjñibal yom bʌ mi lac mel:
1. Mi laj cʌn tiʼ tojlel Dios yicʼot Jesús. Ti jumpʼejl oración tsaʼ bʌ i melbe i Tat, Jesús tsiʼ yʌlʌ: «Ili yom i yʌl cuxtʌlel mach bʌ añic miʼ jilel: Cheʼ miʼ cʼotel i cʌñetob, jatet jiñi cojach bʌ i sujm bʌ Dios, yicʼot jiñi tsaʼ bʌ a choco tilel, Jesucristo» (Juan 17:3).
2. Yom mi lac mel jiñi muʼ bʌ laj cʌn. Jesús tsiʼ yʌlʌ chaʼan jiñi i cʌntesa tac yom mi lac pʌs ti laj cuxtʌlel. Laʼcu lac ñaʼtan, ti yujtibal i cʌntesa yaʼ ti wits Sión, tsiʼ chaʼle ti felicitar pejtelel jiñi muʼ bʌ i ñʌchʼtʌbeñob i tʼan yicʼot miʼ melob (Luc. 6:46-48). Cheʼ jaʼel, tsiʼ yʌlʌ: «Cheʼ laʼ wujilix tac iliyi, ñumen tijicñayetla mi mucʼʌch laʼ mel» (Juan 13:17).
¿A wom baʼ ñumen cʌn tiʼ tojlel Dios yicʼot Jesús? ¿A wom baʼ ñaʼtan bajcheʼ miʼ mejlel a pʌs ti a cuxtʌlel jiñi muʼ bʌ a cʌn? Ila mi caj a taj muʼ bʌ i mejlel i coltañet.
Estudio loqʼuem bʌ ti Biblia
Jiñi estudio loqʼuem bʌ ti Biblia muʼ bʌ i yʌcʼ jiñi i testigojob Jehová an i colta cabʌl lac piʼʌlob chaʼan miʼ cʌñob jiñi Biblia yicʼot bajcheʼ miʼ mejlel i pʌsob tiʼ cuxtʌlel jiñi woli bʌ i cʌñob.
Qʼuele jiñi página «Estudio chaʼan bʌ Biblia a wicʼot juntiquil muʼ bʌ i coltañet», chaʼan maʼ ñumen cʌn bajcheʼ miʼ mejlel.
Qʼuele jiñi video Ubin a tijicñʌyel cheʼ mi caj a chʼʌm estudio, chaʼan maʼ qʼuel bajcheʼ yilal jiñi estudio yicʼot jiñi i testigojob Jehová.
Jiñi tempa bʌ tac
Jiñi i testigojob Jehová chaʼ sujtel miʼ tempañob i bʌ ti jujumpʼejl semana yaʼ tiʼ Yotlel tempa bʌ. Yaʼi miʼ tajtʌl ti tʼan chaʼan bʌ jiñi Biblia yicʼot bajcheʼ miʼ mejlel lac pʌs ti la cuxtʌlel jiñi muʼ bʌ laj cʌn.
Majqui jach miʼ mejlel ti cʼotel ti jiñi tempa bʌ tac, mach cojach jiñi testigojoʼ bʌ Mi yaʼ baqui chumulet maxto añic miʼ mejlel i tempañob i bʌ jiñi i testigojob Jehová yaʼ ti yotlel tempa bʌ, maʼ mejlel ti ochel ti videoconferencia.
Ti jiñi video ¿Chuqui miʼ mejlel yaʼ ti i Yotlel Tempa bʌ?, mi caj a tsʼitaʼ qʼuel chuqui miʼ mejlel yaʼi.
Ochen yaʼ ti página «Cucu tiʼ tempa bʌ jiñi i testigojob Jehová» chaʼan maʼ qʼuel baqui bʌ jiñi i yotlel tempa bʌ ñumen lʌcʼʌl bʌ a wicʼot.
Tema tac yicʼot video tac am bʌ ti internet
Yaʼi mi caj a taj tema tac yicʼot video tac muʼ bʌ caj i coltañet a cʌn jiñi i cʌntesa tac Jesús yicʼot chucoch ñucʌch i cʼʌjñibal cheʼ tsiʼ yʌcʼʌ i cuxtʌlel.
Mi a wom a cʌn bajcheʼqui an cheʼ juntiquil wiñic tsaʼ chʌmi chaʼan miʼ coltan yonlel lac piʼʌlob, pejcan jiñi tema «¿Bajcheʼ miʼ coltañonla Jesús?», «¿Chucoch tsiʼ yila wocol yicʼot tsaʼ chʌmi Jesús?» o qʼuele jiñi video ¿Chucoch tsaʼ chʌmi Jesús?