Jiñi i testigojob Jehová yicʼot jiñi ticʼlʌntel | ¿Chuqui miʼ yʌl jiñi Biblia?

Cheʼ ti 27 chaʼan enero ti 2023, yonlelob muʼ bʌ caj i cʼajtesañob bajcheʼ tsaʼ wen ticʼlʌntiyob lac piʼʌlob ti wajali. Tajol jiñi tsʌts tac bʌ ticʼlʌntel tsaʼ bʌ ujti ñumeñix bʌ ti 75 jab, miʼ yʌqʼueñet a cʼajtiben a bʌ chucoch Dios tsiʼ yʌcʼʌ ti ujtel jiñi.

• Chaʼan maʼ ñumen ñaʼtan muʼ bʌ i yʌl jiñi Biblia, pejcan jiñi tema «¿Chucoch Dios maʼañic chuqui tsiʼ mele cheʼ bʌ cabʌl judíojob ti tsʌnsʌntiyob?».

Jiñi judíojob tsaʼ wen ticʼlʌntiyob, tsiʼ wen ñusayob wocol i yonlelob tsaʼ bʌ tsʌnsʌntiyob. An yambʌ lac piʼʌlob jaʼel tsaʼ bʌ ticʼlʌntiyob yicʼot tsaʼ tsʌnsʌntiyob. Yaʼ ochemob jiñi i testigojob Jehová, tsaʼ ticʼlʌntiyob tiʼ caj chuqui miʼ ñopob.

• Chaʼan maʼ ñumen ñaʼtan, pejcan jiñi tema «¿Chuqui tsiʼ chaʼleyob jiñi i testigojob Jehová tiʼ yorajlel ticʼlʌntel?».

An chuqui utsʼat bʌ woli lac pijtan

Cabʌl lac piʼʌlob muʼ bʌ i bʌcʼñañob chaʼan miʼ chaʼ ujtel cheʼ bʌ ticʼlʌntel bajcheʼ iliyi. Pero tijicñayonla cheʼ la cujil chaʼan jiñi Biblia miʼ yʌl chaʼan maʼañix baʼ ora mi caj i chaʼ ujtel cheʼ bʌ bajcheʼ iliyi.

• «Come cujil chuqui com c melbeñetla, cheʼen lac Yum [Jehová]. Com ñʌchʼʌletla. Mach comic miʼ tajetla wocol. Com cʌqʼueñetla chuqui utsʼat woli bʌ laʼ pijtan» (Jeremías 29:11).a

Ili tʼan mi caj i tsʼʌctiyel cheʼ bʌ Jehová miʼ jisan jiñi jontolil i miʼ tojʼesan pejtelel jiñi wocol. Tsʼitaʼ jax yom chaʼan Dios miʼ mel pejtelel iliyi:

• Mi caj i jisan jiñi jontoloʼ bʌ, muʼ bʌ i ticʼlan yañoʼ bʌ (Proverbios 2:22).

• Mi caj i chaʼ aqʼueñob i tijicñʌyel pejtelel jiñi ñusʌbil bʌ i chaʼañob wocol (Apocalipsis 21:4).

• Mi caj i chaʼ cuxtesan jiñi chʌmeñoʼ bʌ (Juan 5:28, 29).

Miʼ mejlel a ñop chaʼan i sujmʌch muʼ bʌ i yʌl jiñi Biblia. Mi a wom a ñaʼtan chucoch, mic subeñet lojon chaʼan maʼ chʼʌm jumpʼejl estudio loqʼuem bʌ ti Biblia.