Jiñi i testigojob Jehová, ¿muʼ ba i xicʼob jiñi quixtañujob chaʼan miʼ qʼuextañob i ñopbal?
Maʼañic. Tsictesʌbilon c chaʼan yaʼ ti revista La Atalaya ili tʼan: «Cheʼ mi lac xicʼ quixtañujob chaʼan miʼ qʼuextañob i ñopbalʌl mach weñic».a Maʼañic mi lon c mel come añʌch i sujmlel chucoch:
Jesús maʼañic tsiʼ xiqʼui jiñi quixtañujob chaʼan miʼ jacʼob jiñi i cʌntesa. I yujil chaʼan mach tiʼ pejtelelic mi caj i jacʼob jiñi i cʌntesa (Mateo 7:13, 14). Cheʼ bʌ chaʼtiquil uxtiquil xcʌntʼañob i chaʼan tsaʼ yajliyob chaʼan jiñi tʼan tsaʼ bʌ i yʌlʌ, maʼañic tsiʼ xiqʼui chaʼan miʼ cʌytʌlob tsiʼ cʌyʌ chaʼan miʼ majlelob (Juan 6:60-62, 66-68).
Jiñi xcʌntʼañob i chaʼan Jesús tsaʼ cʌntesʌntiyob chaʼan mach yomic miʼ xicʼob jiñi yambʌ quixtañujob chaʼan miʼ qʼuextañob i ñopbalʌl. Jiñi xcʌntʼañob i chaʼan tsiʼ sʌclayob quixtañujob yom bʌ i ñʌchʼtañob jiñi wen tʼan, i maʼañic tsiʼ xiqʼuiyob jiñi quixtañujob chaʼan miʼ chʼʌmob ti ñuc jiñi wen tʼan chaʼan bʌ i Yumʌntel Dios (Mateo 10:7, 11-14).
Cheʼ an majqui xicʼbil jach miʼ sujtel ti juntiquil xñoptʼan, toʼol jach come Dios cojach miʼ qʼuel ti ñuc jiñi chʼujutesʌntel cheʼ loqʼuemʌch ti lac pusicʼal (Deuteronomio 6:4, 5; Mateo 22:37, 38).
Jiñi la queʼtel muʼ bʌ lon c mel, ¿chaʼan jach ba mi lon c pʌy ochel yambʌ quixtañujob?
Tiʼ sujm ‹cʼʌlʌl ti ñajt bʌ pañimil mi lon c sub› cheʼ bajcheʼ miʼ yʌl jiñi Biblia jiñi wen tʼan, i mi lon c mel ‹tiʼ wut wiñicob xʼixicob yicʼot ti jujumpʼejl otot› (Hechos 1:8; 10:42; 20:20). Lajal bajcheʼ jiñi ñaxam bʌ xñoptʼañob, mi lon c jopʼbentel lon c mul chaʼan tiʼ caj miʼ yʌlob mi lon c xicʼ ochel yañoʼ bʌ ti lon c ñopbalʌl (Hechos 18:12, 13). Pero ili tʼan mach isujmic. Maʼañic majqui mi lon c xicʼ chaʼan miʼ ñop jiñi lon c ñopbal. Mi lon c ñaʼtan chaʼan yom mi lon j cʌy chaʼan jiñi quixtañujob miʼ ñaxan tajob i ñaʼtʌbal chaʼan miʼ ñaʼtañob chuqui mi caj i melob.
Maʼañic majqui mi lon c xicʼ chaʼan miʼ qʼuextan i ñopbalʌl, maʼañic mi lon c sub i chaʼan bʌ política, maʼañic mi lon cʌcʼ chuqui tac chaʼan mi lon c pʌy ochel ti lon c ñopbalʌl yambʌ quixtañujob. Pero an muʼ bʌ i melob bajcheʼ ili, i miʼ yʌlob i bʌ chaʼan xñoptʼañob pero tiʼ sujmlel maʼañic miʼ qʼuelob ti ñuc Cristo.b
¿Am ba tiʼ wenta miʼ qʼuextan i ñopbal juntiquil quixtañu?
Jiñi xʼaltʼan Abraham tsiʼ cʌyʌ jiñi i ñopbal i familiajob
Cheʼʌchi, cheʼʌch miʼ yʌl jiñi Biblia, miʼ tsictesan chaʼan an cabʌlob mach bʌ añic tiʼ tsajcayob i melbal i cʌñʌyoʼ bʌ, i an tsaʼ bʌ i bajñel ñaʼtayob chaʼan miʼ tsajcañob jiñi i sujm bʌ Dios. Abraham, Rut yicʼot yan tac bʌ quixtañujob añoʼ bʌ ti Atenas yicʼot jiñi apóstol Pablo jiñʌch tsaʼ bʌ i meleyob bajcheʼ jiñi (Josué 24:2; Rut 1:14-16; Hechos 17:22, 30-34; Gálatas 1:14, 23). Jiñi Biblia miʼ yʌl jaʼel mi juntiquil quixtañu yom i ñajtʼesan i bʌ tiʼ chʼujutesʌntel jiñi isujm bʌ Dios, añix ti wenta mi yom i mel (1 Juan 2:19).
Mi lon c ñaʼtan chaʼan chuculʌch ti jiñi Derechos Humanos, cʌmbil bʌ i chaʼan jiñi Naciones Unidas bajcheʼ «i wiʼ jiñi ñuc bʌ mandar chaʼan jiñi quixtañujob» mi an majqui yom i qʼuextan i ñopbal. Ili jun miʼ yʌl chaʼan ti jujuntiquil quixtañu «an ti tojlel mi yom i qʼuextan i ñopbalʌl» yicʼot «chaʼan miʼ yʌcʼ i tʼan tac ti chuqui tac jach i tiʼ tojlel jiñi ñopbalʌl tac jaʼel».c Ili mi taj ti tʼan jaʼel chaʼan yom miʼ qʼuelob ti ñuc jiñi yañoʼ bʌ jaʼel chaʼan jiñi i ñopbalʌl yicʼot chaʼan maʼañic yom miʼ ñaʼtañob chaʼan jiñʌch ñumen ñuc muʼ bʌ i ñaʼtañob.
¿Muʼ ba i yʌcʼ ti quisin i familia jiñi muʼ bʌ i qʼuextan i ñopbalʌl?
Mach cheʼic miʼ yujtel tiʼ pejtelel ora. Jiñi Biblia miʼ subeñonla chaʼan yom mi laj qʼuel ti ñuc tiʼ pejtelel jiñi quixtañujob, i mach yʌlʌyic baqui bʌ i ñopbal (1 Pedro 2:17). Cheʼ jaʼel, jiñi i testigojonbʌla Jehová mi lon c jacʼ jiñi mandar am bʌ ti Biblia chaʼan yom mi lon j qʼuel ti ñuc jiñi tatʌlob anquese yambʌ i ñopbalob (Efesios 6:2, 3).
Pero mach tiʼ pejtelelobic mi caj i qʼuelob ti ñuc muʼ bʌ i yʌl jiñi Biblia. Juntiquil xʼixic tsaʼ bʌ coli ti Zambia tsiʼ yʌlʌ: «Yaʼ baqui chumulon mi an majqui miʼ qʼuextan i ñopbal, lajalʌch bajcheʼ mach bʌ yomix i qʼuel i familia yicʼot jiñi i lumal». Ili xʼixic tsiʼ taja ili wocol cheʼ bʌ xcolel to, cheʼ tsaʼ caji i pejcan jiñi Biblia yicʼot jiñi i testigojob Jehová i cheʼ jiñi tsiʼ ñaʼta i qʼuextan i ñopbal. Tsiʼ yʌlʌ: «Tiʼ pejtelel ora jiñi c tatʌlob tsiʼ subeyoñob chaʼan wen michʼob yicʼot chaʼan tsaʼ c mele yilal chaʼan mach comix j qʼuelob. Wen wocol tsaʼ cubi, come tic tojlel ñuc i cʼʌjñibal cheʼ jiñi c tat miʼ coltañoñob. Cheʼ bʌ tsaʼ c yajca c melben i yeʼtel Jehová i mach jiñic jiñi costumbre i chaʼan tac bʌ jiñi ñopbalʌl tac mach yomic i yʌl chaʼan mach comix j qʼuel jiñi c familia.»d
a Qʼuele jiñi artículo chaʼan jiñi La Atalaya i chaʼan 1 enero, 2002, tiʼ yopol 12, párrafo 15.
b Jumpʼejl ejemplo, lʌcʼʌl ti jiñi jabil 785 E.C., Carlomagno tsiʼ yʌcʼʌ jumpʼejl mandar ti Sajonia, chaʼan mi an majqui miʼ chaʼlen chʼʌmjaʼ bajcheʼ juntiquil xñoptʼan mi caj i tsʌnsʌntel. Cheʼ jaʼel, jiñi jun cʌmbil bʌ bajcheʼ La Paz de Ausburgo tsaʼ bʌ i chaʼleyob ti firmar ti chajp ti chajp ti 1,555 E.C. ti caj jiñi wocol añoʼ bʌ i chaʼan yaʼ ti Sacro Imperio yaʼ ti Roma, miʼ yʌl chaʼan ti jujuntiquil jiñi yumʌlob añoʼ bʌ ti jiñi tejclum tac yom jiñʌch católico o juntiquil luterano i ñopbal yicʼot chaʼan tiʼ pejtelel jiñi quixtañujob am bʌ ti wenta jiñi yumʌl jiñʌch i ñopbalob jaʼel. Pero jiñi mach bʌ añic yom i yochelob ti jiñi ñopbalʌl miʼ subentelob chaʼan miʼ loqʼuelob majlel ti jiñi tejclum.
c Ili mandar tac yaʼʌch ochem jaʼel ti jiñi Carta Africana chaʼan Derechos Humanos y de los Pueblos, jiñi Declaración Americana de los Derechos y Deberes del Hombre, jiñi Carta Arábica de Derechos Humanos 2004, jiñi Convención Europea de Derechos Humanos i jiñi Convención Internacional de los Derechos Civiles y Políticos. Anquese an tac tejclum muʼ bʌ i yʌlob chaʼan miʼ jacʼob ili mandar tac, pero tiʼ sujmlel yʌñʌlix bajcheʼ miʼ pʌstʌl.
d I cʼabaʼ jiñʌch Jehová chaʼ bajcheʼ miʼ yʌl yaʼ ti Biblia.