¿Chuqui miʼ mel i testigojob Jehová cheʼ bʌ an majqui miʼ chʌmel?
Muʼ bʌ lon c mel cheʼ bʌ an majqui miʼ chʌmel yaʼʌch chucul ti Biblia. Mi caj laj qʼuel ejemplo tac:
I tilelʌch an chʼijiyemlel cheʼ bʌ miʼ chʌmel muʼ bʌ laj cʼuxbin. Jiñi xcʌntʼañob i chaʼan Jesús tsiʼ yucʼtayob cheʼ bʌ tsaʼ chʌmiyob i familia (Juan 11:33-35, 38; Hechos 8:2; 9:39). Jin chaʼan, mach i yorajlel chaʼan tijicñʌyel cheʼ bʌ an chuqui miʼ mejlel yaʼ baqui an jiñi tsaʼ bʌ chʌmi (Eclesiastés 3:1, 4; 7:1-4). I yorajlel chaʼan mic pʌs lojon j cʼuxbiya tiʼ tojlel jiñi chʼijiyemoʼ bʌ (Romanos 12:15).
Maʼañix chuqui yujil jiñi chʌmeñoʼ bʌ. Maʼan mi lon c jacʼ costumbre tac mach bʌ loqʼuemic ti Biblia mach yʌlʌlic baqui tilemon lojon o baqui bʌ lon j cultura, i maʼan mi lon c chʼujbin chaʼan anto chuqui cuxul i chaʼan jiñi tsaʼix bʌ chʌmi o muʼto i mejlel i ticʼlañonla (Eclesiastés 9:5, 6, 10). Jumpʼejl ejemplo, maʼan miʼ cʌqʼuen lojon i majtan jiñi chʌmeñoʼ bʌ, mi muqʼuic c ñop lon c pejcan yicʼot maʼan mic ñop lon j cʼajtiben i coltaya, mi jiñic to mi lon c melben i qʼuiñijel tac. Jiñi Biblia miʼ yʌl: ‹Loqʼuenla [...] mach laʼ mel chuqui tac bibiʼ›. Mic jacʼ lojon jiñi mandar, jin chaʼan maʼañic mi cotsan lon c bʌ tiʼ melol tsʼaʼlebil bʌ tiʼ Tʼan Dios (2 Corintios 6:17).
Miʼ chaʼ mejlelob ti tejchel jiñi chʌmeñoʼ bʌ. Jiñi Biblia miʼ yʌl chaʼan mi caj i chaʼ tejchelob jiñi chʌmeñoʼ bʌ yicʼot mi caj i cʼotel i yorajlel chaʼan maʼañix miʼ cajel chʌmel (Hechos 24:15; Apocalipsis [Revelación] 21:4). Jiñi pijtaya tsiʼ coltayob jaʼel jiñi ñaxam bʌ xñoptʼañob, jin chaʼan miʼ coltañon lojon jaʼel (1 Tesalonicenses 4:13).
Jiñi Biblia miʼ yʌl chaʼan yom pʼisbil jach chuqui yom melol. (Proverbios 11:2) Cheʼ bʌ an majqui miʼ chʌmel lon c chaʼan, mach chaʼañic mic pʌs lojon chaʼan wen cabʌl lon c chubʌʼan o chaʼan mi lon j qʼuejlel ti ñuc (1 Juan 2:16). Jiñi chajpʌbil bʌ, maʼan mi lon c mel ti colem yicʼot mach chaʼan miʼ yʌqʼuentelob i tijicñʌyel yaʼ bʌ tempʌbilob, yicʼot maʼan mi lon j cʼʌn wen lets bʌ i tojol caja tac o leco jax bʌ mele, i mach lecojax bʌ lon c pislel mi lon c xoj.
Maʼañic mi lon c wersa suben yañoʼ bʌ yom bʌ miʼ melob cheʼ bʌ an majqui miʼ chʌmel. Mi lon c jacʼ ili principio muʼ bʌ i yʌl: «Jujuntiquilonla mi caj lac sub lac bʌ tiʼ tojel Dios» (Romanos 14:12). Pero mi an majqui miʼ mejlel lon c tsʼitaʼ tsictesʌben chaʼan jiñi, mi lon c mel i mi lon j qʼuel baqui bʌ tʼan mi lon j cʼʌn (1 Pedro 3:15).
¿Chuqui miʼ mel i testigojob Jehová cheʼ bʌ an majqui miʼ chʌmel?
¿Baqui miʼ mejlel?: Mi jiñi familia an chuqui yom i mel, jiñix yujilob baqui mi caj i melob, tajol ti jumpʼejl i Yotlel Tempa bʌ, o yaʼ baqui miʼ yʌjqʼuel jiñi xchʌmelob o yaʼ ti panteón.
Muʼ bʌ i mejlel: Miʼ yʌjqʼuel jumpʼejl discurso chaʼan miʼ tijicñesʌbentel i pusicʼal jiñi familia, miʼ tsictesʌntel muʼ bʌ i yʌl jiñi Biblia chaʼan jiñi chʌmeñoʼ bʌ yicʼot chaʼan mi caj i chaʼ tejchelob (Juan 11:25; Romanos 5:12; 2 Pedro 3:13). Ti jiñi discurso miʼ mejlel ti alol chuqui wem bʌ tsiʼ mele yicʼot miʼ mejlel ti alol chaʼan mi lac lajin jiñi wem bʌ i melbal (2 Samuel 1:17-27).
Miʼ mejlel ti cʼʌyol jumpʼejl cʼay chucul bʌ ti Biblia (Colosenses 3:16). Miʼ mejlel jumpʼejl oración cheʼ miʼ yujtel jiñi discurso (Filipenses 4:6, 7).
Taqʼuin: Maʼan mij cʼajtin lojon taqʼuin. Mi jiñic ti lon c tempa bʌ miʼ mejlel jiñi (Mateo 10:8).
Muʼ bʌ i cʼotelob: Jiñi discurso muʼ bʌ i mejlel yaʼ tiʼ Yotlel Tempa bʌ majqui jach miʼ mejlel ti ochel mach tojbilic, lajal bajcheʼ ti lon c tempa bʌ. Jin chaʼan jiñi mach bʌ Testigojob miʼ mejlelob ti ochel jaʼel.
Jiñi i testigojob Jehová, ¿muʼ ba i majlel cheʼ bʌ an chuqui miʼ chajpan yambʌ ñopbalʌl chaʼan jiñi tsaʼ bʌ chʌmi?
Jujuntiquilix yujil chuqui mi caj i mel, pero muʼ bʌ caj i coltan jiñʌch cʌmbil bʌ i chaʼan yaʼ ti Biblia (1 Timoteo 1:19). Maʼan mi cotsan lon c bʌ tiʼ melol qʼuiñijel mach bʌ loqʼuemic ti Biblia (2 Corintios 6:14-17).