¿Wem ba miʼ qʼuel jiñi Biblia cheʼ miʼ cʼʌjñel maquillaje yicʼot uyaʼʌl, ujʌl i yan tac bʌ?
I jacʼbal muʼ bʌ i yʌcʼ jiñi Biblia
I sujmʌch chaʼan jiñi Biblia maʼañic miʼ wen taj ti tʼan chaʼan ili tema, pero maʼañic miʼ yʌl chaʼan mach weñic cheʼ mi lac chʼʌl lac bʌ o cheʼ mi lac xoj uyaʼʌl o yan tac bʌ. Jiñi Biblia mach jiñic miʼ ñumen acʼ ti ñuc bajcheʼ yilalonla, muʼ bʌ i ñumen acʼ ti ñuc jiñʌch mi utsonla yicʼot mi la cujil pʌsol lac ñʌchʼtʌlel (1 Pedro 3:3, 4).
Mach lecojic cheʼ mi lac chʼʌl lac bʌ
Jiñi Biblia miʼ yʌl chaʼan añʌch xʼixicob ti wajali xucʼuloʼ bʌ ti Jehová tsaʼ bʌ i chʼʌlʌyob i bʌ jaʼel. Miʼ yʌl tiʼ tojlel Rebeca, tsaʼ bʌ ñujpuñi yicʼot Isaac, tiʼ xojo uyaʼʌl yicʼot pulsera tac melbil bʌ ti oro tsaʼ bʌ i majtan aqʼuenti ti Abrahán, tsaʼ bʌ sujti tiʼ suegro (Génesis 24:22, 30, 53). Yambʌ ejemplo jiñʌch Ester, juntiquil xchʼoc tsaʼ bʌ sujti ti reina ti Imperio persa. Chaʼan miʼ chajpan i bʌ, tsiʼ bombe i bʌ tsʼac tac xojocña bʌ i yujtsʼil, tajol yaʼ ochem jaʼel chaʼan tac bʌ miʼ bon i ñiʼ i wut (Ester 2:7, 9, 12).
Jiñi Biblia miʼ cʼʌn jiñi tʼan uyaʼʌl, ujʌl yicʼot yan tac bʌ chaʼan miʼ lajin chuqui wem bʌ. Jumpʼejl ejemplo, jiñi Biblia miʼ yʌl chaʼan jiñi muʼ bʌ i yʌcʼ wem bʌ ticʼojel lajal «bajcheʼ uyaʼʌl [...] tiʼ tojlel jini muʼ bʌ i jacʼ» (Proverbios 25:12). Cheʼ bʌ Dios tsiʼ yʌlʌ chuqui tac tsiʼ mele tiʼ tojlel i tejclum Israel, tsiʼ laji i bʌ bajcheʼ juntiquil ñoxiʼalʌl muʼ bʌ i yʌqʼuen i yijñam wen utsʼatax bʌ pulsera, cadena yicʼot uyaʼʌl. Ili chʼʌjlibʌl miʼ yʌcʼ chaʼan jiñi tejclum miʼ qʼuejlel bajcheʼ juntiquil i «tʼojol jax» bʌ ijñamʌl (Ezequiel 16:11-13).
¿Bajcheʼ yilal miʼ qʼuel jiñi lac piʼʌlob cheʼ bʌ miʼ cʼʌjñel jiñi maquillaje, uyaʼʌl, ujʌl yicʼot yan tac bʌ?
An muʼ bʌ i yʌlob: Ti 1 Pedro 3:3, jiñi Biblia miʼ yʌl chaʼan mach weñic cheʼ wen jalbil lac jol i cheʼ mi lac wen chʼʌl lac bʌ yicʼot melbil tac bʌ ti oro.
I sujmlel: Cheʼ bʌ mi lac pejcan i contextojlel ili versículo, mic taj laj qʼuel chaʼan woli bʌ i yʌl jiñʌch chaʼan ñumen ñuc bʌ i cʼʌjñibal mach jiñic bajcheʼ yilal mi lac chʼʌl lac bʌ, jiñʌch chuqui am bʌ ti lac pusicʼal (1 Pedro 3:3-6). Muʼ bʌ i yʌjlel ilayi, miʼ tajtʌl ti tʼan jaʼel ti yan tac bʌ versículo (1 Samuel 16:7; Proverbios 11:22; 31:30; 1 Timoteo 2:9, 10).
An muʼ bʌ i yʌlob: Cheʼ bʌ jiñi jontol bʌ reina Jezabel tsiʼ boño i wut miʼ pʌs chaʼan mach weñic cheʼ mi lac bon lac bʌ (2 Reyes 9:30).
I sujmlel: Tsaʼ ujti meloñel tiʼ tojlel Jezabel tiʼ caj tsiʼ cʼʌñʌ wujt tac yicʼot tiʼ chaʼle tsʌnsa, pero mach chaʼañic tiʼ boño i bʌ (2 Reyes 9:7, 22, 36, 37).