Maʼañix bajcheʼ miʼ mejlel c tojʼesan j cuxtʌlel tsaʼ j qʼuele

BAJCHEʼ QUILAL TI WAJALI

Jiñi c familiajob chʼoyolob ti Tonga, jumpʼejl país baqui an 170 isla yaʼ ti suroeste del Pacífico. Mach wen cabʌlic chuqui an lon c chaʼan, maʼañic lon c luz i mi añicto lon j carro. Pero añʌch lon caʼal yicʼot an lon c mut. Cheʼ maʼañic lon j clase, joñon yicʼot chaʼtiquil querañob mic majlel lon j coltan jiñi lon c tat tiʼ yeʼtel. Mic pʌcʼ lojon jaʼas, ñame, jucʼ (pocob) yicʼot tsʼijn. Jiñi c tat miʼ chon jiñi muʼ bʌ i pʌcʼ yicʼot miʼ mel yan tac bʌ alʌ eʼtel tac chaʼan mi lon j coltan lon c bʌ ti taqʼuin. Jiñi lac piʼʌlob yaʼ bʌ chumulob ti isla miʼ wen chʼʌmob ti ñuc jiñi Biblia i cheʼ miʼ mel jaʼel jiñi c familia, i mucʼʌch lon c majlel ti jiñi iglesia. Pero maʼañic mi lon j cʌy c ñaʼtan chaʼan mi lon com chumtʌl ti wen yom mi lon c majlel ti chumtʌl ti yambʌ país.

Cheʼ bʌ an jaxto 16 c jabilel, tsiʼ chajpa jiñi c tío chaʼan miʼ lon c majlel ti chumtʌl ti California (Estados Unidos). Wen wocol tsaʼ lon c ñusa come mach lajalic jiñi cultura. Anquese tsʼitaʼ añʌch lon c taqʼuin, chumulon lojon ti jumpʼejl barrio baqui wen an pʼumpʼuñiyel, cabʌl jontolil yicʼot droga. Ti abʌlel mi lon c wen ubin cheʼ miʼ chaʼleñob julbʌl, i cabʌl miʼ wen bʌcʼñañob jiñi jontoloʼ bʌ. I cabʌl añob i juloñib chaʼan miʼ cʌntañob i bʌ o chaʼan miʼ tojʼesañob jiñi wocol. Ili ora an jumpʼejl bala tic tajn tsaʼ bʌ cʌyle cheʼ bʌ tiʼ juluyoñob.

Cheʼ bʌ chʼitoñonto mic mulan sujtel cheʼ bajcheʼ jiñi c piʼʌlob ti clase. Tsaʼ cajiyon ti ñumel majlel ti qʼuiñijel tac, tsaʼ caji c ñumen jap lembal, ñumen jontoloñix yicʼot tsaʼ caji c ñumen cʼʌñeʼ droga. Tsaʼ caji c wen mulan jiñi cocaína yicʼot tsaʼ cajiyon ti xujchʼ chaʼan mic mejlel c mʌn jiñi droga. Anquese jiñi c familia añobʌch i ñopbal i miʼ yajñelob ti iglesia maʼañic tsiʼ coltayoñob. Mach junsujtel jach tsiʼ yotsayoñob ti cárcel tiʼ caj chaʼan wen jontolon. Maʼañix bajcheʼ miʼ mejlel c tojʼesan j cuxtʌlel tsaʼ j qʼuele. Ti wiʼil tsaʼ chaʼ otsʌntiyon ti cárcel.

BAJCHEʼ TSIʼ QʼUEXTA C PENSAR JIÑI BIBLIA

Ti 1997, cheʼ bʌ ñupʼulon ti cárcel, an juntiquil xcʌjchel tsaʼ bʌ i qʼuele chaʼan an jumpʼejl c Biblia. Ti jimbʌ ora i yorajlel jiñi Navidad, i lʌcʼʌ tiʼ pejtelel jiñi chumuloʼ bʌ ti Tonga miʼ wen qʼuelob ti ñuc ili qʼuiñijel. Jiñi xcʌjchel tsaʼ bʌ i qʼuele chaʼan an c Biblia tsiʼ cʼajtibeyon mi cujilʌch chuqui miʼ yʌl jiñi Biblia chaʼan cheʼ bʌ tsiʼ yila pañimil Cristo, pero maʼañic tsaʼ mejli c jacʼben. Tsiʼ pʌsbeyon jumpʼejl relato baqui miʼ yʌl cheʼ bʌ tsiʼ yila pañimil Jesús, i tsaʼ cʼoti j qʼuel chaʼan jiñi muʼ bʌ i mejlel tac ti navidad maʼañic miʼ yʌjlel tac ti Biblia (Mateo 2:1-12; Lucas 2:5-14). Wen tsaʼ cubi tsaʼ bʌ c pejca i tsaʼ j cʼajtibe c bʌ chuqui miʼ bej al jiñi Biblia. Ili xcʌjchel miʼ yajñel tac ti jiñi tempa bʌ muʼ bʌ i melob jiñi i testigojob Jehová yaʼ ti cárcel, i tsaʼ majli quicʼot. Ti jiñi tempa bʌ tsajñon bʌ woliʼ tsajiñob jiñi libro i chaʼan Apocalipsis. Anquese maʼañic tsaʼ c chʼʌmbe i sujm, tsaʼ j qʼuele chaʼan loqʼuemʌch ti Biblia jiñi woli bʌ i subob.

Cheʼ bʌ jiñi i testigojob Jehová tiʼ subeyoñob chaʼan mi com c chʼʌm jumpʼejl estudio, ora tsaʼ c jacʼʌ. Cojaxto tsaʼ cubi ti alol jiñi Paraíso muʼ bʌ i cajel ila ti Pañimil (Isaías 35:5-8). Tsaʼ cʼoti j cʌn chaʼan yom mij qʼuextan c melbal mi com chaʼan wen miʼ qʼuelon Dios come Jehová maʼañic mi caj i yotsan ti Paraíso juntiquil am bʌ i vicio cheʼ bajcheʼ joñon (1 Corintios 6:9, 10). Jin chaʼan tsaʼ caji c chaʼlen wersa chaʼan maʼañix mic wen michʼan, chaʼan mij cʌy ñucʼ cʼujts, jap lembal yicʼot jiñi droga.

Ti 1999, cheʼ bʌ anto yom chaʼan miʼ tsʼʌctiyel bajcheʼ jalel yom mi cajñel ti cárcel, tsaʼ chojquiyon majlel ti yambʌ cárcel. Ñumen ti jumpʼejl jab maʼañic tsaʼ c pejcayob jiñi i testigojob Jehová. Pero comʌch c bej chaʼlen wersa chaʼan mic ñumen tojʼesan jiñi c melbal. Ti jiñi jabil 2000, tsiʼ chilbeyoñob jiñi c permiso tsaʼ bʌ aqʼuentiyon chaʼan mic chumtʌl ti Estados Unidos, i tsiʼ chocoyoñob chaʼ sujtel ti Tonga.

Cheʼ bʌ tsaʼ cʼotiyon ti Tonga, tsaʼ c chaʼ sʌclayob jiñi i testigojob Jehová chaʼan mic chaʼ chʼʌm jiñi estudio. Tsaʼʌch c wen mulaj jiñi woli bʌ j cʌn majlel, i tsaʼ toj sajti c pusicʼal cheʼ bʌ tsaʼ j qʼuele chaʼan jiñi i testigojob Jehová añoʼ bʌ yaʼ ti isla chuculʌch i cʌntesajob jaʼel yaʼ ti Biblia cheʼ bajcheʼ mucʼob ti cʌntesa jiñi añoʼ bʌ ti Estados Unidos.

Jiñi c tat wen cʌmbil yaʼ baqui chumulon lojon come an i yeʼtel yaʼ ti iglesia. Ti ñaxan jiñi c familia tsaʼ michʼa yicʼot maʼañic tsiʼ ñaʼtañob chucoch mic wen ñochtañob jiñi i testigojob Jehová. Pero ti wiʼil, jiñi c tatob tijicña tsaʼ caji i yubiñob chaʼan jiñi principio tac am bʌ ti Biblia tsiʼ coltayon chaʼan mic tojʼesan c melbal.

Ñumen wocol bʌ tsaʼ cubi chaʼan mi cʌy jiñʌch i japol jiñi kava come wen ñʌmʌl ti melol ti jiñi cultura. Jiñi wiñicob yaʼ ti Tonga ti jujumpʼejl semana miʼ wen japob jiñi kava, lʌcʼʌ lajal bʌ bajcheʼ droga. Chaʼan miʼ melob jiñi kava miʼ cʼʌñob i wiʼ jiñi i teʼel pimienta. Cheʼ wʌʼix chaʼ añon ti Tonga tsaʼ caji c tech majlel lʌcʼʌ jujumpʼejl acʼʌlel yaʼ baqui miʼ wen jajpel jiñi kava, jinto mij cʌy c jap cheʼ maʼañix mi cubin pañimil. Muʼ bʌ i ñumen acʼon ti wocol jiñʌch jiñi camigojob come maʼañic miʼ chʼʌmob ti ñuc muʼ bʌ i yʌl jiñi Biblia. Ti wiʼil, jiñi i testigojob Jehová tsiʼ coltayoñob j qʼuel chaʼan jiñi c vicio miʼ yʌcʼ ti wajlentel Dios. Jin chaʼan, tsaʼ caji j qʼuextan c melbal chaʼan mic tajben i bendición Jehová yicʼot chaʼan miʼ chʼʌmon ti ñuc.

Maʼañix tsaʼ caji j cʌy majlel ti jiñi tempa bʌ muʼ bʌ i mel jiñi i testigojob Jehová. Cheʼ bʌ tsaʼ caji c wen ñochtañob jiñi muʼ bʌ i chaʼleñob wersa i melob chuqui wem bʌ tiʼ tojlel Dios tsiʼ coltayon chaʼan maʼañic mic yajlel tiʼ melol jiñi mach bʌ weñic. Ti 2002 tsaʼ c chʼʌmʌ jaʼ i tsaʼ sujtiyon bajcheʼ i testigo Jehová.

WENLEL TAC TAJBIL BɅ C CHAʼAN

An c taja c wenlel cheʼ bʌ Dios yujilʌch pijt come jiñi Biblia miʼ yʌl chaʼan «woliʼ pijtañonla come mach yomic miʼ sajtel mi juntiquilic. Yom mi laj cʌy lac mul ti lac pejtelel» (2 Pedro 3:9). Cheʼ yomic Dios wajalix tsiʼ jisa ili jontol bʌ pañimil, pero cheʼ maʼañic tsiʼ mele an i yʌcʼʌ chaʼan yambʌlob, bajcheʼ joñon, miʼ sujtelob tiʼ yamigo. Mic mulan cheʼ bʌ miʼ cʼʌñon chaʼan mij coltan jiñi lac piʼʌlob chaʼan miʼ lʌcʼtesañob i bʌ ti Dios.

Wocolix i yʌlʌ tiʼ coltaya Jehová tsaʼ mejli c tojʼesan jiñi j cuxtʌlel. Ti wajali mic chaʼlen xujchʼ tiʼ caj jiñi c vicio. Ili ora mij coltan jiñi lac piʼʌlob chaʼan miʼ cʌñob Jehová. Ti jiñi congregación i chaʼan i testigojob Jehová tsaʼ j cʌñʌ jiñi quijñam i cʼabaʼ Tea. An juntiquil lon calobil i wen tijicñayon lojon. Temel quicʼot quijñam yicʼot calobil mij cʌntesan lojon yambʌlob muʼ bʌ i yʌl jiñi Biblia chaʼan mi caj lac mejlel ti chumtʌl tiʼ pejtelel ora yicʼot chaʼan ñʌchʼʌl mi caj la cajñel ti jiñi Paraíso.