Miʼ tajtʌl muʼ bʌ i pʌs chaʼan jiñi rey David juntiquilʌch tsaʼ bʌ ajñi ti wajali
Cheʼ bajcheʼ miʼ yʌl jiñi Biblia, David jiñi i rey Israel, tsaʼ ajñi cheʼ ti jabil 1001 i jiñi i pʼolbalob tsiʼ chaʼleyob yumʌl cabʌl jab. An wen yujiloʼ bʌ muʼ bʌ i yʌlob chaʼan David loqʼuem jach ti jumpʼejl cuento. Pero ¿tiʼ sujm ba tsaʼ ajñi David ti wajali?
Ti 1993, jumpʼejl equipo am bʌ tiʼwenta Avraham Biran, juntiquil yujil bʌ chaʼan arqueología, tsiʼ taja i xujtʼil xajlel yaʼ ti Tel Dan, ti Israel, baqui tsʼijbubil «i familia David». Ili tʼan tac tsʼijbubil ti jumpʼejl ñoxix bʌ tʼan tilem bʌ tiʼ pʼolbal Sem yicʼot tsaʼ mejli cheʼ ti jabil 801. Jiñʌch i xujtʼil tsaʼ bʌ i meleyob jiñi arameojob chaʼan miʼ cʼajtesañob cheʼ bʌ miʼ mʌlbeñob i tejclum Israel.
Ti Bible History Daily tiʼ tsʼijbuyob: «An tsaʼ bʌ i yʌlʌyob chaʼan mach i sujmic baqui miʼ yʌl ‹i familia David› [...]. Pero cabʌl yujiloʼ bʌ chaʼan jiñi Biblia yicʼot chaʼan arqueología tsiʼ yʌlʌyob chaʼan jiñi xajlel chaʼan Tel Dan jiñʌch muʼ bʌ i pʌs chaʼan David tsaʼʌch ajñi ti wajali. Jiñʌch ñumen ñuc bʌ tajbil tsaʼ bʌ loqʼui yaʼ ti revista Biblical Archaeology Review».