Cʌntesʌntel 4

Bajcheʼ tsiʼ sʌtʌyob i chumlib

QʼUELE cu chuqui woli ti ujtel. Woli i chojquelob loqʼuel jini Adán yicʼot Eva yaʼ ti pʌcʼʌbʌl i cʼabaʼ Edén. ¿Awujil ba chucoch?

Tiʼ caj chaʼan tsiʼ meleyob wen jontol jax bʌ. Jini chaʼan Jioba woli yʌqʼueñob i toj i mul. ¿Awujil ba chuqui tsiʼ meleyob Adán yicʼot Eva?

Tsiʼ meleyob tsaʼ bʌ i yʌlʌ Dios chaʼan maʼanic miʼ melob. Dios tsiʼ sube chaʼan miʼ mejlel i laj cʼuxbeñob i wut jini teʼ am bʌ yaʼ ti pʌcʼʌbʌl. Pero an juntejc teʼ tsaʼ bʌ i sube chaʼan maʼanic mi cʼuxbeñob i wut; mi tsiʼ cʼuxuyob, mi chʌmelob. Come jini teʼ an tiʼ wenta Dios. Yicʼot la cujil chaʼan mach wenic cheʼ mi lac chʼʌm mach bʌ lac chaʼanic, ¿ñomach? Cheʼ jini, ¿chuqui tsaʼ ujti?

Jumpʼejl bʌ qʼuin cheʼ bʌ ora Eva i bajñel jach woli ti xʌmbal yaʼ ti pʌcʼʌbʌl, juncojt lucum tsiʼ pejca. ¡Ñaʼtancu! Jini lucum tsiʼ sube Eva chaʼan miʼ cʼuxben i wut jini teʼ tsaʼ bʌ subentiyob ti Dios chaʼan maʼanic miʼ cʼuxob. Weno, cheʼ bʌ ora Jioba tsiʼ mele jini lucum tac maʼanic tsiʼ mele chaʼan miʼ chaʼleñob tʼan. Jini chaʼan, an yambʌ juntiquil tsaʼ bʌ i yʌcʼʌ ti tʼan jini lucum. ¿Majqui jini?

Mach jinic Adán. Jini chaʼan jiñʌch junticlel tsaʼ bʌ i mele Jioba ti wajali cheʼ bʌ maxto anic melbil i chaʼan jini Pañimil. Iliyobi jiñobʌch ángelob, i maʼanic miʼ mejlel laj qʼuelob. Ili ángel tsaʼix i wen chanʼesa i bʌ. Tsaʼ caji i ñaʼtan chaʼan wen cheʼ mi yochel ti yumʌl cheʼ bajcheʼ Dios yicʼot chaʼan yom jini miʼ jacʼbentel i tʼan i mach jinic Jioba. Jiñʌch tsiʼ mele chaʼan miʼ chaʼlen tʼan jini lucum.

Ili ángel tsaʼ mejli i lotin jini Eva. Cheʼ bʌ ora tsiʼ sube chaʼan lajal mi caj i yajñel bajcheʼ Dios mi tsiʼ cʼuxbe i wut jini teʼ, Eva tsiʼ ñopbe. Jini chaʼan tsiʼ cʼuxu, Adán tsiʼ cʼuxu jaʼel. Adán yicʼot Eva tsiʼ ñusʌbeyob i tʼan Dios, jini chaʼan tsiʼ sʌtʌyob jini i tʼojol jax bʌ i chumlibob, jini pʌcʼʌbʌl.

Pero jumpʼejl bʌ qʼuin Dios mi caj i mel chaʼan ti pejtelel jini Pañimil i tʼojol jax mi caj i sujtel cheʼ bajcheʼ jini pʌcʼʌbʌl i cʼabaʼ Edén. Ti wiʼil mi caj laj qʼuel bajcheʼ miʼ mejlel a mel jini. Wʌle laʼ laj qʼuel chuqui tsiʼ chaʼle Adán yicʼot Eva.

Génesis 2:16, 17; 3:1-13, 24; Apocalipsis 12:9.