Dios miʼ mel wiñic yicʼot xʼixic

Jehová tsiʼ chajpa jumpʼejl pʌcʼʌbʌl yaʼ ti Edén. Ili pʌcʼʌbʌl an i chaʼan ñichteʼ, añimal yicʼot teʼ tac. Cheʼ jiñi, Dios tsiʼ mele (pʌtʌ) jiñi Adán, jiñi ñaxan bʌ wiñic. Tsiʼ mele ti lum i tsiʼ wujtʌbe i ñiʼ. ¿A wujil ba chuqui tsaʼ ujti? ¡Jiñi wiñic tsaʼ caji ti chumtʌl! Jehová tsiʼ sube Adán chaʼan miʼ cʌntan jiñi pʌcʼʌbʌl yicʼot chaʼan miʼ yotsʌben i cʼabaʼ jiñi añimal tac.

Jehová tsiʼ yʌqʼue Adán jumpʼejl ticʼojel wen ñuc bʌ i cʼʌjñibal. Tsiʼ sube: «Miʼ mejlel a cʼuxben i wut baqui jach bʌ teʼ, cojach an jumpʼejl mach bʌ yomic. Mi tsaʼ cʼuxbe i wut jiñi teʼ, mi caj a chʌmel».

Ti wiʼil, Jehová tsiʼ yʌlʌ: «Mi caj c melben i yaj coltaya Adán». Jin chaʼan tsiʼ yotsʌbe tam bʌ i wʌyel Adán i tsiʼ locʼsʌbe i chʼilʼat chaʼan miʼ melben i yijñam. I cʼabaʼ jiñʌch Eva. Adán yicʼot Eva jiñobʌch ñaxan bʌ familia ti wajali. ¿Bajcheʼ yubil tsiʼ yubi i bʌ Adán cheʼ bʌ tsiʼ qʼuele i yijñam? Wen tijicña tsiʼ yubi i tsiʼ yʌlʌ: «¡Qʼuele chuqui tsiʼ mele Jehová yicʼot c chʼilʼat! ¡Yomʌch cheʼ añix lajal bʌ bajcheʼ joñon!».

Jehová tsiʼ sube Adán yicʼot Eva chaʼan miʼ butʼob ili pañimil tiʼ yalobilob. Jehová tsiʼ mulaj chaʼan tijicña miʼ comol chaʼleñob eʼtel (troñel) chaʼan miʼ sujtesañob ti paraíso ili lum. I Wentʌlel tsaʼ sujti bajcheʼ cʼoʼtajax bʌ pʌcʼʌbʌl, cheʼ bajcheʼ ti Edén. Pero mach cheʼic tsaʼ ujti. ¿Chucoch? Ti yan to bʌ cʌntesʌntel mi caj laj qʼuel.