Cʌntesʌntel 9

Noé tsiʼ mele jumpʼejl arca

NOÉ an juntiquil i yijñam yicʼot uxtiquil i yalobilob. I cʼabaʼ i yalobilob jiñʌch Sem, Cam yicʼot Jafet. Ti jujuntiquil i yalobil an i yijñam. Jini chaʼan an waxʌctiquil chumuloʼ bʌ ti yotot Noé.

Wʌle Dios tsiʼ sube Noé chaʼan miʼ mel mach bʌ ñʌmʌlic tiʼ melol. Tsiʼ sube chaʼan miʼ mel colem bʌ arca. Wen colem jini arca cheʼ bajcheʼ colem barco, pero ñumen cheʼ yilal bajcheʼ jumpʼejl tam bʌ colem caja. ‹Uxlajm yom maʼ melben i mal›, cheʼen Dios, ‹yicʼot melben i tsalʌl tac›. Jini tsalʌl tac i chaʼañʌch Noé yicʼot añoʼ bʌ ti yotot, jini añimal tac yicʼot jini bʌlñʌcʼʌl tac i chaʼañobʌch tiʼ pejtelel.

Dios tsiʼ sube Noé chaʼan mi mel ti wen jini arca chaʼan maʼanic mi yochel jaʼ. Tsiʼ yʌlʌ: ‹Mi caj c choc tilel butʼjaʼ chaʼan mic jisan pejtelel i bʌl pañimil am bʌ i cuxtʌlel. Jini mach bʌ tsaʼic ochi ti arca mi caj i chʌmel›.

Noé yicʼot i yalobilob tsiʼ jacʼbeyob i tʼan Dios i tsaʼ caji i melob jini arca. Pero jini yañoʼ bʌ winicob xʼixicob tsaʼ jach i tseʼtayob. Tsaʼ caji i chʌn melob jontolil. Maʼanic majqui tsiʼ ñopo cheʼ bʌ Noé tsiʼ subu chaʼan chuqui mi caj i mel Dios.

Chaʼan wen colem jini arca, jal tsaʼ mejli. Cheʼ bʌ tsaʼ ñumi cabʌl jabil, tsaʼ ujti ti mejlel. Cheʼ jini Dios tsiʼ sube Noé chaʼan mi yotsan jini añimal tac. Tsiʼ sube chaʼan mi yotsan ti chaʼchaʼcojt jini añimal tac ti chajp ti chajp bʌ, i tat yicʼot i ñaʼal. Pero jini yan tac bʌ añimal, Dios tsiʼ sube Noé chaʼan mi yotsan ti wuccojt. Yicʼot jaʼel tsiʼ sube Noé chaʼan mi yotsan ti pejtelel ti chajp ti chajp bʌ xteʼlemut tac. Cheʼʌch tsiʼ mele Noé cheʼ bajcheʼ tsiʼ yʌlʌ Dios.

Ti wiʼil, Noé yicʼot i familia tsaʼ ochiyob jaʼel ti arca. Cheʼ jini Dios tsiʼ mʌcbe i puertajlel. Cheʼ ochemobix, Noé yicʼot i familia tsiʼ pijtayob. Ñaʼtancu cheʼ yaʼic añet tiʼ mal, woli a pijtan. ¿Muʼ ba caj i tilel jini butʼjaʼ cheʼ bajcheʼ tsiʼ yʌlʌ Dios?

Génesis 6:9-22; 7:1-9.