¿Majqui tsiʼ jacʼbe i tʼan Dios cheʼ maxto ñumen jini colem Butʼjaʼ?

Cheʼ ti yorajlel Noé, yonlelob jini tsaʼ bʌ i meleyob mach bʌ wenic (Génesis 6:5)

Adán yicʼot Eva tsiʼ yilayob pañimil i yalobilob, yicʼot tsaʼ wen pʼojliyob cabʌl winicob xʼixicob. Lamital ángelob tsiʼ jacʼbeyob i tʼan Satanás i tsaʼ jubiyob tilel. Tsiʼ chʼʌmʌyob i bʌcʼtal bajcheʼ winicob ila ti Pañimil, chaʼan miʼ mejlel i pʌyob i yijñamob.

Jini xʼixicob tsiʼ yʌcʼʌyob i yalobil cojach bʌ, wen pʼʌtʌlob yicʼot wen jontolob. Yonlel winicob xʼixicob tsaʼ caji i melob jontolil.

Jini Pañimil tsaʼ bujtʼi ti winicob xʼixicob tsaʼ bʌ i meleyob jontolil. Jini Biblia miʼ yʌl: «Cabʌlix i jontolil winicob ti Pañimil. Tsiʼ qʼuele jontol jax tiʼ pejtelel ora pejtel chuqui an tiʼ pusicʼal winicob yicʼot pejtel chuqui tsiʼ ñaʼtayob».

Noé tsaʼʌch i jacʼbe i tʼan Dios i tsiʼ mele jini arca (Génesis 6:13, 14, 18, 19, 22)

Noé mach jontolic. Jioba tsiʼ sube chaʼan mi caj i jisan jini jontoloʼ bʌ winicob xʼixicob ti colem butʼjaʼ.

Dios tsiʼ sube Noé chaʼan miʼ mel jumpʼejl colem caja bʌ teʼ, tsiʼ yotsʌbe i cʼabaʼ arca, chaʼan yaʼ mi caj i yotsan i familia, yicʼot añimal tac.

Noé tsiʼ sube jini winicob xʼixicob chaʼan mi caj i tilel Butʼjaʼ, pero maʼanic majqui tsiʼ ñopbe. Lamital tsiʼ wajleyob i yañoʼ bʌ tsiʼ tsʼaʼleyob.

Noé tsiʼ yotsa jini añimal tac cheʼ bʌ tsaʼ ujti i mel jini arca.