Cʌntesʌntel 18

Jacob miʼ majlel ti Harán

¿AWUJIL ba majquiyob ili winicob woli bʌ i pejcan Jacob? Cheʼ cabʌlix qʼuin i chaʼle xʌmbal, Jacob tsiʼ tajayob lʌcʼʌl baʼan pozo. Woli i cʌntañob i tiñʌmeʼob. Jacob tsiʼ cʼajtibeyob: ‹¿Baqui chʼoyoletla?›

‹Chʼoyolon lojon ti Harán›, cheʼob.

‹¿Laʼ cʌñʌ ba Labán?› tsiʼ cʼajti Jacob.

‹J cʌñʌ cu lojon›, cheʼob. ‹Awilan, yaʼ tilel xchʼoc bʌ i yalobil i cʼabaʼ Raquel yicʼot i tiñʌmeʼ Labán.› ¿Muʼ ba a qʼuel jini Raquel woli ti lʌcʼtiyel?

Cheʼ bʌ Jacob tsiʼ qʼuele Raquel yicʼot i tiñʌmeʼ i yichan Labán, tsaʼ majli ti pozo i tsiʼ locʼsa jini xajlel chaʼan mi yʌqʼuen i jap jaʼ jini tiñʌmeʼ tac. Cheʼ jini Jacob tsiʼ tsʼujtsʼu Raquel i tsiʼ sube i bʌ majqui. Raquel tsiʼ wen taja i tijicñʌyel, tsaʼ majli ti yotot yicʼot tsiʼ sube jini i tat Labán chuqui tsaʼ bʌ ujti.

Labán tsiʼ wen taja i tijicñʌyel cheʼ tsaʼ cʌyle Jacob ti yotot. Yicʼot cheʼ bʌ Jacob tsiʼ sube chaʼan yom ñujpuñel yicʼot Raquel, Labán tsiʼ taja i tijicñʌyel. Pero tsiʼ sube Jacob chaʼan mi chaʼlen eʼtel wucpʼejl jab yaʼ tiʼ lum chaʼan miʼ ñujpuñel yicʼot Raquel. Jacob tsiʼ mele, come miʼ wen cʼuxbin Raquel. Pero cheʼ bʌ tsaʼ cʼoti i yorajlel chaʼan miʼ ñujpuñel, ¿awujil ba chuqui tsaʼ ujti?

Labán tsiʼ yʌqʼue Jacob jini chichʌl bʌ i yalobil, i cʼabaʼ Lea, i mach jinic Raquel. Cheʼ bʌ Jacob tsiʼ jacʼʌ chaʼan mi chaʼliben i yeʼtel Labán yambʌ wucpʼejl jab, Labán tsiʼ yʌqʼue jaʼel jini Raquel ti yijñam. Cheʼ bʌ ora jini Dios maʼanic tsiʼ tiqʼui winicob chaʼan mi pʌyob ñumen ti juntiquil i yijñam. Pero wʌle, cheʼ bajcheʼ mi pʌsbeñonla jini Biblia, juntiquil jach yom miʼ pʌy i yijñam jini winic.

Génesis 29:1-30.