Cʌntesʌntel 19
Wen yonlel i familia Jacob
Q’UELE cu ili yonleloʼ bʌ ti jumpʼejl otot. Iliyobi jiñʌch lajchʌntiquil bʌ i yalobilob Jacob. Yicʼot jaʼel tsiʼ yila pañimil xchʼocoʼ bʌ i yalobil. ¿Awujil ba chuqui i cʼabaʼob lamital i yalobil Jacob? Laʼ laj cʌmben lamital i cʼabaʼob.
Lea tsiʼ yʌcʼʌ ti pañimil Rubén, Simeón, Leví yicʼot Judá. Cheʼ bʌ tsiʼ qʼuele Raquel maʼanic woli i cʌntan i yalobil, tsiʼ wen taja i chʼijiyemlel. Jini chaʼan Lea tsiʼ yʌqʼue Jacob i criada Bilha, Bilha tsiʼ yʌcʼʌ ti pañimil chaʼtiquil i yalobil i cʼabaʼob Dan yicʼot Neftalí. Cheʼ jaʼel jini Lea tsiʼ yʌqʼue jaʼel i criada Zilpa, i Zilpa tsiʼ yʌcʼʌ ti pañimil Gad yicʼot Aser. Cheʼ jini, Lea tsaʼ tili yambʌ chaʼtiquil i yalobil, Isacar yicʼot Zabulón.
Tsiʼ cʼun acʼʌ ti pañimil i yalobil Raquel. Tsiʼ yotsʌbe i cʼabaʼ ti José. Ti wiʼil muʼto cajel lac ñumen cʌn chaʼan tiʼ tojlel José, come tsaʼ sujti tiʼ wen ñuc bʌ i yeʼtel. Iliyobi jiñobʌch jini junlujuntiquil i yalobil Jacob cheʼ bʌ chumul to yicʼot Labán i tat jini Raquel.
Jacob tsaʼ yʌcʼʌ ti pañimil jaʼel xchʼocoʼ bʌ i yalobil, pero jini Biblia cojach juntiquil mi yʌlben i cʼabaʼ. I cʼabaʼ jiñʌch Dina.
Tsaʼ cʼoti i yorajlel chaʼan Jacob miʼ ñaʼtan i cʌy jini Labán yicʼot chaʼan miʼ chaʼ sujtel ti Canaán. Jini chaʼan tsiʼ tempa jini yonlel bʌ i chaʼañob yicʼot on bʌ i tiñʌmeʼ tac yicʼot junmojt i wacax, i tsaʼ caji ti ñajt bʌ xʌmbal.
Mach jalic cheʼ bʌ tsaʼ chaʼ sujti Jacob yicʼot i familia yaʼ ti Canaán, Raquel tsiʼ yʌcʼʌ ti pañimil yambʌ chʼiton bʌ i yalobil. Iliyi tsaʼ ujti cheʼ bʌ woliyob ti xʌmbal. Mach wenic chuqui tsaʼ ujti tiʼ tojlel Raquel, tsaʼ chʌmi cheʼ woli i yʌcʼ ti pañimil i yalobil. Pero jini alʌl maʼanic chuqui tsiʼ chaʼle. Jini Jacob tsiʼ yotsʌbe i cʼabaʼ Benjamín.
La com laj cʼajtesan i cʼabaʼob jini lajchʌntiquil i yalobilob Jacob come pejtelel jini tejclum chaʼan Israel yaʼʌch chʼoyol tsaʼ tili. Cheʼ jaʼel, jini lajchʌnmojt i tejclum Israel chʼʌmbil i chaʼan i cʼabaʼ jini lujuntiquil i yalobil Jacob i chaʼtiquil i yalobil José. Isaac jalto tsaʼ chumle cheʼ tsiʼ yilayob pañimil ti pejtelel ili chʼitoñob, yicʼot melelʌch wen tijicña tsiʼ yubi chaʼan yonlel i buts. Pero laʼ laj qʼuel chuqui tsiʼ chaʼle jini xchʼoc bʌ i buts i cʼabaʼ Dina.
Génesis 29:32-35; 30:1-26; 35:16-19; 37:35.