CɅNTESɅNTEL 13
Timoteo tsiʼ mulaj i coltan wiñicob xʼixicob
Timoteo jiñʌch juntiquil chʼiton tsaʼ bʌ yubi i tijicñʌyel cheʼ tsiʼ colta yambʌlob. Tsajñi i coltan wiñicob xʼixicob (quixtañujob) ti cabʌl tejclum. Wen utsʼatax chuqui tsiʼ ñusa. ¿A wom baʼ ñumen cʌn chaʼan Timoteo?...
I mamá yicʼot i coʼ Timoteo tiʼ cʌntesayob tiʼ chaʼan bʌ Jehová
Timoteo tsaʼ coli ti jumpʼejl tejclum i cʼabaʼ Listra. I mamá jiñʌch Eunice, i coʼ jiñʌch Loida. Cheʼ bʌ alʌ chʼiton to jiñi Timoteo, tsiʼ cʌntesayob tiʼ chaʼan bʌ Jehová. Jin chaʼan, cʼʌlʌl cheʼ bʌ alʌ chʼiton to tsiʼ mulaj i coltan quixtañujob chaʼan miʼ cʌñob Jehová.
Jumpʼejl bʌ qʼuin cheʼ bʌ ñuquix jiñi Timoteo, Pablo tiʼ sube: «Mi cac majlel ti subtʼan ti yan tac bʌ tejclum. ¿A wom ba majlel?». Wen tijicña tiʼ yubi i bʌ i tsiʼ yʌlʌ: «¡Com cu!». Jiñi Timoteo wen yom i coltan quixtañujob.
Timoteo tsaʼ majli yicʼot Pablo ti Tesalónica, jumpʼejl tejclum am bʌ ti Grecia. Chaʼan miʼ mejlelob ti cʼotel, wen ñajt tiʼ xʌñʌyob ti yoc yicʼot ti barco. Cheʼ bʌ tsaʼ cʼotiyob, tsiʼ colta cabʌl wiñicob xʼixicob chaʼan miʼ cʌñob Jehová. Pero an tsaʼ bʌ wen michʼayob yicʼot tsiʼ ñopo i ticʼlañob. Jin chaʼan, Pablo yicʼot Timoteo tsaʼ majliyob ti subtʼan ti yambʌ tejclum.
Timoteo tijicña i utsʼat chuqui tsiʼ ñusa
Cheʼ ñumeñix chaʼpʼej uxpʼejl uw, Pablo tsiʼ chaʼ choco majlel Timoteo ti Tesalónica chaʼan miʼ ñaʼtan bajcheʼ yilal an jiñi hermanojob. Pero yaʼi, an quixtañujob tsaʼ bʌ i pʼumpʼun ticʼla jiñi xñoptʼañob. ¡Timoteo tsaʼʌch i wen pʌsʌ i chʼejlel! Jin chaʼan, tsiʼ chaʼ jacʼʌ majlel come tsiʼ cʼojoʼta jiñi hermanojob. Cheʼ bʌ tsaʼ chaʼ sujti baʼan Pablo, tsiʼ chʼʌmbe cʼotel wen tac bʌ tʼan. ¡Jiñi hermanojob wolix (yʌquelix) to i chʌn melbeñob i yeʼtel Jehová!
Timoteo cabʌl jabil tsiʼ melbe i yeʼtel Jehová yicʼot Pablo. Jin chaʼan, jumpʼejl bʌ qʼuin, Pablo tiʼ tsʼijbu: «Maʼañic yambʌ bajcheʼ Timoteo. Mi cac choc majlel chaʼan miʼ coltan jiñi hermanojob. Miʼ cʼuxbin Jehová yicʼot jiñi wiñicob xʼixicob».
Jatet mucʼʌch a cʼuxbin yambʌlob jaʼel, ¿ñomach? ¿A wom baʼ coltañob chaʼan miʼ cʌñob Jehová?... Mi cheʼʌchi, mi caʼ wen taj a tijicñʌyel yicʼot utsʼat chuqui mi caj a ñusan, cheʼ bajcheʼ Timoteo.