MELE REVISITA TAC
LECCIÓN 9
Ñaʼtan bajcheʼ yubil miʼ yubiñob
Texto baqui chucul: «Ubinla laʼ tijicñʌyel laʼ wicʼotob jiñi tijicñayoʼ bʌ, chaʼlenla uqʼuel laʼ wicʼot jiñi woliyoʼ bʌ ti uqʼuel» (Rom. 12:15).
Tsaʼ bʌ i mele Jesús
1. Qʼuele jiñi VIDEO o pejcan Marcos 6:30-34. Cheʼ jiñi ñaʼtan ili cʼajtiya tac:
¿Chucoch Jesús yicʼot jiñi i apóstolob yomob majlel «baqui miʼ mejlelob ti bajñel ajñel»?
¿Chuqui tsiʼ ñijca Jesús chaʼan miʼ suben wen tʼan jiñi yonlel lac piʼʌlob?
¿Chuqui mi laj cʌn tiʼ tojlel Jesús?
2. Cheʼ bʌ mi lac ñaʼtan bajcheʼ yubil miʼ yubiñob o chuqui miʼ ñaʼtañob jiñi lac piʼʌlob, mi lac pʌs chaʼan lac wentajobʌch i mach jin jach la com lac subeñob jiñi wen tʼan.
Lajin Jesús
3. Wen ñʌchʼtan chuqui miʼ yʌl. Acʼʌ ti tʼan jiñi woli bʌ a pejcan i mach a tsʼocben i tʼan. Ñʌchʼtan mi woliʼ subeñet chuqui miʼ ñaʼtan o bajcheʼ yubil miʼ yubin. Cheʼ bajcheʼ jiñi mi caj i qʼuel chaʼan mucʼʌch a qʼuel ti ñuc chuqui miʼ ñaʼtan.
4. Ñaʼtan chuqui i cʼʌjñibal i chaʼan. Cʼajtesan chuqui tsaʼ laʼ wʌlʌ i cʼajtiben a bʌ:
«¿Chucoch yom miʼ cʌn jiñi i sujmlel?».
«¿Bajcheʼ mi caj i coltan ili ora yicʼot ti talto bʌ qʼuin mi tsiʼ chʼʌmʌ jumpʼejl estudio?».
5. Alʌ chuqui tac muʼ bʌ i mejlel i coltan. Pʌsben chaʼan mi tsiʼ chʼʌmʌ jumpʼejl estudio mi caj i tajben i jacʼbal jiñi i cʼajtiya tac yicʼot mi caj i taj cabʌl i wenlel.