3 ¿Bajcheʼ yom mi lac mel oración?

CABɅL ñopbalʌl miʼ yʌl bajcheʼ yom mi la cajñel yicʼot chuqui tac yom mi la cʌl cheʼ mi lac mel oración, pero jiñi Biblia maʼañic miʼ mel bajcheʼ jiñi. Muʼ bʌ i yʌl jiñi Biblia ñumen ñuc i cʼʌjñibal cheʼ bajcheʼ tac jiñi.

Tiʼ sujm, miʼ yʌl chaʼan jiñi xucʼul bʌ i wiñicob Dios tsiʼ meleyob oración baqui jach yicʼot mach junsujmic jach bajcheʼ añob cheʼ tsiʼ meleyob. An i tajol tsiʼ meleyob ti mucul tʼan jach, i an i tajol tsiʼ meleyob ti cʼam bʌ tʼan. An tsaʼ bʌ i qʼueleyob cʼʌjquel ti panchan, i an tsaʼ bʌ i qʼueleyob jubel ti lum. Pero maʼañic tsiʼ cʼʌñʌyob imagen tac, rosario tac o alʌ libro tac chaʼan bʌ oración. Tsaʼ jach i yʌlʌyob bajcheʼ yubil miʼ yubiñob i bʌ. ¿Chucoch Dios tsiʼ ñʌchʼtʌbeyob i yoración?

Ti ñaxan, jiñi tsaʼ bʌ i pejcayob jiñʌch Jehová, cheʼ bajcheʼ tsaʼix laj qʼuele, jiñʌch jiñi wen ñuc bʌ i cʼʌjñibal. Pero ti 1 Juan 5:14 miʼ yʌl yambʌ: «Ili jiñʌch muʼ bʌ lac ñop tiʼ tojlel: Miʼ mejlel laj cʼajtiben chuqui jach la com mi lajalʌch yicʼot jiñi muʼ bʌ i mulan i mucʼʌch i ñʌchʼtañonla». Cheʼʌchi, jiñi la coración lajalʌch yom cheʼ bajcheʼ jiñi muʼ bʌ i mulan Dios. ¿Chuqui yom i yʌl?

Ñaxan yom mi lac ñaʼtan chuqui muʼ bʌ i mulan Dios. Jin chaʼan yom mi lac pejcan jiñi Biblia. Pero ¿yom ba mi lac ñaxan ñaʼtan pejtelel chuqui miʼ yʌl jiñi Biblia chaʼan Dios miʼ ñʌchʼtan la coración tac? Maʼañic. Pero yomʌch mi lac ñaʼtan chuqui jiñi muʼ bʌ i mulan Dios, mi lac chaʼlen wersa chaʼan mi lac chʼʌmben i sujm i mi lac mel cheʼ bajcheʼ woli laj cʌn (Mateo 7:21-23). Cheʼʌch yom mi lac mel la coración cheʼ bajcheʼ miʼ yʌl jiñi Biblia.

Cheʼ jaʼel, cheʼ mi lac ñumen cʌn Jehová yicʼot chuqui miʼ mulan, ñumento mi lac ñop tiʼ tojlel. Ili jiñʌch yambʌ ñuc bʌ i cʼʌjñibal chaʼan Dios miʼ ñʌchʼtan la coración, Jesús tsiʼ yʌlʌ: «Pejtelel chuqui mi laʼ cʼajtin ti oración, mucʼʌch caj laʼ wʌqʼuentel mi mucʼʌch laʼ ñop» (Mateo 21:22). Ili yom i yʌl chaʼan jiñi muʼ bʌ lac ñop i sujmʌch anquese maʼañic mi lac taj laj qʼuel, mach cheʼic jach mi lac toʼol ñop (Hebreos 11:1). I sujmʌch chaʼan maʼañic mi lac taj laj qʼuel Jehová, pero yaʼ ti Biblia an cabʌl chuqui miʼ pʌs chaʼan añʌch, miʼ mejlel lac ñop chuqui miʼ yʌl yicʼot miʼ jacʼben i yoración jiñi muʼ bʌ i ñop tiʼ tojlel. Maʼañic miʼ cʼojyel i yubiñonla cheʼ mi laj cʼajtiben lac ñopoñel, mucʼʌch i yʌqʼueñonla chuqui i cʼʌjñibal bʌ lac chaʼan (Lucas 17:5; Santiago 1:17).

Pero anto chuqui yambʌ yom la cujil chaʼan Dios miʼ ñʌchʼtan la coración. Jesús tsiʼ yʌlʌ: «Maʼañic majch miʼ mejlel ti cʼotel baʼan jiñi Tatʌl mi mach tic tojlelic» (Juan 14:6). Ti yambʌ tʼan, cojach tiʼ tojlel Jesús miʼ mejlel lac lʌcʼtesan lac bʌ tiʼ tojlel Jehová, jiñi lac Tat. Jin chaʼan, Jesús tsiʼ cʌntesa jiñi xcʌntʼañob i chaʼan chaʼan yom miʼ melob oración tiʼ cʼabaʼ (Juan 14:13; 15:16). Pero cheʼ mi lac mel oración tiʼ cʼabaʼ Jesús mach yomic i yʌl chaʼan jin woli lac pejcan. Yom i yʌl chaʼan mi laj cʌn chaʼan cojach yicʼot i coltaya Jesús miʼ mejlel lac pejcan jiñi lac Tat am bʌ ti panchan, juntiquil Dios toj bʌ yicʼot chʼujul bʌ.

Ti jumpʼejl bʌ qʼuin, juntiquil xcʌntʼan i chaʼan Jesús tsiʼ cʼajtibe: «C Yum, cʌntesañon lojon bajcheʼ mi lon c mel oración» (Lucas 11:1). ¿Chuqui yom i yʌlob? Yujilobix bajcheʼ yom miʼ chaʼleñob oración. Wen tsiquil chaʼan yomoʼ bʌ i ñaʼtan jiñʌch chuqui yom miʼ cʼajtiñob ti oración.