Añʌch i cʼʌjñibal cheʼ cuxulonla

TI JIÑI ñaxan tac bʌ temaj tsaʼ laj qʼuele chaʼan an wocol tac muʼ bʌ i mejlel i yʌqʼueñonla la cubin chaʼan mach lʌjtʼix lac chaʼan. Tajol ili ora wocol woli (choncol) a ñusan i maʼ ñaʼtan chaʼan maʼañix i cʼʌjñibal cheʼ cuxulet o chaʼan maʼañic majch i wentajet. Pero miʼ mejlel a ñop chaʼan Dios cʼux miʼ yubin cheʼ miʼ qʼuelet ti wocol. I wentajetʌch.

Tsaʼ bʌ i tsʼijbu jiñi Salmo 86 tsiʼ yʌlʌ bajcheʼ cʼamel i ñopoñel (chʼujbiya) ti Dios: «Cheʼ woliyon ti wocol mic pejcañet, come jatet mi caj a jacʼbeñon» (Salmo 86:7). Pero tajol maʼ cʼajtiben a bʌ: «¿Bajcheʼ miʼ jacʼbeñonla Dios cheʼ bʌ cabʌl laj cʼojol?».

Anquese Dios tajol mach ti orajic mi caj i tojʼesan lac wocol tac, miʼ yʌl chaʼan mi caj i yʌqʼueñonla i ñʌchʼtʌlel lac pusicʼal chaʼan miʼ mʌjlel lac chaʼan. Yaʼ tiʼ Tʼan, ti Biblia, miʼ subeñonla: «Mach mi laʼ chaʼlen tsic pusicʼal pero tiʼ pejtelel chuqui tac miʼ yujtel subenla Dios chuqui tac yom ti oración. Chʌn cʼajtibenla. Subenla wocolix i yʌlʌ. Cheʼ jini, i ñʌchʼtʌlel laʼ pusicʼal chʼoyol bʌ ti Dios mi caj i cʌntan laʼ pusicʼal yicʼot laʼ ñaʼtʌbal [...]. Maʼanic i pʼisol i ñʌchʼtʌlel lac pusicʼal muʼ bʌ i yʌqʼueñonla» (Filipenses 4:6, 7). Tsajin jiñi yan tac bʌ texto i mi caj a qʼuel bajcheʼ cʼamel miʼ wentajiñet Dios.

Dios i wentajetʌch

«Mach ñajʌyemic mi juncojtic [xpuruwoc] tiʼ pusicʼal Dios. [...] Jatetla, ñumen an laʼ cʼʌjñibal bajcheʼ cabʌl xpuruwoc» (Lucas 12:6, 7).

ÑAʼTANCU ILIYI: Dios muʼto i qʼuel ti ñuc juncojt alʌ xpuruwoc come cuxulʌch. Pero ñumen ñuc i cʼʌjñibal miʼ qʼuel wiñicob xʼixicob (quixtañujob) bajcheʼ cabʌl xpuruwoc. Joñoñʌchla jiñi ñumen ñuc bʌ i melbal ila ti Lum come melbilonla tiʼ yejtal i miʼ mejlel lac pʼol yicʼot lac pʌs jiñi wen tac bʌ i melbal (chaʼlibal) (Génesis 1:26, 27).

«C Yum, tsaʼ wen qʼueleyon. Cʌmbiloñʌch a chaʼan. [...] Maʼ luʼ cʌmbeñon c pusicʼal [...]. Tsajiñon, Dios. [...] Cʌmbeñon c pensar» (Salmo 139:1, 2, 23).

ÑAʼTANCU ILIYI: Dios wen i cʌñʌyet. Cʌmbil i chaʼan bajcheʼ yubil maʼ wubin a bʌ yicʼot chuqui maʼ wen cʼojoʼtan. Anquese tajol jiñi yambʌlob maʼañic miʼ laj chʼʌmbeñob i sujm a wocol, Dios mucʼʌch i wentajiñet i yom i coltañet. Jiñi miʼ yʌqʼueñet a qʼuel chaʼan i cʼʌjñibalʌch cheʼ cuxulet.

Añʌch i sujmlel a cuxtʌlel

«C Yum, ubibeñon coración. Laʼ cʼotic c tʼan baʼ añet. [...] Ñichʼtʌbeñon c tʼan. Cheʼ mic pejcañet yom maʼ bʌcʼ jacʼbeñon». Jehová «miʼ jacʼbeñob i yoración jini pʼumpʼuñoʼ bʌ» (Salmo 102:1, 2, 17).

ÑAʼTANCU ILIYI: Lajal bajcheʼ Dios woliʼ qʼuel jujumpʼejl i yaʼlel i wut quixtañujob muʼ bʌ i bejqʼuel tiʼ caj wocol (Salmo 56:8). I yaʼʌch ochem a chaʼan jaʼel. Dios cʼajal i chaʼan jiñi wocol tac ñusʌbil bʌ a chaʼan yicʼot bajcheʼ cʼamel an a beque i yaʼlel a wut come miʼ wen qʼuelet ti ñuc.

«Mach yomic maʼ lij a bʌ come a Dioson. Mi caj c wen pʼʌtʼesañet. Mi caj j coltañet. [...] Come joñon a Yumon, a Dioson. [...] Mach a chaʼlen bʌqʼuen, come mi caj j coltañet» (Isaías 41:10, 13).

ÑAʼTANCU ILIYI: Dios yom i coltañet. Mi maʼ yajlel, mi caj i techet.

Woli lac pijtan chuqui wen chaʼan ti talto bʌ qʼuin

«Tsiʼ wen cʼuxbi jini añoʼ bʌ ti pañimil Dios. Tsiʼ yʌcʼʌ cojach bʌ i Yalobil. Majqui jach miʼ ñop i Yalobil, maʼanic miʼ sajtel. Miʼ taj i cuxtʌlel mach bʌ anic miʼ jilel» (Juan 3:16).

ÑAʼTANCU ILIYI: Dios miʼ wen cʼuxbiñet i tsaʼto i yʌcʼʌ ti chʌmel Jesús ti a tojlel. Ili coltʌntel miʼ yʌqʼueñet a tajben i sujmlel a cuxtʌlel yicʼot chaʼan tijicñayet tiʼ pejtelel ora.a