Ñumen weñʼesan a subtʼan: Chajpan cʌytʌl chaʼan maʼ chaʼ majlel

¿CHUCOCH ÑUC I CʼɅJÑIBAL?

Com lac chaʼ mul jiñi pacʼ chaʼan i sujmlel tsaʼ bʌ lac pʌcʼʌ (1 Co. 3:6). Mi tsaʼ lac taja juntiquil yom bʌ i ñumen cʌn, weñʌch cheʼ mi lac melben jumpʼejl cʼajtiya chaʼan mi la cʌqʼuen i jacʼbal cheʼ mi lac chaʼ julaʼtan. Ili jiñʌch chaʼan miʼ wʌn ñaʼtan jiñi quixtañu yicʼot mi caj i coltañonla chaʼan mi lac chajpan lac bʌ chaʼan mi lac chaʼ julaʼtan. Cheʼ mi lac chaʼ majlel, miʼ mejlel lac suben chaʼan tsaʼ tiliyonla chaʼan mi lac jacʼ jiñi cʼajtiya tsaʼ bʌ lac melbe.

¿BAJCHEʼ YOM MIʼ MEJLEL?

• Cheʼ maʼ chajpan muʼ bʌ caj a wʌl yaʼ ti subtʼan, wʌn ñaʼtan chuqui ti cʼajtiya mi caj a cʌy chaʼan maʼ wʌqʼuen i jacʼbal ti yambʌ ora. Miʼ mejlel a yajcan jumpʼejl muʼ bʌ i tilel i jacʼbal ti jiñi jun muʼ bʌ caj a wʌcʼ. Miʼ mejlel a sʌclan jaʼel ti jiñi jun tac muʼ bʌ laj cʼʌn ti pʌs estudio yicʼot yom mi lac pʌsben ili jun cheʼ bʌ mi lac chaʼ julaʼtan.

• Cheʼ tsaʼix a chaʼle tʼan a wicʼot juntiquil yom bʌ i ñumen cʌn, suben chaʼan a wom a bej chaʼlen tʼan ti yambʌ ora i melben jiñi cʼajtiya a wom bʌ a cʌyben. Mi mucʼʌch i mejlel, cʼajtiben baqui chumul o bajcheʼ miʼ mejlel a pejcan.

• Mi tsaʼ sube bajcheʼ ora mi caj a chaʼ majlel, tsʼʌctesan jiñi a tʼan (Mt. 5:37).