¿Am ba baqui cʌyʌl chuqui mi caj i yujtel ti a tojlel?

MUʼ BɅ I ÑAʼTAÑOB CABɅLOB

JIÑI ASTROLOGÍA. Cabʌlob miʼ ñaʼtañob chaʼan muʼ bʌ i pʌs chuqui mi caj i yujtel tiʼ tojlelob jiñʌch bajcheʼ yilal an jiñi ecʼ cheʼ bʌ tsiʼ yilayob pañimil (tsaʼ chʼocʼayob). Jin chaʼan miʼ pejcañob jiñi horóscopo i miʼ qʼuelob chuqui miʼ melob chaʼan maʼañic miʼ tajob wocol o chaʼan cabʌl chuqui miʼ tajob.

I PEJCɅNTEL XWUJTOB. An muʼ bʌ i ñaʼtañob chaʼan muʼ bʌ caj i coltañob jiñʌch cheʼ miʼ cʼajtibeñob jiñi xwujtob chuqui yom miʼ melob, miʼ ñaʼtañob chaʼan wen mi caj i loqʼuel chuqui miʼ melob mi mucʼʌch i jacʼob chuqui miʼ subeñob. Cheʼ jaʼel, pejtelel chuqui miʼ melob yaʼʌch chucul ti chuqui miʼ yʌl jiñi xwujtob.

I CHʼUJUTESɅNTEL LAC ÑOJTEʼELOB. An muʼ bʌ i ñaʼtañob chaʼan yom miʼ chʼujutesañob i ñojteʼelob o yambʌ diosob chaʼan miʼ cʌntañob i miʼ tajob bendición. Van,a juntiquil xʼixic ti Vietnam, miʼ yʌl: «Tsaʼ c ñaʼta chaʼan, cheʼ mi cʌqʼuen i ñuclel jiñi c ñojteʼelob, ñumen wen mi caj c chumtʌl i tijicña mi caj cajñel quicʼot calobilob».

JIÑI REENCARNACIÓN. Cabʌl muʼ bʌ i ñopob chaʼan cheʼ bʌ mi lac chʌmel (sajtel) mi lac chaʼ ilan pañimil yicʼot chaʼan mach junyajlic jach miʼ yujtel iliyi. Miʼ yʌlob chaʼan pejtelel chuqui miʼ yujtel tiʼ tojlelob jiñʌch tiʼ caj bajcheʼ tsaʼ chumleyob ti wajali.

Anquese yujilob chaʼan mach i sujmic pejtelel iliyi, mucʼʌch i cʼʌñob jiñi horóscopo, jiñi carta de tarot i miʼ yʌcʼob ti pejcʌntel i cʼʌb, miʼ ñaʼtañob chaʼan iliyi tajol mucʼʌch i yʌqʼueñob i ñaʼtan chuqui mi caj i yujtel tiʼ tojlelob.

¿CHUQUI MIʼ TAJOB?

¿Ñumen wem ba añob i yujilobix chaʼan wen mi caj i yajñelob ti talto bʌ qʼuin pejtelel muʼ bʌ i ñopob iliyi?

Laʼ laj qʼuel tsaʼ bʌ ujti tiʼ tojlel Hào, chumul bʌ ti Vietnam. Tsiʼ yʌcʼʌ chaʼan jiñi astrología yicʼot i chʼujutesʌntel lac ñojteʼelob miʼ coltan. Pero ¿tsaʼ ba i colta? Hào miʼ yʌl: «Tsaʼ c sʌtʌ cabʌl taqʼuin, tsaʼ c wen otsa c bet, an c wocol tic familia i mach wen tijicñayix tsaʼ ajñiyon».

Qiuming, chʼoyol bʌ ti Taiwán, miʼ ñop ti jiñi astrología, jiñi reencarnación, jiñi destino yicʼot jiñi i chʼujutesʌntel lac ñojteʼelob. Pero cheʼ bʌ tsaʼix i wen tsaji (qʼuele) pejtelel iliyi, tsiʼ yʌlʌ: «Tsaʼ j qʼuele chaʼan jiñi muʼ bʌ c ñop yicʼot jiñi costumbre tac maʼañic miʼ taj tac i bʌ yicʼot maʼañic miʼ wen chʼʌmbentel i sujm. Jiñi astrología an i tajol mach i sujmic chuqui miʼ yʌl. I chaʼan bʌ jiñi reencarnación..., weno, mi maʼañix cʼajal a chaʼan chuqui tsaʼ mele ti ñaxan, ¿bajcheʼ mi caj a qʼuextan a bʌ i mi caj a tojʼesan a bʌ ti jiñi yambʌ a cuxtʌlel?».

Hào, Qiuming yicʼot yambʌ lac piʼʌlob tsaʼ cʼoti i qʼuelob chaʼan jiñi destino, jiñi ecʼ tac, lac ñojteʼelob yicʼot jiñi reencarnación maʼañic miʼ tsictesan chuqui mi caj i yujtel ti lac tojlel. Pero ¿yom ba i yʌl chaʼan junyajl maʼañic chuqui miʼ mejlel lac mel?

Cabʌl muʼ bʌ i ñaʼtañob chaʼan mi yomob chaʼan wen miʼ yajñelob ti talto bʌ qʼuin yom miʼ wen chaʼleñob clase o yom ricojob. Pero ¿bajcheʼ yubil miʼ yubiñob jiñi am bʌ i meleyob iliyi?