¿Muʼ ba mejlel a cʌn baqui bʌ jiñi i sujmlel yicʼot mach bʌ i sujmic?

1. ¿Bajcheʼ yilal maʼ qʼuel jiñi i sujmlel?

JIÑI i wiñiconbʌla Jehová mi laj qʼuel ti ñuc jiñi i sujmlel am bʌ tiʼ Tʼan Dios. Yaʼʌch baqui chucul lac ñopoñel (Rom. 10:17). Mi lac ñop chaʼan Jehová jiñʌch tsaʼ bʌ i waʼchoco jiñi congregación «bajcheʼ i yoyel jiñi i sujmlel yicʼot muʼ bʌ i coltan jiñi i sujmlel» (1 Tim. 3:15). I tijicña mi lac jacʼbeñob i tʼan jiñi waʼchocobiloʼ bʌ come miʼ tsictesʌbeñoñobla jiñi i sujmlel am bʌ ti Biblia i miʼ coltañoñobla chaʼan mi lac mel chuqui yom Jehová (Heb. 13:17).

2. Cheʼ bajcheʼ miʼ yʌl Santiago 5:19, ¿chuqui miʼ mejlel ti ujtel ti lac tojlel?

² Anquese añoñixla tiʼ sujmlel i la cujil chaʼan yom mi lac jacʼ muʼ bʌ i yʌl jiñi i yorganización Jehová, bej añʌch jiñi wocol chaʼan mi lac ñajtʼesan lac bʌ tiʼ sujmlel (pejcan Santiago 5:19). Satanás yom chaʼan mi laj cʌy lac ñop muʼ bʌ i yʌl jiñi Biblia yicʼot muʼ bʌ i subeñonla jiñi organización (Efes. 4:14).

3. ¿Chucoch yom mi lac chʌn ñop jiñi i sujmlel? (Efesios 6:13, 14).

³ (Pejcan Efesios 6:13, 14). Satanás mi caj i cʼʌn lot tac chaʼan jiñi tejclum tac miʼ contrajiñob Jehová, i tsʼitaʼ jax yom chaʼan miʼ mel (Apoc. 16:13, 14). Cheʼ jaʼel, mi caj i ñumen chaʼlen wersa chaʼan miʼ lotin jiñi i wiñicob Jehová (Apoc. 12:9). Jin chaʼan, wen ñucʌch i cʼʌjñibal cheʼ bʌ mi laj cʌn baqui bʌ jiñi i sujmlel i baqui bʌ jiñi mach bʌ i sujmic, i mi lac jacʼ jiñi i sujmlel (Rom. 6:17; 1 Ped. 1:22). Ili jiñʌch muʼ bʌ caj i coltañonla chaʼan cuxul mi lac ñumel ti jiñi ñuc bʌ wocol.

4. ¿Chuqui mi caj laj qʼuel ti ili estudio?

⁴ Ti ili estudio mi caj laj cʌn chaʼpʼejl melbalʌl muʼ bʌ caj i coltañonla laj cʌn jiñi i sujmlel i mi lac jacʼ muʼ bʌ i yʌl jiñi organización. Cheʼ jaʼel, mi caj laj qʼuel uxchajp muʼ bʌ caj i coltañonla chaʼan mi lac chʌn ñop jiñi i sujmlel.

MELBALɅL TAC YOM BɅ AN LAC CHAʼAN

5. ¿Chucoch i cʼʌjñibalʌch i bʌcʼñʌntel Jehová chaʼan mi laj cʌn i sujmlel?

⁵ I bʌcʼñʌntel Jehová. Ili yom i yʌl chaʼan maʼañic mi lac mel mach bʌ weñic muʼ bʌ i yʌqʼuen i chʼijyemlel come mi lac wen cʼuxbin. Jin chaʼan, la com laj cʌn baqui bʌ i sujmlel yicʼot mach bʌ i sujmic yicʼot mi laj cʌn chuqui jiñi wem bʌ i mach bʌ weñic chaʼan wen miʼ qʼuelonla Jehová (Pr. 2:3-6; Heb. 5:14). Chaʼan maʼañic baʼ ora mi lac mel tsʼaʼ bʌ miʼ qʼuel Jehová, mach yomic mi lac bʌcʼñan jiñi wiñicob come lʌcʼʌl tiʼ pejtelel ora miʼ melob mach bʌ weñic. Jin chaʼan, joñonla yom mi lac ñumen cʼuxbin Jehová.

6. ¿Chuqui tsaʼ ujti tiʼ tojlel jiñi 10 israelitajob cheʼ tsiʼ bʌcʼñayob jiñi cananeojob?

⁶ Mi tsaʼ caji lac bʌcʼñan jiñi wiñicob, tajol mi caj lac ñop jiñi lot tac am bʌ tiʼ contra jiñi i sujmlel tilem bʌ ti Jehová. Laʼcu lac ñaʼtan tiʼ tojlel jiñi 12 israelitajob tsaʼ bʌ chojquiyob majlel i qʼuel jiñi lum tsaʼ bʌ subentiyob chaʼan mi caj i yʌqʼuentelob. Diez wiñicob tsiʼ cʌyʌ i bʌcʼñañob Jehová come jiñix tsaʼ caji i bʌcʼñañob jiñi cananeojob, jin chaʼan tsiʼ yʌlʌyob: «Mach mejliconla ti letsel majlel ame i jisañonla laj contrajob come wen pʼʌtʌlob» (Nm. 13:27-31). I sujmʌch chaʼan jiñi cananeojob ñumen pʼʌtʌlob, pero cheʼ bʌ jiñi israelitajob tsiʼ yʌlʌyob chaʼan maʼañic mi caj i mʌjlelob i chaʼan, tsiʼ ñajʌtesayob chuqui yom Jehová i maʼañic tsiʼ cʼajtesayob tsaʼ jaxto bʌ i mele tiʼ tojlelob. Maʼañic tsaʼ mejli i qʼuelob chaʼan tiʼ tojlel Jehová jiñi cananeojob maʼañobic i cʼʌjñibal. Pero Josué yicʼot Caleb wen qʼuexelob. Tsaʼʌch i ñopoyob tiʼ tojlel Jehová i yomob chaʼan utsʼat miʼ qʼuejlelob. Jin chaʼan tiʼ subeyob jiñi tejclum: «Cʼux miʼ yubiñonla lac Yum. Mi caj i yʌqʼueñonla jini lum» (Nm. 14:6-9).

7. ¿Chuqui miʼ mejlel i coltañonla chaʼan mi lac bʌcʼñan Jehová? (Qʼuele jaʼel jiñi dibujo).

⁷ ¿Chuqui miʼ mejlel i coltañonla chaʼan mi lac bʌcʼñan Jehová? Jiñʌch cheʼ mi lac wen ñaʼtan chuqui miʼ mulan cheʼ bʌ an chuqui woli (choncol) lac ñaʼtan lac mel (Sal. 16:8). Cheʼ woli a pejcan jumpʼejl relato, cʼajtiben a bʌ: «¿Chuqui tsaʼ c mele cheʼ yaʼic añoñi?». Ñaʼtancu chaʼan woli a wubin chuqui woliʼ yʌlob jiñi diez israelitajob. ¿Muʼ ba caj a ñop chuqui miʼ yʌlob i maʼ tech a bʌcʼñan jiñi wiñicob? ¿O mi caj a ñumen cʼuxbin Jehová i maʼ mel chuqui miʼ mulan? Cabʌl israelitajob maʼañic tsiʼ tajayob i qʼuel chaʼan i sujmʌch chuqui woli bʌ i yʌl Josué yicʼot Caleb. ¿I chuqui tsaʼ ujti? Maʼañic tsaʼ ochiyob ti jiñi Lum tsaʼ bʌ wʌn subentiyob (Nm. 14:10, 22, 23).

8. ¿Chuqui ti melbalʌl yom mi lac chaʼlen wersa lac pʌs, i chucoch?

⁸ Pecʼlel. Jehová miʼ pʌsbeñob i sujmlel jiñi añoʼ bʌ i pecʼlel (Mat. 11:25). Cheʼ bʌ tsaʼ laj cʌñʌ i sujmlel an majqui tsiʼ cʌntesayonla i wen tsaʼ lac jacʼʌ come an lac pecʼlel (Hech. 8:30, 31). Pero yomʌch mi laj cʌntan lac bʌ chaʼan maʼañic mi laj qʼuel lac bʌ ti ñuc, come jiñi miʼ mejlel i yʌqʼueñonla lac ñaʼtan chaʼan ñumen ñuc i cʼʌjñibal chuqui mi la cʌl i mach jiñic jiñi principio tac am bʌ ti Biblia o muʼ bʌ i yʌl jiñi organización.

9. ¿Chuqui mi caj i coltañonla chaʼan mi lac bej pʌs lac pecʼlel?

⁹ ¿Chuqui mi caj i coltañonla chaʼan mi lac bej pʌs lac pecʼlel? Yom mi laj cʼajtesan chaʼan tiʼ wut Jehová cheʼ ya wistʌlonlayi (Sal. 8:3, 4). I miʼ mejlel laj cʼajtiben i coltaya chaʼan mi lac chʌn pʌs lac pecʼlel yicʼot chaʼan mi la cʌcʼ lac bʌ ti cʌntesʌntel. Jehová miʼ cʼʌn jiñi Biblia yicʼot i yorganización chaʼan miʼ coltañonla lac ñumen acʼ ti ñuc chuqui miʼ ñaʼtan i mach jiñic muʼ bʌ lac bajñel ñaʼtan. Cheʼ mi lac pejcan jiñi Biblia, laʼ lac sʌclan chuqui tac miʼ pʌs chaʼan Jehová miʼ mulan cheʼ an lac pecʼlel i mach jiñic cheʼ ñuc mi laj qʼuel lac bʌ o mi lac chañʼesan lac bʌ tiʼ tojlel yambʌlob. I mi tsaʼ lac taja jumpʼejl privilegio, yom tsajalonla chaʼan maʼañic chuqui miʼ yʌqʼueñonla lac sʌt lac pecʼlel.

¿CHUQUI MI CAJ I COLTAÑONLA CHAʼAN MI LAC CHɅN ÑOP JIÑI I SUJMLEL?

10. ¿Majqui an i cʼʌñʌ Jehová chaʼan miʼ coltan yicʼot miʼ tojʼesan majlel i tejclum?

¹⁰ Laʼ lac chʌn ñop muʼ bʌ i yʌl i yorganización Jehová. Jehová tsiʼ cʼʌñʌ Moisés chaʼan miʼ tojʼesan jiñi i tejclum wajali, i ti wiʼil tsiʼ cʼʌñʌ Josué (Jos. 1:16, 17). Cheʼ bʌ jiñi israelitajob tsiʼ qʼueleyob ti ñuc ili wiñicob waʼchocobiloʼ bʌ, utsʼat tsaʼ ajñiyob. Cheʼ ti ñaxam bʌ siglo, Jehová tsiʼ cʼʌñʌ jiñi 12 apóstolob chaʼan miʼ cʌntan jiñi congregación (Hech. 8:14, 15). Ti wiʼil, tsiʼ cʼʌñʌ jaʼel jiñi ancianojob añoʼ bʌ ti Jerusalén. Come jiñi hermanojob tsiʼ jacʼʌyob muʼ bʌ i yʌlob ili xucʼul bʌ wiñicob, «jiñi congregación tac tsaʼ bej pʼʌtʼa majlel tiʼ ñopoñel i ti jujumpʼejl qʼuin tsaʼ coli majlel» (Hech. 16:4, 5). Ili ora Jehová miʼ cʼʌn jiñi organización chaʼan miʼ tojʼesañonla majlel, i cheʼ bʌ mucʼʌch lac jacʼ muʼ bʌ i yʌl, Jehová miʼ yʌqʼueñonla i bendición jaʼel. Pero ¿ixcu mi maʼañic mi lac jacʼ muʼ bʌ i yʌl jiñi Junmojt muʼ bʌ i pʌsob bij? ¿Bajcheʼ yubil miʼ yubin i bʌ Jehová? Chaʼan mi lac ñaʼtan, laʼ laj qʼuel tsaʼ bʌ ujti tiʼ tojlel jiñi israelitajob.

11. ¿Chuqui tsiʼ chaʼleyob jiñi maʼañic bʌ tsiʼ qʼueleyob ti ñuc jiñi waʼchocobil bʌ i chaʼan Jehová? (Qʼuele jaʼel jiñi dibujo).

¹¹ Cheʼ bʌ jiñi israelitajob maxto cʼotiyob ti jiñi Lum tsaʼ bʌ wʌn subentiyob, an wiñicob ñucoʼ bʌ i yeʼtel tsaʼ bʌ caji i contrajiñob Moisés i maʼañix tsiʼ qʼueleyob ti ñuc jiñi eʼtel aqʼuebil bʌ. Jin chaʼan tsiʼ yʌlʌyob: «Laj chʼujulonla ti Israel [mach cojach Moisés]. Junlajalonla. Baqui jach añonla yaʼan lac Yum la quicʼot» (Nm. 16:1-3). I sujmʌch, pejtelel jiñi israelitajob chʼujulobʌch, pero Jehová cojach tsiʼ yajca Moisés chaʼan miʼ tojʼesan majlel jiñi tejclum (Nm. 16:28). Jin chaʼan cheʼ tsiʼ contrajiyob Moisés woli (yʌquel) i contrajiñob Jehová. Maʼañic tsiʼ ñaʼtayob chuqui yom bʌ Jehová, jin jach chuqui bajñel yomob: Chaʼan miʼ ñumen qʼuejlelob ti ñuc. Jin chaʼan, Jehová tsiʼ jisayob yicʼot pejtelel tsaʼ bʌ i temeyob i bʌ yicʼotob (Nm. 16:30-35, 41, 49). Ili ora jaʼel, mach utsʼatic miʼ qʼuel jiñi maʼañic bʌ miʼ qʼuelob ti ñuc muʼ bʌ i yʌl jiñi organización.

12. ¿Chucoch mucʼʌch i mejlel lac chʌn ñop muʼ bʌ i yʌl jiñi organización?

¹² Mucʼʌch i mejlel lac ñop muʼ bʌ i yʌl jiñi i yorganización Jehová. ¿Chucoch? Come jiñi Junmojt muʼ bʌ i pʌsob bij yomob i yʌqʼuen i tijicñʌyel Jehová. Cheʼ jaʼel, miʼ chaʼleñob wersa chaʼan yaʼʌch chucul ti Biblia pejtelel chuqui miʼ yʌlob o miʼ melob, i cheʼʌch yom mi lac mel jaʼel ti lac pejtelel. Jin chaʼan, cheʼ bʌ miʼ qʼuelob chaʼan yom miʼ tojʼesʌntel jumpʼejl cʌntesa o bajcheʼ mi lac melben i yeʼtel (troñel) Jehová, ti ora miʼ melob (Pr. 4:18).

13. ¿Chuquiyes «jiñi i sujm bʌ tʼan», i chuqui yom mi lac mel?

¹³ «Chʌn tsajcan jiñi ejemplo chaʼan jiñi i sujm bʌ tʼan» (2 Tim. 1:13). ¿Chuquiyes «jiñi i sujm bʌ tʼan»? Jiñʌch jiñi cʌntesa tac i chaʼan Jesucristo muʼ bʌ lac taj yaʼ ti Biblia (Juan 17:17). Ili cʌntesa tac jiñʌch baqui chucul pejtelel jiñi muʼ bʌ lac ñop. Jiñi i yorganización Jehová an i pʌsbeyonla lac jacʼ i cʌntesa tac Jesús, i cheʼ bʌ mucʼʌch lac mel, wen mi caj la cajñel.

14. ¿Chucoch an chaʼtiqui uxtiquil tsaʼ bʌ i cʌyʌyob i ñop «jiñi i sujm bʌ tʼan»?

¹⁴ ¿Chuqui miʼ mejlel ti ujtel mi tsaʼ laj cʌyʌ lac ñop «jiñi i sujm bʌ tʼan»? Laʼ laj qʼuel tsaʼ bʌ ujti ti ñaxam bʌ siglo. An xñoptʼañob tsaʼ bʌ caji i yʌlob chaʼan tsaʼix tejchi jiñi qʼuiñilel Jehová. Tajol tsiʼ yʌlʌyob chaʼan jiñʌch tsaʼ bʌ i yʌlʌ Pablo ti jumpʼejl carta tsaʼ bʌ i chocbeyob cʼotel, pero maʼañic tsiʼ wen qʼueleyob mi jiñi carta i chaʼañʌch Pablo. Jin chaʼan, an ora bʌ tsiʼ ñopoyob jiñi tʼan i tsaʼ caji i pucob. Tsaʼic i cʼajtesayob tsaʼ bʌ i cʌñʌyob cheʼ bʌ yaʼañob yicʼot Pablo maʼañic tsaʼ ujtiyob bajcheʼ jiñi (2 Tes. 2:1-5). Jin chaʼan Pablo tiʼ subeyob chaʼan mach yomic miʼ ñopob pejtelel chuqui miʼ yubiñob. I chaʼan maʼañic miʼ chaʼ ujtelob bajcheʼ jiñi, tiʼ subeyob: «Joñon, Pablo, tij cʼʌb mic tsʼijbubeñetla majlel ili saludo, cheʼʌch mi cʌcʼ ti cʌñol pejtelel jiñi j carta. Cheʼʌch mic chaʼlen tsʼijb» (2 Tes. 3:17).

15. ¿Bajcheʼ miʼ mejlel laj cʌntan lac bʌ ti jiñi lot tac poj i sujm bʌ yilal? Alʌ jumpʼejl ejemplo. (Qʼuele jaʼel jiñi foto tac).

¹⁵ ¿Chuqui miʼ pʌsbeñonla jiñi tsaʼ bʌ i tsʼijbube Pablo jiñi hermanojob ti Tesalónica? Chaʼan mi an chuqui tsaʼ la cubi muʼ bʌ i yʌcʼ ti toj sajtel lac pusicʼal pero mach lajalic yicʼot jiñi cʌmbil bʌ lac chaʼan yaʼ ti Biblia, yom tsajalonla. Ti wajali, jiñi Unión Soviética tsiʼ pucu jumpʼejl carta baqui miʼ suben jiñi hermanojob chaʼan miʼ mejlel i tʼoxob i bʌ tiʼ tojlel jiñi organización, i tsiʼ yʌlʌyob chaʼan jiñi carta tilem ti central mundial. Anquese poj cheʼʌch yilali, jiñi hermanojob xucʼuloʼ bʌ tsiʼ cʌñʌyob chaʼan muʼ bʌ i yʌl jiñi carta mach lajalic yicʼot jiñi cʌmbil bʌ i chaʼañob, jin chaʼan maʼañic tsaʼ yajliyob ti jiñi lot. Ili ora, jiñi laj contrajob an i tajol miʼ cʼʌñob jiñi internet chaʼan miʼ pucob lot tac ti lac tojlel i miʼ ñop i tʼoxoñobla. Jin chaʼan, yomʌch mi lac wen qʼuel miʼ sujmʌch jiñi woli bʌ lac pejcan o lac ñʌchʼtan chaʼan maʼañic mi la cʌcʼ lac bʌ ti lotintel i miʼ qʼuextan jiñi lac ñaʼtʌbal (2 Tes. 2:2; 1 Juan 4:1).

16. Cheʼ bajcheʼ miʼ yʌl Romanos 16:17, 18, ¿chuqui yom mi lac mel mi an majqui miʼ cʌy i sujmlel?

¹⁶ Laʼ chʌn ajñiconla yicʼot jiñi xucʼul bʌ i wiñicob Jehová. Dios yom chaʼan juntemel mi lac chʼujutesan la quicʼot jiñi hermanojob, cheʼ bajcheʼ jiñi mi caj lac chʌn ajñel tiʼ sujmlel. Jiñi muʼ bʌ i cʌyob i sujmlel mi caj i ñopob i tʼox jiñi congregación. Jin chaʼan, Dios miʼ subeñonla chaʼan maʼañic mi lac ñochtañob chaʼan maʼañic miʼ ñajtʼesañoñobla tiʼ sujmlel (pejcan Romanos 16:17, 18).

17. ¿Chuqui mi caj i yujtel mi mucʼʌch lac wen chuc lac bʌ tiʼ sujmlel?

¹⁷ Cheʼ mucʼʌch laj cʌn baqui bʌ i sujmlel i tsʌts mi lac chuc lac bʌ, chʌn lʌcʼʌl mi caj la cajñel tiʼ tojlel Jehová (Efes. 4:15, 16). Cheʼ bajcheʼ jiñi, maʼañic mi caj la cʌcʼ lac bʌ ti lotintel ti chuqui miʼ yʌl Satanás, i Jehová mi caj i cʌntañonla ti jiñi ñuc bʌ wocol. Jin chaʼan, mi tsʌtsʌch maʼ chuc a bʌ tiʼ sujmlel, «jiñi Dios chaʼan bʌ ñʌchʼtʌlel» mi caji yajñel yicʼotet (Filip. 4:8, 9).