Laʼ laj cʼajtesan chaʼan mach luʼ la cujilic

1. ¿Bajcheʼ yilal tsiʼ meleyonla Jehová, i chucoch?

JEHOVÁ tsiʼ meleyonla (pʌtʌyonla) chaʼan mi lac taj lac ñaʼtʌbal, chaʼan an chuqui mi lac mulan laj cʌn i mi laj qʼuel bajcheʼ mi laj cʼʌn ti laj cuxtʌlel jiñi muʼ bʌ laj cʌn. ¿Chucoch cheʼ tsiʼ meleyonla bajcheʼ ili? Come yom chaʼan miʼ cʼotel laj cʌmben jiñi i ñaʼtʌbal yicʼot yom chaʼan mi laj cʼʌn jiñi lac ñaʼtʌbal chaʼan mi lac chʼʌm wem bʌ decisión cheʼ bʌ mi lac melben i yeʼtel (Pr. 2:​1-5; Rom. 12:1).

2. ¿Chuqui yom mi lac ñaʼtan i bajcheʼ miʼ coltañonla jiñi? (Job 37:​23, 24; qʼuele jaʼel jiñi dibujo).

² Anquese Jehová tsiʼ meleyonla chaʼan cabʌl chuqui miʼ mejlel laj cʌn, pero tiʼ sujm maʼañic baʼ ora mi caj i mejlel lac luʼ ñaʼtan (pejcan Job 37:​23, 24). Laʼcu lac ñaʼtan tiʼ tojlel Job. Jehová tsiʼ melbe cʼajtiya tac chaʼan miʼ coltan i qʼuel chaʼan cabʌl chuqui mach bʌ yujilic. Jiñi tsiʼ colta Job chaʼan miʼ qʼuextan i ñaʼtʌbal yicʼot miʼ pʌs i pecʼlel (Job 42:​3-6). Jin chaʼan, mi añʌch lac pecʼlel i mi lac pʌs chaʼan mach luʼ la cujilic mi caj i coltañonla lac ñop chaʼan Jehová mi caj i subeñonla chuqui yom mi lac mel cheʼ i cʼʌjñibal lac chaʼan chaʼan mi lac chʼʌm wem bʌ decisión (Pr. 2:6).

3. ¿Chuqui mi caj laj qʼuel ti ili estudio?

³ Ti ili estudio mi caj laj qʼuel chuqui mach tac bʌ la cujilic i bajcheʼ miʼ mejlel i yotsañonla ti wocol jiñi. Cheʼ jaʼel mi caj laj qʼuel chucoch weñʌch cheʼ bʌ an chuqui mach la cujilic. Jiñi muʼ bʌ caj laj cʌn mi caj i coltañonla lac ñop chaʼan Jehová, jiñi «tsʼʌcʌl bʌ i ñaʼtʌbal», mi caj i subeñonla chuqui jiñi yom bʌ mi lac ñaʼtan (Job 37:16).

MACH LA CUJILIC JALA MI CAJ I TILEL I JILIBAL

4. Cheʼ bajcheʼ miʼ yʌl Mateo 24:​36, ¿chuqui jiñi mach bʌ la cujilic?

⁴ (Pejcan Mateo 24:36). Mach la cujilic jala mi caj i tilel i jilibal ili jontol bʌ pañimil. Jinto Jesús jaʼel cheʼ bʌ wʌʼan ila ti pañimil (mulawil) mach yujilic «chuqui ti qʼuin yicʼot bajcheʼ ora» mi caj i tilel i jilibal.a Pero tiʼ sube jiñi apóstolob chaʼan Jehová jiñʌch an tiʼ wenta i yʌl jala mi caj i mel jiñi ñaʼtʌbil bʌ i chaʼan (Hech. 1:​6, 7). Jehová yujilix chuqui ti qʼuin mi caj i tilel i jilibal pero joñonla maʼañic miʼ mejlel lac ñaʼtan.

5. ¿Bajcheʼ miʼ mejlel i ticʼlañonla cheʼ mach la cujilic chuqui ti qʼuin mi caj i tilel i jilibal?

⁵ Mach la cujilic jaypʼejlto tiempo yom mi lac pijtan chaʼan miʼ tilel i jilibal i tiʼ caj jiñi tajol mi lac lujbʼan lac pijtan, ñumento mi añix ora cajel lac melben i yeʼtel Jehová. O tajol wocol mi la cubin chaʼan mi lac bej cuch jiñi lac wajlentel ti lac familia o ti jiñi yambʌ lac piʼʌlob (2 Ped. 3:​3, 4). Tajol jiñi miʼ mejlel i yʌqʼueñonla lac ñaʼtan chaʼan cheʼ la cujilic chuqui ti qʼuin miʼ tilel i jilibal mach wocolic mi caj la cubin chaʼan mi lac bej pijtan yicʼot lac lʌtʼ jiñi lac wajlentel.

6. ¿Chucoch weñʌch cheʼ mach la cujilic chuqui ti qʼuin mi caj i tilel i jilibal?

⁶ Cheʼ bʌ Jehová maʼañic miʼ subeñonla jala mi caj i tilel i jilibal miʼ coltañonla lac pʌs chaʼan woli (choncol) lac melben i yeʼtel come mi laj cʼuxbin yicʼot mi lac ñop tiʼ tojlel. Mach la comic chaʼan jin jach miʼ tilel i jilibal mi laj cʌy lac melben i yeʼtel Jehová, la com lac mel tiʼ pejtelel ora. Jin chaʼan, mach yomic mi laj cʌlʌx ñaʼtan jala mi caj i tilel jiñi «i qʼuiñilel Jehová», yom bʌ mi lac ñaʼtan jiñʌch chuqui ti wenlel mi caj lac taj. Mi cheʼʌch mi lac mel mi caj i coltañonla chaʼan mi lac ñumen lʌcʼtesan lac bʌ ti Jehová i mi lac chaʼlen wersa lac mel chuqui miʼ mulan (2 Ped. 3:​11, 12).

7. ¿Chuqui jiñi la cujil bʌ?

⁷ La com la cʌcʼ lac ñaʼtʌbal ti chuqui la cujil bʌ. ¿I chuqui jiñi la cujil bʌ? Chaʼan chumuloñixla ti jiñi cojix bʌ qʼuin. Yaʼ ti Biblia mi lac taj profecía tac muʼ bʌ i pʌs chaʼan ti 1914 tsaʼ tejchi jiñi cojix bʌ qʼuin i cheʼ jaʼel miʼ yʌl chuqui tac mi caj i yujtel. Jin chaʼan mi lac ñop chaʼan lʌcʼʌlix jiñi i qʼuiñilel Jehová (Sof. 1:14). Cheʼ jaʼel, la cujil chaʼan Jehová yom chaʼan mi lac sub jiñi «wen tʼan» (Mat. 24:14). I jiñʌch woli bʌ (yʌquel bʌ) i mejlel ili ora, woliʼ sujbel jiñi wen tʼan ti 240 país yicʼot territorio tac i ñumen ti mil idioma woliʼ sujbel. I chaʼan mi lac tsʼʌctesan ili eʼtel mach cʼʌñʌlic mi lac ñaʼtan chuqui ti qʼuin i bajcheʼ ora mi caj i tilel i jilibal.

MAʼAÑIC MI LAC ÑAʼTAN BAJCHEʼ TAC MIʼ COLTAÑONLA JEHOVÁ

8. ¿Chuqui miʼ pʌsbeñonla Eclesiastés 11:5?

⁸ (Pejcan Eclesiastés 11:5) Ili texto miʼ pʌsbeñonla chaʼan maʼañic miʼ mejlel lac luʼ ñaʼtan chuqui miʼ mel Jehová chaʼan miʼ tsʼʌctesan jiñi ñaʼtʌbil bʌ i chaʼan. Jin chaʼan maʼañic miʼ mejlel lac ñaʼtan chucoch an chuqui tac miʼ yʌcʼ ti ujtel o chuqui mi caj i mel chaʼan miʼ coltañonla (Sal. 37:5). Lajal bajcheʼ maʼañic miʼ mejlel lac ñaʼtan bajcheʼ miʼ colel majlel jiñi alʌl tiʼ ñʌcʼ i ñaʼ, i mi jiñicto jiñi doctorob, joñonla jaʼel maʼañic miʼ mejlel lac mero ñaʼtan chuqui tac miʼ mel Jehová.

9. ¿Chuqui miʼ mejlel ti ujtel cheʼ mach la cujilic bajcheʼ mi caj i coltañonla Jehová?

⁹ Cheʼ mach la cujilic bajcheʼ tac miʼ coltañonla Jehová, tajol wocol mi caj la cubin chaʼan mi laj cʌy chuqui tac an lac chaʼan chaʼan mi lac ñumen chaʼlen subtʼan, o chaʼan mi lac majlel baqui ñumen anto yom subtʼañob. Tajol wolʌch lac chaʼlen wersa lac ñumen melben i yeʼtel Jehová pero mach cheʼic miʼ loqʼuel bajcheʼ ñaʼtʌbil lac chaʼan. Tajol woli lac ñumen chaʼlen subtʼan pero maʼañic lac estudiante o woliyonla ti coltaya ti jumpʼejl construcción pero mi lac taj wocol. O an jumpʼejl lac meta pero maʼañic woliʼ tsʼʌctiyel yilal. Tiʼ caj pejtelel iliyi tajol mi lac ñaʼtan chaʼan Jehová maʼañic woliʼ coltañonla o mach tijicñayic yicʼotonla.

10. ¿Chuqui ti melbalʌl mi caj lac pʌs cheʼ mach la cujilic bajcheʼ mi caj i coltañonla Jehová?

¹⁰ Cheʼ mach la cujilic bajcheʼ mi caj i coltañonla Jehová miʼ yʌcʼ chaʼan mi lac pʌs lac pecʼlel. Miʼ cʼajtesʌbeñonla chaʼan mach lajalic lac ñaʼtʌbal bajcheʼ i chaʼan (Is. 55:​8, 9). Cheʼ jaʼel, mi caj lac ñop chaʼan ñumen wen mi caj i loqʼuel chuqui mi lac mel cheʼ mucʼʌch lac sʌclan laj coltʌntel tiʼ tojlel. Mi wolʌch lac tajben i wenlel lac subtʼan o tijicña woli lac ñusan ti jumpʼejl proyecto, yomʌch mi la cʌqʼuen wocolix i yʌlʌ Jehová (Sal. 127:1; 1 Cor. 3:7). Pero mi mach cheʼic miʼ loqʼuel bajcheʼ ñaʼtʌbil lac chaʼan yom mi laj cʼajtesan chaʼan Jehová wolʌch i qʼuel chuqui woli lac mel (Is. 26:12). Jin chaʼan, laʼ lac mel baqui jaxʌl mi lac mejlel i jiñi yan tac bʌ jiñix Jehová mi caj i mel. Anquese maʼañic mi caj i waʼ mel jumpʼejl milagro chaʼan miʼ pʌsbeñonla chuqui yom mi lac mel bajcheʼ tsiʼ mele ti wajali, mucʼʌch lac ñop chaʼan mi caj i coltañonla cheʼ i cʼʌjñibal lac chaʼan (Hech. 16:​6-10).

11. ¿Chuqui la cujil bʌ tiʼ tojlel Jehová?

¹¹ Cheʼ mi laj cʼajtesan jiñi la cujil bʌ miʼ mejlel i coltañonla. ¿I chuqui jiñi la cujil bʌ? Chaʼan Jehová miʼ cʼuxbiñonla, miʼ mel chuqui toj yicʼot wen an i ñaʼtʌbal. Cheʼ jaʼel, la cujil chaʼan miʼ qʼuel ti ñuc cheʼ mi lac melben i yeʼtel yicʼot cheʼ mi laj coltan jiñi hermanojob, i chaʼan mi caj i yʌqʼuen i majtan jiñi muʼ bʌ i pʌs i xucʼtʌlel tiʼ tojlel (Heb. 11:6).

MACH LA CUJILIC CHUQUI MI CAJ I YUJTEL IJCʼɅL

12. Cheʼ bajcheʼ miʼ yʌl Santiago 4:​13, 14, ¿chuqui jiñi mach bʌ la cujilic?

¹² (Pejcan Santiago 4:​13, 14). Mach la cujilic chuqui miʼ mejlel ti ujtel ti lac tojlel ijcʼʌl. Ti lac pejtelel miʼ mejlel i waʼ tajonla wocol (Ec. 9:​11, TNM). Jin chaʼan, maʼañic miʼ mejlel lac ñaʼtan mi muqʼuixto caj lac tsʼʌctesan jiñi ñaʼtʌbil bʌ lac chaʼan lac mel.

13. ¿Chucoch wocolʌch cheʼ mach la cujilic chuqui miʼ mejlel ti ujtel ijcʼʌl?

¹³ Wocolʌch cheʼ mach la cujilic chuqui miʼ mejlel ti ujtel ijcʼʌl. Tajol mi lac tech lac toʼol ñaʼtan chuqui miʼ mejlel ti ujtel ti lac tojlel i jiñi miʼ chilbeñonla lac tijicñʌyel. O cheʼ bʌ miʼ waʼ qʼuextʌyel laj cuxtʌlel o miʼ tajonla jumpʼejl wocol miʼ mejlel i ticʼlañonla. O cheʼ maʼañic miʼ tsʼʌctiyel junchajp ñaʼtʌbil bʌ lac chaʼan lac mel tajol miʼ yʌqʼueñonla lac ñaʼtan chaʼan maʼañix laj cʼʌjñibal (Pr. 13:12).

14. ¿Baqui cʌyʌl jiñi lac tijicñʌyel? (Qʼuele jaʼel jiñi foto tac).

¹⁴ Mach yʌlʌyic chuqui ti wocol mi lac ñusan, mi lac melben i yeʼtel Jehová come mi laj cʼuxbin. Yaʼ ti Biblia mi lac taj relato tac muʼ bʌ i pʌs chaʼan mach yomic mi lac pijtan chaʼan Jehová mi caj i cʌntañonla chaʼan maʼañic miʼ tajonla wocol tac i chaʼan maʼañic miʼ wʌn al chuqui mi caj i yujtel ti lac tojlel. Jehová yujil chaʼan tijicña mi lac mejlel ti ajñel anquese mach la cujil chuqui mi caj i yujtel ti lac tojlel. Jiñi lac tijicñʌyel yaʼʌch cʌyʌl cheʼ mi laj cʼajtiben i coltaya yicʼot cheʼ mi lac jacʼben i tʼan (Jer. 10:23). Cheʼ bʌ mi lac chʼʌm ti ñuc Jehová cheʼ an chuqui mi caj lac mel lajal bajcheʼ woli la cʌl: «Mi cheʼ yom Jehová, cuxul mi caj la cajñel, mi caj lac mel iliyi i mi caj lac mel ili yambʌ» (Sant. 4:15).

15. ¿Chuqui jiñi la cujil bʌ chaʼan ti talto bʌ qʼuin?

¹⁵ Anquese mach la cujilic chuqui mi caj i yujtel ijcʼʌl, la cujil bʌ jiñʌch chaʼan Jehová an i subeyonla chaʼan mi lac mejlel ti chumtʌl tiʼ pejtelel ora. Jehová mach yujilic lot i maʼañic chuqui miʼ mejlel i mʌctan chaʼan miʼ tsʼʌctesan i tʼan (Tito 1:2). Cojach jin miʼ mejlel i yʌl: «Joñon mic wʌn sub i yujtibal [ . . . ]. Ti oñiyi tsac wʌn tsictesa jini maxto bʌ anic woli ti ujtel». Pejtelel tsaʼ bʌ i yʌlʌ Jehová ti wajali tsaʼʌch tsʼʌctiyi i mucʼʌch caj i tsʼʌctiyel jaʼel jiñi albil bʌ i chaʼan chaʼan ti talto bʌ qʼuin (Is. 46:10). La cujil chaʼan Jehová maʼañic chuqui miʼ mejlel i mʌctan chaʼan miʼ cʼuxbiñonla (Rom. 8:​35-39). Mi caj i subeñonla chuqui yom mi lac mel, mi caj i ñuqʼuesan lac pusicʼal i mi caj i yʌqʼueñonla lac pʼʌtʌlel chaʼan mi lac lʌtʼ chuqui jach miʼ yujtel ti lac tojlel. Mi lac ñop chaʼan Jehová mucʼʌch caj i coltañonla i chaʼan mi caj i yʌqʼueñonla i bendición (Jer. 17:​7, 8).

MAʼAÑIC MI LAC WEN ÑAʼTAN BAJCHEʼ CʼAMEL I CɅÑɅYONLA JEHOVÁ

16. ¿Chuqui yujil bʌ Jehová ti lac tojlel? (Salmo 139:​1-6).

¹⁶ (Pejcan Salmo 139:​1-6). Jehová wen i cʌñʌyonla, yujil chuqui mi lac ñaʼtan, chuqui mi la cʌl, chuqui mi lac mel yicʼot bajcheʼ yubil mi la cubin lac bʌ. Jiñi rey David tsiʼ yʌlʌ chaʼan Jehová miʼ cʌntañonla yicʼot miʼ coltañonla. ¿Bajcheʼ yubil maʼ wubin cheʼ wen i cʌñʌyet jiñi Dios mach bʌ añic i pʼisol i pʼʌtʌlel? Tajol cheʼ maʼ wubin a bʌ bajcheʼ tsiʼ yʌlʌ David: «Maʼanic i pʼisol j coltʌntel. Mach mejlic c laj cʌn. Wen ñuc, mach mejlic c chʼʌmben isujm» (Sal. 139:6).

17. ¿Chucoch an i tajol wocol mi lac ñop chaʼan Jehová wen i cʌñʌyonla?

¹⁷ Tiʼ caj bajcheʼ tsaʼ coliyonla, laj cultura o jiñi lac ñopbal baqui tsaʼ loqʼuiyonla tajol wocol mi la cubin chaʼan mi lac ñop chaʼan Jehová miʼ cʼuxbiñonla yicʼot chaʼan miʼ qʼuelonla ti ñuc. O tajol muʼto i bej ticʼlañonla jiñi mach bʌ weñic tsaʼ lac mele ti wajali i miʼ yʌqʼueñonla lac ñaʼtan chaʼan Jehová mach yomix i qʼuelonla, cheʼʌch bajcheʼ tsaʼ ujti tiʼ tojlel David (Sal. 38:​18, 21). O tajol juntiquil woli bʌ i chaʼlen wersa i qʼuextan i melbal (chaʼlibal) chaʼan miʼ mel chuqui miʼ mulan Dios miʼ cʼajtiben i bʌ: «Mi Dios wen i cʌñʌyoñʌch, ¿chucoch miʼ subeñon j cʌy c mel mach bʌ lecojic mij qʼuel?»

18. ¿Chucoch yomʌch mi lac ñop chaʼan Jehová wen i cʌñʌyonla? (Qʼuele jaʼel jiñi foto tac).

¹⁸ Yom mi lac ñop chaʼan Jehová wen i cʌñʌyonla yicʼot chaʼan miʼ qʼuel jiñi wen tac bʌ lac melbal mach bʌ añic mi lac taj laj qʼuel joñonla. Jehová mucʼʌch i qʼuel lac sajtemal pero yujil chucoch cheʼ yilalonla bajcheʼ jiñi i miʼ cʼuxbiñonla (Rom. 7:15). Cheʼ bʌ miʼ cʼotel lac chʼʌmben i sujm chaʼan Jehová yujil chuqui miʼ mejlel lac mel i bajcheʼ miʼ mejlel i cʼʌñonla, miʼ coltañonla chaʼan xucʼul mi la cajñel tiʼ tojlel yicʼot chaʼan mi lac melben i yeʼtel yicʼot lac tijicñʌyel.

19. ¿Chuqui la cujil tiʼ tojlel Jehová?

¹⁹ La cujil chaʼan Jehová miʼ pʌs i cʼuxbiya (1 Juan 4:8). An i yʌqʼueyonla jiñi i Mandar tac come miʼ cʼuxbiñonla i yom chaʼan wen mi la cajñel. Cheʼ jaʼel, yom chaʼan mi lac chumtʌl tiʼ pejtelel ora, jin chaʼan tsiʼ yʌcʼʌ i yalobil chaʼan miʼ toj lac mul. I miʼ mejlel lac ñop chaʼan anquese mi lac taj lac sajtemal mucʼʌch mejlel lac melben i yeʼtel Jehová cheʼ bajcheʼ miʼ mulan come Jesús tsiʼ yʌcʼʌ i cuxtʌlel ti lac tojlel (Rom. 7:​24, 25). I la cujil chaʼan «Dios ñumen ñuc bajcheʼ jiñi lac pusicʼal i laj i cʌñʌ chuqui an» (1 Juan 3:​19, 20). Jehová wen i cʌñʌyonla i miʼ ñop chaʼan mucʼʌch mejlel lac mel chuqui yom.

20. ¿Chuqui mi caj i coltañonla chaʼan maʼañic mi lac pensarin cheʼ an chuqui mach bʌ la cujilic?

²⁰ Cheʼ bajcheʼ tsaʼix laj qʼuele, Jehová miʼ subeñonla chuqui i cʼʌjñibal bʌ lac chaʼan. Jin chaʼan, mach yom mi lac pensarin chuqui jiñi mach bʌ la cujilic, yom bʌ mi lac mel jiñʌch cheʼ mi la cʌcʼ lac ñaʼtʌbal ti jiñi chuqui la cujil bʌ. Cheʼ bajcheʼ jiñi mi lac pʌs chaʼan mi lac ñop ti Jehová, jiñi wen am bʌ i ñaʼtʌbal (Job 36:4). Anquese ili ora cabʌl chuqui mach bʌ la cujilic, la cujil chaʼan Jehová maʼañic baʼ ora mi caj i cʌy i cʌntesañonla i maʼañic baʼ ora mi caj laj cʌy laj cʌn tiʼ tojlel (Ec. 3:11).