I pʼʌtʌlel Jehová mach yujilic jilel

1. ¿Bajcheʼ tsiʼ pʌsʌ Moisés chaʼan tsaʼʌch i ñopo tiʼ tojlel Jehová cheʼ bʌ tsiʼ locʼsa jiñi israelitajob yaʼ ti Egipto?

JIÑI libro chaʼan Hebreos miʼ taj ti tʼan lac piʼʌlob tsaʼ bʌ i pʌsʌyob chaʼan mucʼʌch i ñopob Jehová. Juntiquil jiñʌch Moisés (Heb. 3:​2-5; 11:​23-25). Tsiʼ pʌsʌ bajcheʼ cʼamel miʼ ñop Jehová cheʼ bʌ tsiʼ colta jiñi israelitajob chaʼan miʼ loqʼuelob ti Egipto come maʼañic tsiʼ bʌcʼña faraón yicʼot i soldadojob i tsiʼ cʌnta jiñi tejclum cheʼ bʌ tsaʼ ñumiyob yaʼ ti mar Rojo yicʼot cheʼ bʌ yaʼañob yaʼ ti desierto (Heb. 11:​27-29). Anquese yonlel israelitajob tsiʼ cʌyʌ i ñopob chaʼan Jehová mucʼʌch caj i bej i cʌntañob, Moisés tsaʼʌch i chʌn ñopo. I weñʌch jiñi tsaʼ bʌ i mele come jiñʌch Jehová tsaʼ bʌ i yʌqʼueyob i yaʼal yicʼot chuqui miʼ cʼuxob yaʼ ti desierto (Éx. 15:​22-25; Sal. 78:​23-25).a

2. ¿Chucoch Jehová tsiʼ melbe Moisés jiñi cʼajtiya muʼ bʌ lac taj ti Números 11:​21-23?

² Cheʼ bʌ ñumeñix cheʼ bʌ jumpʼejl jab i loqʼuelob jiñi israelitajob yaʼ ti Egipto, Jehová tsiʼ yʌlʌ chaʼan mi caj i yʌqʼueñob weʼel. Anquese Moisés mucʼʌch i wen ñop Jehová, ili ora maʼañic tsiʼ wen ñopo jiñi tsaʼ bʌ i yʌlʌ come yujil chaʼan yonlel lac piʼʌlob i maʼañic miʼ ñaʼtan bajcheʼ mi caj i mel (chaʼlen) Jehová chaʼan miʼ tajbeñob cabʌl weʼel. Jin chaʼan, Jehová tsiʼ cʼajtibe: «¿Tsaʼix ba jili c pʼʌtʌlel?» (pejcan Números 11:​21-23). Ili texto ti hebreo miʼ yʌl «i cʼʌb Jehová» i jin miʼ taj ti tʼan jiñi chʼujul bʌ i yespíritu muʼ bʌ i cʼʌn chaʼan miʼ mel chuqui yom bʌ. Lajal bajcheʼ Jehová tiʼ sube Moisés: «¿Mach ba añic miʼ mejlel c mel maʼ wʌl jiñi muʼ bʌ cʌl?».

3. ¿Chucoch yomʌch mi lac tsajin tsaʼ bʌ ujti tiʼ tojlel Moisés yicʼot jiñi israelitajob?

³ ¿Am ba a cʼajtibe a bʌ jaʼel mi Jehová mucʼʌch caj i yʌqʼueñet chuqui i cʼʌjñibal a chaʼan a wicʼot a familia? Tajol añʌch a cʼajtibe a bʌ o maʼañic, pero mi caj laj qʼuelben i yejemplo Moisés yicʼot jiñi israelitajob, tsaʼ bʌ i cʌyʌ i ñopob chaʼan Jehová mi caj i mejlel i bej cʌntañob. Mi caj laj qʼuel jaʼel texto tac muʼ bʌ caj i coltañonla lac ñumen ñop chaʼan Jehová maʼañic chuqui miʼ mejlel i mʌctan chaʼan miʼ coltañonla.

MUʼ BɅ LAJ CɅN TIʼ TOJLEL MOISÉS YICʼOT JIÑI ISRAELITAJOB

4. ¿Chucoch cabʌl israelitajob tsaʼ caji i ñaʼtañob chaʼan Jehová maʼañix mi caj i mejlel i cʌntañob?

⁴ ¿Chucoch cabʌl israelitajob tsaʼ caji i ñaʼtañob chaʼan Jehová maʼañix mi caj i mejlel i cʌntañob? Jiñi israelitajob yicʼot yonlel mach bʌ israelitajob tsaʼ loqʼuiyob ti Egipto i añix ora i cajelob ti xʌmbal yaʼ ti desierto chaʼan miʼ cʼotelob yaʼ ti lum tsaʼ bʌ i subeyob Jehová (Éx. 12:38; Dt. 8:15). Jiñi mach bʌ israelitajobic tsaʼ cʼojyiyob i cʼux jiñi maná i tsaʼix cajiyob ti michʼ, i cabʌl israelitajob cheʼix tsaʼ caji i melob jaʼel (Nm. 11:​4-6). Tsaʼ caji i wen cʼajtesañob tsaʼ tac bʌ i cʼuxuyob ti Egipto. I tiʼ caj bajcheʼix yilal jiñi lac piʼʌlob, Moisés tsaʼix caji i ñaʼtan chaʼan jin an tiʼ wenta chaʼan miʼ yʌqʼueñob weʼel (Nm. 11:​13, 14).

5, 6. ¿Chuqui tsaʼ bʌ caji i ticʼlan jiñi israelitajob, i chuqui miʼ pʌsbeñonla jiñi?

⁵ Jiñi mach bʌ israelitajobic maʼañic tsiʼ qʼueleyob ti ñuc chuqui tac tsiʼ yʌqʼueyob Jehová, i cheʼix tsaʼ caji i melob jaʼel jiñi israelitajob. Joñonla jaʼel miʼ mejlel lac toy bajcheʼ yilal lac piʼʌlob ili ora, i tiʼ caj jiñi mach tijicñayoñixla chaʼan chuqui tac miʼ lon aqʼueñonla Jehová. Tajol mi lac tech lac ñaʼtan chuqui tac an lac chaʼan ti ñaxan o mi lac mulan chuqui an i chaʼan yañoʼ bʌ. Pero ñumen tijicña mi caj la cubin mi jasʌlʌch mi la cubin chuqui an lac chaʼan.

⁶ Jiñi israelitajob i wentʌlel tsiʼ cʼajtesayob jiñi tsaʼ bʌ i subeyob Jehová. Tiʼ subeyob chaʼan cabʌl chuqui tac wem bʌ mi caj i yʌqʼueñob cheʼ bʌ miʼ cʼotelob yaʼ ti lum tsaʼ bʌ i subeyob, mach jiñic cheʼ bʌ woliyobto (choncolobto) ti xʌmbal yaʼ ti desierto. Ili ora jaʼel, joñonla mach yaʼic yom mi la cʌcʼ lac ñaʼtʌbal ti chuqui tac mach bʌ añic lac chaʼan. Yom mi lac wen ñaʼtan jiñi albil tac bʌ i chaʼan Jehová chaʼan mi caj i yʌqʼueñonla yaʼ ti tsijiʼ bʌ pañimil yicʼot mi lac ñaʼtan texto tac muʼ bʌ i coltañonla chaʼan mi lac ñumen ñop tiʼ tojlel.

7. ¿Chucoch miʼ mejlel lac ñop chaʼan Jehová mucʼʌch i mejlel i coltañonla tiʼ pejtelel ora?

⁷ Tajol mi laj cʼajtiben lac bʌ chucoch Jehová tiʼ sube Moisés: «¿Tsaʼix ba jili c pʼʌtʌlel?». Tajol yom i coltan i ñaʼtan chaʼan maʼañic baʼ ora miʼ jilel i pʼʌtʌlel yicʼot chaʼan baqui jach miʼ mejlel ti cʼotel. Jin chaʼan, muʼto i mejlel i yʌqʼuen bajcheʼ cʼamel weʼel jiñi israelitajob anquese añob ti desierto. «Ti pʼʌtʌl bʌ i cʼʌb», Jehová tsiʼ pʌsʌ chaʼan miʼ mejlel i coltan i tejclum baqui jach an (Sal. 136:​11, 12). Jin chaʼan, cheʼ bʌ mi lac ñusan jumpʼejl wocol miʼ mejlel lac ñop chaʼan Jehová mi caj i mejlel i coltañonla baqui jach añonla (Sal. 138:​6, 7).

8. ¿Chuqui yom mi lac mel chaʼan mach cheʼic mi la cujtel bajcheʼ jiñi israelitajob? (Qʼuele jaʼel jiñi dibujo).

⁸ Jehová tsaʼʌch i tsʼʌctesa i tʼan i tsiʼ choco cʼotel yonlel xculucap chaʼan jiñi israelitajob miʼ cʼuxob weʼel. Pero maʼañic tsaʼ cʼajtiyi i chaʼañob i yʌqʼuen wocolix i yʌlʌ. Jin jach tsiʼ ñaʼtayob chuqui yomob i jumpʼejlto qʼuin yicʼot ojlil tsiʼ tempañob xculucap. Jin chaʼan, Jehová tsaʼ michʼa yicʼotob i tsiʼ yʌqʼueyob i toj i mul. (Nm. 11:​31-34). ¿Chuqui mi laj cʌn? Chaʼan yom mi laj cʌntan lac bʌ chaʼan mach jin jach mi lac ñaʼtan chuqui la com. Mach yʌlʌ mi ricojonla o pobrejonla, ñumen ñuc bʌ i cʼʌjñibal yom ti lac tojlel jiñʌch cheʼ lʌcʼʌl añonla tiʼ tojlel Jehová yicʼot Jesús, i mi lac tempan lac chubʌʼan yaʼ ti panchan (Mat. 6:​19, 20; Luc. 16:9). Mi mucʼʌch lac mel iliyi, Jehová mi caj i yʌqʼueñonla chuqui i cʼʌjñibal lac chaʼan.

9. ¿Chuqui jiñi muʼ bʌ i mejlel lac ñop?

⁹ Ili ora, Jehová bej yomʌch i coltañonla. Pero jiñi mach yomic i yʌl chaʼan maʼañic baʼ ora mi caj i jilel lac taqʼuin o i bʌl lac ñʌcʼ.b Pero mucʼʌch i mejlel lac ñop chaʼan Jehová maʼañic baʼ ora mi caj i cʌyonla yicʼot mi caj i yʌqʼueñonla lac pʼʌtʌlel chaʼan mi lac lʌtʼ baqui jach bʌ wocol. Mi caj laj qʼuel chaʼchajp baqui miʼ mejlel lac pʌs chaʼan mucʼʌch lac ñop chaʼan Jehová mi caj i cʌntañonla: Cheʼ bʌ maʼañic lac taqʼuin yicʼot cheʼ bʌ mi lac chajpan bajcheʼ mi caj lac taj chuqui la com cheʼ bʌ ñoxoñixla.

CHEʼ BɅ MAʼAÑIC LAC TAQʼUIN

10. ¿Chucoch an i tajol wocol mi caj la cubin chaʼan mi lac taj taqʼuin?

¹⁰ Cheʼ bajcheʼ woli (yʌquel) i ñumen lʌcʼtiyel tilel i jilibal ili pañimil, tajol ñumen wocolix mi caj la cubin chaʼan mi lac taj taqʼuin. Tajol mi lac sʌt la queʼtel (troñel), chuqui tac an lac chaʼan o la cotot tiʼ caj jiñi wocol tac chaʼan bʌ política, jiñi guerra tac, icʼ jaʼal, yujquel o yan tac bʌ cʼamʌjel muʼ bʌ i pam pujquel. Jin mecu chaʼan, tajol yomix mi lac sʌclan yambʌ la queʼtel yaʼ ti lac lumal o mi lac ñaʼtan chaʼan muqʼuix lac majlel la quicʼot lac familia ti yambʌ tejclum baqui miʼ mejlel lac taj chuqui i cʼʌjñibal lac chaʼan. ¿Chuqui miʼ mejlel i coltañonla lac chʼʌm jumpʼejl decisión muʼ bʌ i pʌs chaʼan mucʼʌch lac ñop chaʼan Jehová mi caj i coltañonla?

11. ¿Chuqui miʼ mejlel i coltañonla mi woli lac ñusan wocol tiʼ caj taqʼuin? (Lucas 12:​29-31).

¹¹ Junchajp wen ñuc bʌ i cʼʌjñibal muʼ bʌ i mejlel i coltañonla jiñʌch cheʼ mi lac suben Jehová chuqui mi lac pensarin (Pr. 16:3). Yom mi laj cʼajtiben lac ñaʼtʌbal chaʼan mi lac chʼʌm jumpʼejl wem bʌ decisión yicʼot chaʼan miʼ yʌqʼueñonla lac ñʌchʼtʌlel i maʼañic mi laj cʌlʌx chaʼlen pensar (pejcan Lucas 12:​29-31). Laʼ lac suben chaʼan miʼ yʌqʼueñonla la cubin lac tijicñʌyel chaʼan jiñi an tac bʌ lac chaʼan (1 Tim. 6:​7, 8). Laʼ lac sʌclan ti lac publicación tac chuqui miʼ mejlel lac mel chaʼan miʼ mejlel lac ñusan majlel jiñi wocol chaʼan bʌ taqʼuin. Cheʼ jaʼel, ti jw.org an video tac yicʼot tema tac muʼ bʌ i taj ti tʼan iliyi i an i colta cabʌlob.

12. ¿Chuqui ti cʼajtiya tac miʼ mejlel i coltan juntiquil xñoptʼan chaʼan miʼ chʼʌm jumpʼejl decisión muʼ bʌ i coltan i familia?

¹² An am bʌ i jacʼʌyob majlel ti eʼtel ti ñajt, pero ti wiʼil tsiʼ qʼueleyob chaʼan mach weñic cheʼ tsiʼ cʌyʌyob i familia. Jin chaʼan mi woli a ñaʼtan a chʼʌm jumpʼejl tsijiʼ bʌ a weʼtel, wen ñaʼtan bajcheʼ mi caj i ticʼlañet ti bajcheʼ añet a wicʼot Jehová i mach jin jach maʼ ñaʼtan jiñi taqʼuin muʼ bʌ caj a taj (Luc. 14:28). Cʼajtiben a bʌ: «¿Bajcheʼ mi caj i ticʼlañon tic ñujpuñel cheʼ ñajt añon tiʼ tojlel c ñoxiʼal o quijñam? ¿Mucʼʌch ba caj c mejlel ti majlel tiʼ pejtelel tempa bʌ, ti subtʼan o chaʼan mi cajñel quicʼot jiñi hermanojob?». I mi añix a walobil yom maʼ melben a bʌ jaʼel ili yambʌ cʼajtiya: «¿Bajcheʼ mi caj i mejlel j cʌntesan jiñi calobil tiʼ chaʼan bʌ Jehová mi mach yaʼic añon quicʼot?» (Efes. 6:4). Cheʼ bʌ mi caj a chʼʌm jumpʼejl decisión chʼʌmʌ ti ñuc chuqui yom bʌ Jehová, i mach jiñic chuqui miʼ subeñet jiñi a familia o a wamigojob.c Tony, chumul bʌ ti Asia, tsaʼ subenti wen tac bʌ eʼtel ti yambʌ país. Pero ñaxan tsiʼ mele oración yicʼot tsiʼ chaʼle tʼan yicʼot i yijñam i maʼañic tsiʼ jacʼʌ jiñi eʼtel, tsiʼ chaʼle wersa chaʼan maʼañic jaypʼejl taqʼuin miʼ cʼʌñob. ¿Chuqui ti wenlel an i taja Tony? Miʼ yʌl: «Mejlem j coltan cabʌlob chaʼan miʼ cʌñob i sujmlel yicʼot chaʼan jiñi calobilob miʼ cʼuxbiñob Jehová. Tsaʼ j cʌñʌ lojon chaʼan Jehová miʼ cʌntañonla mi mucʼʌch lac jacʼ muʼ bʌ i yʌl Mateo 6:33».

CHEʼ BɅ MI LAC ÑAʼTAN BAJCHEʼ MI CAJ LAC TAJ TAQʼUIN CHEʼ BɅ ÑOXOÑIXLA

13. ¿Chuqui miʼ mejlel lac mel ili ora chaʼan tsʼitaʼ añixto chuqui an lac chaʼan ti talto bʌ qʼuin?

¹³ Mi mejlel lac pʌs jaʼel bajcheʼ cʼamel mi lac ñop tiʼ tojlel Jehová cheʼ bʌ mi lac chajpan chuqui mi caj lac mel cheʼ bʌ ñoxoñixla. Jiñi Biblia miʼ subeñonla chaʼan yomʌch mi lac chaʼlen tsʌts bʌ eʼtel chaʼan añixto chuqui an lac chaʼan ti talto bʌ qʼuin (Pr. 6:​6-11). Mi mucʼʌch i mejlel, yomʌch mi lac tsʼitaʼ lot majlel lac taqʼuin. Anquese i sujmʌch chaʼan jiñi taqʼuin mucʼʌch i coltañonla, mach jiñic la com bʌ lac ñumen acʼ ti ñuc (Ec. 7:​11, 12).

14. ¿Bajcheʼ miʼ coltañonla Hebreos 13:5 cheʼ bʌ woli lac chajpan chuqui mi lac mel cheʼ bʌ ñoxoñixla?

¹⁴ Jesús tsiʼ cʼʌñʌ jumpʼejl lajiya chaʼan miʼ tsictesan chaʼan maʼañic i cʼʌjñibal cheʼ juntiquil cabʌl chuqui an i chaʼan «pero pʼumpʼun tiʼ wut Dios» (Luc. 12:​16-21). Mach la cujilic chuqui miʼ mejlel ti waʼ ujtel (Pr. 23:​4, 5; Sant. 4:​13-15). Cheʼ jaʼel, Jesús tsiʼ yʌlʌ chaʼan jiñi yomoʼ bʌ i tsajcan yom miʼ cʌyob chuqui tac añob i chaʼan (Luc. 14:33). Jiñʌch tsaʼ bʌ i meleyob jiñi xñoptʼañob ti Judea ti wajali, i yicʼotob i tijicñʌyel tsiʼ meleyob (Heb. 10:34). Ili ora, cabʌl hermanojob an i sʌtʌyob i yeʼtel o chuqui tac añob i chaʼan tiʼ caj maʼañic miʼ yotsañob i bʌ ti política (Apoc. 13:​16, 17). Miʼ pʌsob chaʼan mucʼʌch i ñopob ili albil bʌ i chaʼan Jehová: «Maʼañic baʼ ora mi caj j cʌyet i maʼañic baʼ ora mi caj j cʌy j coltañet» (pejcan Hebreos 13:5). Mucʼʌch lac chaʼlen wersa chaʼan mi lac mero chajpan majlel lac bʌ chaʼan baʼ ora ñoxoñixla i mi lac ñop jaʼel chaʼan Jehová mi caj i coltañonla mi tsaʼ waʼ ujti mach bʌ pijtʌbilic lac chaʼan.

15. ¿Chuqui mach bʌ yomic miʼ ñaʼtañob jiñi tatʌlob tiʼ tojlel i yalobilob? (Qʼuele jaʼel jiñi foto).

¹⁵ An lac piʼʌlob añoʼ bʌ i yalobil chaʼan jach yomob chaʼan jiñix miʼ chaʼleñob eʼtel i miʼ yʌqʼueñob taqʼuin cheʼ bʌ ñoxobix. Pero jiñi Biblia miʼ yʌl chaʼan jiñʌch jiñi tatʌl yom bʌ miʼ yʌqʼueñob chuqui i cʼʌjñibal i chaʼan i yalobilob (2 Cor. 12:14). I sujmʌch chaʼan cheʼ bʌ jiñi tatʌlob ñoxobix tajol jiñi i yalobilob yomix miʼ tsʼitaʼ coltañob ti taqʼuin o miʼ sʌclañob bajcheʼ tac yambʌ miʼ mejlel i coltañob, i tijicña miʼ melob jiñi i yalobilob (1 Tim. 5:4). Pero muʼ bʌ i ñumen aqʼuen i tijicñʌyel juntiquil tatʌl xñoptʼan bʌ jiñʌch cheʼ miʼ coltan i yalobilob chaʼan miʼ melben i yeʼtel Jehová, i mach jiñic cheʼ miʼ cosan chaʼan jiñix miʼ yʌqʼuen taqʼuin cheʼ bʌ ñoxix (3 Juan 4).

16. ¿Bajcheʼ miʼ mejlel i coltañob i yalobil jiñi tatʌlob chaʼan miʼ cʌñob bajcheʼ miʼ mejlel i mʌcʼlañob i bʌ cheʼ bʌ ñucobix? (Efesios 4:28).

¹⁶ Tatʌlob, cheʼ bʌ mi laʼ coltan laʼ walobilob chaʼan miʼ cʌñob bajcheʼ miʼ mejlel i mʌcʼlañob i bʌ cheʼ bʌ ñucobix, aqʼuenla wem bʌ ejemplo i pʌsbenla chaʼan yomʌch miʼ ñopob chaʼan Jehová mi caj i coltañob. Cʼʌlʌl cheʼ bʌ alʌlobto yom maʼ pʌsbeñob chaʼan ñucʌch i cʼʌjñibal cheʼ miʼ chaʼleñob tsʌts bʌ eʼtel (Pr. 29:21; pejcan Efesios 4:28). Coltañob chaʼan miʼ chaʼleñob wersa yaʼ ti escuela. Yaʼ ti lac publicación tac miʼ mejlel laʼ sʌclan ticʼojel tac muʼ bʌ i mejlel a cʼʌn laʼ coltan laʼ walobilob chaʼan miʼ ñaʼtañob mi yomto miʼ bej chaʼleñob clase. Yom bʌ mi laʼ mel jiñʌch mi laʼ coltan laʼ walobilob chaʼan miʼ mejlel i tajob jumpʼejl eʼtel muʼ bʌ i coltañob chaʼan miʼ mejlel i mʌcʼlañob i bʌ yicʼot muʼ bʌ i yʌqʼueñob i yorajlel chaʼan miʼ chaʼleñob subtʼan o chaʼan miʼ sujtelob ti precursor.

17. ¿Chuqui jiñi muʼ bʌ lac ñop?

¹⁷ I wiñiconbʌla Jehová mi lac ñop chaʼan yomʌch i yʌqʼueñonla chuqui i cʼʌjñibal lac chaʼan i mucʼʌch i mejlel i mel. Cheʼ bʌ woliʼ ñumen lʌcʼtiyel tilel i jilibal ili pañimil (mulawil) yom mi caj lac ñumen pʌs bajcheʼ cʼamel mi lac ñop tiʼ tojlel Jehová. Pero mach yʌlʌ chuqui miʼ yujtel, laʼ lac ñop chaʼan Jehová mi caj i cʼʌn i pʼʌtʌlel chaʼan miʼ yʌqʼueñonla chuqui i cʼʌjñibal lac chaʼan. La cujil chaʼan i pʼʌtʌlel maʼañic i jilibal i jin jach baqui miʼ mejlel ti cʼotel.