¿Bajcheʼ miʼ mejlel a coltan jiñi a westudiante chaʼan miʼ melben i yeʼtel Jehová?

1, 2. a) ¿Chucoch an estudiantejob muʼ bʌ i bʌcʼñañob sujtel tiʼ testigo Jehová? b) ¿Chuqui mi caj laj qʼuel ti ili estudio?

CHEʼ bʌ woli (choncol) a ñaʼtan sujtel tiʼ testigo Jehová tajol tsaʼ bʌcʼña chaʼan jiñi a piʼʌlob ti eʼtel, a wamigojob o jiñi a familia miʼ tech i tsʼaʼleñetob. O tajol tsaʼ caji a ñaʼtan chaʼan maʼañic mi caj i mejlel a tsʼʌctesan jiñi i mandar tac Jehová. Mi cheʼ tsaʼ ujtiyet bajcheʼ jiñi, mi caj a chʼʌmben i sujm chucoch juntiquil estudiante wocol woliʼ yubin chaʼan miʼ sujtel tiʼ testigo Jehová.

² Jesús yujil chaʼan jiñi lac bʌqʼuen miʼ mejlel i mʌctañonla chaʼan mi lac melben i yeʼtel Jehová (Mat. 13:​20-22). Pero maʼañic tsiʼ cʌyʌ i coltan jiñi wocol bʌ miʼ yubiñob chaʼan miʼ sujtelob ti xcʌntʼan i chaʼan. Mi cheʼʌch mi lac mel cheʼ bajcheʼ tsiʼ mele Jesús, mi caj i mejlel laj coltan jiñi estudiante chaʼan 1) miʼ qʼuel chuqui woli (yʌquel) i mʌctan chaʼan miʼ melben i yeʼtel Jehová, 2) chaʼan miʼ ñumen cʼuxbin Jehová, 3) chaʼan miʼ qʼuel chuqui jiñi ñumen ñuc bʌ i cʼʌjñibal i 4) chaʼan miʼ lʌtʼ jiñi contrajintel. ¿Bajcheʼ miʼ mejlel lac lajin Jesús cheʼ mi laj cʼʌn jiñi libro Ubin a tijicñʌyel chaʼan mi laj coltan juntiquil estudiante chaʼan miʼ sujtel tiʼ testigo Jehová?

COLTAN I QʼUEL CHUQUI WOLIʼ MɅCTAN CHAʼAN MIʼ MELBEN I YEʼTEL JEHOVÁ

3. ¿Chucoch wocol tsiʼ yubi Nicodemo chaʼan miʼ sujtel ti xcʌntʼan i chaʼan Jesús?

³ Nicodemo juntiquilʌch wen ñuc bʌ i yeʼtel, pero añʌch chuqui tsiʼ mʌcta chaʼan miʼ sujtel ti xcʌntʼan i chaʼan Jesús. Cheʼ bʌ Jesús an jaxto 6 uw i cajel ti subtʼan, Nicodemo tsiʼ cʌñʌ chaʼan jiñʌch jiñi Mesías (Juan 3:​1, 2). Anquese yujilix chaʼan jiñʌch jiñi Mesías mucul jach tsaʼ majli i pejcan come «miʼ bʌcʼñañob jiñi judíojob» (Juan 7:13; 12:42). Tajol tsiʼ ñaʼta chaʼan mi caj i sʌt i yeʼtel mi tsaʼ sujti ti xcʌntʼan.a

4. ¿Chuqui tsiʼ mele Jesús chaʼan miʼ coltan i ñaʼtan Nicodemo chuqui yom bʌ Jehová chaʼan miʼ mel?

⁴ Nicodemo wen i cʌñʌ jiñi Mandar tsaʼ bʌ aqʼuenti Moisés, pero yomʌch miʼ coltʌntel chaʼan miʼ ñaʼtan chuqui yom bʌ Jehová chaʼan miʼ mel, i Jesús jiñʌch tsaʼ bʌ i colta. ¿Bajcheʼ tsiʼ mele? Tsiʼ yʌqʼue i yorajlel chaʼan miʼ chaʼlen tʼan yicʼot anquese acʼʌlelix. Cheʼ jaʼel, tiʼ sube chaʼan mi yom sujtel ti xcʌntʼan i chaʼan yom miʼ chaʼ ñaʼtan i bʌ, miʼ chaʼlen chʼʌmjaʼ i miʼ pʌs chaʼan mucʼʌch i ñop tiʼ tojlel jiñi i yalobil Dios (Juan 3:​5, 14-21).

5. ¿Bajcheʼ miʼ mejlel ti coltʌntel juntiquil estudiante chaʼan miʼ qʼuel mi an chuqui woliʼ mʌctan chaʼan miʼ melben i yeʼtel Jehová?

⁵ Tajol juntiquil estudiante wen i cʌñʌ jiñi Biblia pero yomʌch miʼ coltʌntel chaʼan miʼ qʼuel chuqui woliʼ mʌctan chaʼan miʼ melben i yeʼtel Jehová. Tajol woliʼ wen chaʼlen eʼtel (troñel) o jiñi i familia mach yomic chaʼan miʼ sujtel ti Testigo. ¿Bajcheʼ miʼ mejlel a lajin Jesús? Jiñʌch cheʼ maʼ locʼsʌben i yorajlel chaʼan maʼ wajñel a wicʼot jiñi estudiante. Tajol miʼ mejlel a pʌy ti cʼux waj o maʼ jumucʼ loqʼuel ti xʌmbal a wicʼot. Cheʼ maʼ locʼsʌben i yorajlel chaʼan maʼ wajñel a wicʼot tajol mach wocolic mi caj i yubin chaʼan miʼ yʌl chuqui woli bʌ i ñusan. Cheʼ jiñi coltan i qʼuel chuqui woli bʌ i mʌctan i cʼajtesʌben chaʼan mi tsiʼ melbe i yeʼtel Jehová chaʼañʌch miʼ cʼuxbin i mach chaʼañic woli a suben.

6. ¿Bajcheʼ miʼ mejlel a coltan jiñi estudiante chaʼan miʼ jacʼ jiñi woli bʌ i cʌn majlel ti Biblia? (1 Corintios 16:13).

⁶ Chaʼan jiñi estudiante miʼ jacʼ jiñi mandar tac am bʌ ti Biblia yomʌch miʼ ñop chaʼan Jehová mi caj i coltan i tsʼʌctesan jiñi i mandar tac (pejcan 1 Corintios 16:13). ¿Chuqui miʼ mejlel a mel chaʼan maʼ coltan? Juntiquil wem bʌ maestro mach cojach miʼ suben i yalumno chuqui yom bʌ miʼ mel, miʼ yʌqʼuen i ñop chaʼan mucʼʌch caj i mejlel i tsʼʌctesan chuqui muʼ bʌ i subentel i mel. Cheʼʌch yom maʼ mel jaʼel bajcheʼ ili maestro. Mach cojach maʼ suben jiñi estudiante chuqui yom bʌ Jehová chaʼan miʼ mel, cʼajtesʌben chaʼan Jehová mi caj i coltan i qʼuextan majlel i melbal (chaʼlibal). ¿Chuqui yambʌ miʼ mejlel a mel chaʼan maʼ coltan?

COLTAN JIÑI ESTUDIANTE CHAʼAN MIʼ ÑUMEN CʼUXBIN JEHOVÁ

7. ¿Chuqui tsiʼ mele Jesús chaʼan miʼ coltan jiñi lac piʼʌlob i ñumen cʼuxbiñob Jehová?

⁷ Jesús yujil chaʼan mi jiñi xcʌntʼañob mucʼʌch i cʼuxbiñob Jehová mach wocolic mi caj i yubiñob chaʼan miʼ jacʼbeñob i tʼan. Jin chaʼan tsiʼ coltayob chaʼan miʼ ñumen cʼuxbiñob Jehová. Junchajp bajcheʼ tsiʼ mele jiñʌch cheʼ bʌ tiʼ subeyob chaʼan Jehová lajalʌch bajcheʼ juntiquil tatʌl muʼ bʌ i cʼuxbin i yalobilob (Mat. 7:​9-11). Tajol jiñi yaʼ bʌ añob i ñʌchʼtañob Jesús maʼañic tsaʼ cʼuxbintiyob tiʼ tat. Laʼcu lac ñaʼtan bajcheʼ yubil tsiʼ yubiyob cheʼ bʌ Jesús tsiʼ taja ti tʼan juntiquil tatʌl tsaʼ bʌ i chaʼ otsa tiʼ yotot i yalobil tsaʼ bʌ i mele mach bʌ weñic pero tsaʼix i chaʼ ñaʼta i bʌ. Ili tsiʼ colta jiñi lac piʼʌlob chaʼan miʼ qʼuelob chaʼan Jehová mucʼʌch i cʼuxbiñob i yom i coltañob (Luc. 15:​20-24).

8. ¿Bajcheʼ miʼ mejlel a coltan jiñi estudiante i ñumen cʼuxbin Jehová?

⁸ Miʼ mejlel a coltan jiñi estudiante chaʼan miʼ ñumen cʼuxbin Jehová. Cheʼ bʌ maʼ wʌqʼuen jiñi estudio tajben ti tʼan bajcheʼ yilal Jehová. Coltan i qʼuel chaʼan jiñi woli bʌ i cʌn majlel miʼ pʌsben chaʼan Jehová mucʼʌch i cʼuxbin. I cheʼ bʌ mi laʼ taj ti tʼan chaʼan Jesús tsiʼ yʌcʼʌ i cuxtʌlel chaʼan miʼ toj lac mul, coltan i qʼuel chaʼan jumpʼejlʌch i majtan tsaʼ bʌ i yʌqʼue Jehová (Rom. 5:8; 1 Juan 4:10). Mi jiñi estudiante miʼ chʼʌmben i sujm chaʼan Jehová mucʼʌch i cʼuxbin, tajol mi caj i ñumen cʼuxbin jaʼel (Gál. 2:20).

9. ¿Chuqui tsiʼ colta Michael chaʼan miʼ qʼuextan i melbal?

⁹ Laʼ laj qʼuel tsaʼ bʌ ujti tiʼ tojlel Michael chʼoyol bʌ ti Indonesia. Michael tsiʼ cʌñʌ i sujmlel cheʼ bʌ alobto, pero maʼañic tsiʼ chʼʌmʌ jaʼ. Cheʼ bʌ añix 18 i jabilel tsaʼ majli ti eʼtel ti yambʌ país. Ti wiʼil tsaʼ chaʼ majli ti Indonesia, tsaʼ ñujpuñi i tsaʼ tiliyob i yalobil, pero tsaʼ chaʼ majli ti eʼtel ti yambʌ país i tsiʼ bajñel cʌyʌ i yijñam yicʼot i yalʌ chʼoc. Jiñi i yijñam yicʼot i yalʌ chʼoc tsaʼ cajiyob ti estudio i tsaʼ caji i qʼuextañob i melbal. Cheʼ bʌ Michael tsaʼ chʌmi i mamá, tsaʼ chaʼ majli tiʼ yotot chaʼan miʼ cʌntan i papá i tsaʼ caji ti estudio jaʼel. Jiñi tsaʼ bʌ cʌñʌ ti jiñi sección «Laʼ lac ñumen ñaʼtan» am bʌ ti jiñi cʌntesʌntel 27 ti jiñi libro Ubin a tijicñʌyel tsaʼ wen cʼoti tiʼ pusicʼal. I tsaʼto i chaʼle uqʼuel cheʼ bʌ tsiʼ ñaʼta bajcheʼ yubil tsiʼ yubi Jehová cheʼ bʌ tsaʼ chʌmi i yalobil. Cheʼ bʌ tsiʼ cʌñʌ chaʼan Jehová yicʼot Jesús miʼ wen cʼuxbin tsiʼ colta chaʼan miʼ qʼuextan i melbal yicʼot miʼ chʼʌmjaʼ.

COLTAN JIÑI ESTUDIANTE CHAʼAN MIʼ QʼUEL BAQUI BɅ JIÑI ÑUMEN ÑUC BɅ I CʼɅJÑIBAL

10. ¿Chuqui tsiʼ mele Jesús chaʼan miʼ coltan jiñi xcʌntʼañob chaʼan miʼ ñaʼtañob chuqui jiñi ñumen ñuc bʌ i cʼʌjñibal? (Lucas 5:​5-11; qʼuele jaʼel jiñi dibujo).

¹⁰ Jiñi ñaxam bʌ xcʌntʼañob ti ora tsiʼ cʌñʌyob chaʼan Jesús jiñʌch jiñi Mesías, pero i cʼʌjñibalʌch miʼ coltʌntelob chaʼan miʼ ñaʼtañob chaʼan jiñi ñumen ñuc bʌ i cʼʌjñibal jiñʌch jiñi subtʼan. Pedro yicʼot Andrés bej añix ora cajel i tsajcañob Jesús cheʼ bʌ tsiʼ cʌyʌyob chuqui añob i chaʼan chaʼan miʼ majlelob ti subtʼan yicʼot (Mat. 4:​18, 19). Ili chaʼtiquilob añob i negocio yicʼot Santiago yicʼot Juan, jiñʌch jiñi chuc chʌy (Mar. 1:​16-20). Cheʼ bʌ Pedro yicʼot Andrés «tsiʼ cʌyʌyob i chimoʼchʌy» tajol tsaʼʌch i ñaʼtayob bajcheʼ mi caj i bej cʌntañob i familia. ¿I chuqui tsiʼ coltayob chaʼan miʼ qʼuelob chaʼan jiñi ñumen ñuc bʌ i cʼʌjñibal jiñʌch jiñi subtʼan? Jesús tsiʼ mele jumpʼejl milagro chaʼan miʼ yʌqʼueñob i ñaʼtan chaʼan Jehová mi caj i yʌqʼueñob chuqui i cʼʌjñibal bʌ i chaʼañob (pejcan Lucas 5:​5-11).

11. ¿Chuqui miʼ mejlel a suben jiñi estudiante chaʼan miʼ ñop chaʼan mucʼʌch caj i coltan Jehová?

¹¹ Joñonla mach mejlic lac mel jumpʼejl milagro cheʼ bajcheʼ tsiʼ mele Jesús, pero mucʼʌch i mejlel lac suben jiñi estudiante chaʼan Jehová mi caj i coltan mi ñaxañʌch miʼ yʌcʼ tiʼ cuxtʌlel. Miʼ mejlel a suben bajcheʼ tsiʼ coltayet Jehová cheʼ bʌ tsaʼ caji a tech majlel ti tempa bʌ. Tajol tsaʼ cʌyʌ a weʼtel o an chuqui tac tsaʼ mele chaʼan maʼañic maʼ sʌt jiñi tempa bʌ. Suben jiñi estudiante chaʼan cheʼ bʌ tsaʼ mele jiñi tsaʼ qʼuele bajcheʼ Jehová tsaʼ caji i coltañet i jiñi tsiʼ ñumen lʌcʼtesayet tiʼ tojlel.

12. a) ¿Chucoch weñʌch cheʼ mi lac pʌy majlel yambʌ hermanojob cheʼ miʼ majlel la cʌcʼ estudio? b) ¿Chuqui yambʌ miʼ mejlel a mel chaʼan maʼ coltan jiñi estudiante chaʼan miʼ ñaxan acʼ Jehová tiʼ cuxtʌlel? Acʼʌ jumpʼejl ejemplo.

¹² Yambʌ muʼ bʌ mejlel a mel chaʼan maʼ coltan jiñi estudiante jiñʌch cheʼ maʼ pʌy majlel yambʌ hermanojob cheʼ bʌ miʼ majlel a wʌqʼuen estudio. Jiñi yambʌ hermanojob miʼ mejlel i subeñob bajcheʼ tsiʼ cʌñʌyob i sujmlel yicʼot chuqui tsiʼ meleyob chaʼan miʼ ñumen melbeñob i yeʼtel Jehová. Cheʼ jaʼel, miʼ mejlel a locʼsʌben i yorajlel chaʼan maʼ qʼuel a wicʼot jiñi estudiante jiñi video tac muʼ bʌ i tilel ti jiñi sección «Laʼ lac ñumen ñaʼtan» o «Cʌñʌ yan tac bʌ» am bʌ ti jiñi libro Ubin a tijicñʌyel. Jumpʼejl ejemplo, cheʼ mi laʼ chaʼlen ti estudiar jiñi cʌntesʌntel 37 i mi laʼ qʼuel jiñi video Jehová mi caj i yʌqʼueñonla chuqui la com miʼ mejlel a suben jiñi estudiante chuqui miʼ mejlel i mel chaʼan miʼ ñaxan acʼ Jehová tiʼ cuxtʌlel.

COLTAN JIÑI ESTUDIANTE CHAʼAN MIʼ LɅTʼ JIÑI CONTRAJINTEL

13. ¿Chuqui tsiʼ wʌn sube Jesús jiñi xcʌntʼañob i chaʼan?

¹³ Jesús mach junsujtel jach tiʼ sube jiñi xcʌntʼañob chaʼan mi caj i contrajintelob (Mat. 5:11; 10:​22, 36). Cheʼ bʌ lʌcʼʌlix mi caj i chʌmel tiʼ subeyob chaʼan muʼto i mejlelob ti tsʌnsʌntel (Mat. 24:9; Juan 15:20; 16:2). Cheʼ jaʼel, tiʼ subeyob chaʼan yomʌch miʼ cʌntañob i bʌ i mach yomic miʼ chaʼleñob leto (quera) yicʼot jiñi i contrajob chaʼan miʼ bej mejlelob ti subtʼan.

14. ¿Bajcheʼ miʼ mejlel laj coltan jiñi estudiante chaʼan chajpʌbil miʼ yajñel cheʼ baʼ ora miʼ taj i contrajintel? (2 Timoteo 3:12).

¹⁴ Cheʼ bajcheʼ tsiʼ mele Jesús, joñonla jaʼel miʼ mejlel lac wʌn suben jiñi lac estudiante chaʼan jiñi i piʼʌlob ti eʼtel, i yamigojob yicʼot i familia an chuqui tac mi caj i melob o i yʌlob chaʼan woli ti estudio (pejcan 2 Timoteo 3:12). Tajol jiñi i piʼʌlob ti eʼtel mi caj i wajleñob chaʼan qʼuexelix i melbal. O tajol jiñi i familia maʼañic mi caj i mulañob cheʼ bʌ woli ti estudio, jin chaʼan yomʌch mi lac wʌn suben jiñi estudiante chaʼan mi caj i contrajintel. Cheʼ bajcheʼ jiñi yujilix chuqui mi caj i mel o chuqui mi caj i yʌl cheʼ bʌ miʼ taj i contrajintel.

15. ¿Bajcheʼ miʼ mejlel laj coltan jiñi estudiante mi woliʼ contrajintel tiʼ familia?

¹⁵ Mi jiñi estudiante woliʼ contrajintel tiʼ familia miʼ mejlel a suben chaʼan mach cojaxto woliʼ yujtel jiñi. Jesús cheʼʌch tsiʼ ñusa jaʼel, jiñi i familia maʼañic tsiʼ mulaj chuqui woli bʌ i mel i tsaʼto i subeyob chaʼan tsaʼ sojqui (Mar. 3:21; Juan 7:5). Coltan i ñaʼtan chucoch woliʼ contrajintel, tajol jiñi i familia mach yomic i qʼuelob jiñi i testigojob Jehová o miʼ ñaʼtañob chaʼan woliʼ lotintel. Miʼ mejlel a suben jiñi estudiante chaʼan mach yomic miʼ michʼan yicʼotob i chaʼan wen jach bajcheʼ yom miʼ pejcan jiñi i familia yicʼot yambʌ lac piʼʌlob.

16. ¿Bajcheʼ miʼ mejlel a coltan jiñi estudiante chaʼan wen jach miʼ tsictesʌben i familia jiñi woli bʌ i cʌn majlel?

¹⁶ Mi jiñi estudiante an i familia yom bʌ i ñumen cʌn chuqui miʼ yʌl jiñi Biblia, ñumen wen cheʼ mach ti orajic miʼ laj tsictesʌben chuqui woli bʌ i cʌn majlel. Jin chaʼan miʼ mejlel a suben chaʼan tsʼitaʼ jach chuqui miʼ suben majlel jiñi i familia. Cheʼ bajcheʼ jiñi mucʼʌch caj i bej mulan i ñʌchʼtan ti wiʼil (Col. 4:6). Cheʼ jaʼel, jiñi estudiante miʼ mejlel i suben i familia chaʼan miʼ yochelob ti jiñi sitio jw.org. Yaʼi miʼ mejlel i ñumen tajob información tiʼ tojlel jiñi i testigojob Jehová.

17. ¿Chuqui tac miʼ mejlel a cʼʌn chaʼan jiñi estudiante miʼ cʌn bajcheʼ miʼ mejlel i jacʼ cheʼ bʌ an chuqui miʼ cʼajtibentel chaʼan bʌ jiñi i testigojob Jehová? (Qʼuele jaʼel jiñi foto).

¹⁷ Miʼ mejlel a cʼʌn jiñi sección «Cʼajtiya tac muʼ bʌ i ñumen mejlel tiʼ tojlel i testigojob Jehová» am bʌ ti jw.org chaʼan jiñi estudiante miʼ ñaʼtan chuqui miʼ mejlel i yʌl cheʼ bʌ jiñi i piʼʌlob ti eʼtel o jiñi i familia an chuqui miʼ cʼajtibeñob (2 Tim. 2:​24, 25). Miʼ mejlel a cʼʌn jaʼel jiñi sección «An muʼ bʌ i yʌlob» muʼ bʌ i tilel ti jiñi libro Ubin a tijicñʌyel. Cheʼ jaʼel, miʼ mejlel a suben jiñi estudiante chaʼan miʼ chaʼlen ti ensayar bajcheʼ miʼ mejlel i bajñel tsictesan tiʼ tʼan chuqui ñopol bʌ i chaʼan. Mi tsaʼ qʼuele chaʼan yomto miʼ ñumen weñʼesan miʼ mejlel a suben. Mi mucʼʌch i chaʼlen ti ensayar mach wocolic mi caj i yubin chaʼan miʼ tsictesan chuqui ñopol bʌ i chaʼan.

18. ¿Chuqui miʼ mejlel a mel chaʼan maʼ coltan jiñi estudiante chaʼan miʼ sujtel ti publicador? (Mateo 10:27).

¹⁸ Jesús tiʼ sube jiñi xcʌntʼañob i chaʼan chaʼan miʼ subob jiñi wen tʼan (pejcan Mateo 10:27). Cheʼ bʌ jiñi estudiante miʼ tech loqʼuel ti subtʼan mi caj i qʼuel bajcheʼ Jehová mi caj i coltan i mi caj i ñumen ñop tiʼ tojlel. ¿Bajcheʼ miʼ mejlel a coltan chaʼan miʼ mulan loqʼuel ti subtʼan yicʼot jiñi congregación? Cheʼ bʌ miʼ sujbel chaʼan miʼ cajel jumpʼejl campaña, miʼ mejlel a suben chuqui miʼ mejlel i mel chaʼan miʼ sujtel ti publicador. Suben chaʼan ti jiñi campaña tac mach wen wocolic mi caj i yubin chaʼan miʼ tech i pejcan jiñi lac piʼʌlob. Yambʌ muʼ bʌ mejlel i coltan jiñʌch cheʼ miʼ chaʼlen i bʌ ti matricular chaʼan miʼ ñusan jiñi asignación tac ti jiñi tempa bʌ muʼ bʌ i mejlel ti entre semana. Cheʼ bajcheʼ jiñi mi caj i cʌn i tsictesan ti wen chuqui woli bʌ i cʌn majlel.

COLTAN I QʼUEL JIÑI ESTUDIANTE CHAʼAN MUCʼɅCH MEJLEL I MELBEN I YEʼTEL JEHOVÁ

19. ¿Bajcheʼ tsiʼ pʌsʌ Jesús chaʼan mucʼʌch i ñop chaʼan jiñi xcʌntʼañob i chaʼan yomʌch i melbeñob i yeʼtel Jehová, i bajcheʼ miʼ mejlel lac lajin?

¹⁹ Cheʼ bʌ Jesús muʼto caj i majlel ti panchan tiʼ sube jiñi xcʌntʼañob i chaʼan chaʼan ti jumpʼejl bʌ qʼuin mi caj i chaʼ ajñel yicʼotob. Jiñi xcʌntʼañob maʼañic tsiʼ chʼʌmbeyob i sujm chaʼan woli bʌ i taj ti tʼan Jesús jiñʌch chaʼan mi caj i majlelob ti panchan. Pero Jesús mach jiñic tsiʼ chʼʌmʌ ti ñuc cheʼ bʌ an chuqui maʼañic woliʼ chʼʌmbeñob i sujm (Juan 14:​1-5, 8). Yujil chaʼan yomʌch miʼ ñumel tiempo chaʼan miʼ chʼʌmbeñob i sujm chuqui woli bʌ i taj ti tʼan, tsaʼ bʌ qʼuele ti ñuc jiñʌch chaʼan yomʌch i tsajcañob yicʼot i melbeñob i yeʼtel Jehová (Juan 16:12). Joñonla jaʼel mach yomic mi lac ñaʼtan chaʼan jiñi lac estudiante mach mejlic i melben i yeʼtel Jehová, yomʌch mi la cʌqʼuen i qʼuel chaʼan mucʼʌch i mejlel.

20. ¿Bajcheʼ tsiʼ pʌsʌ juntiquil hermana chaʼan tsaʼʌch i ñopo chaʼan ti jumpʼejl bʌ qʼuin jiñi yestudiante mucʼʌch caj i jacʼ muʼ bʌ i yʌl jiñi Biblia?

²⁰ Yom mi lac ñaʼtan chaʼan jiñi woli bʌ la cʌqʼueñob estudio yomʌch i melob chuqui miʼ mulan Jehová. Laʼcu lac ñaʼtan tsaʼ bʌ ujti tiʼ tojlel juntiquil hermana am bʌ ti Malaui i cʼabaʼ Chifundo. Ili hermana tsaʼ caji i yʌqʼuen estudio juntiquil xchʼoc católica bʌ i cʼabaʼ Alinafe. Cheʼ bʌ tsaʼ cʼotiyob ti jiñi cʌntesʌntel 14 ti jiñi libro Ubin a tijicñʌyel, tsiʼ cʼajtibe i yestudiante bajcheʼ yilal miʼ qʼuel cheʼ bʌ miʼ cʼʌjñel imagen tac chaʼan miʼ chʼujutesʌntel Dios. Alinafe tsaʼ wen michʼa i tsiʼ jacʼʌ: «¡Añix tic wenta mi com j cʼʌn imagen o maʼañic!». Chifundo tsiʼ ñaʼta chaʼan jiñi yestudiante mi caj i cʌy jiñi estudio. Pero maʼañic tsiʼ cʌyʌ i julaʼtan come tsiʼ ñaʼta chaʼan ti jumpʼejl bʌ qʼuin mi caj i chʼʌmben i sujm chaʼan mach yomic miʼ cʼʌjñel jiñi imagen tac i jiñʌch tsaʼ bʌ ujti. Cheʼ bʌ tsaʼ cʼotiyob ti jiñi cʌntesʌntel 34, tsiʼ cʼajtibe i yestudiante bajcheʼ woliʼ coltan cheʼ woli ti estudio yicʼot cheʼ woliʼ ñumen cʌn Jehová. Chifundo tsiʼ yʌlʌ chaʼan Alinafe cabʌl chuqui wen tac bʌ tsiʼ yʌlʌ, i junchajp tsaʼ bʌ i yʌlʌ jiñʌch chaʼan jiñi Testigojob maʼañic miʼ melob chuqui mach bʌ añic miʼ mulan Dios. Ti wiʼil ili xchʼoc tsiʼ cʌyʌ i cʼʌn imagen tac i tsiʼ chʼʌmʌ jaʼ.

21. ¿Bajcheʼ miʼ mejlel laj coltan juntiquil estudiante chaʼan miʼ melben i yeʼtel Jehová?

²¹ La cujil chaʼan jiñʌch Dios muʼ bʌ i coltan jiñi estudiantejob chaʼan miʼ mulan i melbeñob i yeʼtel, pero mucʼʌch i mejlel laj coltañob jaʼel (1 Cor. 3:7). Mach cojach mi lac subeñob chuqui yom bʌ Jehová chaʼan miʼ melob, mi laj coltañob chaʼan miʼ ñumen cʼuxbiñob jaʼel. I chaʼan miʼ pʌsob jiñi i cʼuxbiya yomʌch miʼ ñaxan acʼob Jehová tiʼ cuxtʌlel. Cheʼ jaʼel, mi lac pʌsbeñob chaʼan yom miʼ sʌclañob i coltʌntel ti Jehová cheʼ bʌ miʼ ñusañob wocol tac. Cheʼ bʌ mi laj coltan i qʼuel jiñi estudiante chaʼan mucʼʌch i mejlel i mel chuqui miʼ mulan Jehová, mi caj laj coltan chaʼan miʼ mulan i melben i yeʼtel Jehová.