Brais Seara/Moment via Getty Images
¡YOM CHɅN YɅXɅL LA CO!
Jajmeñal | ¿Chuqui miʼ yʌl jiñi Biblia?
«China woliʼ wen ubin wocol tiʼ caj jajmeñal i miʼ ñaʼtʌntel chaʼan ili jiñʌch i yuxyajlel baqui ñumen tsʌts an i yubi» (The Guardian, 7 cha’an Septiembre, 2022).
«Ti ili joʼpʼejl jab woli bʌ i ñumel tilel, an parte tac yaʼ ti Africa baqui miʼ cajel cabʌl jajmeñal» (Noticias ONU, 26 cha’an Agosto, 2022).
«Lʌcʼʌ tiʼ pejtelel Europa woliʼ wen ñusan wocol tiʼ caj jajmeñal, i miʼ ñaʼtʌntel chaʼan maʼañic baqui ujtem bajcheʼ iliyi» (BBC News, 23 cha’an Agosto, 2022).
Cabʌl wen yujiloʼ bʌ miʼ yʌlob chaʼan miʼ ñumen cajel jajmeñal i mi caj i tiquin chuqui tac an o tajol muʼto caj i ñumen tsʌtsʼan. ¿Mejl ba lac pijtan chaʼan miʼ tojʼan? ¿Chuqui miʼ yʌl jiñi Biblia?
Jiñi jajmeñal yicʼot jiñi profecía tac am bʌ ti Biblia
Ili jiñʌch tsaʼ bʌ wʌn ajli muʼ bʌ caj i yujtel ti ili ora:
«Miʼ cajel [...] ti cabʌl tejclum [...] wiʼñal» (Lucas 21:11).
Tiʼ caj jiñi jajmeñal miʼ jilel chuqui miʼ cʼuxtʌl. Jiñi profecía tac am bʌ ti Biblia miʼ taj ti tʼan jiñi wiʼñal, i tiʼ caj iliyi an wocol yicʼot chʌmel (Apocalipsis 6:6, 8).
¿Chucoch ñumen tsʌtsix jiñi jajmeñal?
Jiñi Biblia miʼ yʌl junchajp chucoch woli yujtel bajcheʼ jiñi:
Jiñi «winic [...] mach mejlic i bajñel yajcan i bijlel» (Jeremías 10:23).
Ili yom i yʌl chaʼan jiñi quixtañujob mach mejlic i bajñel tojʼesañob majlel i bʌ o i yumañob i bʌ. Lʌcʼʌ tiʼ pejtelel ora, tiʼ caj chuqui miʼ ñaʼtañob i mel miʼ yʌcʼ wiʼñal yicʼot miʼ tiquin jaʼ.
Lʌcʼʌ tiʼ pejtelel jiñi científicojob miʼ yʌlob chaʼan tiʼ caj chuqui miʼ mel jiñi quixtañujob an i yʌcʼʌ chaʼan miʼ bej ticwan ili Pañimil, jin chaʼan an cabʌl tiquiñal.
Woliʼ tiquin jiñi jaʼ, ¿chucoch? Tiʼ caj jiñi quixtañujob muʼ bʌ i bajñel ñaʼtañob i bʌ yicʼot muʼ bʌ i yotsañob i bʌ ti política, come maʼañic miʼ ñaʼtañob chaʼan jiñi talto bʌ qʼuin. An i jisayob mateʼel yicʼot an i bibʼesayob chuqui tac an.
Jiñi Biblia miʼ yʌqʼueñonla jumpʼejl lac pijtaya.
¿Muʼ ba caj i tojʼan ili wocol ti jumpʼejl bʌ qʼuin?
Jiñi Biblia miʼ yʌl chaʼan Dios miʼ caj i tojʼesan jiñi wocol chaʼan bʌ jaʼ. ¿Bajcheʼ mi caj i mel?
1. Dios mi caj i «jisañob jiñi woli bʌ i jisañob pañimil» (Apocalipsis 11:18). Mi caj i jisañob jiñi muʼ bʌ i bibʼesañob jiñi pañimil, come jiñobʌch tiʼ caj maʼañic jaʼ (2 Timoteo 3:1, 2).
2. «Yaʼ baʼ ticʌw jiʼ, on mi caj i tilel tsʌwan jaʼ» (Isaías 35:1, 6, 7). Dios miʼ caj i jisan jiñi wocol am bʌ i yʌcʼʌ tiʼ caj jajmeñal, i miʼ caj i sujtesan ili Pañimil ti jumpʼejl paraíso baqui maʼañix miʼ caj i jilel jiñi jaʼ.
3. «Maʼ ñaʼtan chuqui yom ti pañimil. Maʼ choc tilel jaʼal. Jini chaʼan wen anix i bʌl chaʼan maʼ wʌchʼesan» (Salmo 65:9). Tiʼ coltaya Dios, ti lac pejtelel miʼ cajel lac taj i bʌl lac ñʌcʼ yicʼot sʌc bʌ jaʼ.