¿Chuqui miʼ yʌl jiñi Biblia chaʼan jiñi wiʼñal ti pañimil?
«Maʼañix wiʼñal». Ili jiñʌch yom bʌ i tajob jiñi yumʌlob chaʼan miʼ jisañob ili wocol: Cheʼ pejtelel lac piʼʌlob miʼ tajob bʌlñʌcʼʌl.a Pero ¿muʼ ba caj i jilel jiñi wiʼñal ti jumpʼejl bʌ qʼuin? ¿Chuqui miʼ yʌl jiñi Biblia?
Jiñi Biblia tsiʼ wʌn alʌ chaʼan mach cabʌlic bʌlñʌcʼʌl miʼ cajel
Jiñi Biblia tsiʼ wʌn alʌ chaʼan ili ora, cʌmbil bʌ bajcheʼ «jiñi cojix tac bʌ qʼuin», mach wen cabʌlic bʌlñʌcʼʌl miʼ cajel (2 Timoteo 3:1). Mach i mulic Dios iliyi, pero tsaʼʌch i wʌn alʌ chaʼan cheʼʌch miʼ cajel (Santiago 1:13). Qʼuele ili chaʼpʼejl profecía.
«Miʼ cajel wiʼñal [...] ti cabʌl tejclum» (Mateo 24:7). Ili profecía tsiʼ yʌlʌ chaʼan miʼ cajel wiʼñal ti cabʌl parte. Miʼ toj sajtel lac pusicʼal muʼ bʌ i yʌl jumpʼejl informe tsaʼ bʌ i meleyob jiñi institución tac muʼ bʌ i qʼuelob bajcheʼ cʼamel an bʌlñʌcʼʌl tac: «Jiñi lac piʼʌlob maʼañic chuqui woli i mejlel i melob chaʼan miʼ jisañob jiñi wiʼñal, chaʼan ñumen an bʌlñʌcʼʌl yicʼot chaʼan miʼ jisañob jiñi desnutrición».b Cabʌl millón lac piʼʌlob ti cabʌl país maʼañic miʼ tajob jiñi bʌlñʌcʼʌl i cʼʌjñibal bʌ i chaʼañob, i tiʼ caj jiñi yonlelob miʼ chʌmelob.
«Tsaʼ j qʼuele juncojt iʼicʼ bʌ caballo. Jiñi cʼʌchʌl bʌ yaʼi chucul i chaʼan jumpʼejl balanza» (Apocalipsis 6:5). Ti ili profecía, jiñi caballo yicʼot jiñi cʼʌchʌl bʌ yaʼi woliʼ lajin jiñi wiʼñal am bʌ ti ili cojix tac bʌ qʼuin.c Jiñi cʼʌchʌl bʌ chucul i chaʼan jumpʼejl balanza chaʼan miʼ pʼis yicʼot miʼ tʼox jiñi bʌlñʌcʼʌl. Cheʼ bʌ woli ti ajñel jiñi cʼʌchʌl bʌ ti caballo, tsaʼ ubinti jumpʼejl tʼan tsaʼ bʌ i yʌlʌ chaʼan wen lets miʼ cajel jiñi bʌlñʌcʼʌl i tsaʼ subenti lac piʼʌlob chaʼan maʼañic miʼ toʼol asiñob jiñi bʌlñʌcʼʌl (Apocalipsis 6:6). Ili miʼ pʌs chaʼan woliyʌch i tsʼʌctiyel ili ora come an cabʌl wiʼñal tiʼ petol pañimil, yonlel lac piʼʌlob maʼañic miʼ tajob o maʼañobic i taqʼuin chaʼan miʼ mʌñob wen tac bʌ bʌlñʌcʼʌl.
Mi caj i jilel jiñi wiʼñal
Jiñi especialistajob miʼ yʌlob chaʼan ili Lum mucʼʌch i mejlel i yʌcʼ bʌlñʌcʼʌl chaʼan petol pañimil. Cheʼ jiñi, ¿chucoch an cabʌl lac piʼʌlob muʼ bʌ i ñusañob wiʼñal? I cheʼ bajcheʼ miʼ yʌl jiñi Biblia, ¿chuqui mi caj i mel Dios, Jehová,d chaʼan miʼ tojʼesan ili wocol?
Jiñi wocol: Jiñi yumʌlob maʼañic miʼ mejlel i jisañob jiñi pʼumpʼuñiyel yicʼot chaʼan jiñi lac piʼʌlob junlajal miʼ tajob bʌlñʌcʼʌl i maʼañic miʼ ñusañob wiʼñal.
Bajcheʼ mi caj i tojʼan: Jiñi i Yumʌntel Dios yicʼot jiñi i Rey, Jesucristo, mi caj i jisañob jiñi yumʌlob am bʌ ili ora (Daniel 2:44; Mateo 6:10). Ili ora, cabʌl lac piʼʌlob pʼumpʼuñoʼ bʌ wocol miʼ yubiñob chaʼan miʼ mʌñob bʌlñʌcʼʌl, pero jiñi i Yumʌntel Dios mi caj i qʼuextan iliyi. Jiñi Biblia miʼ yʌl tiʼ tojlel Jesús: «Miʼ locʼsan ti wocol jini pʼumpʼun bʌ cheʼ miʼ cʼajtiben, yicʼot jini ticʼlʌbil bʌ mach bʌ anic majqui miʼ coltan [...]. Mi caj i yʌcʼ cabʌl i cuch jini cholel yaʼ ti joctʌl cʼʌlʌl tiʼ pam tac jini wits» (Salmo 72:12, 16).
Jiñi wocol: Jiñi guerra tac miʼ yʌcʼ chaʼan maʼañic cabʌl taqʼuin, jin chaʼan maʼañic miʼ pujquel bʌlñʌcʼʌl.
Bajcheʼ mi caj i tojʼan: «[Jehová] miʼ yujtesan guerra cʼʌlʌl tiʼ pejtelel pañimil. Miʼ bicʼti cʼʌs jini jalʌjb, miʼ cʼʌs jini lanza. Miʼ pulbeñob i carreta tac muʼ bʌ i cʼʌñob ti guerra» (Salmo 46:9). Dios mi caj i jisan pejtelel muʼ bʌ i cʼʌjñel ti guerra yicʼot jiñi lac piʼʌlob muʼ bʌ i techob guerra. Jin chaʼan pejtelel lac piʼʌlob mi caj i mejlel i tajob bʌlñʌcʼʌl. Jiñi Biblia miʼ yʌl: «Mux i tajob i wenlel jini tojoʼ bʌ cheʼ woli ti yumʌl. Mux i tajob cabʌl i ñʌchʼtʌlel» (Salmo 72:7).
Jiñi wocol: Jiñi tsʌts bʌ icʼ jaʼal yicʼot cheʼ wen qʼuexelix jiñi clima miʼ tsʌnsan jiñi pʌcʼʌbʌl yicʼot jiñi wacax.
Bajcheʼ mi caj i tojʼan: Dios mi caj i ticʼ pejtelel am bʌ ti pañimil bajcheʼ jiñi icʼ yicʼot jiñi jaʼ i muqʼuix caj i colel pejtelel muʼ bʌ lac pʌcʼ. Jiñi Biblia miʼ yʌl: «[Jehová] tsiʼ ñʌchʼtesa jini pʼʌtʌl bʌ icʼ, tsaʼ lajmi. Tsiʼ tiqʼui jini wʌlwʌlña bʌ jaʼ, tsaʼ ñʌjchʼi. Miʼ sutqʼuin jini tiquin lum ti wen bʌ lum. Miʼ yʌcʼ ti loqʼuel cuxul bʌ jaʼ ti tiquin lum. Yaʼi miʼ yotsañob ti chumtʌl jini woli bʌ i yubiñob wiʼñal [...]. Miʼ pʌcʼob cholel yicʼot tsʼusubil. Miʼ tajob on bʌ i cuch i cholob» (Salmo 107:29, 35-37).
Jiñi wocol: Jiñi jontol bʌ lac piʼʌlob miʼ melob bʌlñʌcʼʌl muʼ bʌ i ticʼlañonla o miʼ mʌctañob chaʼan maʼañic miʼ cʼotel bʌlñʌcʼʌl yaʼ baqui an i cʼʌjñibal bʌ i chaʼañob.
Bajcheʼ mi caj i tojʼan: Jiñi i Yumʌntel Dios mi caj i jisan jiñi jontol bʌ lac piʼʌlob muʼ bʌ i bajñel sʌclañob i wenlel (Salmo 37:10, 11; Isaías 61:8). Jiñi Biblia miʼ yʌl chaʼan Jehová «Miʼ mel ti toj jini ticʼlʌbiloʼ bʌ. Miʼ yʌqʼueñob i waj jini añoʼ bʌ i wiʼñal» (Salmo 146:7).
Jiñi wocol: Ti jujumpʼejl jab tiʼ petol pañimil miʼ toʼol asintel bʌlñʌcʼʌl yicʼot miʼ chojquel.
Bajcheʼ mi caj i tojʼan: Jiñi i Yumʌntel Dios mi caj i chʼʌm tiʼ wenta chaʼan ñumen an bʌlñʌcʼʌl. Cheʼ bʌ Jesús tsajñi ila ti Pañimil tsiʼ qʼuele chaʼan maʼañic miʼ toʼol asintel jiñi bʌlñʌcʼʌl. Jumpʼejl ejemplo, ti jumpʼejl bʌ qʼuin tsiʼ weʼsa ñumen ti 5 mil lac piʼʌlob. Cheʼ jiñi tiʼ sube jiñi xcʌntʼañob i chaʼan: «Lotola jiñi i xujtʼil tac tsaʼ bʌ colobʌyi chaʼan maʼañic chuqui miʼ toʼol asiyel» (Juan 6:5-13).
Jiñi i Yumʌntel Dios mi caj i jisan jiñi wocol tac muʼ bʌ i pʼol wiʼñal. Jin chaʼan, pejtelel lac piʼʌlob mi caj i ñusañob i bʌ ti cabʌl bʌlñʌcʼʌl (Isaías 25:6). ¿I jala miʼ cajel jiñi? Chaʼan maʼ ñaʼtan, qʼuele jiñi tema «¿Jala mi caj i chʼʌm tiʼ wenta ili Pañimil jiñi i Yumʌntel Dios?».
a Agenda 2030 chaʼan jiñi Desarrollo Sostenible, tsaʼ bʌ i chaʼleyob ti aprobar ti 2015 pejtelel jiñi Estado ochemoʼ bʌ ti jiñi Naciones Unidas.
b Ili informe tsiʼ mele jiñi Organización de las Naciones Unidas para la Alimentación y la Agricultura, jiñi Fondo Internacional de Desarrollo Agrícola, jiñi Fondo de las Naciones Unidas para la Infancia, jiñi Programa Mundial de Alimentos de las Naciones Unidas yicʼot jiñi Organización Mundial de la Salud.
c Chaʼan maʼ ñumen cʌn chaʼan jiñi chʌntiquil cʼʌchʌloʼ bʌ ti caballo muʼ bʌ i yʌjlel ti Apocalipsis, qʼuele jiñi tema «¿Qué representan los jinetes del Apocalipsis?».
d Jehová jiñʌch i cʼabaʼ Dios (Salmo 83:18, Traducción del Nuevo Mundo). Qʼuele jiñi tema «¿Majqui Jehová?»