Jiñi woli bʌ a pijtan mi caj i tsʼʌctiyel

1. ¿Chucoch Abrahán tsaʼʌch i chʌn pijta jiñi tsaʼ bʌ subenti?

JEHOVÁ tiʼ sube Abrahán chaʼan tiʼ tojlel i pʼolbal, pejtelel jiñi tejclum tac mi caj i taj bendición (Gn. 15:5; 22:18). Abrahán tsaʼʌch i wen ñopo chaʼan mi caj i tsʼʌctiyel jiñi tsaʼ bʌ subenti, pero cheʼ bʌ añix 100 i jabilel i jiñi i yijñam 90, maxto añobic i yalobil (Gn. 21:1-7). Pero jiñi Biblia miʼ yʌl chaʼan «tsiʼ chucu i bʌ ti jiñi pijtaya i tsiʼ ñopo chaʼan mucʼʌch caj i sujtel tiʼ tat cabʌl tejclum» (Rom. 4:18). I cheʼ bajcheʼ la cujil, tsaʼʌch tsʼʌctiyi jiñi tsaʼ bʌ subenti Abrahán. Sara tsiʼ yʌcʼʌ ti pañimil jiñi yalobil Isaac. ¿Chucoch Abrahán tsiʼ wen ñopo chaʼan Jehová mi caj i tsʼʌctesan jiñi tsaʼ bʌ i sube?

2. ¿Chucoch Abrahán tsaʼʌch i wen ñopo chaʼan mi caj i tsʼʌctiyel jiñi tsaʼ bʌ i sube Jehová?

² Abrahán wen i cʌñʌ Jehová, jin chaʼan tsaʼʌch i ñopo chaʼan mi caj i tsʼʌctiyel jiñi tsaʼ bʌ subenti (Rom. 4:21). Chaʼan i ñopoñel, Jehová tsiʼ qʼuele ti toj yicʼot tsaʼ sujti tiʼ yamigo (Sant. 2:23). Cheʼ bajcheʼ miʼ yʌl Romanos 4:18, Abrahán tsiʼ ñopo tsaʼ bʌ subenti i tsiʼ chʌn pijta. Wʌle laʼ laj qʼuel tsaʼ bʌ i yʌlʌ jiñi apóstol Pablo chaʼan jiñi lac pijtaya yaʼ ti capítulo 5 chaʼan Romanos.

3. ¿Chuqui tsiʼ yʌlʌ Pablo chaʼan jiñi pijtaya?

³ Pablo tsiʼ yʌlʌ chaʼan «miʼ mejlel lac ñop ti jiñi pijtaya am bʌ lac chaʼan» (Rom. 5:5). Cheʼ bʌ mi laj qʼuel majlel muʼ bʌ i yʌl Romanos 5:1-5, ñaʼtan bajcheʼ an pʼʌtʼa majlel jiñi a pijtaya. Cheʼ jaʼel, ti ili estudio mi caj laj qʼuel chuqui miʼ mejlel lac mel chaʼan mi lac ñumen pʼʌtʼesan lac pijtaya. Laʼ lac ñaxan qʼuel jiñi utsʼatax bʌ pijtaya tsaʼ bʌ i taja ti tʼan Pablo, la cujil bʌ chaʼan mucʼʌch caj i tsʼʌctiyel.

JIÑI UTSʼATAX BɅ LAC PIJTAYA

4. ¿Chuqui miʼ taj ti tʼan Romanos 5:1, 2?

⁴ (Pejcan Romanos 5:1, 2). Pablo tiʼ tsʼijbube majlel ili tʼan tac jiñi congregación am bʌ ti Roma. Ili hermanojob tsaʼix i cʌñʌyob tiʼ tojlel Jehová yicʼot Jesús, i tsiʼ pʌsʌyob chaʼan añobʌch i ñopoñel yicʼot tsaʼ sujtiyob ti xñoptʼan. Jin chaʼan Dios tsiʼ qʼueleyob ti toj i tsiʼ yajcayob ti chʼujul bʌ espíritu. Ti jimbʌ ora añob i chaʼan jumpʼejl utsʼatax bʌ pijtaya.

5. ¿Baqui bʌ i pijtaya añob i chaʼan jiñi xñoptʼañob yajcʌbiloʼ bʌ ti chʼujul bʌ espíritu?

⁵ Ti wiʼil, Pablo tiʼ sube jiñi xñoptʼañob ti Éfeso chaʼan jiñi pijtaya tsaʼ bʌ i yʌqʼueyob Jehová jumpʼejlʌch pijtaya «maʼañic bʌ miʼ mejlel ti lajintel tsaʼ bʌ i wʌn sube jiñi chʼujuloʼ bʌ» (Efes. 1:18). Cheʼ jaʼel, tiʼ sube jiñi xñoptʼañob añoʼ bʌ ti Colosas: «Woli laʼ pijtan jiñi laʼ majtan chajpʌbil bʌ chaʼañetla yaʼ ti panchan» (Col. 1:4, 5). Jin chaʼan, jiñi xñoptʼañob yajcʌbiloʼ bʌ añob i pijtaya chaʼan miʼ majlelob ti panchan baqui mi caj i chaʼleñob yumʌntel yicʼot Cristo (1 Tes. 4:13-17; Apoc. 20:6).

6. ¿Chuqui tsiʼ yʌlʌ jiñi hermano Franz chaʼan jiñi i pijtaya?

⁶ Jiñi xñoptʼañob yajcʌbiloʼ bʌ miʼ wen qʼuelob ti ñuc jiñi i pijtaya. Jumpʼejl ejemplo, ti 1991, jiñi hermano Frederick Franz tsiʼ yʌlʌ iliyi: «Jiñi lac pijtaya i sujmlelʌch i tiʼ pejtelelob jiñi 144 mil mi caj i qʼuelob ti jujuntiquil cheʼ bʌ miʼ tsʼʌctiyel tiʼ tojlelob, i ñumen wento mi caj i yujtel cheʼ bajcheʼ ñaʼtʌbil lon c chaʼan». ¿I bajcheʼ tsiʼ yubi i bʌ cheʼ bʌ añix cabʌl ora i cajel i melben i yeʼtel (troñel) Jehová? Tsiʼ yʌlʌ: «Maʼañic sʌtbil lon c chaʼan jiñi lon c pijtaya. Muʼto lon c ñumen qʼuel ti ñuc, [ . . . ] ñumento cheʼ añix ora i cajel lon c pijtan. Iliyi mach toʼolic, jin chaʼan mi caj c chʌn pijtan mach yʌlʌyic bajcheʼ jalel yom mic mel. Ili ora mic ñumen qʼuel ti ñuc jiñi pijtaya am bʌ c chaʼan, ñumento bajcheʼ ti ñaxan».

7, 8. ¿Baqui bʌ pijtaya añob i chaʼan yonlel hermanojob? (Romanos 8:20, 21).

⁷ Cabʌl lac piʼʌlob muʼ bʌ i melbeñob i yeʼtel Jehová ili ora lajalob i pijtaya bajcheʼ i chaʼan Abrahán: Mi caj i chumtʌlob tiʼ pejtelel ora ila ti Pañimil (Heb. 11:8-10, 13). Pablo tsiʼ taja ti tʼan jaʼel ili utsʼatax bʌ pijtaya (pejcan Romanos 8:20, 21). Cheʼ bʌ jatet tsaʼ cʌñʌ muʼ bʌ i yʌl jiñi Biblia chaʼan jiñi talto bʌ qʼuin, ¿chuqui jiñi tsaʼ bʌ a ñumen mulaj? ¿Jimba cheʼ ti jumpʼejl bʌ qʼuin mach xmuliloñixla? O ¿jimba cheʼ bʌ tsaʼ cʌñʌ chaʼan jiñi chʌmeñoʼ bʌ a chaʼan mi caj i chaʼ ajñelob a wicʼot yaʼ ti Paraíso? An a chaʼan ili utsʼatax bʌ pijtaya come Jehová tsiʼ yʌqʼueyet.

⁸ Ti lac pejtelel an lac chaʼan jumpʼejl utsʼatax bʌ lac pijtaya, an muʼ bʌ caj i majlelob ti panchan i an muʼ bʌ caj i cʌytʌlob ila ti Pañimil. Jiñi pijtaya am bʌ lac chaʼan miʼ mejlel ti ñumen pʼʌtʼan majlel. ¿Bajcheʼ mi lac mel? Chaʼan mi lac ñaʼtan, laʼ lac bej qʼuel chuqui tsiʼ yʌlʌ Pablo. Jiñi mi caj i coltañonla lac ñumen ñop chaʼan jiñi woli bʌ (choncol bʌ) lac pijtan mucʼʌch caj i tsʼʌctiyel.

¿BAJCHEʼ MIʼ ÑUMEN PʼɅTʼAN LAC PIJTAYA?

9, 10. Cheʼ bajcheʼ Pablo, ¿chuqui la cujil chaʼan mi caj lac ñusan? (Romanos 5:3, qʼuele jaʼel jiñi foto tac).

⁹ (Pejcan Romanos 5:3). Pablo tsiʼ yʌlʌ chaʼan cheʼ bʌ mi lac ñusan wocol tac miʼ ñumen pʼʌtʼan jiñi lac pijtaya. Tajol iliyi miʼ yʌcʼ ti toj sajtel lac pusicʼal, pero la cujil chaʼan ti lac pejtelel mi caj lac ñusan wocol tac. Laʼ lac ñaʼtan tsaʼ bʌ i sube Pablo jiñi xñoptʼañob ti Tesalónica: «Cheʼ bʌ yaʼto añon lon quicʼotetla, tsaʼʌch c subeyetla chaʼan mi caj lac ñusan wocol tac, i cheʼ bajcheʼ laʼ wujil, cheʼʌch ujtem» (1 Tes. 3:4). I cheʼ jaʼel tiʼ sube jiñi añoʼ bʌ ti Corinto: «Com lojon chaʼan laʼ wujil chuqui ti wocol tac tsaʼ lon c ñusa [ . . . ] i tsaʼto lon c ñaʼta mi cuxulixto mi caj lon j cʌytʌl o maʼañic» (2 Cor. 1:8; 11:23-27).

¹⁰ I cheʼʌch miʼ yujtel ili ora, la cujil chaʼan mi caj lac ñusan wocol tac (2 Tim. 3:12). ¿Baqui tac bʌ wocol an a ñusa cʼʌlʌl bajcheʼ tsaʼ sujtiyet ti xcʌntʼan? Tajol jiñi a wamigojob o jiñi a familia an i wajleyetob o an i melbeyetob mach bʌ weñic. ¿Am baʼ taja wocol ti a weʼtel tiʼ caj maʼañic tsaʼ jacʼʌ a mel mach bʌ weñic? (Heb. 13:18). ¿Woli baʼ taj a contrajintel tiʼ tojlel jiñi añoʼ bʌ i yeʼtel come woli a sub jiñi wen tʼan? Mach yʌlʌyic baqui tac bʌ wocol mi lac ñusan, Pablo miʼ yʌl chaʼan yom tijicñayonla. ¿Chucoch?

11. ¿Chucoch yomʌch mi laj cuch wocol tac?

¹¹ Tijicña mi la cubin cheʼ bʌ mi lac ñusan wocol tac come miʼ coltañonla lac taj yambʌ melbalʌl (chaʼlibal) wen ñuc bʌ i cʼʌjñibal. Romanos 5:3 miʼ yʌl: «Jiñi wocol tac miʼ coltañonla laj cuch». La cujil chaʼan mi caj lac ñusan wocol tac, jin chaʼan yom mi laj cuch. Mi cheʼʌch mi lac mel mi caj lac taj jiñi woli bʌ (yʌquel bʌ) lac pijtan. Mach la comic chaʼan lajalonla bajcheʼ jiñi lac piʼʌlob tsaʼ bʌ i taja ti tʼan Jesús, tijicña bʌ miʼ jacʼob jiñi wen tʼan cheʼ bʌ miʼ yubiñob, pero cheʼ bʌ miʼ tilel wocol tac o contrajintel ti ora miʼ yajlelob (Mat. 13:5, 6, 20, 21). I sujmʌch, maʼañic mi lac mulan cheʼ bʌ mi lac ñusan wocol o contrajintel, pero cheʼ bʌ mi laj cuch añʌch cabʌl i wenlel. Laʼ laj qʼuel chucoch.

12. ¿Bajcheʼ miʼ coltañonla cheʼ bʌ mi laj cuch wocol?

¹² Santiago tsiʼ yʌlʌ baqui bʌ i wenlel cheʼ bʌ mi laj cuch jiñi wocol tac. Tsiʼ yʌlʌ: «Acʼʌla chaʼan jiñi i cuchol wocol tsʼʌcʌl miʼ mel i yeʼtel, chaʼan tsʼʌcʌletla tiʼ pejtelel chuqui jach i maʼañic chuqui anto yom laʼ chaʼan» (Sant. 1:2-4). Cheʼ bajcheʼ mi laj qʼuel, cheʼ bʌ mi laj cuch wocol tac mucʼʌch i mel i yeʼtel ti lac tojlel. Miʼ coltañonla chaʼan ñumen la cujil pijt yicʼot chaʼan mi lac ñumen ñop ti Jehová. Pero mach cojachi, anto yambʌ bajcheʼ miʼ coltañonla.

13, 14. ¿Chuqui miʼ yujtel cheʼ bʌ mi laj cuch wocol, i bajcheʼ miʼ coltan jiñi lac pijtaya? (Romanos 5:4).

¹³ (Pejcan Romanos 5:4). Pablo tsiʼ yʌlʌ chaʼan «jiñi i cuchol wocol miʼ yʌcʼ chaʼan utsʼat mi laj qʼuejlel ti Dios», jiñi mach yomic i yʌl chaʼan Jehová tijicña miʼ yubin cheʼ bʌ mi lac ñusan wocol tac. Muʼ bʌ i yʌqʼuen i tijicñʌyel jiñʌch cheʼ bʌ mi laj cuch yicʼot xucʼul mi laj cajñel tiʼ tojlel. ¿Mach ba muqʼuic i ñuqʼuesan lac pusicʼal iliyi? (Sal. 5:12).

¹⁴ Laʼcu lac ñaʼtan tiʼ tojlel Abrahán, utsʼat tsaʼ qʼuejli ti Dios come tsiʼ cuchu jiñi wocol tac. Jehová tsiʼ qʼuele bajcheʼ i yamigo yicʼot bajcheʼ juntiquil toj bʌ wiñic (Gn. 15:6; Rom. 4:13, 22). I cheʼʌch miʼ mejlel ti ujtel ti lac tojlel jaʼel. Chaʼan utsʼat mi laj qʼuejlel ti Dios yom xucʼul mi la cajñel yicʼot mi laj cuch jiñi wocol tac, mach yaʼic cʌyʌl ti lac privilegio tac o chaʼan bajcheʼ cʼamel woli lac mel. I ti lac pejtelel miʼ mejlel lac mel jiñi, mach yʌlʌyic jaypʼejl lac jabilel, chuqui woli lac ñusan o chuqui la cujil bʌ melol. ¿Woli baʼ ñusan wocol ili ora? Cʼajtesan chaʼan mi xucʼul maʼ wajñel utsʼat mi caj a qʼuejlel ti Dios. Cheʼ la cujil iliyi miʼ pʼʌtʼesan jiñi lac pijtaya.

ÑUMEN PʼɅTɅL JIÑI LAC PIJTAYA

15. ¿Chuqui tsiʼ bej alʌ Pablo, i chuqui miʼ mejlel laj cʼajtiben lac bʌ?

¹⁵ Cheʼ bajcheʼ tsaʼix laj qʼuele, Pablo tsiʼ yʌlʌ chaʼan utsʼat mi caj laj qʼuejlel ti Dios mi mucʼʌch laj cuch wocol. Wʌle laʼ laj qʼuel chuqui tsiʼ bej alʌ: «Cheʼ utsʼat mi laj qʼuejlel ti Dios miʼ yʌqʼueñonla lac pijtaya» (Rom. 5:4, 5). Tiʼ sujm, joñonla miʼ mejlel lac ñop jiñi pijtaya am bʌ lac chaʼan. Ti Romanos 5:2, Pablo tsaʼix i sube jiñi xñoptʼañob añoʼ bʌ ti Roma chaʼan añob jumpʼejl i pijtaya, chaʼan Dios mi caj i yʌqʼueñob i ñuclel. Jin chaʼan tajol mi laj cʼajtiben lac bʌ: «Mi ili xñoptʼañob añobix i pijtaya, ¿chucoch Pablo tsaʼto i chaʼ alʌ chaʼan Dios miʼ yʌqʼueñob i pijtaya?».

16. ¿Bajcheʼ miʼ pʼʌtʼan majlel i pijtaya juntiquil lac piʼʌl? Tsictesan. (Qʼuele jaʼel jiñi foto tac).

¹⁶ Cheʼ bʌ mi lac ñaʼtan chaʼan jiñi lac pijtaya miʼ mejlel ti ñumen pʼʌtʼan majlel, miʼ mejlel lac chʼʌmben i sujm chuqui tsaʼ bʌ i yʌlʌ Pablo. Ñaʼtancu iliyi, ¿chuqui tsaʼ ñaʼta cheʼ bʌ cojaxto tsaʼ wubi chaʼan mi caj lac chumtʌl ti jumpʼejl paraíso ila ti Pañimil? Tajol tsaʼ ñaʼta: «Utsʼatax yubil, pero mi cʌl maʼañic baʼ ora mi caj i tsʼʌctiyel». Pero cheʼ bʌ tsaʼ ñumen cʌñʌ Jehová yicʼot muʼ bʌ i yʌl jiñi Biblia, tsaʼ ñumen ñopo chaʼan jiñi woli bʌ a subentel mucʼʌch caj i tsʼʌctiyel.

17. ¿Bajcheʼ an pʼʌtʼa jiñi a pijtaya cʼʌlʌl bajcheʼ tsaʼ chʼʌmʌ jaʼ?

¹⁷ Cʼʌlʌl bajcheʼ tsaʼ lac chʼʌmʌ jaʼ, jiñi lac pijtaya an ñumen pʼʌtʼa majlel come an lac ñumen taja lac ñaʼtʌbal yicʼot an lac ñumen lʌcʼtesa lac bʌ ti Jehová (Heb. 5:13–6:1). Miʼ mejlel la cʌl chaʼan cheʼʌch ujtemonla bajcheʼ miʼ yʌl Romanos 5:2-4, an lac ñusa wocol tac i an laj qʼuele chaʼan Jehová utsʼat miʼ qʼuelonla, jin chaʼan mi lac ñumen ñop chaʼan mucʼʌch caj i tsʼʌctesan pejtelel am bʌ i subeyonla. Jiñi lac pijtaya ñumen pʼʌtʌlix bajcheʼ ti ñaxan, miʼ coltañonla ti laj cuxtʌlel, ti lac familia, ti chuqui muʼ bʌ lac yajcan lac mel yicʼot bajcheʼ mi laj cʼʌn jiñi lac tiempo.   

18. ¿Chucoch miʼ mejlel lac ñop jiñi albil bʌ i chaʼan Jehová?

¹⁸ Cheʼ bʌ Pablo tsaʼix i yʌlʌ chaʼan mi lac taj lac pijtaya cheʼ utsʼat mi laj qʼuejlel ti Dios, tsiʼ yʌlʌ jaʼel chaʼan miʼ mejlel lac ñop chaʼan jiñi muʼ bʌ lac pijtan mucʼʌch caj i tsʼʌctiyel. ¿Chucoch? Pablo tiʼ sube jiñi xñoptʼañob: «Joñonla miʼ mejlel lac ñop ti jiñi pijtaya am bʌ lac chaʼan come Dios miʼ cʼʌn jiñi chʼujul bʌ i yespíritu muʼ bʌ i yʌqʼueñonla chaʼan miʼ pʌs chaʼan miʼ cʼuxbiñonla» (Rom. 5:5). Jin chaʼan, miʼ mejlel lac ñop chaʼan Jehová mi caj i tsʼʌctesan jiñi albil bʌ i chaʼan.

19. ¿Chuqui mi lac ñop?

¹⁹ Yomʌch mi laj cʼajtesan tsaʼ bʌ ujti tiʼ tojlel Abrahán. Jehová tsiʼ yʌqʼue jumpʼejl i pijtaya, utsʼat tsiʼ qʼuele i tsaʼ sujti tiʼ yamigo. Jiñi tsaʼ bʌ i pijta Abrahán tsaʼʌch tsʼʌctiyi. Jiñi Biblia miʼ yʌl: «Cheʼ bʌ Abrahán tsiʼ pʌsʌ i pijt, tsaʼ aqʼuenti jiñi tʼan» (Heb. 6:15; 11:9, 18; Rom. 4:20-22). Joñonla jaʼel miʼ mejlel lac ñop chaʼan mi xucʼuloñʌchla ti Jehová, jiñi muʼ bʌ lac pijtan mi caj i tsʼʌctiyel. Jiñi lac pijtaya i sujmlelʌch, i jin chaʼan tijicñayonla (Rom. 12:12). Pablo tiʼ tsʼijbu: «Laʼ i yʌqʼueñetla laʼ tijicñʌyel yicʼot laʼ ñʌchʼtʌlel chaʼan laʼ ñopoñel jiñi Dios muʼ bʌ i yʌcʼ pijtaya, chaʼan cabʌl laʼ pijtaya tiʼ coltaya i pʼʌtʌlel jiñi chʼujul bʌ espíritu» (Rom. 15:13).