Cheʼ mi lac bʌcʼñan Dios miʼ coltañonla ili ora yicʼot ti talto bʌ qʼuin

1, 2. ¿Chucoch lajal bajcheʼ chumulonla tiʼ yorajlel Lot?

ILI ora quisintic jax i melbal (chaʼlibal) lac piʼʌlob, i cheʼʌch tsaʼ ujti jaʼel tiʼ yorajlel Lot. Jin chaʼan, tsiʼ wen chaʼle pensar tiʼ caj i melbal jiñi jontoloʼ bʌ (mañajoʼ bʌ) come yujil chaʼan Jehová tsʼaʼ miʼ qʼuel muʼ bʌ i melob bajcheʼ jiñi (2 Ped. 2:7, 8). Lot machʌch weñic tsiʼ qʼuele jaʼel i melbal jiñi lac piʼʌlob come miʼ cʼuxbin Jehová yicʼot miʼ wen qʼuel ti ñuc. Cheʼʌch jaʼel ili ora, anquese jiñi lac piʼʌlob maʼañix miʼ qʼuelob ti ñuc muʼ bʌ i yʌl Dios, joñonla sʌc mi lac mejlel ti ajñel cheʼ mucʼʌch laj cʼuxbin Jehová yicʼot mi lac bʌcʼñan (Pr. 14:2).

² Chaʼan sʌc mi la cajñel, Jehová miʼ cʼʌn jiñi libro chaʼan Proverbios chaʼan miʼ coltañonla. Ti lac pejtelel, mach yʌlʌyic majquiyonla, miʼ mejlel i coltañonla jiñi wen tac bʌ ticʼojel muʼ bʌ i chʼʌm tilel.

CHEʼ MI LAC BɅCʼÑAN DIOS MIʼ COLTAÑONLA

3. Cheʼ bajcheʼ miʼ yʌl Proverbios 17:3, ¿chucoch yom mi laj cʌntan lac pusicʼal? (Qʼuele jaʼel jiñi foto tac).

³ ¿Chucoch ñucʌch i cʼʌjñibal mi laj cʌntan lac pusicʼal? Junchajp come Jehová miʼ luʼ taj i qʼuel chuqui an, mach cheʼic miʼ qʼuel bajcheʼ joñonla mi lac taj laj qʼuel (pejcan Proverbios 17:3). Cheʼ mi lac wen lot ti lac pusicʼal i ticʼojel tac Jehová mi caj i cʼuxbiñonla, i maʼañic mi caj lac ñop jiñi i lot tac Satanás o chuqui tac miʼ yʌl ili pañimil (mulawil) am bʌ tiʼ pʼʌtʌlel (Juan 4:14; 1 Juan 5:18, 19). Cheʼ mi lac ñumen lʌcʼtesan lac bʌ ti Jehová mi caj lac ñumen cʼuxbin yicʼot laj qʼuel ti ñuc. I maʼañic mi caj lac mulan lac mel mach bʌ weñic muʼ bʌ i yʌqʼuen i chʼijyemlel. Cheʼ miʼ tilel ti lac pusicʼal chaʼan mi lac mel mach bʌ weñic, mi caj laj cʼajtiben lac bʌ: «¿Bajcheʼqui mi caj c lowben i pusicʼal juntiquil muʼ bʌ i wen cʼuxbiñon yicʼot am bʌ i wen coltayon?» (1 Juan 4:9, 10).

4. ¿Bajcheʼ tsiʼ colta juntiquil hermana jiñi i bʌqʼuen ti Jehová?

⁴ Marta,b juntiquil hermana ti Croacia, colel i yajlel ti tsʼiʼlel. Miʼ yʌl: «Wen wocol tsaʼ cubi chaʼan mic ñaʼtan chuqui wen come jin jach an tic jol chaʼan mic jumucʼ ñusan c bʌ tiʼ melol jiñi. Pero tsaʼ bʌ i coltayon jiñʌch cheʼ mic bʌcʼñan Jehová». ¿Bajcheʼ tsiʼ colta? Tsiʼ wen ñaʼta jiñi wocol muʼ bʌ mejlel i taj mi tsiʼ mele jiñi tsʼiʼlel. Jiñʌch yom bʌ mi lac mel jaʼel. Cheʼ miʼ tilel ti lac pusicʼal chaʼan mi lac mel mach bʌ weñic, laʼ laj cʼajtesan jiñi wocol muʼ bʌ mejlel lac taj: Mi la cʌqʼuen i chʼijyemlel Jehová i tajol mach mejlix lac chʼujutesan tiʼ pejtelel ora (Gn. 6:5, 6).

5. ¿Chuqui miʼ pʌsbeñonla tsaʼ bʌ ujti tiʼ tojlel Leo?

⁵ Mi mucʼʌch lac bʌcʼñan Jehová maʼañic mi caj lac sʌclan lac tʼan chaʼan mi lac mel mach bʌ weñic mi muqʼuic caj lac ñaʼtan chaʼan mach lac tajayic wocol mi tsaʼ lac sʌcla mach bʌ weñic la camigojob. Laʼ laj qʼuel tsaʼ bʌ ujti tiʼ tojlel Leo, chʼoyol bʌ ti República Democrática del Congo. Cheʼ an jaxto chʌmpʼejl jab chʼʌmbil i chaʼan jaʼ tsaʼ caji i ñochtañob jiñi mach bʌ weñobic i melbal, i tsiʼ ñaʼta chaʼan maʼañic i wocolel come maʼañic woli (choncol) i mel mach bʌ weñic. Pero mach jalic tsaʼ ñumi i tsaʼ caji i jap lembal yicʼot tsiʼ mele tsʼiʼlel. Ti wiʼil, tsaʼʌch i chaʼ ñaʼta i bʌ, tsaʼ caji i wen ñaʼtan pejtelel tsaʼ bʌ i pʌsbeyob jiñi i papá i mamá yicʼot chaʼan wen tijicña cheʼ bʌ wento an yicʼot Jehová. I tiʼ coltaya jiñi ancianojob tsaʼʌch chaʼ sujti. Ili ora an bajcheʼ anciano yicʼot precursor especial, i wen tijicña miʼ yubin i bʌ.

6. ¿Majqui jiñi chaʼtiquil xʼixicob muʼ bʌ caj lac tajob ti tʼan ti ili estudio?

⁶ Wʌle mi caj laj qʼuel jiñi capítulo 9 chaʼan Proverbios, baqui ti lac pejtelel mi lac taj wen tac bʌ cʌntesʌntel. Ila miʼ yʌjlel jiñi am bʌ i ñaʼtʌbal yicʼot jiñi maʼañic bʌ, muʼ bʌ i lajintel bajcheʼ chaʼtiquil xʼixicob.c Cheʼ bʌ woli (yʌquel) laj qʼuel majlel iliyi, laʼ laj cʼajtesan chaʼan jiñi i pañimil Satanás miʼ wen mulan jiñi pornografía yicʼot jiñi chaʼan tac bʌ tsʼiʼlel (Efes. 4:19). Jin chaʼan, ñuc i cʼʌjñibal cheʼ mi lac chʌn bʌcʼñan Jehová i maʼañic mi lac mel mach bʌ weñic (Pr. 16:6). Jiñi chaʼtiquil xʼixicob muʼ bʌ caj lac tajob ti tʼan miʼ pʌyob ti cʼux waj jiñi mach bʌ añobic i ñaʼtʌbal (Pr. 9:1, 5, 6, 13, 16, 17). Laj laʼ qʼuel chuqui miʼ yujtel tiʼ tojlelob jiñi muʼ bʌ i jacʼbeñob i tʼan jiñi xʼixic am bʌ i ñaʼtʌbal yicʼot jiñi muʼ bʌ i jacʼbeñob i tʼan jiñi tonto bʌ xʼixic.

MACH YOMIC MI LAC JACʼBEN I TʼAN JIÑI «TONTO BɅ XʼIXIC»

7. Cheʼ bajcheʼ miʼ yʌl Proverbios 9:13-18, ¿chuqui mi caj i chaʼleñob jiñi muʼ bʌ i jacʼbeñob i tʼan jiñi tonto bʌ xʼixic? (Qʼuele jaʼel jiñi dibujo).

⁷ Jiñi tonto bʌ xʼixic cʼam miʼ chaʼlen tʼan i miʼ yʌl: «Jini maxto bʌ julemic i pusicʼal [o maxto bʌ añic i ñaʼtʌbal] laʼ ochic baʼ añon» (pejcan Proverbios 9:13-18). ¿Chuqui mi caj i yujtel tiʼ tojlel jiñi muʼ bʌ i jacʼbeñob i tʼan? Mi caj i pʌjyelob majlel baʼan chʌmeñoʼ bʌ. Mach cojach wʌʼ ti capítulo 9 baʼ miʼ yʌjlel tiʼ tojlel juntiquil tonto bʌ xʼixic, ti yan tac bʌ capítulo miʼ yʌjlel chaʼan juntiquil xʼixic am bʌ i maña yicʼot yambʌ muʼ bʌ i cʌy i ñoxiʼal. I miʼ yʌl jaʼel chaʼan «jini muʼ bʌ i jijlel tiʼ yotot miʼ sajtel», yom i yʌl, miʼ chʌmel (Pr. 2:11-19). Ti capítulo 5 versículo 3 cʼʌlʌ ti 10 miʼ subeñonla jaʼel chaʼan yom mi laj cʌntan lac bʌ tiʼ tojlel yambʌ «xʼixic am bʌ i maña» «come woliʼ majlel ti chʌmel».

8. Mi tsaʼ la cubibe i tʼan jiñi tonto bʌ xʼixic, ¿muʼ ba caj lac jacʼben i tʼan o maʼañic?

⁸ Ti lac pejtelel yom mi lac ñaʼtan mi yom mi lac jacʼben i tʼan jiñi tonto bʌ xʼixic o maʼañic. Tajol miʼ tilel ti lac pusicʼal chaʼan mi lac mel tsʼiʼlel o tajol miʼ waʼ pʌs i bʌ jiñi pornografía. Mi tsaʼ ujti iliyi, ¿chuqui mi caj lac mel?

9, 10. ¿Chucoch mach yomic mi lac chaʼlen tsʼiʼlel?

⁹ Jiñi Biblia miʼ subeñonla chucoch mach yomic mi lac yajlel ti jiñi tsʼiʼlel. Yaʼ ti libro chaʼan Proverbios miʼ yʌl chaʼan jiñi «tonto bʌ xʼixic» miʼ yʌl chaʼan sumuc ti japol jiñi «xujchʼibil bʌ jaʼ». Pero ¿chuqui yom i yʌl jiñi jaʼ? Yaʼ ti Biblia miʼ lajintel jiñi piʼleya bajcheʼ jiñi jaʼ (Pr. 5:15-18). Cheʼ bʌ juntiquil wiñic yicʼot xʼixic ñujpuñemoʼ bʌ miʼ piʼleñob i bʌ, lajal bajcheʼ woliʼ japob sumuc bʌ jaʼ tsʌwan tsʌwan bʌ. Jin chaʼan, jiñi «xujchʼibil bʌ jaʼ» tajol jiñʌch cheʼ bʌ juntiquil wiñic yicʼot xʼixic mach bʌ ñujpuñemobic miʼ piʼleñob. Jiñi muʼ bʌ i melob tsʼiʼlel mucul jach miʼ melob, lajal bajcheʼ juntiquil xujchʼ muʼ bʌ i yochel ti acʼʌlel chaʼan maʼañic miʼ qʼuejlel. Anquese mucʼʌch i tajob i tijicñʌyel cheʼ miʼ melob ti mucul iliyi, maʼañic chuqui mucul tiʼ wut Jehová come miʼ luʼ taj i qʼuel, maʼañic i sumuclel jiñi jaʼ come miʼ mejlel i ñajtʼesañob ti Jehová (1 Cor. 6:9, 10).

¹⁰ Cheʼ jaʼel, jiñi muʼ bʌ i chaʼleñob tsʼiʼlel tajol miʼ yubiñob quisin, miʼ ñaʼtañob chaʼan maʼañobix i cʼʌjñibal, embarazada miʼ cʌytʌlob anquese mach cheʼic yomob o miʼ jisʌbeñob i familia. Jin chaʼan mach yomic mi lac jacʼben i tʼan jiñi tonto bʌ xʼixic. Cheʼto jaʼel, mach cojach miʼ ñajtʼesañonla tiʼ tojlel Jehová, miʼ mejlel lac sʌt laj cuxtʌlel tiʼ caj tsʌts tac bʌ cʼamʌjel (Pr. 7:23, 26). Proverbios 9:18 miʼ yʌl: «Añob tiʼ tamlel mucoñibʌl jini pʌybiloʼ bʌ i chaʼan». Mi cheʼ bajcheʼ iliyi, ¿chucoch cabʌl lac piʼʌlob miʼ melob? (Pr. 9:13-18).

11. ¿Chucoch mach wis yomic mi laj qʼuel jiñi pornografía?

¹¹ Jiñi pornografía baqui jachix an. An muʼ bʌ i ñaʼtañob chaʼan maʼañic i wocolel mi tsaʼ laj qʼuele. Pero tiʼ sujm, miʼ mejlel ti sujtel ti jumpʼejl vicio, miʼ yʌsin lac pensar yicʼot miʼ jisan laj cʼʌjñibal. I jiñi muʼ bʌ i qʼuel pornografía wen wocol chaʼan miʼ mejlel i ñajʌtesan jiñi tsaʼ bʌ i qʼuele. Mach i sujmic cheʼ miʼ yʌjlel chaʼan miʼ coltañonla lac ticʼ lac bʌ, mucʼ jach i ñumen pʼʌtʼesan jiñi lac tsucu pensar (Col. 3:5; Sant. 1:14, 15). Jin chaʼan cabʌlob am bʌ i qʼueleyob pornografía an yajlemob ti tsʼiʼlel.

12. ¿Chuqui yom mi lac mel mi tsaʼ lac taja laj qʼuel jumpʼejl foto muʼ bʌ i techbeñonla lecoj bʌ lac pensar?

¹² Ixcu mi tsiʼ waʼ pʌsʌ i bʌ jumpʼejl foto chaʼan bʌ pornografía yaʼ ti a celular o a tableta, ¿chuqui yom maʼ mel? Yom maʼ cʌy a qʼuel ti orajach. Junchajp muʼ bʌ mejlel i coltañet jiñʌch cheʼ maʼ cʼajtesan chaʼan jiñi ñumen ñuc bʌ i cʼʌjñibal jin cheʼ i yamigojet Jehová. Cheʼ jaʼel, mach yomic mi laj qʼuel pejtelel chuqui tac yambʌ miʼ pʌstʌl anquese miʼ ñaʼtʌntel chaʼan mach pornografíajic. ¿Chucoch? Come miʼ bibʼesan lac ñaʼtʌbal, i mach la comic chaʼan mi ti lac pusicʼalic mi lac chaʼlen tsʼiʼlel (Mat. 5:28, 29). Juntiquil anciano ti Tailandia, i cʼabaʼ David, miʼ yʌl chuqui miʼ mel: «Joñon mic mulan j cʼajtiben c bʌ: ¿Muʼ ba caj i mulan Jehová mi tsaʼ c bej qʼuele ili foto tac anquese mach pornografíajic? Ili miʼ coltañon chaʼan mic mel chuqui wen».

13. ¿Chuqui mi caj i coltañonla chaʼan wen muʼ bʌ lac yajcan lac mel?

¹³ Chaʼan mi lac yajcan lac mel chuqui wen, yom mi laj cʌn lac bʌcʼñan Jehová cheʼ bajcheʼ yom. Jin chaʼan, Proverbios 9:10 miʼ yʌl: «Jiñʌch i cajibal lac ñaʼtʌbal cheʼ mi lac bʌcʼñan lac Yum». Yaʼ ti capítulo 9 chaʼan Proverbios, wen tsiquil miʼ pʌs iliyi, yaʼi miʼ tajtʌl ti tʼan jiñi i sujm bʌ ñaʼtʌbal, muʼ bʌ i lajintel bajcheʼ juntiquil xʼixic.

LAʼ LAC JACʼBEN I TʼAN JIÑI XʼIXIC AM BɅ I ÑAʼTɅBAL

14. ¿Chuqui muʼ bʌ i taj ti tʼan yaʼ ti Proverbios 9:1-6?

¹⁴ (Pejcan Proverbios 9:1-6). Ti ili versículo tac mi laj qʼuel chaʼan jiñi muʼ bʌ i chaʼlen pʌyoñel jiñʌch Jehová, jiñi tsaʼ bʌ i meleyonla (pʌtʌyonla), come yaʼʌch baqui tilem pejtelel jiñi ñaʼtʌbal (Pr. 2:6; Rom. 16:27). Ila miʼ yʌjlel jumpʼejl otot yicʼot i yoyel. Jiñi Traducción del Nuevo Mundo miʼ yʌl chaʼan an «siete i yoyel», ili miʼ yʌqʼueñonla lac ñaʼtan chaʼan jiñi otot colemʌch. ¿Chuqui miʼ pʌsbeñonla iliyi? Chaʼan Jehová wen an i yutslel i lajal bajcheʼ miʼ yotsañonla tiʼ yotot cheʼ bʌ joñonla mi lac sʌclan chaʼan mi laj cʼajtiben lac ñaʼtʌbal.

15. ¿Chuqui yom Jehová chaʼan mi lac mel?

¹⁵ Jehová wen an i yutslel i cabʌl chuqui wem bʌ miʼ yʌqʼueñonla. Ili wen tsiquil miʼ pʌstʌl yaʼ ti capítulo 9 chaʼan Proverbios baqui miʼ yʌjlel chaʼan jiñi i sujm bʌ ñaʼtʌbal,d muʼ bʌ i lajintel bajcheʼ juntiquil xʼixic, luʼ chajpʌbilix i chaʼan. Tsaʼix i tasi jiñi i mesa, tiʼ tsʌnsa i wacax i tsiʼ xʌbʌ jiñi vino (Pr. 9:2). Jin chaʼan, yaʼ ti versículo 4 yicʼot 5 miʼ yʌl chaʼan jiñi xʼixic am bʌ i ñaʼtʌbal miʼ suben jiñi mach bʌ añobic i ñaʼtʌbal: «Laʼ cʼuxu c waj. Japʌ jini vino tsaʼ bʌ c chajpa». ¿Chucoch yomʌch mi lac jacʼ? Come Jehová yom i cʌntañonla yicʼot yom i yʌqʼueñonla lac ñaʼtʌbal. Mach yomic chaʼan an chuqui mi lac chaʼlen tiʼ caj chuqui mi lac mel, i ti wiʼil mi caj lac chaʼ ñaʼtan lac bʌ. Jin chaʼan, ti Proverbios 2:7 miʼ yʌl chaʼan Jehová «miʼ chajpʌbeñob i wenlel jini tojoʼ bʌ», yom bʌ i yʌl, chaʼan miʼ yʌqʼueñob i ñaʼtʌbal. Mi mucʼʌch lac bʌcʼñan Jehová mi caj lac mulan lac jacʼben i ticʼojel tac, i jiñi mi caj i yʌqʼueñonla lac tijicñʌyel (Sant. 1:25).

16. ¿Bajcheʼ tsiʼ colta Alain jiñi i bʌqʼuen ti Jehová, i chuqui ti wenlel tsiʼ taja?

¹⁶ Laʼ laj qʼuel jumpʼejl ejemplo muʼ bʌ i pʌs chaʼan cheʼ mi lac bʌcʼñan Jehová miʼ coltañonla lac mel chuqui wen. Alain, juntiquil anciano ti congregación, miʼ chaʼlen eʼtel (troñel) bajcheʼ maestro ti jumpʼejl escuela, miʼ yʌl: «Jiñi yambʌ c piʼʌlob ti eʼtel miʼ ñaʼtañob chaʼan jiñi película tac chaʼan bʌ pornografía mucʼʌch i cʼʌjñibʌyel chaʼan miʼ cʌntesʌntel jiñi alumnojob». Pero Alain yujil chaʼan mach cheʼic bajcheʼ jiñi, ¿chuqui tsiʼ mele? Miʼ yʌl: «Maʼañic tsaʼ c wis jacʼʌ j qʼuel jiñi película tac come mic bʌcʼñan Jehová, i tsaʼ c subeyob chucoch maʼañic mic mel bajcheʼ jiñi». Alain tsaʼʌch i jacʼʌ jiñi ticʼojel muʼ bʌ lac taj ti Proverbios 9:6, muʼ bʌ i yʌl: «Toj [chuqui] yom maʼ mel cheʼ bajcheʼ jini muʼ bʌ i chʼʌmbeñob isujm». ¿Chuqui ti wenlel tsiʼ taja? An i piʼʌlob ti eʼtel tsaʼ bʌ i mulayob bajcheʼ yilal i melbal jiñi Alain, tsaʼ cajiyob ti estudio yicʼot tsaʼ cajiyob ti majlel ti tempa bʌ.

17, 18. ¿Baqui bʌ wenlel mi caj i tajob ili ora yicʼot ti talto bʌ qʼuin jiñi muʼ bʌ i jacʼbeñob i tʼan jiñi xʼixic am bʌ i ñaʼtʌbal? (Qʼuele jaʼel jiñi dibujo).

¹⁷ Jehová miʼ cʼʌn ili lajiya chaʼan jiñi chaʼtiquil xʼixicob chaʼan miʼ pʌsbeñonla chuqui yom mi lac mel chaʼan tijicña mi la cajñel. Jiñi muʼ bʌ i jacʼbeñob i tʼan jiñi «tonto bʌ xʼixic» jin jach añob tiʼ pusicʼal i jumucʼ ñusañob i bʌ ti tsʼiʼlel, maʼañic miʼ ñaʼtañob chaʼan ti talto bʌ qʼuin mi caj i tajob wocol. Tiʼ sujm, woliʼ majlelob «tiʼ tamlel mucoñibʌl» (Pr. 9:13, 17, 18).

¹⁸ Pero muʼ bʌ i jacʼbeñob i tʼan jiñi xʼixic am bʌ i ñaʼtʌbal, tijicña miʼ ñusañob come añob i chaʼan sumuc tac bʌ bʌlñʌcʼʌl wen chajpʌbil bʌ tilem bʌ ti Jehová (Is. 65:13). Jin chaʼan, Jehová miʼ yʌl tiʼ tojlel jiñi xʼaltʼan Isaías: «Ñichʼtanla c tʼan. Cheʼ jini mi caj laʼ cʼux wen bʌ i bʌl laʼ ñʌcʼ. Mi caj laʼ tijicñesan laʼ pusicʼal yicʼot sumuc tac bʌ i bʌl laʼ ñʌcʼ» (Is. 55:1, 2). Cheʼ bajcheʼ ili, woli laj cʌn laj cʼuxbin muʼ bʌ i cʼuxbin Jehová, i mi lac tsʼaʼlen muʼ bʌ i tsʼaʼlen (Sal. 97:10). Lajalonla bajcheʼ jiñi xpʌyoñelob muʼ bʌ i yʌjlelob ti Proverbios 9:4 muʼ bʌ i chaʼleñob cʼam bʌ tʼan yaʼ ti tejclum, miʼ yʌlob: «Laʼ tilic jini maxto bʌ anic i pusicʼal [o i ñaʼtʌbal]». Mi mucʼʌch lac jacʼ ili lac pʌyol mi caj lac taj cabʌl lac wenlel ili ora, i mach cojach jiñi, ti jiñi talto bʌ qʼuin mi caj lac mejlel ti chumtʌl tiʼ pejtelel ora mi mucʼʌch lac chʌn taj majlel lac ñaʼtʌbal (Pr. 9:3, 4, 6).

19. Cheʼ bajcheʼ miʼ yʌl Eclesiastés 12:13, 14, ¿chuqui yom mi lac mel? (Qʼuele jaʼel jiñi recuadro «¿Bajcheʼ miʼ coltañonla cheʼ mi lac bʌcʼñan Dios?»).

¹⁹ (Pejcan Eclesiastés 12:13, 14). Anquese ili ora cʌlʌxix jontolil, la com lac bej bʌcʼñan Jehová cheʼ bajcheʼ miʼ mulan, chaʼan cheʼ bajcheʼ jiñi miʼ mejlel laj cʌntan lac pusicʼal, chʌn sʌc mi la cajñel i lʌcʼʌlonla tiʼ tojlel. I come mi laj cʼuxbin Jehová yicʼot mi lac wen qʼuel ti ñuc, la com lac bej suben yambʌ lac piʼʌlob chaʼan miʼ sʌclañob jaʼel jiñi i sujm bʌ ñaʼtʌbal yicʼot miʼ tajob i wenlel.